សង្គម​​ស៊ីវិល​​បារម្ភ​ពី​ករណី​​​ហិង្សាក្នុង​គ្រួសារ និង​​ការ​​បៀតបៀន​​ផ្លូវភេទ​​នៅ​​​កន្លែង​​ចត្តាឡីស័ក​និង​​តំបន់​បិទ​ខ្ទប់​

ដោយ សេក បណ្ឌិត
2021-04-20
Share
សង្គម​​ស៊ីវិល​​បារម្ភ​ពី​ករណី​​​ហិង្សាក្នុង​គ្រួសារ និង​​ការ​​បៀតបៀន​​ផ្លូវភេទ​​នៅ​​​កន្លែង​​ចត្តាឡីស័ក​និង​​តំបន់​បិទ​ខ្ទប់​ កម្មករ-កម្មការិនី កំពុងស្វែងរកជំនួយ ក្រោយពីស្ថិតនៅក្នុងតំបន់បិទខ្ទប់នៃរាជធានីភ្នំពេញ។
រូប៖ ហ្វេសប៊ុក ViReak Seth fsp

ក្រុម​អង្គការ​​សង្គម​ស៊ីវិល​កត់​សម្គាល់ថា ការ​រាតត្បាត​ជំងឺកូវីដ-១៩ កំពុង​ជំរុញ​ឱ្យ​មាន​ការ​កើន​ឡើង​​នូវ​អំពើហិង្សាក្នុង​គ្រួសារ​​និង​​ការ​បៀត​បៀន​​ផ្លូវ​ភេទ​បន្ថែម​​ទៀត​ជាពិសេស​នៅ​​កន្លែង​​ធ្វើ​ចត្តាឡីស័ក និង​នៅ​​តំបន់​បិទ​ខ្ទប់។ បញ្ហា​នេះ​​ផ្តើម​ចេញពីភាព​​មិន​នឹងនរ​​នៃ​​សេដ្ឋកិច្ច​គ្រួសារ របៀប​រស់​នៅ​ថ្មីដែល​​ត្រូវ​បន្ស៊ាំខ្លួន​​យូរដែល​ប៉ះពាល់​​ដល់​​អារម្មណ៍ ឬធុញថប់ផ្លូវចិត្ត​ ការ​ប្រើប្រាស់​​គ្រឿងញៀន គ្រឿងស្រវឹង និង​ឱកាស​​អំណោយ​ផល​​ក្នុង​ការ​ប្រព្រឹត្ត​នៅក្នុង​​តំបន់​បិទ​ខ្ទប់ ឬ​កន្លែង​ធ្វើចត្តាឡីស័ក។ ស្រ្តី កុមារ និង​ក្រុម​អ្នក​ប្តូរ​ភេទ គឺ​ជា​ក្រុម​​ដែល​ងាយ​រង​គ្រោះ​​ជាង​គេ​​នៅ​ក្នុង​​ស្ថាន​ភាព​នេះ។

នាយិកា​អង្គការ​ក្លាហាន​កញ្ញា បុណ្យ រចនា  មាន​ប្រសាសន៍ថា វិធានការ​របស់​​អាជ្ញាធរ​ភាគច្រើនជាវិធានការ​រួម និង​​ផ្តោត​សំខាន់​លើការ​កាត់​ផ្តាច់ចរន្ត​​នៃ​​ការ​​ឆ្លង​​ជំងឺកូវីដ-១៩។ ប៉ុន្តែមិន​ឃើញ​​មាន​​វិធានការ​​ជាក់​លាក់​ទៅលើ​ការ​​ទប់​ស្កាត់​អំពើ​​ហិង្សា​ក្នុងគ្រួសារ និង​​ការ​​បៀតបៀន​ផ្លូវ​ភេទ ដែល​បង្ក​​ឡើង​​ដោយ​ការ​រាត​ត្បាត​​​ជំងឺកូវីដ-១៩ នៅឡើយទេ ជាពិសេស​​នៅ​តំបន់​​បិទខ្ទប់ និង​​កន្លែ​ង​ធ្វើ​ចត្តាឡីស័ក៖ «កូវីដ​ហ្នឹង វា​ប៉ះពាល់​ដល់​បញ្ហា​ផ្លូវ​ចិត្ត​របស់​ប្រជាពលរដ្ឋ​គ្រប់រូប។ ទីមួយ​ដោយសារ​បាត់​បង់ការងារ ទីពីរ​បាត់​បង់​លទ្ធភាព​នៅក្នុង​ការ​ដើរហើរ​ ហើយ​ទីបី​ទៀត​ខ្វះ​អាហារ​បរិភោគអ៊ីចឹងទៅ។ អ៊ីចឹង​កម្រិត​នៃ​ការ​ថប់​អារម្មណ៍​របស់​មនុស្ស​ហ្នឹង​ វាកើត​ឡើង ហើយ​នៅពេល​ដែល​ខ្វះ​ការ​ផ្តល់​សេវា​ថែ​ទាំ​សុខភាព​ផ្លូវ​ចិត្ត អត់​ដឹង​ថា ​ទៅ​ប្រឹក្សា​នៅ​ឯណា​ទៀត អ៊ីចឹង​វា​អាច​ធ្វើ​ឱ្យមាន​​ការ​ជះ​កំហឹង​ដាក់​គ្នា​ទៅវិញទៅមក។ អ៊ីចឹង​នៅពេល​ដែល​ស្ថាន​ភាព​ហ្នឹង​កើតឡើង អ្នក​ដែល​ងាយ​រង​គ្រោះ គឺ​ស្ត្រី និង​កុមារ​ហ្នឹងឯង»។

ស្រដៀង​គ្នានេះ នាយក​រង​ទទួល​បន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត មើល​ឃើញថា ​ការ​បិទ​ខ្ទប់​​តំបន់​មួយ​ចំនួនទាំងស្រុង និង​បម្រាម​លើ​ការ​ធ្វើ​ដំណើរ​ បង្ក​ឱ្យ​មាន​ក្តីបារម្ភ​ពីករណីអំពើហិង្សា​ក្នុងគ្រួសារ​ និង​ការបំពាន​ផ្លូវភេទ​ក្នុង​រូបភាព​ផ្សេងៗ។ លោក​បញ្ជាក់ថា ដោយសារ​ក្តីកង្វល់បែបនេះ ទើប​ក្រុម​​សង្គម​ស៊ីវិល​ចេញសេចក្តីថ្លែងការណ៍​រួម​គ្នា ​ស្នើឱ្យ​អាជ្ញាធរ​ដាក់​ចេញវិធានការ​ជាក់​លាក់​បន្ថែម​ទៀត​ដើម្បី​ទប់​ស្កាត់​បញ្ហា​នេះ៖ «វា​ទាក់​ទង​នឹង​អារម្មណ៍ ភាព​តប់​ប្រម៉ល់ ជាដើម​ហ្នឹងទៅ វា​បង្ក​ឱ្យ​មាន​​ជា​អំពើហិង្សា ឬ​ក៏​​ការ​បំពារបំពាន​ផ្លូវ​ភេទ​ផ្សេងៗ»។

កាល​ពី​ថ្ងៃទី១៦ ខែមេសា ក្រុមសង្គម​ស៊ីវិល​ជាង​ ២០ ស្ថាប័ន បាន​ចេញសេចក្តីថ្លែងការណ៍​រួម​គ្នា ដោយ​អំពាវនាវ​ដល់​អាជ្ញាធរមាន​សមត្ថកិច្ច និង​អ្នក​ពាក់​ព័ន្ធ​យក​ចិត្ត​ទុក​ដាក់បន្ថែម​ទៀត ក្នុងកិច្ចការពារ ​ផ្សព្វផ្សាយ​ និង​លើក​កម្ពស់​ការ​យល់​ដឹង​ពី​ករណីរំលោភបំពានផ្លូវភេទ និង​​អំពើហិង្សាលើ​ស្ត្រី កុមារ និង​ក្រុម​អ្នក​ស្រឡាញ់​ភេទដូចគ្នា។ ការ​អំពាវនាវនេះ ធ្វើ​ឡើង​ដោយសារ​តែ​ក្រុម​​សង្គម​ស៊ីវិល​យល់ថា ករណី​ទាំងនេះ​អាច​កើត​មាន​ឡើង​ នៅអំឡុង​ពេល​នៃ​ការ​ធ្វើចត្តាឡីស័ក និង​នៅ​តាម​តំបន់​បិទ​ខ្ទប់​មួយ​ចំនួន។

ក្រុមសង្គម​ស៊ីវិល​ដែល​ចេញសេចក្តីថ្លែងការណ៍​រួម​គ្នា​នោះ មាន​ដូចជា អង្គការ​រ៉ាក់ (RHAC) អង្គការ​ក្លាហាន (Klahaan) មជ្ឈមណ្ឌល​សិទ្ធិមនុស្ស​កម្ពុជា (CCHR) អង្គការ​លីកាដូ (LICADHO) សហភាពការងារកម្ពុជា​ (CLC) ព្រម​ទាំង​អង្គការ​-សមាគម និង​សហជីពមួយ​ចំនួ​នទៀត។ ពួ​កគេ​សេចក្តីថ្លែងការណ៍​រួម​នេះ ក្រោយ​ពីអាជ្ញាធរ​បាន​អនុវត្តវិធានការ​​បិទខ្ទប់​រាជធានីភ្នំពេញ និងក្រុង​តាខ្មៅខេត្ត​កណ្តាល ព្រម​ទាំង​តំបន់​មួយ​ចំនួន​នៅ​តាម​ខេត្តដទៃទៀត ដើម្បី​ទប់ស្កាត់​ការ​រាល​ដាល​ជំងឺកូវីដ-១៩។

ក្រុម​សង្គម​ស៊ីវិល​ទាំងនេះពន្យល់ថា កម្រិត​នៃ​ភាព​តានតឹង​ផ្លូវ​ចិត្ត​របស់​ឪពុក​ម្តាយ អាច​នាំ​ឱ្យ​មាន​ការ​ប្រើប្រាស់​អំពើហិង្សា​ផ្លូវ​កាយ និង​ការ​មិន​យក​ចិត្ត​ទុក​ដាក់​ថែ​ទាំកុមារ ស្របពេល​កុមារ​ប្រឈម​នឹង​សម្ពាធ​ផ្លូវ​ចិត្ត និង​ភាព​ធុញថប់ នៅពេល​ពួក​គេ​មិន​អាច​ចេញក្រៅផ្ទះ និង​រៀន​សូត្រ​ដូច​ពេលមុន។ ចំណែក​ស្ត្រីវិញ ពួកគេ​ត្រូវ​ទទួល​បន្ទុក​មើល​ថែទាំ​គ្រួសារ​កាន់​តែ​ច្រើន ប្រឈម​នឹង​សម្ពាធផ្លូវចិត្ត និង​មាន​កម្រិត​ខ្ពស់​ក្នុង​ការ​ទទួល​រង​អំពើហិង្សា​ពី​ដៃគូ ក្នុង​រយៈពេល​ដែល​មិន​អាច​ដើរចេញទៅក្រៅផ្ទះ និង​ស្វែងរក​ចំណូល​សម្រាប់​គ្រួសារបាន។ ជាងនេះទៅទៀត ស្រ្តី និងកុមារ ក៏​ប្រឈម​នឹង​ហានិភ័យ​ខ្ពស់​នៃ​ការ​បៀតបៀន​ផ្លូវ​ភេទ និង​ការ​រំលោភបំពាននានា នៅពេល​ពួក​គេ​ស្ថិត​ក្នុងទីតាំងនៃ​ការ​បិទ​ខ្ទប់ ​ទីតាំងធ្វើ​ចត្តាឡីស័ក ឬកន្លែង​ព្យាបាល​រួម ដែល​អំណោយ​ផល​ដល់​អ្នក​ប្រព្រឹត្ត ស្របពេល​ការ​យល់​ដឹង​អំពីការ​បៀតបៀន ឬ​ការ​រំលោភបំពាន​​ផ្លូវភេទ និង​កិច្ច​អន្តរាគមន៍​របស់អាជ្ញាធរ នៅ​​មាន​កម្រិត​នៅឡើយ។ ដោយ​ឡែកក្រុម​អ្នក​ប្តូរភេទ ឬស្រឡាញ់​ភេទដូច​គ្នាវិញ ពួក​គេ​អាច​រង​នូវ​ការ​មាក់​ងាយ​ធ្ងន់ធ្ងរ​ជាងមុនថែម​ទៀត នៅពេល​ស្ថិត​ក្នុង​កន្លែង​ធ្វើចត្តាឡីស័ក ឬ​​កន្លែង​សម្រាក​ព្យាបាល​រួម​គ្នា​នេះ។

អាស៊ីសេរី​មិន​អាច​ទាក់ទងអ្នក​នាំពាក្យ​ក្រសួង​កិច្ច​ការ​នារីអ្នកស្រី ម៉ាន ចិន្តា និង​​អ្នក​នាំពាក្យ​អគ្គស្នងការដ្ឋាន​នគរបាល​ជាតិលោក ឆាយ គឹមខឿន ដើម្បី​សុំ​ការ​ឆ្លើយតប​រឿងនេះ​បាន​ទេ នៅថ្ងៃទី២០ ខែមេសា ដោយ​ទូរស័ព្ទចូល តែពុំ​មាន​អ្នក​ទទួល។

ទោះជាយ៉ាងណា​ក្ដី ស្នងការដ្ឋាន​នគរបាល​រាជធានី​ភ្នំពេញ មិន​យល់​ស្រប​ទៅនឹង​ការ​លើក​ឡើង​របស់​ក្រុម​សង្គម​ស៊ីវិល​នេះទេ។ ស្ថាប័ន​ដដែល​គូស​បញ្ជាក់ថា វិធានការ​របស់​រដ្ឋាភិបាល មាន​តែ​​ជួយ​កាត់​បន្ថយ​ ករណី​​រំលោភ​បំពាន​ផ្លូវ​ភេទ និង​អំពើហិង្សា​លើ​ស្ត្រី និង​កុមារទៅវិញទេ។

អ្នក​នាំពាក្យ​ស្នងការដ្ឋាន​នគរបាល​រាជធានីភ្នំពេញលោក សាន សុខសីហា អះអាងថា មកដល់​ពេល​នេះ អាជ្ញាធរ​មិនទាន់​​ទទួល​បានករណី​ហិង្សា ឬការ​រំលោភបំពាន​ផ្លូវភេទណា​មួយ​ ដែល​កើត​ឡើង​លើស្ត្រី និង​កុមារនៅកន្លែង​​ធ្វើចត្តាឡីស័ក ឬនៅ​តំបន់​បិទ​ខ្ទប់​នោះឡើយ។ លោក​ថា ការ​លើក​ឡើង​របស់​ក្រុម​សង្គម​ស៊ីវិលត្រឹម​តែ​ជា​ក្តីបារម្ភប៉ុណ្ណោះ មិន​មែន​ជាការ​ករណី​ជាក់​ស្តែងនោះទេ៖ «បើ​គាត់ ​(ក្រុម​សង្គម​ស៊ីវិលមិន​ដឹង​ថា គាត់​យក​ Reference (ឯកសារយោង) អ្វីមក​យោង ដែល​គាត់​គិត​ថា ក្នុង​កាលៈទេសៈនេះ​ទៅ​ជាមាន​ការ​បារម្ភ​លើ​អំពើហិង្សា​កើន​ឡើង​លើ​បញ្ហា​ស្ត្រី និង​កុមារ​វិញ។ ប៉ុន្តែ​គ្រាន់​តែ​ចំណុចខ្ញុំ​គិត គឺថា​វា​អត់​មាន​អ្វី​ដែល​ថា វា​ត្រូវ​កើន​ឡើង​លើ​បញ្ហា​ហ្នឹង​ទេ។ សូម្បី​ទាក់ទង​នឹង​បញ្ហា​សន្តិសុខ សុវត្ថិភាព​ផ្សេងៗ ក៏​ខ្ញុំ​គិត​ថា វា​នឹង​កាត់​បន្ថយ​ Automatic (ដោយស្វ័យ​ប្រវត្តិ) ដោយសារ​តែ​សមត្ថកិច្ច​យើង​អនុវត្ត​វិធានការ​បិទ​ខ្ទប់។ អ៊ីចឹង​បាន​សេចក្តីថា បទល្មើស​ផ្សេងៗ​ វាសឹង​តែ Automatic បាត់​តែម្តង»

ប៉ុន្តែការបកស្រាយបែបនេះ មិន​អាច​ធ្វើ​ឱ្យ​អង្គការ​សង្គម​ស៊ីវិល​ជឿជាក់​បាន​នោះទេ។

នាយិកា​អង្គការ​ក្លាហានកញ្ញា បុណ្យ រចនា សង្កេតឃើញថា អាជ្ញាធរ​​មិន​ទាន់មាន​យន្តការ​ត្រួតពិនិត្យ និង​តាមដាន​រឿង​នេះបាន​ច្បាស់​លាស់នៅឡើយទេ។ កញ្ញា​ជំរុញ​អាជ្ញាធរ​​ឱ្យ​យក​ចិត្ត​ទុក​ដាក់លើរឿងនេះ ព្រោះនេះ​ជា​បញ្ហាធ្ងន់ធ្ងរ ខណៈការរាតត្បាត​ជំងឺកូវីដ-១៩ នៅ​តែ​អូសបន្លាយ ដោយគ្មាន​ពេលកំណត់៖ «រាជរដ្ឋាភិបាល​អត់​ទាន់​បាន​យក​ចិត្ត​ទុក​ដាក់ក្នុ​ងការ​អង្កេត ពិនិត្យ​ស្ថិតិ​ថា តើ​មាន​ករណី​អំពើហិង្សា​បង្ក​ឡើង​ដោយ​ដៃគូ​ស្និទ្ធ​ស្នាល​ ឬក៏​អំពើ​ហិង្សា​ក្នុ​ងគ្រួសារ​ហ្នឹង​កើត​ឡើងនៅ​ក្នុង​តំបន់​បិទ​ខ្ទប់ ​ឬក៏​អត់នោះទេ។ អ៊ីចឹង​ (អាជ្ញាធរអត់​អាច​និយាយ​បាន​ថា វា​អត់​កើត​មាន​នោះទេ។ វា​អត់​កើត​មាន​ អាច​ដោយសារ​ថា អត់មាន​យន្តការ​ក្នុងការ​រាយការណ៍ ហើយ​វា​អត់​ទាន់​មាន​អ្នក​រាយការណ៍។ អ៊ីចឹង​ដើម្បី​ឱ្យ​មាន​ការ​បញ្ជាក់​ច្បាស់​លាស់ វា​ទាល់​តែ​មាន​ការ​ស៊ើបអង្កេត​ឱ្យ​បាន​ត្រឹម​ត្រូវ​ទាក់​ទង​នឹង​​រឿង​ហ្នឹង​ដែរ»

កម្មកររោងចក្រ​ឌីនហាន (Din Han) នៅរាជធានីភ្នំពេញលោកស្រី ឈួន ស្រីនាង ថ្លែងថា គ្រួសារ​លោក​ស្រី​មិន​ទាន់​​មានករណីហិង្សា​លើរូបរាងកាយនៅឡើយទេ ប៉ុន្តែហិង្សា​ពាក្យ​​សម្តីបាន​កើត​មាន​ជាញឹកញាប់ ខណៈពីមុន​មក​មិន​ធ្លាប់​កើត​មាន​នោះទេ។ លោកស្រីថា បញ្ហានេះកើត​ឡើងដោយសារ​តែលោកស្រី និង​ប្តី បាត់បង់​​ចំណូល​ទាំងស្រុង ហើយ​​ត្រូវ​ធ្វើចត្តាឡីស័កនៅក្នុង​បន្ទប់ជួល ជាមួយកូនតូច​​អាយុជិត ១ខួប។ លោក​ស្រី​សង្កត់ធ្ងន់ថា កង្វះខាតស្បៀងអាហារ និងគ្មាន​​ប្រាក់កាស​ចាយវាយ និង​ទិញទឹក​ដោះ​គោ​ឱ្យ​​កូន​ បានធ្វើ​ឱ្យ​លោក​ស្រី​ធុញថប់​អារម្មណ៍ និង​ធ្លាក់​ទឹក​ចិត្ត​ជាខ្លាំង៖ «រកាំរកូស វា​អត់​អ្វីហូប ដូច​ថា​អត់​កម្លាំង អត់​អ្វីទៅ វា​ចេះ​តែ​មួរម៉ៅ​ដាក់​គ្នាដែរ​ហ្នឹង។ ខឹង​គ្នា​ទៅវិញ​ទៅមកម្ង៉ៃៗ ហើយ​ណាមួយ​កូន​ក៏អត់​ទឹក​ដោះគោ។ កូន​ទើប​ ១១  ហើយ​ដល់​ពេល​ចឹង​ទៅ  ថានិយាយទៅ បាន​តែ​តឹង​ទ្រូងទេពូអើយ។ អានេះ​ចង់​និយាយ​ថា បើ​ងាប់តែម្តង​​ទៅ​វាស្រួល។ អានេះ​មិន​ងាប់ហើយ រស់​នៅ​ទាំង​វេទនា»។

របាយការណ៍​របស់​អង្គការ​សហប្រជាជាតិ​កាល​ពី​ឆ្នាំ២០១៣ បង្ហាញថា ស្ត្រីកម្ពុជាចំនួន​ ២២% ធ្លាប់​ទទួល​រង​នូវ​អំពើហិង្សា​លើ​ផ្លូវកាយ និង​ផ្លូវភេទ ហើយ​ជាង ៦%​ ទៀត កំពុង​ឆ្លង​កាត់​អំពើ​ហិង្សា​នាពេល​បច្ចុប្បន្ន។ ករណីនេះ​មិន​រាប់​បញ្ចូល​ទម្រង់ផ្សេងៗ ទៀត​ ដូច​ជា អំពើហិង្សា​ផ្លូវ​ចិត្ត ឬ​ផ្លូវ​សេដ្ឋកិច្ច នៅឡើយទេ ដោយសារ​មិន​មាន​ទិន្នន័យ​ថ្មីៗ។

ក្រុម​សង្គម​ស៊ីវិលទទូច​ដល់​រដ្ឋាភិបាល និង​អាជ្ញាធរ​មាន​សមត្ថកិច្ចយក​ចិត្ត​ទុកដាក់​បន្ថែម​ទៀត ក្នុង​ការ​ទប់​ស្កាត់ការ​បៀតបៀន ការ​រំលោភ​បំពាន​ផ្លូវភេទ និង​អំពើហិង្សា​ប្រឆាំង​នឹង​យេនឌ័រនៅ​តាម​តំបន់​បិទខ្ទប់ និង​កន្លែង​ធ្វើ​ចត្តាឡីស័ក ដោយចាត់ទុក​រឿងនេះ​ជាអាទិភាព​មួយ​ក្នុង​ចំណោម​អាទិភាព​ដទៃទៀត​នៃ​ប្រតិបត្តិការ​ទប់​ស្កាត់​ជំងឺកូវីដ-១៩។ ជាមួយ​គ្នានេះ ពួក​គេ​ស្នើដល់អាជ្ញាធរ​ដាក់​បញ្ចូល​សារ​ផ្សព្វផ្សាយ​ទប់​ស្កាត់​អំពើហិង្សា​ ការ​រើសអើង និង​ការ​មាក់ងាយ​ផ្អែក​លើ​យេនឌ័រ​នៅ​ក្នុង​តំបន់​ចត្តាឡីស័ក និង​តំបន់​បិទខ្ទប់ ព្រម​ទាំងធានា​ឱ្យ​មាន​ទីធ្លាសុវត្ថិភាព និង​ឯកជន​ភាព​គ្រប់គ្រាន់ ដូច​ជា​កន្លែង​សម្រាប់​ស្ត្រី និង​បុរស​ដាច់​ដោយ​ឡែកពីគ្នា​ជាដើម។ ទន្ទឹម​នឹង​នេះ ក្រុម​សង្គម​ស៊ីវិល​ស្នើ​ឱ្យ​អាជ្ញាធរ​បង្កើត​វិធីសាស្ត្រ​ថ្មីៗ ​ដើម្បី​ឱ្យ​ជន​រងគ្រោះ ឬអ្ន​ក​ឃើញហេតុការណ៍​ អាច​រាយការណ៍​ពីករណី​រំលោភបំពាន​ទាំងនោះ ហើយអាជ្ញាធរត្រូវ​​ឆ្លើយ​តប​ឱ្យ​បានច្បាស់​លាស់ និង​មាន​ប្រសិទ្ធភាព​ចំពោះបទល្មើស​ទាំងនោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល