អ្នកច្បាប់ និងសង្គមស៊ីវិលលើកឡើងថា ការធ្វើកិច្ចសន្យាលើកទី២ លើកិច្ចសន្យាទិញលក់អចលទ្រព្យរបស់ក្រុមហ៊ុន ឡេង ណាវ៉ាត្រា ជាការកេងចំណេញលើកម្លាំងញើសឈាមប្រជាពលរដ្ឋ និងបំបិទសិទ្ធិអតិថិជនមិនឱ្យតវ៉ារកយុត្តិធម៌។ ការលើកឡើងនេះ គឺបន្ទាប់ពីលោក ឡេង ណាវ៉ាត្រា ធ្វើកិច្ចសន្យាថ្មីដោយពន្យារពេលសាងសង់ផ្ទះជូនអតិថិជនរយៈពេល៣ឆ្នាំទៅមុខ និងហាមមិនឱ្យអតិថិជន ផ្សព្វផ្សាយ ឬតវ៉ា ដើម្បីកុំឲ្យប៉ះពាល់កេរ្តិ៍ឈ្មោះក្រុមហ៊ុន។
នៅពីក្រោយទង្វើមនុស្សធម៌ របស់អ្នកឧកញ៉ា ឡេង ណាវ៉ាត្រា ជាម្ចាស់គម្រោងផ្ទះល្វែង និងវិនិយោគលើវិស័យអចលនទ្រព្យ ដែលបរិច្ចាគលុយរាប់លានដុល្លារឱ្យរដ្ឋាភិបាលលោក ហ៊ុន សែន នោះ ពោរពេញដោយរឿងចម្រូងចម្រាស និងការឆបោកអតិថិជន ពាក់ព័ន្ធនឹងការ មិនបានបំពេញតាមកិច្ចសន្យាសាងសង់ផ្ទះជូនអតិថិជនតាមកាលកំណត់ ក្រោយពួកគាត់បង់លុយរួចរាល់។ ទង្វើរំលោភទំនុកចិត្តនិងកិច្ចសន្យាជាមួយអតិថិជនពីសំណាក់លោក ឡេង ណាវ៉ាត្រា នេះ បានបណ្ដាលឱ្យអតិថិជន ផ្ទុះការតវ៉ាជាបន្តបន្ទាប់ និងរិះគន់ព្រោងព្រាតនៅលើបណ្ដាញសង្គមហ្វេសប៊ុក។
ជាការឆ្លើយតបនឹងការតវ៉ារបស់អតិថិជន ម្ចាស់ក្រុមហ៊ុន បុរីផ្ទះល្វែង លោក ឡេង ណាវ៉ាត្រា បានធ្វើកិច្ចសន្យាថ្មីមួយដោយឯកតោភាគី បន្ថែមលើកិច្ចសន្យាចាស់ជាមួយអតិថិជន។ ប៉ុន្តែ អ្នកច្បាប់ និងមន្ត្រីសង្គមស៊ីវិលយល់ថា កិច្ចសន្យាថ្មីនេះ មិនអនុលោមទៅតាមនីតិវិធីច្បាប់នោះទេ។
សកម្មជនបរិស្ថាន និងជានិស្សិតផ្នែកច្បាប់ លោក លី ចាន់ដារ៉ាវុធ ប្រាប់វិទ្យុអាស៊ីសេរីនៅថ្ងៃទី៤ កក្កដា ថា កិច្ចសន្យាព្រមព្រៀងបំពេញបន្ថែមអាចមានសុពលភាព ឬយកជាការបាន លុះត្រាមានការព្រមព្រៀងរវាងភាគីទាំងសងខាង ខណៈកិច្ចសន្យានេះលោកថាភាគីក្រុមហ៊ុនធ្វើតែម្នាក់ឯង។ លើសពីនេះលោកមើលឃើញថា កិច្ចព្រមព្រៀងនេះ មានខ្លឹមសារកេងចំណេញលើអតិថិជន ដោយក្រុមហ៊ុនសន្យាសងតែថ្លៃដើម ក្នុងលក្ខខណ្ឌមិនបានប្រគល់ដីផ្ទះទាន់ពេលវេលា ដោយមិនគិតគូរពីសំណងផ្លូវចិត្ត និងការខាតបង់ពេលវេលាដល់អតិថិជនឡើយ។ លោកដាក់ជាចម្ងល់ដែរថា ហេតុអ្វីលោកឧកញ៉ា ឡេង ណាវ៉ាត្រា មានលុយឧបត្ថម្ភ និងបរិច្ចាគជូនរដ្ឋាភិបាលរាប់លានដុល្លារ តែបែរជាគ្មានលុយជួលកម្មករ និងដំណើរការសាងសង់ផ្ទះឱ្យអតិថិជនទាន់ពេលវេលាទៅវិញ។
លោក លី ចាន់ដារ៉ាវុធ៖ «មើលទៅគាត់ហ្នឹងហាក់បីដូចជាអាងខ្សែរយៈ អាងខ្លួនគាត់ហ្នឹងមើលទៅដូចជាទំនាក់ទំនងជិតស្និទ្ធជាមួយនាយករដ្ឋមន្ត្រីហ្នឹង ដូចជាមិនសូវខ្វាយខ្វល់ពីបញ្ហាច្បាប់អីប៉ុន្មានទេ ដែលជាហេតុធ្វើឱ្យរឿងរ៉ាវកន្លងមក យើងឃើញថាប្រជាជនតវ៉ាគាត់មានការភ័យខ្លាច»។
ក្នុងកិច្ចសន្យាព្រមព្រៀងបំពេញបន្ថែមរបស់ក្រុមហ៊ុនហ្គាឡាក់ស៊ីណាវ៉ាត្រា គ្រុប ឯក. ដែលមានផ្ដិតស្នាមមេដៃលោក ឡេង ភក្ត្រា ហៅឡេង ណាវ៉ាត្រា តែម្នាក់ឯងចុះកាលបរិច្ឆេទថ្ងៃទី៣០ កក្កដា បានចែងពីលក្ខខណ្ឌព្រមព្រៀងចំនួន៥ចំណុច ដោយសុំបន្តការសាងសង់ និងប្រគល់ប័ណ្ណបំបែកក្បាលដីឱ្យអតិថិជនក្នុងរយៈពេល ៣៦ខែ ឬស្មើនឹង៣ឆ្នាំ។ ទីពីរ ក្រុមហ៊ុនអាចបញ្ចប់ការសាងសង់មុនកាលកំណត់ប្រសិនបើស្ថានភាពសេដ្ឋកិច្ចល្អ។ ទីបី ក្រុមហ៊ុនសន្យាប្រគល់ប្រាក់ដើមឱ្យអតិថិជនវិញ ប្រសិនបើមិនធ្វើបានតាមកាលកំណត់។ ចំណុចផ្សេងទៀតនៃកិច្ចសន្យានោះ លោក ឡេង ណាវ៉ាត្រា ថែមទាំងហាមអតិថិជនមិនឱ្យធ្វើសកម្មភាព និងផ្សព្វផ្សាយរឿងអវិជ្ជមាននានាពីក្រុមហ៊ុន ដែលនាំឲ្យប៉ះពាល់កេរ្តិ៍ឈ្មោះ និងផលប្រយោជន៍ក្រុមហ៊ុន។
នៅក្នុងកិច្ចសន្យាថ្មីនេះ លោក ឡេង ណាវ៉ាត្រា គិតតែពីផលប្រយោជន៍និងកេរ្តិ៍ឈ្មោះក្រុមហ៊ុនផ្ទាល់ខ្លួន ប៉ុន្តែលោក មិនបានគិតដល់អតិថិជន ដែលខំតស៊ូធ្វើការទាំងយប់ទាំងថ្ងៃដើម្បីសន្សំប្រាក់បន្តិចបន្តូច និងខ្ចីបុលធនាគារដើម្បីយកលុយទៅទិញគម្រោងផ្ទះល្វែងរបស់លោក ដោយពួកគាត់សង្ឃឹមថា នឹងបានផ្ទះជ្រកកោនសមរម្យនៅថ្ងៃខាងមុខ។
ទោះជាយ៉ាងណា ពលរដ្ឋមួយចំនួនដែលមិនទាន់ទទួលបានផ្ទះពីលោក ឡេង ណាវ៉ាត្រា មិនទទួលយកកិច្ចសន្យាទី២ នេះទេ ដោយពួកគាត់លើកឡើងថា កិច្ចសន្យាថ្មីនេះបានហាមឃាត់ពួកគាត់មិនឱ្យតវ៉ា និងតម្រូវឱ្យពួកគាត់រង់ចាំកាន់តែយូរបន្ថែមទៀត។
ពលរដ្ឋម្នាក់រស់នៅខេត្តបាត់ដំបង កញ្ញា ចន្ទ អរុណរស្មី ប្រាប់វិទ្យុអាស៊ីសេរី ថា កញ្ញាបានទិញផ្ទះល្វែងពីក្រុមហ៊ុន ឡេង ណាវ៉ាត្រា ក្នុងតម្លៃ ១ម៉ឺន ៨ពាន់ដុល្លារ(១៨.០០០)ដោយក្រុមហ៊ុនកំណត់បញ្ចប់ការសាងសង់ក្នុងរយៈពេល១ឆ្នាំ។ ទោះជាបែបនេះក្ដី កញ្ញាអះអាងថា មកទល់ពេលនេះ លើសការកំណត់ក្នុងកិច្ចសន្យាជាងមួយឆ្នាំហើយ ប៉ុន្តែកញ្ញានៅមិនទាន់ឃើញសសរផ្ទះនៅឡើយ។ កញ្ញាបញ្ជាក់ថា ចំពោះកិច្ចសន្យាទី២ ដែលក្រុមហ៊ុន ឡេង ណាវ៉ាត្រា សុំពន្យារពេលសាងសង់បន្ថែម ៣៦ខែនោះកញ្ញាមិនយល់ព្រមនោះទេ ព្រោះកញ្ញាយល់ថា កិច្ចសន្យានេះ ធ្វើឱ្យអតិថិជនកាន់តែខាតបង់ប្រយោជន៍ និងបិទសិទ្ធិមិនឱ្យអតិថិជនតវ៉ា។
កញ្ញា ចន្ទ អរុណរស្មី៖ «ឥឡូវចប់ហើយខ្ញុំ។ ដូចថារកអ្វីក៏មិនបាន ដឹងស្រាប់ហើយ ឥឡូវសេដ្ឋកិច្ចវាពិបាក។ ពួកដូចខ្ញុំហ្នឹង យកលុយទៅបង់ផ្ដាច់គាត់ ហើយគាត់អត់ធ្វើផ្ទះ ធ្វើអ្វីឱ្យយើង ស្រាប់តែប្រគល់ផ្ទះ ឱ្យអ្នកនោះ ហើយយើងជាម្ចាស់ផ្ទះមួយរូបដែរ ដល់ពេលអ៊ីចឹងយើងមានអារម្មណ៍ថាតូចចិត្ត ហើយពិបាកចិត្តខ្លួនឯង ព្រោះខ្លួនឯងអត់មានផ្ទះនៅដែរ ស្រាប់តែអតិថិជនគាត់អត់ផ្ដល់ផ្ទះឱ្យ គាត់ទៅជាផ្ដល់ឱ្យអ្នកដែលអត់បានទិញផ្ទះគាត់ផង គាត់ទៅផ្ដល់ឱ្យគេទៅវិញ។ ខ្ញុំក៏មានអារម្មណ៍អន់ចិត្តដែរ ទើបខ្ញុំបង្ហោះសារ»។
អតិថិជនភាគច្រើន មានបញ្ហាជាមួយបុរី ឡេង ណាវ៉ាត្រា នៅគម្រោងផ្លូវជាតិលេខ៦ ដែលជាគម្រោងធំជាងគេរបស់ក្រុមហ៊ុន អភិវឌ្ឍលើផ្ទៃដីជាង៤០០ហិកតារ ស្ថិតក្នុងស្រុកមុខកំពូល ខេត្តកណ្ដាល។ អតិថិនខ្លះអះអាងថា គម្រោងលំនៅឋានដែលពួកគាត់ទិញមិនទាន់ឃើញមានការសាងសង់សូម្បីសសរគ្រឹះមួយដើម ឯខ្លះថាដីពួកគាត់នៅជាផ្ទៃទឹកមិនទាន់ចាក់ដីបំពេញនៅឡើយ។ ការតវ៉ាទ្រង់ទ្រាយធំរបស់អតិថិជនបុរីលោកឧកញ៉ានេះ ចាប់ផ្ដើមដំបូងនៅខែឧសភា ដោយខ្លះតវ៉ាតាមបណ្ដាញទំនាក់ទំនងសង្គម ដោយថតវីដេអូផ្សព្វផ្សាយ បង្កើតក្រុមឆាតតាមតេឡេក្រាម និងខ្លះទៀតទៅតវ៉ាដល់ក្រុមហ៊ុនផ្ទាល់តែម្ដង។
លោក ឡេង ណាវ៉ាត្រា ដែលមានគោរមងារជាអ្នកឧកញ៉ា គឺជាយុវជនរបស់លោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន ហើយឧកញ៉ារូបនេះ តែងតែប្ដេជ្ញាយ៉ាងមុតមាំការពារត្រកូលហ៊ុនផងដែរ ខណៈកន្លងមកមានការរិះគន់ថា លោក ជាអ្នកឈរឈ្មោះរកស៊ីឱ្យគ្រួសារលោកហ៊ុន សែន។
លោក ឡេង ណាវ៉ាត្រា ដែលជិះរថយន្តប្រណិតល្បីៗដូចជា ឡាំបូហ្គីនី (Lamborghini) ហ្វើរ៉ារី (Ferrari) រ៉ូលរ៉យស៍ (Roll Royce) ផច្ឆ (Porsche) ប៊ែនលី (Bentley) និងមានឧទ្ធម្ភាគចក្រផ្ទាល់ខ្លួនផងនោះ ជានិច្ចកាល តែងតែបរិច្ចាគលុយឱ្យរដ្ឋាភិបាលលោក ហ៊ុន សែន ម្ដងៗរាប់សែនដុល្លារ។
គិតដោយត្រួសៗ ក្នុងរយៈពេលប៉ុន្មានឆ្នាំចុងក្រោយនេះ លោកបានបរិច្ចាគលុយតិចបំផុតជិត ១៥លានដុល្លារអាមេរិក ក្នុងនោះប្រមាណ ១០លានដុល្លារសម្រាប់រដ្ឋាភិបាល លោក ហ៊ុន សែន ជិត ៤លានដុល្លារសម្រាប់កាកបាទក្រហមកម្ពុជាដឹកនាំដោយអ្នកស្រី ប៊ុន រ៉ានី ហ៊ុន សែន និងជិតកន្លះលានដុល្លារទៀតសម្រាប់ក្រុមគ្រូពេទ្យស្ម័គ្រចិត្តរបស់លោក ហ៊ុន សែន ដឹកនាំដោយប្រពន្ធលោក ហ៊ុន ម៉ាណែត។ ក្នុងពេលថ្មីៗនេះ លោក ឡេង ណាវ៉ាត្រា ក៏បានផ្ដល់ផ្ទះចំនួន២ល្វែងឱ្យទៅគ្រូប្រដាល់ម្នាក់ ដែលរឿងនេះបានធ្វើឱ្យអតិថិជនដែលមិនទាន់បានទទួលផ្ទះពីលោក រឹតតែខកចិត្ត។ ប៉ុន្តែលោក បែរជាគ្មានលទ្ធភាពសាងសង់ផ្ទះជូនអតិថិជនតាមការសន្យាទៅវិញ។
បើទោះបីជាករណី លោក ឡេង ណាវ៉ាត្រា គឺជាបទល្មើសរំលោភលើទំនុកចិត្ត ដោយសារមិនគោរពតាមកិច្ចសន្យាទិញលក់ក្ដី ក៏លោក ឡេង ណាវ៉ាត្រា ហាក់មានសំណាងល្អជាងឧកញ៉ាមួយចំនួនទៀត ដូចជាឧកញ៉ា ជា សារ៉ន ដែលត្រូវសមត្ថកិច្ចខេត្តកំពត ចាប់ខ្លួន និងផ្ដន្ទាទោស ករណីឆបោកលុយប្រជាពលរដ្ឋក្នុងករណីទិញលក់ លើវិស័យអចលនទ្រព្យដូចគ្នានេះដែរ។
វិទ្យុអាស៊ីសេរី មិនអាចទាក់ទងលោក ឡេង ណាវ៉ាត្រា ដើម្បីសុំការបកស្រាយជុំវិញរឿងនេះបានទេ នៅថ្ងៃទី៤ សីហា។
ជុំវិញរឿងនេះ អ្នកនាំពាក្យសមាគមអាដហុក លោក សឹង សែនករុណា មានប្រសាសន៍ថា ការបន្ថែមកិច្ចសន្យាបែបនេះ អាចធ្វើឱ្យអតិថិជនអស់ជំនឿចិត្ត ដោយសារការខាតបង់ពេលវេលា និងលុយកាក់។ លោកបន្តថា អតិថិជនមានសិទ្ធិបដិសេធលើកិច្ចព្រមព្រៀងនេះ និងតវ៉ាទាមទារលើរឿងទាំងឡាយណាដែលធ្វើឱ្យប៉ះពាល់ផលប្រយោជន៍របស់ខ្លួន ដោយក្រុមហ៊ុនគ្មានសិទ្ធិហាមឃាត់ ឬដាក់លក្ខខណ្ឌអ្វីនោះឡើយ ជាពិសេសការព្រមព្រៀងដែលធ្វើឡើងដោយឯកតោភាគីបែបនេះ។
លោក សឹង សែនករុណា៖ «ដូចខ្ញុំលើកឡើងអ៊ីចឹង គឺគាត់មិនអាចទៅបង្ខំឱ្យគេចុះកិច្ចសន្យាជាមួយខ្លួនបានទេ។ កិច្ចសន្យាធ្វើឡើងទាល់តែមានការព្រមព្រៀងគ្នាបានធ្វើទៅបាន។ អ៊ីចឹងបើមានការបង្ខិតបង្ខំគំរាមកំហែង គឺជាអំពើល្មើសច្បាប់ទៅនឹងច្បាប់ព្រហ្មទណ្ឌមួយទៀតហើយ។ អ៊ីចឹងបើយើងនិយាយថា ពីមុនមិនគោរពតាមកិច្ចសន្យា ហើយបើប្រើការគំរាមកំហែងទៅលើប្រជាពលរដ្ឋ ឬក៏ភាគីដែលជាអតិថិជនរបស់ខ្លួនហ្នឹង គឺកាន់តែមានបទល្មើសបន្ថែមទៅទៀតហើយ។ ច្បាប់មិនអនុញ្ញាតឱ្យធ្វើបែបហ្នឹងទេបាទ»។
អ្នកច្បាប់ និងអតិថិជន ជំរុញឱ្យក្រុមហ៊ុនលោក ឡេង ណាវ៉ាត្រា គួរតែពន្លឿនការស្រាយបញ្ហាជូនអតិថិជនឱ្យបានសមស្រប ជាជាងឆ្លើយដោះសា និងចំណាយលុយជួយបក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។