ប្រជាពលរដ្ឋជាច្រើនពាន់នាក់ មកពីតាមបណ្ដាខេត្ត រាជធានី នាំគ្នាមកចូលរួមពិធីបុណ្យខួប ១០០ថ្ងៃ បណ្ឌិត កែម ឡី នៅថ្ងៃទី១៤ តុលា។
ថ្ងៃទី១ នៃពិធីបុណ្យមានអ្នកចូលរួមច្រើននៅពេលល្ងាច បើធៀបទៅនឹងអ្នកចូលរួមនៅពេលព្រឹក។ ចំណែកអ្នករៀបចំកម្មវិធីបុណ្យមានក្រុមការងារទទួលស្វាគមន៍យ៉ាងសមរម្យ។
ពិធីបុណ្យនេះមានរយៈពេល ៤ថ្ងៃ គឺចាប់ពីថ្ងៃទី១៤ ដល់ថ្ងៃទី១៧ ខែតុលា។ កម្មវិធីពីថ្ងៃទី១៤ ដល់ថ្ងៃទី១៦ គឺប្រារព្ធឡើងនៅវត្តពោធិយារាម ហៅវត្តចាស់ ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។ កម្មវិធីបុណ្យនឹងបញ្ចប់នៅថ្ងៃទី១៧ ខែតុលា នៅឯទីបញ្ចុះសពរបស់លោកនាខេត្តតាកែវ។
កម្មវិធីនៅល្ងាចនេះ មានការជួបជុំអ្នកចូលរួមពីទីជិតឆ្ងាយ ធ្វើពិធីសូត្រមន្ត ទេសនា តាមបែបព្រះពុទ្ធសាសនា។
លោកបណ្ឌិត កែម ឡី ជាអ្នកស្រាវជ្រាវការអភិវឌ្ឍសង្គម ត្រូវបានខ្មាន់កាំភ្លើងបាញ់សម្លាប់នៅព្រឹកថ្ងៃទី១០ ខែកក្កដា ឆ្នាំ២០១៦ នៅឯស្ដារម៉ាត (Star Mart) ក្នុងស្ថានីយលក់ប្រេងឥន្ធនៈកាល់តិច (Caltex) កណ្ដាលរាជធានីភ្នំពេញ។ បណ្ឌិត កែម ឡី ត្រូវបានសាធារណជនជាច្រើនបានស្គាល់លោកតាមរយៈការវិភាគលើបញ្ហាសង្គម ស្ថានភាពនយោបាយ សិទ្ធិមនុស្ស ការអភិវឌ្ឍប្រទេសនៅលើប្រព័ន្ធផ្សព្វផ្សាយជាតិ និងអន្តរជាតិ ហើយលោកត្រូវបានពលរដ្ឋខ្មែរដែលគាំទ្រការវិភាគរបស់លោក ហៅថា ជាអ្នកវិភាគឯករាជ្យ ដែលនិយាយចំៗទាក់ទងនឹងភាពអសកម្មរបស់រដ្ឋាភិបាល និងបញ្ហាផ្សេងៗទៀត ទោះបីជាលោកបានដឹងជាមុនថា លោកប្រឈមនឹងការបាញ់សម្លាប់ដោយប្រការណាមួយក្ដី។
សូមស្ដាប់សេចក្ដីរាយការណ៍ផ្ទាល់របស់លោក ប្រាជ្ញ ចេវ ពីវត្តចាស់៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។