ពលរដ្ឋទ្រហោយំអាណិតហ្វូងស្វាព្រៃដែលអាជ្ញាធរអប្សរាជម្លៀសចេញពីឧទ្យានអង្គរ
2020.12.30
ក្រុមមគ្គុទ្ទេសក៍អង្គរ និងពលរដ្ឋរស់នៅខេត្តសៀមរាប បានស្រែកទ្រហោយំ អាណិតអាសូរ សត្វស្វាជាច្រើនក្បាល រស់នៅតំបន់អង្គរ ត្រូវបានអាជ្ញាធរបាញ់ខុសបច្ចេកទេសបណ្ដាលរងរបួស។ ការលើកឡើងនេះ បន្ទាប់ពីអាជ្ញាធរអប្សរា បានជម្លៀសសត្វស្វាកាចៗមួយចំនួន ចេញពីពីតំបន់ឧទ្យានអង្គរក្រោមហេតុផលដើម្បីការពារ សុវត្ថិភាពមនុស្ស និងប្រាសាទ។
ពលរដ្ឋខេត្តសៀមរាប និងក្រុមមគ្គុទ្ទេសក៍អង្គរព្រួយបារម្ភ ពីជីវិតសត្វស្វាជាច្រើនក្បាលដែលកំពុងរស់នៅតំបន់ឧទ្យានអង្គរ ត្រូវបានអាជ្ញាធរអប្សរា ជម្លៀសចេញឱ្យទៅរស់នៅ ក្រៅឧទ្យានអង្គរវិញ។ពលរដ្ឋថា ទង្វើរបស់សមត្ថកិច្ច បង្កហានិភ័យដល់អាយុជីវិតសត្វស្វាទាំងនោះ ដែលមានទម្លាប់រស់នៅក្នុងព្រៃតំបន់អង្គរជាយូរមកហើយ។
ពលរដ្ឋរស់នៅខេត្តសៀមរាប លោក អាង ឆាល ចាត់ទុកទង្វើរបស់អាជ្ញាធរអប្សរាថា ហាក់ដូចជា យកស្វាទៅសម្លាប់ចោលដូច្នោះដែរ ព្រោះនៅក្រៅឧទ្យានអង្គរគ្មានព្រៃឈើផ្ដល់ផល និងស្បៀង សម្រាប់សត្វស្វាទាំងនោះឡើយ ហើយពួកវាអាចនឹងប្រឈមការប្រមាញ់ពីព្រានព្រៃថែមទៀត។ លោកសង្កេតឃើញថា ហ្វូងស្វារាប់រយក្បាល មានទម្លាប់រស់នៅតាមប្រាសាទ និងព្រៃក្នុងឧទ្យានអង្គរតាំងពីបុរាណមក អាជ្ញាធរអប្សរា គួរតែអភិរក្សឱ្យបានល្អ ដើម្បីទាក់ទាញភ្ញៀវទេសចរ៖ «ព្រៃឈើរបស់យើងវាសឹករឹតរិលហើយ វាអត់មានផ្លែឈើ ដែលឱ្យវាស៊ីកើតដែរ។ អ៊ីចឹងហើយពួកវាព្យាយាមមក តំបន់មនុស្សទៅ ហើយពួកមនុស្សទាំងអស់ហ្នឹង។ ពួកអ្នកដំណើរទេសចរ ឱ្យផ្លែឈើទៅ វាអត់ទៅណាទេ បើវាទៅព្រៃគឺ ពុំមានចំណីអាហារគ្រប់គ្រាន់សម្រាប់ពួកវា ដោយសារព្រៃឈើស្ទើរតែបាត់បង់អស់ ហើយផ្លែឈើអត់មានតាមរដូវទៀត»។
ពលរដ្ឋម្នាក់ទៀត រស់នៅខេត្តសៀមរាប លោក នី ម៉ាលី មិនគាំទ្រ ការជម្លៀសសត្វស្វាចេញពីតំបន់អង្គរនោះទេ ព្រោះទម្លាប់បែបធម្មជាតិរបស់វា មិនអាចរស់នៅ ទីតាំងផ្សេងបានទេ។ លោកថា ស្វាទាំងនោះ រស់នៅតំបន់អង្គរមានសុវត្ថិភាពជាងនៅតំបន់ផ្សេងៗព្រោះក្នុងបរិវេណតំបន់អង្គរមិនមានអ្នកបរបាញ់ និងដាក់អន្ទាក់៖ «វាអយុត្តិធម៌សម្រាប់សត្វ ព្រោះសត្វវារស់នៅតំបន់ដែរ កាលណាយើងយកវាទៅលែងនៅព្រៃផ្សេងទៀត អត់មានអភិរក្ស នឹងមានការសម្លាប់។ បើនៅក្នុងព្រៃអង្គរ មានការអភិរក្ស អត់សូវមានអ្នកណាទៅសម្លាប់វា»។
កាលពីថ្ងៃទី២៨ ធ្នូ អាជ្ញាធរអប្សរាបានជូនដំណឹង តាមទំព័រហ្វេសបុករបស់ខ្លួនថា សត្វស្វាកាចៗមួយចំនួន រស់នៅក្នុងតំបន់ប្រាសាទបាយ័ន នឹងត្រូវយកចេញ ទៅលែងនៅក្នុងព្រៃក្រៅឧទ្យានអង្គរ ដោយសារ សត្វទាំងនេះ បង្កហានិភ័យដល់ប្រាង្គប្រាសាទដូចជា រុញឲ្យជ្រុះថ្មប្រាសាទ និងធ្វើឲ្យខូចខាតផ្ទាំងបដាព័ត៌មានផ្សេងៗ។ អាជ្ញាធរអប្សរាមិនបង្ហាញ ពីចំនួនពិតប្រាកដនៃសត្វស្វាដែលត្រូវនាំចេញពីតំបន់ឧទ្យានអង្គរនោះនៅឡើយទេ។
អ្នកនាំពាក្យអាជ្ញាធរអប្សរា លោក ឡុង កុសល បកស្រាយថា វិធីសាស្ត្រនៃការចាប់សត្វស្វា គឺមន្ត្រីជំនាញរដ្ឋបាលព្រៃឈើ ប្រើថ្នាំសន្លប់ មិនបណ្តាលឱ្យសត្វស្វាណាមួយស្លាប់នោះឡើយ។ លោកថា អាជ្ញាធរអប្សរា បានជម្លៀសតែស្វាណាកាចៗ ធ្វើឱ្យប៉ះពាល់សុវត្ថិភាពមនុស្ស និងសុវត្ថិភាពប្រាសាទ ហើយមកទល់ពេលនេះ មានស្វា ១៦ ក្បាល ត្រូវបានអាជ្ញាធរចាប់យកចេញពីតំបន់ឧទ្យានអង្គរកាលពីពេលថ្មីៗនេះ៖ «ស្វាយនេះត្រូវបានយកចេញដោយអ្នកជំនាញ ដែលមានវិជ្ជាជីវៈត្រឹមត្រូវ ដោយក្រុមការងាររដ្ឋបាលព្រៃឈើ។ យើងមិនអាចចាប់យកចេញទៅទាំងអស់នោះទេ យកតែស្វាណាដែលកាចៗ ធ្វើឱ្យប៉ះពាល់ដល់សុវត្ថិភាពរបស់មនុស្ស និងប្រាសាទ។ ស្វាហ្នឹងគ្រាន់តែសន្លប់តើ អត់មានរឿងដែលថា ស្លាប់ទេ អ្នកនិយាយហ្នឹងគាត់មិនបានស្វែងយល់ពីបច្ចេកទេស»។
ទោះបីជាយ៉ាងណា ពលរដ្ឋថា កាលពីថ្ងៃទី២៩ ធ្នូ អាជ្ញាធរអប្សរា និងមន្ត្រីជំនាញរដ្ឋបាលព្រៃឈើ បានបាញ់ថ្នាំសន្លប់ខុសបច្ចេកទេស នៅប្រាសាទអង្គរធំបណ្តាលឱ្យសត្វស្វាមួយចំនួន ធ្លាក់ពីទីខ្ពស់ បុកខ្ទប់នឹងថ្មប្រាសាទរងរបួសធ្ងន់។ ចំណែក ពលរដ្ឋ និងក្រុមមគ្គុទ្ទេសក៍អង្គរ បានថតវីដេអូបង្ហោះតាមបណ្ដាញសង្គម ស្រែកទ្រហោយំ អាណិតស្វាទាំងនោះ៖ «បាញ់វាអត់ត្រង់ទេ ឥលូវស្វាធ្លាក់ត្រូវដុំថ្មហើយ។ ពួកគាត់បាញ់ទម្លាក់ស្វាងាប់អស់ហើយ បងប្អូនអើយធ្លាក់ដល់ ២ ងាប់ពីរ។ សូមរដ្ឋាភិបាលជួយមើលផង សត្វដែលវារស់នៅតំបន់អង្គរ គឺវានៅយូរលង់ណាស់មកហើយ ហើយពួកគាត់ចោទថា ស្វាកាច ស្វាខាំ»។
ប្រធានសមាគមមគ្គុទ្ទេសក៍អង្គរ លោក ខៀវ ធី អំពាវនាវឱ្យអាជ្ញាធរអប្សរា គួរតែអភិរក្សសត្វស្វាព្រៃទាំងនោះ ឱ្យរស់នៅបែបធម្មជាតិដូចដើម មិនត្រូវជម្លៀសចេញនោះទេ ព្រោះពួកវា ផ្ដល់ប្រយោជន៍ច្រើនដល់ពលរដ្ឋខ្មែរ និងទាក់ទាញភ្ញៀវទេសចរ។ លោកសង្កេតឃើញថា ស្វាកាចៗ ដោយសារវាការពារខ្លួន ប្រសិនបើមនុស្សមិនប៉ះពាល់វា វាក៏មិនធ្វើអ្វីយើងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។