ប្រជាពលរដ្ឋនិងអ្នកធ្វើដំណើរ ចំនួន២ស្រុកនៅក្នុងខេត្តសៀមរាប ត្អូញត្អែរថា ផ្លូវមួយខ្សែដែលចេញពីក្រុងសៀមរាបឆ្ពោះទៅស្រុកវ៉ារិន ឆ្លងកាត់ស្រុកអង្គរធំ ស្រុកអង្គរជុំ រងការខូចខាតស្ទើរទាំងស្រុងរយៈពេល៥ឆ្នាំមកហើយ ពុំទាន់ឃើញមានការជួសជុលឡើងវិញនោះទេ។ ចំណែកអាជ្ញាធរមូលដ្ឋានអះអាងថា ពួកគាត់បានស្នើទៅថ្នាក់លើច្រើនដងរួចហើយដែរ ប៉ុន្តែថ្នាក់លើមិនទាន់ឃើញឆ្លើយតបនៅឡើយទេ។
ប្រជាពលរដ្ឋ និងអ្នកដំណើរឆ្លងកាត់ក្នុងឃុំគោកដូង នៃស្រុកអង្គរជុំ និងឃុំជប់តាត្រាវ ស្រុកអង្គរធំ ខេត្តសៀមរាប ត្អូញត្អែរថា ផ្លូវមួយខ្សែមានប្រវែងប្រមាណជាង២០គីឡូម៉ែត្រ កំពុងខូចខាតតាំងពីឆ្នាំ២០១៨ រហូតមកដល់បច្ចុប្បន្ន មិនទាន់ឃើញអាជ្ញាធរពាក់ព័ន្ធអើពើជួសជុលនោះទេ។ ពលរដ្ឋថានៅពេលប្រជាពលរដ្ឋនៅក្នុងឃុំចង់ធ្វើដំណើរទៅណាម្ដងៗមិនអាចធ្វើដំណើរទាន់ពេលវេលានោះទេ ជាពិសេសនៅពេលដែលពលរដ្ឋមានជំងឺឈឺស្កាត់នៅពេលយប់ពិបាកធ្វើដំណើរទៅមន្ទីរពេទ្យខ្លាំង។
ពលរដ្ឋនៅក្នុងឃុំ គោកដូង នៃស្រុកអង្គរជុំ លោកស្រី យឹម សុខឿន រៀបរាប់ប្រាប់វិទ្យុអាស៊ីសេរីនៅថ្ងៃទី២៧ ខែកញ្ញា ថា ផ្លូវនៅក្នុងឃុំដែលតភ្ជាប់ជាមួយស្រុកវ៉ារិន រងការខូចខាតស្ទើរទាំងស្រុងជាង ៥ឆ្នាំហើយ នៅមិនទាន់ឃើញអាជ្ញាធរពាក់ព័ន្ធចុះជួសជុលនៅឡើយទេ។ លោកស្រីបន្ថែមថា នៅខែវស្សាមានរណ្ដៅជ្រៅៗ ធ្វើឲ្យមនុស្សជិះម៉ូតូដួលជាញឹកញយ ជាពិសេស សិស្សសាលាក្មេងៗ តែងតែដួលប្រឡាក់សំលៀកបំពាក់ជាហូរហែ។ ពលរដ្ឋនៅក្នុងឃុំតែងតែរអ៊ូរទាំចំពោះអាជ្ញាធរ ខ្វះការយកចិត្តទុកដាក់ទៅលើពួកគេ ដោយមុនបោះឆ្នោតតែងតែសន្យាអភិវឌ្ឍន៍និងធ្វើផ្លូវឲ្យបានល្អស្អាត ប៉ុន្តែរហូតមកដល់ពេលបច្ចុប្បន្នមិនទានឃើញធ្វើផ្លូវនៅឡើយទេ។
លោកស្រី យឹម សុខឿន៖ «គោយន្តជាប់លើថ្នល់ដែរជាប់គ្រប់តែកន្លែងហ្នឹងឯង ម៉ូតូក៏ជិះវេរចូលផ្ទះគេ វេរចូលមុខផ្ទះគេ ម្ចាស់គេបិទចេះក៏ធ្លាក់ទៅក្នុងជ្រុះក៏ជាប់ម៉ូតូរលត់ក្នុងទឹកក៏មានដែរលោកគ្រូ»។
ស្រដៀងគ្នានេះដែរពលរដ្ឋរស់នៅឃុំ ជប់តាត្រាវ នៃស្រុកអង្គរធំ លោក ផុន ផាន់ថៃ ឲ្យដឹងដែរថា ផ្លូវមួយខ្សែនេះ នៅរដូវប្រាំង មានដីហុយខ្លាំងធ្វើឲ្យពលរដ្ឋ និងក្មេងនៅក្នុងឃុំងាយមានជំងឺដូចជាឆាប់ផ្ដាសាយ ក្អក ជាពិសេសនៅពេលហូបបាយម្ដងៗ ពួកគេត្រូវចង់មុងទើបអាចហូបបាយកើត ចំណែករដូវវស្សាវិញមានទឹកដក់នៅក្នុងរណ្ដៅធំៗធ្វើឱ្យពិបាកខ្លាំងពេលធ្វើដំណើរឆ្លងកាត់។
លោក ផុន ផាន់ថៃ៖ «បន្ទាប់ពីបាត់ហុយមកក៏វាទៅជារណ្ដៅក្រឡុក(ជង្ហុក)ជ្រៅៗអ៊ីចឹងដូចបងឃើញស្រាប់ហើយ ពិបាកណាស់បងអើយ បើគិតពីការដឹកវិញនោះ វាពិបាកក្នុងការធ្វើដំណើរជូនកូនទៅរៀនអីពិបាក»។
ចំណែកឯពលរដ្ឋដែលតែងតែធ្វើដំណើរមកពី ស្រុកវ៉ារិន ឆ្ពោះទៅក្រុងសៀមរាប លោក មូល ម៉ៃ ឱ្យដឹងថា ផ្លូវមួយនេះនៅពេលមេឃភ្លៀងនៅតាមរណ្ដៅខ្លះលិចដល់ក្បាលជង្គង់ ធ្វើឲ្យអ្នកបើកបររថយន្ត និងម៉ូតូ ពិបាកខ្លាំង លើសពីនោះ ម៉ូតូខ្លះមានការខូចខាតថែមទៀត បន្ទាប់ពីជិះឆ្លងកាត់ផ្លូវនោះរួចមក ។ លោកបន្ថែមថា អ្នកភូមិចង់ឲ្យអាជ្ញាធរជួសជុលផ្លូវមួយខ្សែនេះឲ្យឆាប់បំផុត។
លោក មូល ម៉ៃ៖ «ខូចអស់ខ្ទេចខ្ទីអស់ហើយ ជិះអត់កើតផង ខូចជិះអត់កើត ទៅជាស្ទឹងទៅជាប្រឡាយអស់ហើយពិបាកណាស់ ម៉ូតូជិះតាមផ្ទះគេ ជិះតាមផ្លូវអត់កើតទេ ជិះចូលតាមច្រកផ្ទះគេ មុខផ្ទះគេ វាខាតច្រើនទាក់ទងនឹងសេដ្ឋកិច្ច ការធ្វើដំណើរប៉ះពាល់ទាំងស្រុង ទាំងម៉ូតូ ទាំងឡានបុកនឹងថ្ម»។
ជុំវិញរឿងនេះ មេឃុំគោកដូង មកពីគណបក្សប្រជាជនកម្ពុជា លោក ហ៊ូ ខុម ឆ្លើយតបថា រូបលោកបានស្នើទៅថ្នាក់លើរបស់លោកជាច្រើនសាមកហើយ រហូតមកដល់ពេលនេះមិនទាន់ទទួលបានដំណឹងពីថ្នាក់ខេត្តនៅឡើយនោះទេ ។ លោកបន្ថែមថា ចំពោះការជួសជុលផ្លូវមួយខ្សែនេះវាជាកាតព្វកិច្ចរបស់អាជ្ញាធរថ្នាក់ខេត្ត និងមន្ទីរអភិវឌ្ឍន៍ជនបទ។ លោកអំពាវនាវ ឲ្យថ្នាក់លើរបស់លោកជួសជុលផ្លូវមួយនេះឲ្យបានឆាប់។
លោក ហ៊ូ ខុម៖ «នុះឯងខ្ញុំសំណូមពរថាឱ្យថ្នាក់ដឹកនាំខាងលើមន្ទីរអភិវឌ្ឍន៍[ជនបទ]ខេត្ត ឬក៏ក្រសួងដើម្បីជួយឱ្យឃុំខ្ញុំ[ឃុំគោកដូង]និងឃុំជប់តាត្រាវនេះ ធ្វើម៉េចឱ្យផុតពីការនិន្ទារបស់ប្រជាពលរដ្ឋ ហូ!ដល់ហើយខ្ញុំមិនដឹងនិយាយថា ម៉េច»។
វិទ្យុអាស៊ីសេរីមិនអាចទាក់ទង អភិបាលខេត្តសៀមរាបថ្មី លោក ប្រាក់ សោភ័ណ ដើម្បីសុំការអត្ថាធិប្បាយបានទេ នៅថ្ងៃទី២៧ ខែកញ្ញានេះ ដោយទូរស័ព្ទចូលគ្មានអ្នកទទួល។
ទាក់ទងនឹងបញ្ហានេះ អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី ជំរុញឱ្យអាជ្ញាធរពាក់ព័ន្ធត្រូវយកចិត្តទុកដាក់ដោះស្រាយឲ្យបានឆាប់អំពីបញ្ហានេះ ពីព្រោះផ្លូវគឺជាកត្តាមួយ ដែលជំរុញឲ្យមានដំណើរការសេដ្ឋកិច្ច របស់ប្រជាពលរដ្ឋ ដើម្បីដឹកជញ្ជូនទំនិញ និងការប្រើប្រាស់ផ្សេងៗឲ្យទាន់ពេលវេលា។
បណ្ឌិត មាស នី៖ «បើយើងនិយាយអំពីផ្លូវវាជាហេដ្ឋារចនាសម្ព័ន្ធសេដ្ឋកិច្ច ដូចដែលយើងដឹងស្រាប់ហើយថា បើយើងប្រៀបធៀបការដឹកជញ្ជូន តម្លៃដឹកជញ្ជូននៅស្រុកយើង និងស្រុកជិតខាង ប្រទេសជិតខាងយើង គេចំណាយតែ៣ដុល្លារទេ ក្នុង១តោនពីស្រែពីចម្ការមកផ្លូវធំ ប៉ុន្តែស្រុកយើងចំណាយដល់ ១៥ដុល្លារនៅក្នុង១តោន ដោយសារអ្វី ដោយសារតែផ្លូវដឹកជញ្ជូនវាពិបាក»។
កំណាត់ផ្លូវដែលខូចខាតខ្លាំង បង្កការលំបាកដល់ពលរដ្ឋនិងអ្នកធ្វើដំណើរឆ្លងកាត់នេះ មានប្រវែងប្រមាណ២០គីឡូម៉ែត្រ ស្ថិតនៅឃុំជប់តាត្រាវ ស្រុកអង្គរធំ និងឃុំគោកដូង ស្រុកអង្គរជុំ ដែលមានពលរដ្ឋចំនួន២២ភូមិរស់នៅសងខាងផ្លូវ និងប្រើប្រាស់ផ្លូវនេះជាប្រចាំ។
កន្លងមកមេដឹកនាំនៃបក្សប្រជាជនកម្ពុជា លោក ហ៊ុន សែន តែងតែអួតពីការអភិវឌ្ឍគ្រប់វិស័យមិនថា ផ្លូវនោះទេ ប៉ុន្តែបច្ចុប្បន្នប្រជាពលរដ្ឋ ស្ទើរគ្រប់ខេត្តក្រុង បានរអ៊ូរទាំ អំពីការសាងសង់ផ្លូវមិនបានដូចចិត្តដែលពលរដ្ឋត្រូវការ ជាពិសេសផ្លូវនៅក្នុងភូមិឃុំតាមទីជនបទដែលពលរដ្ឋតែងរអ៊ូរទាំពិបាកធ្វើដំណើរខួបប្រាំងខួបវស្សា។
នៅក្នុងអាណត្តិទី៧នេះ រដ្ឋាភិបាលថ្មីបានដាក់ចេញយុទ្ធសាស្ត្របញ្ចកោណដំណាក់កាលទី១ បានកំណត់អាទិភាពគន្លឹះចំនួន៥ ដោយកំណត់យកការពង្រឹងធនធានមនុស្សជាអាទិភាពទី១ និង បញ្ហា ផ្លូវ ទឹក ភ្លើង និងបច្ចេកវិទ្យា គឺជាចំណុចអាទិភាពបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។