ពលរដ្ឋ​តំបន់​អង្គរ​រក្សា​ប្រពៃណី​ចាប់​ត្រី​រួមគ្នា​ក្នុង​បឹង​ដើម្បី​បង្ហាញ​សាមគ្គីភាព

ដោយ សុជីវី
2024.02.13
ពលរដ្ឋ​តំបន់​អង្គរ​រក្សា​ប្រពៃណី​ចាប់​ត្រី​រួមគ្នា​ក្នុង​បឹង​ដើម្បី​បង្ហាញ​សាមគ្គីភាព សកម្មភាពអ្នកភូមិ​ទាំងនោះ រស់នៅ​ក្នុងភូមិ​បង្កោង ឃុំ​អំពិល ស្រុក​ប្រាសាទបាគង​​ប្រារព្ធ​ ចាប់ត្រីក្នុង​បឹងសហគមន៍ កាលពី​ព្រឹក​ថ្ងៃទី១១ កុម្ភៈ ២០២៤។
រូប​៖ ពលរដ្ឋ​ផ្តល់ឱ្យ

ប្រជា​ពលរដ្ឋ​រាប់​ពាន់​នាក់​រស់នៅ​ក្នុង​តំបន់​អង្គរ​ខេត្ត​សៀមរាប នៅ​រក្សា​ប្រពៃណី​ចាប់​ត្រី​ក្នុង​បឹង​បុរាណ​មួយ​កន្លែង ដើម្បី​បង្ហាញ​ពី​ការ​សាមគ្គីភាព និង​ទំនាក់ទំនង​ល្អ​ក្នុង​សហគមន៍។

អ្នកភូមិ​ថា ប្រពៃណី​ចាប់​ត្រី​ឡើង​មាឃ ឬ​ឡើង​អ្នកតា​ធ្វើ​ចង្ហាន់​ប្រគេន​ព្រះសង្ឃ ដើម្បី​ឧទ្ទិស​ជូន​ដូនតា និង​រំលឹក​គុណ​បុព្វបុរស​ខ្មែរ។

បើ​គេ​ធ្វើដំណើរ​ទៅ​ទិស​ខាងកើត​តាមផ្លូវ​លេខ​៦០ ចម្ងាយ​ជាង ២០ គីឡូម៉ែត្រ ពី​ទី​រួម​ខេត្ត​សៀមរាប គេ​នឹង​ប្រទះឃើញ​បឹង​ធម្មជាតិ​មួយ​ដែល​អ្នកស្រុក​ហៅថា បឹង​បង្កោង។ គឺ​នៅ​ទីនោះ​ហើយ​ដែល​ជា​រៀងរាល់​ឆ្នាំ​ឱ្យ​តែ​ដល់​ដើម​ខែ​មាឃ អ្នកភូមិ​រាប់ពាន់​នាក់​តែង​ចុះ​បឹង​ដណ្តើម​គ្នា​ចាប់​ត្រី ដោយ​ប្រើ​ឧបករណ៍​នេសាទ​បុរាណ។

ឆ្នាំនេះ​គេ​សង្កេត​ឃើញ​ថា អ្នកភូមិ​ក្មេង​ចាស់ ប្រុស​ស្រី ក្រោក​ពី​ព្រឹក​ព្រលឹម​ស្រាងៗ ក្នុង​ដៃ​ប្រដាប់​ទៅ​ដោយ​សំណាញ់ អង្រុត ឈ្នាង និង​ទ្រុង​ឬ​ជាល បាន​មក​ជួបជុំគ្នា​ចុះ​ចាប់​ត្រី តាម​ទម្លាប់​ប្រពៃណី​អម​ជាមួយ​ការ​បាញ់​កាំជ្រួច​ធ្វើ​ជា​សញ្ញា​ចាប់ផ្តើម។ «»

អ្នកភូមិ​ទាំងនោះ រស់នៅ​ក្នុងភូមិ​បង្កោង ឃុំ​អំពិល ស្រុក​ប្រាសាទបាគង​តែង​តែង​ប្រារព្ធ​ពិធី​ឡើង​មាឃ ឬ​ឡើង​អ្នកតា​ជា​រៀងរាល់​ឆ្នាំ នៅ​ដើម​ខែ​មាឃ ឬ​ក្នុង​ខែ​កុម្ភៈ។

អ្នកស្រុក​អង្គរ​រាប់​ពាន់​នាក់​នៅ​ព្រឹក​ថ្ងៃទី១១ កុម្ភៈ បាន​រួម​គ្នា​ចុះ​ចាប់​ត្រី​ក្នុង​បឹង​ធ្វើជា​ម្ហូបអាហារ និង​ចង្ហាន់​ប្រគេន​ព្រះសង្ឃ សម្រាប់​ថ្ងៃ​ពិធី​ឡើង​មាឃ ឬ​ឡើងអ្នកតា ដែល​ពួកគាត់​ចាត់​ទុក​ថា ជា​ទំនៀម​ទម្លាប់​បន្សល់​តាំង​ពី​ដូនតា។

ពលរដ្ឋ​ចូលរួម​ចាប់​ត្រី​ក្នុង​បឹង លោក កង វុធ ប្រាប់​វិទ្យុ​អាស៊ីសេរី​នៅ​ថ្ងៃទី ១២ កុម្ភៈ​ថា ប្រពៃណី​នេះ​អ្នកភូមិ​ពូន​ភ្នំស្រូវ ដើម្បី​ថ្វាយ​អ្នកតា​ម្ចាស់​ទឹកដី និង​រំលឹក​គុណ​គោក្របី ដែល​កសិករ​ប្រើប្រាស់​សម្រាប់​ធ្វើ​កសិកម្ម​ចិញ្ចឹម​ជីវិត។

លោក​ថា ត្រី​ដែល​អ្នកភូមិ​នេសាទ​បាន និង​យក​ទៅ​ធ្វើ​ម្ហូបអាហារ​តាម​គ្រួសារ​រៀងៗ​ខ្លួន ក៏ប៉ុន្តែ​ត្រី​ដែល​ចាប់​ក្នុង​សម្រាស់ ក្នុង​បឹង​នេះ​ចំនួន​រាប់​រយ​គីឡូក្រាម ពួកគាត់​នឹង​យក​ប្រើប្រាស់​សម្រាប់​ផ្គត់ផ្គង់​ពិធី​បុណ្យ​ឡើង​អ្នកតា ឬ​ឡើង​មាឃ។

លោក កង វុធ៖ «មិន​ពិបាក​ទិញ​ត្រី​សាច់​ទេ​។ គេ​ធ្លាប់​ឡើង​ពី​ដូនតា​មក ចាស់​ពី​ដើម​មក យើង​ច្រូតកាត់​រួច យក​ស្រូវ​មក​ពួន​ភ្នំស្រូវ ទៅ​ថ្វាយ​ម្ចាស់​ទឹកដី​។ គោក្របី​ដែល​យើង​ប្រើ​វា យើង​សងគុណ​វា»

ពិធី​នេះ​មាន​ការ​ចូលរួម​ដោយ​អាជ្ញាធរ​មូលដ្ឋាន​ភ្ញៀវ​ទេសចរ​ជាតិ និង​អន្តរជាតិ ថត​រូបភាព​បង្ហោះ​វីដេអូ តាម​បណ្ដាញ​សង្គម​ហ្វេសបុក (Facebook) បង្ហាញ​ពី​ទិដ្ឋភាព​នេសាទ​ត្រី​របស់​អ្នកស្រុក​អង្គរ។

ក្រោយ​ពី​ចាប់​ត្រី​ក្នុង​បឹង​រួច មនុស្ស​ក្មេង​ចាស់​ប្រុស​ស្រី​ជាច្រើន​នាក់ បាន​អង្គុយ​ជួបជុំគ្នា​ទទួលទាន​អាហារ​រួមគ្នា នៅ​ជុំវិញ​បឹង​នេះ​យ៉ាង​សប្បាយរីករាយ​។ ពិធី​នេះ​អ្នកភូមិ​តែងតែ​ប្រារព្ធ​ជា​រៀងរាល់​ឆ្នាំ បន្ទាប់​ពី​បញ្ចប់​ការងារ​ច្រូតកាត់ និង​ដាក់​ស្រូវ​ក្នុង​ជង្រុក​រួចរាល់។

ពលរដ្ឋ​ម្នាក់ទៀត​រស់នៅ​ក្នុង​ភូមិ​បង្កោង​លោក លីវ សាត ពន្យល់​ថា ពិធី​នេះ​ធ្វើឡើង​ដើម្បី​សុំ​សេចក្តី​សុខ​ចម្រើន ធ្វើ​កសិកម្ម​បាន​ផល​ច្រើន ពី​អ្នកតា​ម្ចាស់​ទឹកដី និង​បង្ហាញ​ពី​សាមគ្គី​ភាពល្អ តាម​បណ្តាំ​របស់​ដូនតា​ខ្មែរ។

លោក​បន្ថែម​ថា ត្រី​ដែល​ចាប់បាន​ក្នុង​បឹង ពួកគាត់​នឹង​ប្រារព្ធ​ពិធីបុណ្យ​សែន​អ្នកតា ដើម្បី​ដាស់​ស្មារតី​ឱ្យ​អ្នកស្រុក​អង្គរ​រំលឹក​គុណ​បុព្វបុរស​ដែល​ពលី​ជីវិត ការពារ​ទឹកដី​មាតុភូមិ។ «»

ម្យ៉ាងទៀត​រំលឹក​គុណ​ដល់​អ្នកដឹកនាំ​ពី​បុព្វបុរស​យើង​បន្សល់​ទុក កូន​ចៅ​ជំនាន់​ក្រោយ។

បឹង​បង្កោង ឋិត​ក្នុងភូមិ​បង្កោង ឃុំ​អំពិល ស្រុក​ប្រាសាទបាគង ខេត្តសៀមរាប មាន​ទំហំ​សរុប​ជាង ៤ ហិកតារ​អម​ដោយ​ព្រៃ​ឈើ​ព័ទ្ធជុំវិញ​។ បឹង​នេះ​គ្រប់គ្រង​ដោយ​អាជ្ញាធរ​ជាតិ​អប្សរា​ដែល​អ្នកភូមិ​អភិរក្ស​ត្រី​រួមគ្នា​ទុក​មិន​អនុញ្ញាត​ឱ្យ​នេសាទ​ផ្តេសផ្តាស​នោះ​ទេ ដោយ​ទុក​សម្រាប់​តែ​ធ្វើ​ពិធី​ចាប់​ត្រី​រួមគ្នា​ក្នុង​ឱកាស​បុណ្យ​ឡើង​មាឃ ឬ​ឡើង​អ្នកតា​តែ​ប៉ុណ្ណោះ។

ជុំវិញ​រឿង​នេះ អភិបាល​ស្រុក​ប្រាសាទបាគង លោក សូរ ប្លាតុង ថ្លែង​ក្នុង​ពិធី​ចាប់​ត្រី​នោះ​ថា ពិធី​នេះ​ជា វប្បធម៌​ប្រពៃណី​ខ្មែរ ដែល​កប់​ជ្រៅ មិនសូវ​មាន​អ្នកដឹង ហើយ​បន្ត​ធ្វើឡើង​ដើម្បី​ផ្សព្វផ្សាយ​ឱ្យ​បាន​ទូលំទូលាយ​ដល់​ភ្ញៀវ​ទេសចរ​ឱ្យ​ជ្រាប​ពី​តម្លៃ​ប្រពៃណី​ទំនៀមទម្លាប់​ខ្មែរ។

លោក​ថា ពិធីបុណ្យ​នេះ​មាន​សារៈសំខាន់​សម្រាប់​ពលរដ្ឋ​មូលដ្ឋាន បង្ហាញ​ពី​ការ​ទំនាក់ទំនង​ល្អ​ក្នុង​សហគមន៍។

លោក សូរ ប្លាតុង៖ «ក្រៅពី​ប្រាង្គ​ប្រាសាទ​យើង​មាន​វប្បធម៌​រូបិយ និង​អរូបិយ​ច្រើន​មែនទែន ប៉ុន្តែ​វប្បធម៌​ទាំងអស់​នេះ កប់​ក្នុង​ស្រទាប់​បងប្អូន​មហាជន មិនបាន​ផ្សព្វផ្សាយ​នៅ​ឡើយ​ទេ។ ស្របតាម​គោល​នយោបាយ​របស់​រដ្ឋាភិបាល​អាណត្តិ​ថ្មី នៅ​ថ្ងៃ​ខាងមុខ យើង​គាស់​រំលើង​វប្បធម៌​រស់​យើង ដើម្បី​បង្ហាញ​ភ្ញៀវ​ជាតិ​និង​អន្តរជាតិ​។ ប្រាសាទ​របស់​យើង អច្ឆរិយ​ខ្លាំង​ណាស់ តែ​វប្បធម៌​ប្រពៃណី រឹតតែ​អច្ឆរិយ​ខ្លាំង​ជាង​ហ្នឹង​ទៀត»

អ្នកស្រុក​អង្គរ​ចាត់ទុក​បឹង​បង្កោង ជា​ប្រភព​ទឹក​យ៉ាង​សំខាន់ សម្រាប់​គោក្របី និង​ស្រោចស្រព​ស្រូវ​កសិកម្ម​តាំងពី​បុរាណកាល​មក។

បឹង​បុរាណ​នេះ​ហ៊ុមព័ទ្ធ​ដោយ​ដើមឈើ​ខៀវស្រងាត់ មាន​ទេសភាព​ស្រស់បំព្រង ដែល​អ្នកស្រុក​ចាត់ទុក​ថា ជា​កន្លែង​គោរព​បូជា​អារក្សអ្នកតា ពូកែ​ស័ក្តិសិទ្ធិ។

បច្ចុប្បន្ន​បឹង​នេះ គោក​រាក់​ដោយ​អន្លើ ក៏ប៉ុន្តែ​អ្នកភូមិ​បាន​ស្នើ​ឱ្យ​អាជ្ញាធរ​ជីក​ស្ដារ​លក្ខណៈ​ធម្មជាតិ ដោយ​មាន​ការ​ចូលរួម​ពិភាក្សា​គ្នា​ជាមួយ​ប្រជា​សហគមន៍ និង​អាជ្ញាធរ​ជាតិ​អប្សរា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។ 

អត្ថបទពេញនិយម
RFA
ព្រះចៅ​អធិការ​វត្ត​ដំរីស ខេត្ត​បាត់ដំបង បណ្ដេញ​ព្រះសង្ឃ​មួយ​អង្គ​ចេញ​ពី​វត្ត​បន្ទាប់​ពី​ចូលរួម​បុណ្យ​ខួប​បាញ់សម្លាប់​បណ្ឌិត កែម ឡី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។