តំណាងកូដករណាហ្គាវើលដ៍៦នាក់ រួមមាន លោកស្រី ហៃ សុភាព អ្នកស្រី ឃ្លាំង សុបិន្ត និងមនុស្សមួយចំនួនទៀតបានដាក់ពាក្យស្នើទៅតុលាការភ្នំពេញឱ្យពន្យល់ពីលក្ខខណ្ឌស្ថិតនៅក្រោមការត្រួតពិនិត្យតាមផ្លូវតុលាការ នៅថ្ងៃទី០៩ ខែមករានេះ។ ពួកគាត់អះអាងថា មូលហេតុដែលពួកគាត់ដាក់លិខិតស្នើសុំនេះ ដោយសារពួកគាត់បារម្ភពីសុវត្ថិភាពផ្ទាល់ខ្លួនដោយខ្លាចត្រួវតុលាការចាប់ដាក់ពន្ធនាគារដូចកញ្ញា ឈឹម ស៊ីថរ បន្តទៀត។ ជាមួយគ្នានេះ មានក្រុមកូដករក្រុមហ៊ុនណាហ្គាវើលដ៍ប្រមាណ៥០បានលើកគ្នាមកផ្ដល់កម្លាំងចិត្តដល់តំណាងរបស់ពួកគេនៅមុខសាលាដំបូងរាជធានីភ្នំពេញផងដែរ។
អនុប្រធានសហជីពប្រចាំនៅក្រុមហ៊ុនណាហ្គាវើលដ៍ គឺ កញ្ញា ឈឹម សុខន ប្រាប់វិទ្យុអាស៊ីសេរី នៅថ្ងៃទី០៩ ខែមករា ថា មូលហេតុដែលពួកគេដាក់លិខិតស្នើសុំទៅតុលាការនេះដោយសារកន្លងមកពួកគាត់មិនទទួលបានដីកា ឬក៏ការណែនាំពីបម្រាបរបស់តុលាការនោះទេ។ដូច្នេះហើយទើប ពួកគាត់ព្រួយបារម្ភពីសុខសុវត្ថិភាពខ្លាចថ្ងៃណាមួយចេញទៅក្រៅប្រទេសហើយត្រូវតុលាការចាប់ខ្លួន។
កញ្ញា បន្តថា ចាប់តាំងពីពួកគាត់ទទួលដំណឹងពីការសម្រេចដីកាស្នើសុំបញ្ជូនសំណុំរឿងទៅជំនុំជម្រះមកពួកគាត់មិនបានទទួលព័ត៌មានពីបម្រាបរបស់តុលាការនេះទេ៖
«និយាយទៅសម្រាប់បម្រាបដែលចេញពីតុលាការហ្នឹងមានសារសំខាន់សម្រាប់ពួកខ្ញុំទាំងអស់គ្នាណាស់ពីព្រោះអីបម្រាបហ្នឹងបញ្ជាក់ប្រាប់ពីការហាមឃាត់របស់តុលាការដើម្បីឱ្យពួកខ្ញុំជាអ្នកដែលត្រូវចោទហ្នឹងឱ្យវាដឹងថាខ្លួនឯងស្ថិតក្នុងបម្រាបអីខ្លះអ៊ីចឹងពេលយើងមុននឹងធ្វើអីយើងឆែកមើលអ៎បម្រាបនេះអានេះយើងស្ថិតក្នុងបម្រាបហើយយើងមិនអាចធ្វើបានទេ បើកាលណាយើងល្មើសធ្វើគេនឹងចាប់យើងដាក់ពន្ធនាគារអ៊ីចឹងជាដើម អ៊ីចឹងពួកខ្ញុំប្រាកដជាចង់ដឹងហើយថាបម្រាបហ្នឹងមានអីខ្លះវាមានសារសំខាន់សម្រាប់ពួកខ្ញុំណាស់»។
កញ្ញា ឈឹម សុខន ស្នើឱ្យតុលាការ និងក្រសួងពាក់ព័ន្ធបង្ហាញពីបម្រាបដែលហាមឃាត់ដល់ពួកគាត់មិនឱ្យពួកគាត់បានអនុវត្តស្របតាមនីតិវិធីរបស់តុលាការ ហើយកញ្ញា សង្ឃឹមថាតុលាការនឹងឆ្លើយតបទៅតាមការស្នើសុំនេះ។
កញ្ញា ឈឹម ស៊ីថរ ត្រូវបានសមត្ថកិច្ចចាប់ឃុំខ្លួន និងបញ្ជូនទៅពន្ធនាគារព្រៃសភ្លាមៗ កាលពីថ្ងៃទី២៦ ខែវិច្ឆិកា ឆ្នាំ២០២២ ក្រោយពេល កញ្ញាត្រឡប់មកពីចូលរួមកិច្ចប្រជុំនៅប្រទេសអូស្ត្រាលី ។ដោយឡែកកូដករប្រមាណ១០នាក់ត្រូវបានក្រុមហ៊ុនប្ដឹងពីបទរំលោភលើលំនៅឋានធ្វើឱ្យខូចខាតដោយចេតនា មានស្ថានទម្ងន់ទោសនៅពេលពួកគាត់ចេញតវ៉ាដើម្បីទាមទាររកដំណោះស្រាយពីថៅកែក្រុមហ៊ុនណាហ្គាវើលដ៍។
វិវាទការងាររបស់ក្រុមកូដករនិងក្រុមហ៊ុន ណាហ្គាវើលដ៍នេះបានអូសបន្លាយពេលជាង១ឆ្នាំមកហើយ ក្រោយក្រុមហ៊ុនបញ្ឈប់បុគ្គលិកក្រោមហេតុផលជួបវិបត្តិហិរញ្ញវត្ថុដោយសារជំងឺកូវីត១៩(COVID 19) ប៉ុន្តែកម្មករ អះអាងថា ក្រុមហ៊ុន មានចេតនារំលាយសហជីពឯករាជ្យទៅវិញទេ ពីព្រោះក្រុមហ៊ុននៅតែចំណេញច្រើនគួរសមក្នុងអំឡុងពេលដែលមានវិបត្តិរាលដាលជំងឺកូវីដ ១៩(COVID-19)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។