ល្បែង​ស៊ីសង​តាម​អនឡាញ ក្នុង​មូលដ្ឋាន​មួយ​ចំនួន​នៅ​តែ​បន្ត​ដំណើរការ

ដោយ មាន ឫទ្ធិ
2023.02.05
ល្បែង​ស៊ីសង​តាម​អនឡាញ ក្នុង​មូលដ្ឋាន​មួយ​ចំនួន​នៅ​តែ​បន្ត​ដំណើរការ ទីកន្លែងចាក់​ឆ្នោត​អនឡាញឡូតូ​​ (Online Lotto) មួយ​កន្លែ​ង​នៅ​រាជធានី​ភ្នំពេញនាពេលកន្លងមក។
រូប៖ ពលរដ្ឋ​ផ្ដល់​ឲ្យ

ការ​ភ្នាល់​ល្បែង​ស៊ីសង​តាម​ប្រព័ន្ធ​អនឡាញ (Online) នៅ​តែ​បន្ត​កើត​មាន​ច្រើន ដោយសារ​តែ​អាជ្ញាធរ​មូលដ្ឋាន​ទទួល​លុយ​សំណូក​ពី​ម្ចាស់​អាជីវកម្ម​ដែល​បើក​ល្បែង​ភ្នាល់​តាម​អនឡាញ។ មន្ត្រីសង្គមស៊ីវិល​ជំរុញ​ដល់​រដ្ឋាភិបាល​គួរ​បោសសម្អាត​មន្ត្រី​ពុករលួយ​តាម​មូលដ្ឋាន​ជាមុន​សិន ទើប​អាច​ចាត់​វិធានការ​លើ​ល្បែង​ភ្នាល់​តាម​អនឡាញ​នេះ​មាន​ប្រសិទ្ធភាព។

ការ​ប្រកាស​របស់​លោក​នាយករដ្ឋមន្ត្រី ហ៊ុន សែន កន្លងទៅ​ដែល​ណែនាំ​ឱ្យ​អាជ្ញាធរ​មូលដ្ឋាន​បង្ក្រាប និង​ទប់ស្កាត់​ល្បែង​ស៊ីសង​គ្រប់​ប្រភេទ​នោះ អាច​គ្រាន់​ជា​វិធានការ​ភ្លើង​ចំបើង ដ្បិត​មន្ត្រី​អាជ្ញាធរ​តាម​មូលដ្ឋាន​មួយ​ចំនួន​នៅតែ​ប្រព្រឹត្ត​អំពើ​ពុករលួយ​ទទួល​លុយ​កាក​ពី​ឈ្មួញ ដើម្បី​ឱ្យ​បន្ត​អាជីវកម្ម​ការ​ភ្នាល់​ល្បែង​តាម​អនឡាញ។

ទោះជាយ៉ាងណា មក​ទល់​ពេល​នេះ ការ​ភ្នាល់​ល្បែង​ស៊ីសង​តាម​ប្រព័ន្ធ​អនឡាញ​នៅ​តាម​បណ្ដា​ខេត្ត​មួយ​ចំនួន​ដូចជា ខេត្ត​កណ្ដាល កំពត កែប និង​ខេត្ត​បន្ទាយមានជ័យ ជាដើម នៅតែ​បន្ត​ដំណើរ​ការ​ជា​ធម្មតា​ដោយ​គ្មាន​អាជ្ញាធរ​ចុះ​បង្ក្រាប​ឡើយ។ ក្រៅ​ពី​នេះ នៅ​តាម​បណ្ដា​ខេត្ត​មួយ​ចំនួន​ទៀត​បើទោះជា​ពុំ​មាន​ការ​ចាក់​ភ្នាល់ល្បែង​តាម​អេក្រង់​ទូរទស្សន៍​ដូច​មុន​នោះ ក៏ក្រុម​ឈ្មួញ​ងាកមក​ប្រើ (iPad) ជំនួស​វិញ។

អ្នក​រត់​ម៉ូតូ​ឌុប​ម្នាក់​ក្នុង​ខេត្តកំពត លោក មាស វាសនា ប្រាប់​វិទ្យុអាស៊ីសេរី​នៅ​ថ្ងៃទី៥ ខែកុម្ភៈ ថា ល្បែង​ចាក់​ភ្នាល់​តាម​អនឡាញ​នៅ​ក្រុង​កំពត​នៅតែ​បន្ត​កើត​មាន​ច្រើន។ លោក​បញ្ជាក់​ថា នៅ​តាម​តូប​កាហ្វេ​គេ​មិន​លេង​បើក​ចំហ​ដូច​មុន​នោះ​ទេ ដោយ​នៅ​តាម​តូប​ខ្លះ​គេ​បិទបាំង​វាំងនន​លេង​ខាង​ក្នុង​ផ្ទះ។ លោក​អះអាង​ថា អាជ្ញាធរ​ខេត្តកំពត​មិន​ចាត់វិធានការ​លើ​អ្នក​បើក​ល្បែង​ភ្នាល់​តាម​អនឡាញ​ទាំង​នោះ​ទេ ដោយសារ​តែ​មន្ត្រី​មួយ​ចំនួន​ទទួល​បាន​ផល​ប្រយោជន៍​ពី​ក្រុម​ឈ្មួញ​ទាំងនោះ៖

«សម្ដី​លោក​សម្ដេច លោក ហ៊ុន សែន និយាយ​ឱ្យ​ចំ​ទៅ​សម្ដី​បាន​មែន ប៉ុន្តែ​កូនចៅ​គាត់​នៅ​ខាងក្រោម​អត់​អនុវត្ត​តាម។ ចៅហ្វាយ​ខេត្ត​ក៏​ដោយ លោក ម៉ៅ ធនិន គាត់​បញ្ជា​មែន​ក៏​ប៉ុន្តែ​អ្នក​ក្រោមៗ​គាត់​អត់​មាន​ធ្វើការ គាត់​នៅ​របៀប​ពុករលួយ​ស៊ី​លុយ ឱ្យ​លុយគាត់ [អាជ្ញាធរ]បាន​គាត់​ឱ្យ​លេង ហើយ​លេង​ហ្នឹង​យូរៗ​ចាប់​ម្ដង។ អា​នេះ​ដូច​បណ្ដោយ​ជា​ភ្នាក់​អ៊ីចឹង​លេង​ហើយ​ចាប់​ម្ដង​ហើយ​រួច ឱ្យ​រួច​ហើយ​ប្រហែល​ជា​មួយ​ខែ ឬ​ពីរខែ​ក្រោយ​បើក​មក​វិញ​ដដែល»

ចំណែក ពលរដ្ឋ​ម្នាក់​រស់នៅ​ក្រុងប៉ោយប៉ែត ខេត្ត​បន្ទាយមានជ័យ ថ្លែង​សុំមិន​បញ្ចេញ​ឈ្មោះ​ថា នៅ​តាម​តូប​កាហ្វេ​ និង​តាម​ផ្ទះ​ពលរដ្ឋ​មួយ​ចំនួន​ក្នុង​ក្រុង​នៅ​តែ​បើក​ដំណើរ​ល្បែង​ចាក់​ភ្នាល់​តាម​ប្រព័ន្ធ​អនឡាញ​ក្រោម​រូបភាព​លក់​អីវ៉ាន់​ចាប់ហ៊ួយ​នៅ​ខាង​មុខ​ផ្ទះ។ ប្រភព​ដដែល​បញ្ជាក់​ថា ចំណែក​បញ្ហា​ចោរកម្ម​ដូចជា ការ​ឆក់ ប្លន់ គាស់​ផ្ទះសម្បែង​វិញ​នៅ​ក្រុងប៉ោយប៉ែត​ក៏​គ្មាន​ការ​ថមថយ​នោះ​ដែរ។ លោក​រិះគន់​ថា ការណ៍​ដែល​រដ្ឋាភិបាល​គ្មាន​យន្តការ​លុបបំបាត់​គ្រប់គ្រង​ល្បែង​ស៊ីសង​​ឱ្យ​មាន​ប្រសិទ្ធភាព គឺជា​ដើមចម​សំខាន់​បង្ក​ឱ្យ​មាន​បទល្មើស​ឧក្រិដ្ឋ​នានា​ក្នុងសង្គម៖

«ភាគ​ច្រើន​បើ​គេ​លេង គេ​មាន​ហាង​ដូច​មាន​ផ្ទះ​អាហ្នឹង​គេ​សុទ្ធតែ​មាន​សែ​ទើប​ទៅ​បាន បើ​ដូច​យើង​គេ​មិន​ឱ្យ​ចូល​ទេ។ ទោះ​បី​ជា​នាយករដ្ឋមន្ត្រី​និយាយ​ម៉េច បើ​ខាង​ក្រោម​នៅ​តែ​លេង នៅតែ​បិទបាំង​រហូត។ វា​អាច​ឃុបឃិត​គ្នា ប្រសិនជា​មិន​ឃុបឃិត​គ្នា​ទេ ក៏​លេង​មិន​កើត​ដែរ។ អ៊ីចឹង​មាន​ឃុបឃិត​គ្នា​ឱ្យ​លុយ ប្រសិន​ជា​មិន​ឃុបឃិត​គេ​បិទ​ហើយ​បាទ។ យើង​ចេះ​តែ​ភ័យ​ទី​មួយ​លេងល្បែង​ស៊ីសង​កាលណា​ពេល​ចាញ់​ពេល​អ៊ីចឹង​ទៅ​រក​ឯណា​មិន​បាន ដើរ​លួច​ឆក់​ប្លន់»

ទាក់ទង​នឹង​រឿង​នេះ វិទ្យុអាស៊ីសេរី​មិន​អាច​ទាក់ទង​អភិបាល​ខេត្តកំពត លោក ម៉ៅ ធនិន និង​ស្នង​នគរបាល​ខេត្ត​នេះ​គឺ លោក ម៉ៅ ច័ន្ទមធុរិទ្ធ ដើម្បី​សាកសួរ​ជុំវិញ​បញ្ហា​នេះ​បាន​ទេ។ ចំណែក អគ្គលេខាធិការ​នៃ​គណៈកម្មការ​គ្រប់គ្រង​ល្បែង​ពាណិជ្ជកម្ម​កម្ពុជា លោក រស់ ភីរុណ ក៏​មិន​អាច​ទាក់ទង​បាន​ដែរ​នៅ​ថ្ងៃទី៥ ខែកុម្ភៈ។

រីឯ ស្នងការនគរបាល​ខេត្តបន្ទាយមានជ័យ លោក សិទ្ធ ឡោះ បាន​បញ្ចេញ​ប្រតិកម្ម​ទៅនឹង​នៃ​ការ​រាយការណ៍​របស់​ពលរដ្ឋ​ទាំងនេះ។ លោក​បន្ត​ថា កម្ពុជា​មាន​សុខ​សន្តិភាព ហើយ​ក្នុង​ក្រុងប៉ោយប៉ែត​ពុំ​មាន​ការ​បើក​ល្បែង​សង​ភ្នាល់​តាម​អនឡាញ​ទៀត​នោះ​ទេ៖

«ប្រជាពលរដ្ឋ​មួយណា? កុំ​ចេះតែ​លើក​ប្រធានបទ​ដែល​អត់​មាន​មូលដ្ឋាន គាត់​ព្រួយបារម្ភ​អី​អត់​មាន​អី​ព្រួយបារម្ភ​ទេ​គេ​មាន​សុខ​សន្តិភាព​តើ​បង​ចេះ​តែ​ព្រួយបារម្ភ​ឯណា? បងៗ​ឱ្យ​ប្រជាពលរដ្ឋ ដើម្បី​ឱ្យ​ជួប​គ្នា​ជាមួយ​ខ្ញុំ។ ឥឡូវ​នេះ​បង​នៅ​ទីណា? បង​មក​ជួប​ខ្ញុំ​ផ្ទាល់ ខ្ញុំ​នឹង​នាំ​បង​ជូន​ខ្ញុំ​ទៅ​ខ្ញុំ​ធ្វើការ​ជូន»

រដ្ឋមន្ត្រីក្រសួងមហាផ្ទៃ លោក ស ខេង កាល​ពី​ចុង​ឆ្នាំ ២០២២ បាន​ណែនាំ​ឱ្យ​អាជ្ញាធរ បង្ការ ទប់ស្កាត់ និង​បង្ក្រាប​រាល់​បទល្មើស លួច ឆក់ ប្លន់ ល្បែងស៊ីសង​ខុសច្បាប់​គ្រប់​ប្រភេទ និង​បទល្មើស​ផ្សេងៗ​ទៀត ដើម្បី​ធានា​សុវត្ថិភាព​ប្រជាពលរដ្ឋ និង​រក្សា​សណ្ដាប់ធ្នាប់​សាធារណៈ។ ជាមួយ​គ្នា​នេះ លោក​នាយករដ្ឋមន្ត្រី ហ៊ុន សែន ព្រមាន​ដក​តំណែង​អាជ្ញាធរ​មូលដ្ឋាន​ប្រសិន​បើ​មន្ត្រី​ទាំងនោះ​គ្មាន​សមត្ថភាព​ក្នុង​ការ​ទប់ស្កាត់ និង​បង្ក្រាប​បទល្មើស​ល្បែង​ស៊ីសង​តាម​ប្រព័ន្ធ​អនឡាញ។

ទោះ​បី​យ៉ាង​នេះ​ក្ដី ក្រុមអ្នកឃ្លាំមើល និង​ប្រជាពលរដ្ឋ​រិះគន់​ថា ការ​ភ្នាល់​ល្បែង​ស៊ីសង​តាម​ប្រព័ន្ធ​អនឡាញ​ក្នុង​មូលដ្ឋាន​នៅតែ​បន្ត​កើតមានឡើង​ដោយសារ​តែ​មន្ត្រី​អាជ្ញាធរ​តាម​មូលដ្ឋាន​មួយ​ចំនួន​ប្រព្រឹត្ត​អំពើ​ពុករលួយ។

ប្រធានសមាគម​និស្សិត​បញ្ញវន្ត​ខ្មែរ លោក កើត សារ៉ាយ រិះគន់​ថា ការណ៍​ដែល​រដ្ឋាភិបាល​មិន​អាច​ទប់ស្កាត់​ល្បែង​ស៊ីសង​តាម​ប្រព័ន្ធ​អនឡាញ​នេះ​បាន គឺ​ដោយសារ​អាជ្ញាធរ​តាំង​ពី​ថ្នាក់​ក្រោម​ដល់​ថ្នាក់​ជាតិ​ប្រព្រឹត្ត​អំពើ​ពុក​រលួយ​ជា​ប្រព័ន្ធ និង​គ្មាន​ការ​អនុវត្ត​ច្បាប់​លើ​ជនល្មើស៖

«ល្បែង​ស៊ីសង​ផ្សេង​ហ្នឹង​ទាំងអស់​ហ្នឹង​យូរៗ​ទៅ​វា​វិវត្តន៍​ជា​ផល​ប្រយោជន៍​របស់​មន្ត្រី​ថ្នាក់​មូលដ្ឋាន អ៊ីចឹង​ប្រសិន​ជា​ឱ្យ​គាត់​បំបាត់​អា​ហ្នឹង​ទាំង​ស្រុង​ផលប្រយោជន៍​គាត់​ធ្លាប់​ទទួល​បាន​គឺ​វា​បាត់បង់​ដែរ។ អ៊ីចឹង​ទាល់​តែ​រដ្ឋាភិបាល និង​សាមី​ក្រសួង​មាន​ឆន្ទៈ​ពិតប្រាកដ​ប្ដេជ្ញា​ចិត្ត​អា​ហ្នឹង​ទើប​អាច​ធ្វើ​ទៅ​បាន»

នា​រយៈពេល​ប៉ុន្មាន​ឆ្នាំ​ចុងក្រោយ​នេះ​ក្រៅ​ពី​មាន ល្បែង​ភ្នាល់​អនឡាញ បៀ អាប៉ោង ឆ្នោត​ឡូតូ​បាន​រីក​ដូច​ផ្សិត ក៏​មាន​ល្បែង​ចាក់​ភ្នាល់​តាម​ប្រព័ន្ធ​អនឡាញ​ដូចជា ល្បែង​ចាក់​បាល និង​ល្បែង​បាញ់​ត្រី តាម​វេបសាយ (Website) ដែល​គេ​ស្គាល់​ថា​ក្រុមហ៊ុន​ភ្នាល់​ល្បែង​ទាំងនោះ​ភាគច្រើន​ជា​របស់​ក្រុមហ៊ុន​ចិន និង​វៀតណាម។

ប្រជាពលរដ្ឋ និង​មន្ត្រីសង្គមស៊ីវិល យល់ថា បើ​រដ្ឋាភិបាល​មិន​ចាត់​វិធានការ​លើ​មន្ត្រី​មួយ​ចំនួន​ដែល​ប្រព្រឹត្ត​អំពើ​ពុករលួយ នោះ​រដ្ឋាភិបាល​នឹង​មិន​អាច​លុប​បំបាត់​ល្បែង​ភ្នាល់​តាម​អនឡាញ​នេះ​ឱ្យ​មាន​ប្រសិទ្ធភាព​នោះទេ។ លើស​ពី​នេះទៀត កូនខ្មែរ​ជំនាន់​ក្រោយ​នឹង​អាចនឹង​ឈ្លក់វង្វេង​ទៅនឹង​ល្បែង​ស៊ីសង ហើយ​ភូមិ​ឃុំ ក៏​គ្មាន​សុវត្ថិភាព​ដែរ ប្រសិនបើ​វិស័យ​ល្បែង​ស៊ីសង​នៅតែ​បន្ត​បើក​ដំណើរ​ដោយ​គ្មាន​អាជ្ញាធរ​ចាត់​វិធាន​ការ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។