ទំនាស់រវាងគ្រូបង្រៀនមួយក្រុមជាមួយនឹងនាយកសាលា ដែលទើបតែឡើងគ្រប់គ្រងថ្មីនៅវិទ្យាល័យស្រុកក្រឡាញ់ ឋិតនៅចម្ងាយជាង ៧០គីឡូម៉ែត្រភាគត្បូងឆៀងខាងលិចពីទីរួមខេត្តសៀមរាប គឺបានអូសបន្លាយរយៈពេលជាង ១ឆ្នាំមកហើយ។
ក្រុមគ្រូបង្រៀនប្រមាណ ១៦នាក់ បានរួមគ្នាធ្វើពាក្យបណ្ដឹងដាក់ទៅស្ថាប័នពាក់ព័ន្ធជាច្រើនលើកច្រើនសា ព្រមទាំងបានធ្វើកូដកម្មមិនបង្រៀនសិស្សផង ដើម្បីតវ៉ាឲ្យដកនាយកថ្មីនោះចេញពីតំណែងវិញ ក៏ប៉ុន្តែរហូតមកដល់ពេលនេះ នៅតែមិនទាន់ទទួលបានដំណោះស្រាយសមរម្យទេ។
គ្រូបង្រៀនប្រមាណ ១៦នាក់នៅវិទ្យាល័យក្រឡាញ់ ទើបតែសុខចិត្តនាំគ្នាចូលបង្រៀនសិស្សនៅតាមថ្នាក់ជាធម្មជាតិវិញក្នុងរយៈពេល ៤ថ្ងៃមកនេះ បន្ទាប់ពីពួកគេបានធ្វើកូដកម្មតវ៉ាប្រឆាំងនឹងនាយកសាលា ដែលទើបតែឡើងកាន់តំណែងថ្មី ហើយផ្អាកមិនបង្រៀនសិស្សរយៈពេលជាង ២សប្ដាហ៍កន្លងមកហើយ។
ក្រុមគ្រូបង្រៀនទាំងនោះបញ្ជាក់ថា បើទោះបីជាពួកគេសុខចិត្តវិលចូលមកបង្រៀនសិស្សជាធម្មតាវិញក៏ដោយ ក៏មិនមែនមានន័យថា ពួកគេបោះបង់ចោលការតវ៉ាប្រឆាំងនឹងនាយកវិទ្យាល័យក្រឡាញ់ ដែលទើបតែឡើងកាន់តំណែងថ្មីនោះទេ។
គ្រូបង្រៀនម្នាក់ក្នុងចំណោមអ្នកដែលទាមទារឲ្យមានការផ្លាស់ប្ដូរនាយកសាលាថ្មី គឺលោក ឌិន ចាន្ថា។ លោកមានប្រសាសន៍ថា រូបលោក និងគ្រូបង្រៀន ១៥នាក់ផ្សេងទៀត ទើបតែសុខចិត្តចូលបង្រៀនសិស្សជាធម្មតាវិញបានរយៈពេល ៤ថ្ងៃប៉ុណ្ណោះ គិតរហូតមកដល់ថ្ងៃទី១១ ខែមិថុនា។ គ្រូបង្រៀនដដែលបញ្ជាក់ថា ចាប់តាំងតែពីថ្ងៃទី២៥ ខែឧសភា គឺរូបលោក និងគ្រូបង្រៀនចំនួន ១៦នាក់ បាននាំគ្នាធ្វើកូដកម្មមិនចូលបង្រៀនសិស្សទេ ដើម្បីទាមទារឲ្យមានការផ្លាស់ប្ដូរនាយកវិទ្យាល័យក្រឡាញ់ ឈ្មោះ ស៊ាន ផល្លា ចេញពីតួនាទី ប៉ុន្តែទាំងមន្ត្រីមន្ទីរអប់រំ យុវជន និងកីឡា រួមនឹងអាជ្ញាធរខេត្តសៀមរាប បែរជាមិនយកចិត្តទុកដាក់ដោះស្រាយទេ។ លោក ឌិន ចាន្ថា បញ្ជាក់ថា ថ្វីត្បិតតែពេលនេះរូបលោក និងគ្រូបង្រៀនជាច្រើនទៀត សុខចិត្តចូលបង្រៀនវិញក៏ដោយ ក៏ប៉ុន្តែមិនមែនមានន័យថា បញ្ចប់ការទាមទារឡើយ៖ «យើងរៀបចំរបាយការណ៍ដើម្បីដាក់ទៅអភិបាលខេត្តបន្តទៀត ដើម្បីឲ្យមានការដោះស្រាយ ព្រោះអីមន្ត្រីរបស់មន្ទីរអប់រំ យុវជន និងកីឡា មកហើយទៅវិញ សរសេរតែរបាយការណ៍អត់ពិតមួលបង្កាច់បំភ្លៃខុសពីការពិត»។
គ្រូម្នាក់ទៀតឈ្មោះ ឡាប សុផន អះអាងថា នាយកវិទ្យាល័យក្រឡាញ់ ដែលទើបតែឡើងកាន់តំណែងថ្មីឈ្មោះ ស៊ាន ផល្លា នោះ គឺបានប្រព្រឹត្តអំពើពុករលួយទៅលើការចាយវាយថវិកាទ្រទ្រង់សាលា ដែលហៅកាត់ថា ភីប៊ី (PB) ព្រមទាំងបង្កើតឲ្យមានបក្ខពួកនិយមនៅក្នុងចំណោមគ្រូបង្រៀន និងសិស្សទៀតផង៖ «លោក ស៊ាន ផល្លា ហ្នឹងគាត់មិនមានចរិតកែប្រែទាំងអស់ និយាយទៅការចាយវាយ (PB) ក៏នៅតែមិនមានតម្លាភាព។ អត់មានការរីកចម្រើនទៅមុខ អត្តចរិតនៃការគ្រប់គ្រងនៅតែបែងចែកឲ្យគ្រូៗមានបក្សគាំទ្រ និងបក្សមិនគាំទ្រជាដើម»។
ទោះយ៉ាងណា វិទ្យុអាស៊ីសេរី មិនអាចស្វែងរកការទាក់ទងនាយកវិទ្យាល័យក្រឡាញ់ លោក ស៊ាន ផល្លា ដើម្បីសុំប្រតិកម្មជុំវិញការចោទប្រកាន់ពីក្រុមគ្រូបង្រៀនទាំងនោះបានថាយ៉ាងណានៅឡើយ។
ចាប់តាំងតែពីអំឡុងខែមិថុនា ឆ្នាំ២០១៤ មក ក្រុមគ្រូបង្រៀនខ្លះបានប្ដឹងនាយកវិទ្យាល័យក្រឡាញ់ ពាក់ព័ន្ធនឹងអំពើពុករលួយ ក៏ប៉ុន្តែរហូតមកដល់ពេលនេះមិនមានមន្ត្រីណារកយុត្តិធម៌ឲ្យបានត្រឹមត្រូវនៅឡើយទេ។ ចាប់តាំងពីមានបណ្ដឹងប្រឆាំងនឹងនាយកវិទ្យាល័យនោះមក គឺមានមន្ត្រីមន្ទីរអប់រំ យុវជន និងកីឡា ខេត្តសៀមរាប ព្រមទាំងមន្ត្រីសាលាខេត្តផង បានចេញចូលទៅប្រជុំ និងសម្របសម្រួលជាញឹកញាប់ ក៏ប៉ុន្តែមិនមានដំណោះស្រាយសមរម្យឲ្យគ្រូបង្រៀនមួយក្រុម ដែលតវ៉ានោះអាចទទួលយកបានទេ។
ប្រធានមន្ទីរអប់រំ យុវជន និងកីឡា ខេត្តសៀមរាប លោក អ៊ុង សេរីឌី បានបដិសេធមិនធ្វើការពន្យល់ជុំវិញដំណោះស្រាយយ៉ាងណាទៀតទេ ដោយលោកប្រាប់ថា កំពុងជាប់រវល់។ ក៏ប៉ុន្តែកាលពីថ្ងៃទី២៤ ខែឧសភា កន្លងទៅ លោក អ៊ុង សេរីឌី ធ្លាប់មានប្រសាសន៍ថា បញ្ហាទំនាស់រវាងគ្រូបង្រៀន ១ក្រុមជាមួយនាយកវិទ្យាល័យក្រឡាញ់ នោះ មិនមែនតែមន្ទីរអប់រំ យុវជន និងកីឡា ប៉ុណ្ណោះទេ ដែលតែងចុះទៅដោះស្រាយជាញឹកញាប់ សូម្បីតែអភិបាលរងខេត្តសៀមរាប លោក ម៉ៅ វុឌ្ឍី ក៏ធ្លាប់ចុះទៅដោះស្រាយដែរ។ លោក អ៊ុង សេរីឌី បញ្ជាក់ថា មន្ទីរអប់រំ យុវជន និងកីឡា បានស្រាវជ្រាវរួចហើយ គឺនាយកវិទ្យាល័យក្រឡាញ់ ដែលទើបតែមកគ្រប់គ្រងថ្មីនោះមិនមានកំហុស ដូចដែលគ្រូបង្រៀនខ្លះចោទប្រកាន់នោះទេ។ លោក អ៊ុង សេរីឌី បានចាត់ទុកថា មានតែគ្រូបង្រៀន ៥-៦នាក់ទេដែលរឹងរូសមិនទទួលស្គាល់ការគ្រប់គ្រងរបស់នាយកថ្មី៖ «ការប្ដឹងផ្ដល់នោះវាគ្រាន់តែជាបញ្ហាបុគ្គល ១ក្រុមទេ ឯគ្រូភាគច្រើន គឺគេគាំទ្រការដឹកនាំ ឬក៏ការបំពេញការងាររបស់នាយកហ្នឹង»។
សមាជិកក្រុមប្រឹក្សាស្រុកក្រឡាញ់ លោក ស៊ឹម សោភ័ណ មានប្រសាសន៍ថា លោកហាក់ដូចជាមិនយល់ចំពោះមន្ត្រីមន្ទីរអប់រំ យុវជន និងកីឡា ព្រមទាំងអភិបាលរងខេត្តសៀមរាប ដែលចុះមកដោះស្រាយបញ្ហាជម្លោះរវាងគ្រូបង្រៀន ជាមួយនាយកវិទ្យាល័យក្រឡាញ់ ជាញឹកញាប់ ក៏ប៉ុន្តែនៅតែមិនអាចផ្ដល់យុត្តិធម៌បាននោះ។ លោក ស៊ឹម សោភ័ណ បញ្ជាក់ថា ទាំងប្រធានក្រុមប្រឹក្សា និងសមាជិកក្រុមប្រឹក្សាស្រុកក្រឡាញ់ ភាគច្រើនសុទ្ធតែគាំទ្រឲ្យមានការដកហូតតួនាទីនាយកសាលានោះ ហើយកាលពីពេលថ្មីៗ ក្រុមប្រឹក្សាស្រុកក្រឡាញ់ សម្រេចវិសាលភាពឲ្យមានការផ្លាស់ប្ដូរនាយកវិទ្យាល័យនោះទៀតផង៖ «គេបានរកឃើញច្រើន ដូចជាការចាយវាយប្រាក់ (PB) ខុសខ្ទង់ បន្លំហត្ថលេខាអីផងទៅធ្វើឲ្យលោកគ្រូអ្នកគ្រូមួយចំនួន គាត់មិនពេញចិត្ត មិនសប្បាយចិត្ត»។
ក្រុមគ្រូបង្រៀន ១៦នាក់ដែលកំពុងទាមទារឲ្យមានការផ្លាស់ប្ដូរនាយកវិទ្យាល័យក្រឡាញ់ ទាំងនោះ ឲ្យដឹងថា ពួកគេនឹងមិនបោះបង់ចោលការតវ៉ាដោយងាយៗឡើយ ហើយពួកគេកំពុងរកច្រកទំនាក់ទំនងទៅកាន់មន្ត្រីក្រសួងអប់រំ យុវជន និងកីឡា ដើម្បីស្រាវជ្រាវរឿងនេះឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។