អាជ្ញាធរថៃបង្ក្រាបបានឧក្រិដ្ឋជនឆបោកមានមូលដ្ឋាននៅកម្ពុជាជាច្រើនករណី ទោះបីរដ្ឋាភិបាលកម្ពុជាបានប្ដេជ្ញាលុបបំបាត់
2024.12.06
អាជ្ញាធរថៃបានបង្ក្រាប និងចាប់ខ្លួនឧក្រិដ្ឋជនឆបោកតាមអ៊ីនធឺណិតជាបន្តបន្ទាប់ ដោយអាជ្ញាធរថៃរកឃើញថា ឧក្រិដ្ឋជនខ្លះ បានព្យាយាមរត់គេចខ្លួនចូលមកកម្ពុជា និងខ្លះទៀតជាជនបរទេស ប៉ុន្តែមានសញ្ជាតិខ្មែរ។ អាជ្ញាធរថៃដាក់ការសង្ស័យថា ឧក្រិដ្ឋជនឆបោកទាំងនោះ អាចមានក្រុមខ្សែបណ្ដាញធំ ដែលមានទីតាំងនៅក្នុងប្រទេសកម្ពុជា។ មន្ត្រីសង្គមស៊ីវិលជំរុញអាជ្ញាធរកម្ពុជា ឱ្យបង្កើនកិច្ចសហប្រតិបត្តិការជាមួយអាជ្ញាធរថៃ ដើម្បីប្រយុទ្ធប្រឆាំងនឹងឧក្រិដ្ឋកម្មឆបោកតាមអ៊ីនធឺណិត។
គិតត្រឹមដើមខែធ្នូ នេះ អាជ្ញាធរថៃបានបង្ក្រាបករណីឆបោកតាមអ៊ីនធឺណិតជាបន្តបន្ទាប់ ដែលគេសង្ស័យថា ឧក្រិដ្ឋជនទាំងនេះ បានបំបែកសាខាចេញពីខ្សែបណ្ដាញធំនៅកម្ពុជា។
ក្នុងនោះ កាលពីថ្ងៃទី៤ ខែធ្នូ សមត្ថកិច្ចប្រឆាំងបទល្មើសបច្ចេកវិទ្យារបស់ថៃ បានបើកប្រតិបត្តិការចុះឆែកឆេរមជ្ឈមណ្ឌលឆបោកតាមអ៊ីនធឺណិត ដែលអាជ្ញាធររកឃើញថា គ្រប់គ្រងដោយជនជាតិចិនមានសញ្ជាតិខ្មែរ ដែលបង្កប់ខ្លួនក្នុងរមណីយដ្ឋានមួយកន្លែង នៅខេត្តឈៀងម៉ៃ (Chiang Mai)។ នៅក្នុងប្រតិបត្តិការចុះបង្ក្រាបនោះ សមត្ថកិច្ចរកឃើញក្រុមជនជាតិចិនចំនួន ៩នាក់ ជនជាតិភូមាចំនួន ៤នាក់ និងឧបករណ៍ទូរគមនាគមន៍ ប្រើសម្រាប់ប្រព័ន្ធអ៊ីនធឺណិតខុសច្បាប់ជាច្រើនទៀត។
ដោយឡែកកាលពីថ្ងៃទី២ ខែធ្នូ កម្លាំងសមត្ថកិច្ចថៃបានចាប់ខ្លួនបុរសជនជាតិចិនម្នាក់ ស្ថិតក្នុងស្រុកអារញ្ញប្រាថេត (Aranyaprathet) ខេត្តស្រះកែវ (SaKeo) ជិតព្រំដែនកម្ពុជា ដែលគេសង្ស័យថា បុរសចិនរូបនោះ គឺជាមេខ្លោងឆបោកតាមអ៊ីនធឺណិត និងព្យាយាមរត់គេចខ្លួនចូលប្រទេសកម្ពុជា។ អាជ្ញាធរថៃបានរកឃើញថា ជនសង្ស័យឈ្មោះ ទឺមីន វិន (Demin Wen) បានដំឡើងប្រព័ន្ធប្រតិបត្តិការឆបោកជាច្រើនកន្លែងនៅតាមផ្ទះជួលក្នុងខេត្តឈៀងម៉ៃ (Chiang Mai) ដើម្បីជួយសម្រួលដល់មជ្ឈមណ្ឌលឆបោក។ ក្នុងនោះសមត្ថកិច្ចបានឆ្មក់ចូល ឆែកឆេរទីតាំងមួយកន្លែងរបស់ជនសង្ស័យ ដោយប៉ូលិសបានរកឃើញស៊ីមកាតចំនួនជិត ៦០ម៉ឺន (៥៩០.០០០) កុំព្យូទ័រ ៧២គ្រឿង និងទូរស័ព្ទដៃចំនួនជាង ១ពាន់គ្រឿង (១.៤៥៥គ្រឿង)។
នៅក្នុងថ្ងៃដដែលនោះ ស្ថានទូតថៃប្រចាំនៅទីក្រុងភ្នំពេញ បានជួយសង្គ្រោះជនជាតិថៃចំនួន ៤នាក់ ដែលបានរត់គេចខ្លួនពីកន្លែងឃុំឃាំង និងឆបោកតាមអនឡាញរបស់ជនជាតិចិនមួយកន្លែង នៅក្នុងប្រទេសកម្ពុជា និងបញ្ជូនទៅប្រទេសកំណើត។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ កត់សម្គាល់ឃើញថា ក្រុមឧក្រិដ្ឋជនឆបោកតាមប្រព័ន្ធអនឡាញ ហាក់មានជំនាញកាន់តែខ្លាំង និងពង្រីកបណ្ដាញកាន់តែច្រើន។ លោកបន្តថា ដើម្បីប្រឆាំងនឹងឧក្រិដ្ឋកម្មទាំងនេះ អាជ្ញាធរកម្ពុជា គួរតែសហការជាមួយអាជ្ញាធរប្រទេសជិតខាង ដោយបោសសម្អាតបទល្មើសនេះចាប់ផ្ដើមចេញពីតំបន់ព្រំដែន ជាពិសេសគឺការប្រើប្រាស់វិធានគ្រប់គ្រងច្រកចេញចូល នៃប្រព័ន្ធអ៊ីនធឺណិតឱ្យចំគោលដៅទៅលើក្រុមឧក្រិដ្ឋជនទាំងនេះ។
លោក សេក សុជាតិ៖ «អ៊ីចឹងគួរតែផ្ដោតប្រព័ន្ធសន្តិសុខឌីជីថល ឬក៏អ៊ីនធឺណិតហ្នឹងទៅលើក្រុមបរទេស ឬក៏ទីតាំងកន្លែងណាដែលមានការសង្ស័យខ្ពស់ ជាជាងការយកបញ្ហាទាំងអស់ហ្នឹង ឬក៏បច្ចេកវិទ្យាទាំងអស់ហ្នឹងធ្វើទុក្ខបុកម្នេញទៅលើក្រុមសកម្មជន ឬក៏អ្នកដែលមិនមានជាប់ពាក់ព័ន្ធជាមួយនឹងបទល្មើស ហើយគ្រាន់តែធ្វើដើម្បីកិច្ចការងារសង្គមអីជាដើម»។
វិទ្យុអាស៊ីសេរី មិនអាចទាក់ទងអ្នកនាំពាក្យរងក្រសួងមហាផ្ទៃ លោក ទូច សុឃៈ និងអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី៥ ខែធ្នូ។
អ្នកស្រី ជូ ប៊ុនអេង ធ្លាប់ប្រាប់វិទ្យុអាស៊ីសេរី ថា កម្ពុជា ក៏ជាប្រទេសដែលរងគ្រោះពីឧក្រិដ្ឋកម្មឆបោកតាមអ៊ីនធឺណិត និងចាប់ជំរិតដែរ ហើយក្នុងករណីនេះ រដ្ឋាភិបាលនៃប្រទេសសាមី គួរតែរួមគ្នាទប់ស្កាត់ និងប្រយុទ្ធប្រឆាំងនឹងការជួញដូរមនុស្ស ជាជាងការដាក់បន្ទុក និងទម្លាក់កំហុសទៅលើប្រទេសណាមួយ។
យ៉ាងណាមិញ នៅក្នុងកិច្ចប្រជុំកំពូលអាស៊ាន នៅរដ្ឋធានីវៀងចន្ទន៍(Vientiane) ប្រទេសឡាវ(Laos) កាលពីថ្ងៃទី៩ ខែតុលា នាយករដ្ឋមន្ត្រីថៃ អ្នកស្រី ផេថងថាន ស៊ីណាវ៉ាត់(Paetongtarn Shinawatra) បានលើកយកបញ្ហាឧក្រិដ្ឋកម្មឆ្លងដែននេះ ទៅពិភាក្សាទ្វេភាគីជាមួយលោកនាយករដ្ឋមន្ត្រី ហ៊ុន ម៉ាណែត ដើម្បីរកវិធីដោះស្រាយបញ្ហានេះ។
ទោះជាបែបនេះក្ដី រដ្ឋាភិបាលកម្ពុជាមិនបានបង្ហាញពីទំនួលខុសត្រូវ ចំពោះករណីឆបោកតាមអ៊ីនធឺណិតនេះនោះទេ ដោយកន្លងមកអាជ្ញាធរកម្ពុជា តែងតែច្រានចោលចំពោះការរកឃើញ និងការផ្សព្វផ្សាយរបស់បណ្ដាញព័ត៌មានពីក្រៅប្រទេសមួយចំនួនពាក់ព័ន្ធនឹងការជួញដូរ និងបង្ខាំងមនុស្សដោយខុសច្បាប់ និងការធ្វើទារុណកម្មលើពលករបរទេស ឱ្យធ្វើការឆបោក ថាជាការមួលបង្កាច់ និងលាបពណ៌មកលើកម្ពុជាទៅវិញ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក លោក នី សុខា យល់ឃើញថា ការបង្ក្រាបករណីឆបោកតាមអ៊ីនធឺណិតនេះ ហាក់មានភាពស្មុគស្មាញជាងបទល្មើសធម្មតា ដែលទាមទារឱ្យមានការសហការគ្នា រវាងរដ្ឋនឹងរដ្ឋ ដោយកំណត់ទិសដៅរកមេខ្លោង ដែលបង្កើតបណ្ដាញក្រុមឧក្រិដ្ឋជននេះឡើង។
លោក នី សុខា៖ «រឿងអស់នេះ មិនមែនជារឿងមួយដែលយើងបង្ក្រាបធម្មតាបានទេ។ បើថាមានរនុកក្នុង មានអ្នកឱ្យការណ៍អីទាំងអស់ហ្នឹង គឺថាយើងពិបាកណាស់នៅក្នុងការធ្វើកិច្ចការងារហ្នឹង។ អ៊ីចឹងហើយបានរដ្ឋាភិបាល ឬក៏អាជ្ញាធរមានសមត្ថកិច្ចហ្នឹងទាល់តែមានឆន្ទៈមោះមុតណាស់នៅក្នុងរឿងអស់នេះ ហើយកុំលើកលែងនៅពេលណាដែលយើងរកឃើញបណ្ដាញខ្សែរយៈហើយ ទោះបីអ្នកនោះធំប៉ុណ្ណាក៏ដោយ យើងត្រូវតែវែកមុខឱ្យដល់ឫសគល់ បានយើងអាចបង្ក្រាបបាន។ បើមិនអ៊ីចឹងទេ យើងចាប់បានតែល្អិតល្អោចៗ ដូចយើងវៀចចកអ៊ីចឹង»។
ក្នុងដំណើរទស្សនកិច្ចរយៈពេល ៣ថ្ងៃនៅទីក្រុងប៉េកាំង (Beijing) កាលពីថ្ងៃទី៣ ខែធ្នូ ប្រធានព្រឹទ្ធសភា លោក ហ៊ុន សែន បានស្នើឱ្យប្រធានាធិបតីចិន លោក ស៊ី ជីនពីង (Xi Jinping) ជួយពង្រឹងកិច្ចសហប្រតិបត្តិការសន្តិសុខ ប្រយុទ្ធប្រឆាំងឧក្រិដ្ឋកម្មឆ្លងដែន ការឆបោក ការបង្ក្រាបបទល្មើសល្បែងអនឡាញ។
យោងតាមព័ត៌មានពីស្ថានទូតចិនប្រចាំកម្ពុជា បង្ហាញថា ក្នុងរយៈពេល ៦ខែ ដើមឆ្នាំ២០២៤ នេះ អាជ្ញាធរកម្ពុជាបានចាប់បញ្ជូនជនជាតិចិនជាង ១.២០០នាក់ ដែលជាប់ពាក់ព័ន្ធនឹងអំពើឆបោកតាមប្រព័ន្ធអ៊ីនធឺណិតនៅក្នុងប្រទេសកម្ពុជា ឱ្យត្រឡប់ទៅកាន់ប្រទេសកំណើតវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
