សហជីព​ស្នើ​ក្រសួង​ការងារ និង​និយោជក​ឱ្យ​រក​មធ្យោបាយ​សម​ស្រប ជាជាង​ពន្យារ​ពេល​ចរចា​ប្រាក់​ឈ្នួល​គោល

ដោយ សុជីវី
2020-06-24
Share
គង់ អាទិត្យ (ឆ្វេង) លោក គង់ អាទិត្យ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់​ដេរ​កម្ពុជា ហៅ​កាត់​ថា C-CAWDU និង​លោក ប៉ាវ ស៊ីណា ប្រធាន​សម្ព័ន្ធ​ចលនា​សហជីព​កម្មករ។ រូប៖ ហ្វេសប៊ុក C-CAWDU
រូប៖ ហ្វេសប៊ុក C-CAWDU

សហជីព​ស្នើ​ដល់​ក្រសួង​ការងារ និង​សមាគម​រោងចក្រ​កាត់ដេរ​ថា​អោយ​រិះរក​មធ្យោបាយ​សមស្រប​មួយ​ជា​មុន​សិន ជាជាង​ការសម្រេច​ពន្យារ ពេល​ចរចា​ប្រាក់​ឈ្នួល​គោល​សម្រាប់​កម្មករ​ក្នុង​វិស័យ​កាត់ដេរ និង​ផលិត​ស្បែកជើង​សម្រាប់​ឆ្នាំ២០២១។

សហជីព​ថា ការ​ស្នើ​ពន្យារ​ពេល​ចរចា​ប្រាក់​ឈ្នួល​ផ្ដើម​ដោយ​និយោជក​នេះ​គឺ និយោជក​គិត​តែ​ពី​ផល​ប៉ះពាល់​ក្នុង​ផ្នែក​របស់​ខ្លួន ដោយ​មិន​បាន​គិត​ពី​ផល​ប៉ះពាល់​ដល់​កម្មករ។

ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា​ហៅ​កាត់​ថា C-CAWDU លោក គង់ អាទិត្យ មាន​ប្រសាសន៍​ថា សមាគម​រោងចក្រ​កាត់ដេរ​គួរតែ​ផ្ដល់​ដំណោះស្រាយ​ណាមួយ ដែល​ប្រសើរ​ជាង​ការ​ពន្យារ​ពេល​ចរចា​ប្រាក់​ឈ្នួល​គោល។

លោក​ថា​ហេតុផល​ដែល​លើកឡើង​ដោយ​សមាគម​រោងចក្រ​កាត់ដេរ ដើម្បី​ពន្យារ​ពេល​ចរចា​នោះ​គ្រាន់​តែ​ជា​ការ​អះអាង​របស់​ភាគី​តែ​ម្ខាង ដែល​អាច​និយាយ​បាន​ថា​ពុំ​មាន​តម្លាភាព​សម្រាប់​គ្រប់​ភាគី​អាច​ទទួល​យក​បាន​ឡើយ៖ «ការ​បញ្ជា​ទិញ (order) ដែល​ដាក់​ដោយ​ក្រុមហ៊ុន​ម៉ាក យីហោ (Brand) តើ​វា​មាន​កម្រិត​យ៉ាង​ម៉េច? តើ​វា​ប្រាកដ​ជា​អត់​ការងារ​ធ្វើ​មែន​អត់? ខាង​រដ្ឋាភិបាល​ក៏​ត្រូវ​មាន​អធិការ​កិច្ច​ត្រួត​ពិនិត្យ​ទៅ​លើ​រឿង​ហ្នឹង​ដែរ ដើម្បី​បង្កើត​ប្រព័ន្ធ​តម្លាភាព​មួយ។ យើង​ដឹង​ថា​ផល​ប៉ះ​ពាល់​របស់​កូវីដ-១៩ វា​មាន​ការ​បិទ​ទីផ្សារ​នៅ​អាមេរិក​ នៅ​អឺរ៉ុប អ៊ីចឹង​ការ​ប៉ះ​ពាល់​ជា​រួម​វា​មាន​មែន។ ចំណុចកណ្ដាល​គឺ​យើង​ត្រូវ​មាន​ក្រុមការងារ ឬ​គណៈកម្មការ ឬ​អី​ពិសេស​មួយ ដែល​បញ្ចូល​សហជីព​ទាំង​អស់ តំណាង​និយោជក ហើយ​មាន​អ្នក​ជំនាញ​ពី​អាយឡូ (ILO) ពី​អី​មក ដើម្បី​ត្រួត​ពិនិត្យ​មិន​មែន​ចេះ​តែ​និយោជក​គាត់​ចេះ​តែ​ថា​បាន​ទេ»

សមាគម​រោងចក្រ​កាត់ដេរ​នៅ​កម្ពុជា GMAC បាន​ចេញ​សេចក្ដី​ថ្លែង​ការណ៍​មួយ​កាល​ពី​ថ្ងៃ​ទី២៣ ខែ​មិថុនា ដោយ​លើក​ឡើង​ពី​ផល​ប៉ះ​ពាល់​ទៅ​លើ​វិស័យ​វាយនភណ្ឌ​កាត់ដេរ និង​ផលិត​ស្បែកជើង ដោយសារ​វិបត្តិ​ជំងឺ​កូវីដ-១៩ ក្នុង​នោះ​មាន​រោងចក្រ​សហគ្រាស​ជាច្រើន​បាន​ផ្អាក​សកម្មភាព ព្រោះ​តែ​អ្នក​បញ្ជា​ទិញ​ជា​ច្រើន​បាន​លុបចោល​ការ​បញ្ជា​ទិញ មិន​ទទួល​យក​ទំនិញ ថែម​ទាំង​មាន​ករណី​មិន​ទូទាត់​ប្រាក់ ដែល​បាន​ព្រមព្រៀង​ថែមទៀត។ GMAC ថា ស្ថានភាព​នេះ​មិន​ដឹង​ថា​អាច​វិល​ទៅ​រក​ភាព​ធម្មតា​វិញ​នៅ​ពេល​ណា​ឡើយ ហេតុនេះ​គួរតែ​ពន្យារ​ការ​ចរចា​ប្រាក់​ឈ្នួល​ហើយ​ប្រាក់​ឈ្នួល​អប្បរមា ដែល​មាន​ស្រាប់​ក្នុង​ផ្នែក​នេះ​​គួរតែ​រក្សា​ដដែល រហូត​ដល់​ពេល ដែល​ស្ថានភាព​វិល​មក​សភាព​ដើម​វិញ។

អគ្គលេខាធិការ​នៃ​សមាគម​រោងចក្រ​កាត់ដេរ លោក ខេន លូ ប្រាប់​វិទ្យុ​ក្នុង​ស្រុក​ថា វិបត្តិ​ជំងឺ​កូវីដ-១៩ ធ្វើ​អោយ​ផល​ប៉ះ​ពាល់​ទាំង​អស់​គ្នា ពោល​គឺ​ទៅ​លើ​សេដ្ឋកិច្ច​ទាំងមូល។ លោក​អះអាង​ថា ចំពោះ​រោងចក្រ​សហគ្រាស ដែល​កំពុង​មាន​ដំណើរការ​ក៏​ពិបាក​ទទួល​បាន​ប្រាក់​ទូទាត់​មក​វិញ ដោយ​អ្នក​បញ្ជាទិញ​​បាន​ពន្យារ​ការ​ទូទាត់​ប្រាក់​ចន្លោះ​ពី ១២០ ទៅ ១៦០​ថ្ងៃ​នៅ​ក្រោយ​ពេល​ទទួល​បាន​ទំនិញ​ពី​បណ្ដា​រោងចក្រ សហគ្រាស​អ្នក​ផលិត។

បើ​ទោះ​ជា​យ៉ាង​ណា លោក គង់ អាទិត្យ បន្ត​ថា ចាំបាច់​ណាស់ ដែល​គ្រប់​ភាគី​ត្រូវ​រិះរក​មធ្យោបាយ​មួយ ដែល​អាច​ផ្ដល់​អត្ថប្រយោជន៍​ទាំង​សង្ខាង គឺ​ទាំង​និយោជក និង​កម្មករ៖ «ក្នុង​ពេល​កូវីដ​ហ្នឹង​មិនមែន​លំបាក​តែ និយោជក​ឯណា រដ្ឋាភិបាល​ក៏​លំបាក កម្មករ​ក៏​លំបាក ហើយ​ម៉េច​ក៏​ត្រូវ​ឱ្យ​ទៅដល់​ឆ្នាំ២០២១ ហ្នឹង ត្រូវ​អោយ​កម្មករ​លំបាក​មួយ​ជាន់​ទៀត? ជា​ទស្សន​របស់​ខ្ញុំ​គិត​ថា វា​អត់​ត្រូវ​ព្រោះ​ក្នុង​ពេល​នេះ គឺ​កម្មករ​គាត់​បាន​តែ ៧០ដុល្លារ​ទេ(ព្យួរ​ការងារ) ព្រោះ​បើ​ប្រាក់​ខែ​ធម្មតា​វា ១៩០​ដុល្លារ មាន​ថែម​ម៉ោង​ថែម​អី​គាត់​អាច​ដល់​ជាង ២០០​ដុល្លារ ២១៥ ឬ ២២០​អី​ដែរ»

មិន​ខុសគ្នា​នេះ​ដែរ ប្រធាន​សម្ព័ន្ធ​ចលនា​សហជីព​កម្មករ លោក ប៉ាវ ស៊ីណា លើកឡើង​ថា ក្នុង​ករណី​មាន​ការ​ពន្យារ​ពេល​ចរចា​ទៅតាម​ការ​ស្នើ​របស់​និយោជក​មែន​នោះ កម្មករ​ជា​អ្នក​ខាតបង់​កាន់​តែ​ខ្លាំង គឺ​មាន​ផល​ប៉ះ​ពាល់​កាន់​តែ​ធ្ងធ្ងរ​ចំពោះ​ពួក​គាត់។ លោក​ថា​គួរតែ​រក​មធ្យោបាយ​សម​ស្រប​ណា​មួយ​សម្រាប់​គ្រប់​ភាគី​ពាក់ព័ន្ធ ដែល​ទទួល​ផល​ប្រយោជន៍​ពី​ការ​ចរចា​ប្រាក់​ឈ្នួល​នៅ​ថ្ងៃ​ខាង​មុខ​នេះ៖ «ខ្ញុំ​គិត​ថា​ឱកាស​នេះ​យើង​គួរ​តែ​ចូល​តុ​ជជែក​គ្នា​សិន​ថា តើ​យើង​មាន​ដំណោះ​ស្រាយ​អី ដែល​អាច​ល្អ​ទាំង​សង្ខាង​បាន​ចំពោះ​ស្ថានភាព​ម៉ោង​នេះ? ពីព្រោះ​ថា យើង​យល់​ទាំង​អស់​គ្នា។ ភាគី​កម្មករ​ពួក​យើង​យល់​ពី​ការ​លំបាក​របស់​និយោជក​ដូច​គ្នា ប៉ុន្តែ អ្វី​ដែល​សំខាន់​យើង​អត់​ទាន់​ឃើញ​និយោជក​យល់​ពី​ផល​លំបាក​របស់​បងប្អូន​កម្មករ​នៅ​ឡើយ​ទេ»

បើ​ទោះ​ជា​យ៉ាង​ណា​ក្ដី ចំពោះGMAC ការ​បង្អង់​ការ​ចរចា​ប្រាក់​ឈ្នួល​នឹង​ជួយ​អោយ​វិស័យ​វាយនភណ្ឌ​កាត់ដេរ​អាច​បន្ត​នៅ​មាន​ជីវិត ឬ​អាច​និយាយ​ថា​អាច​រក្សា​ការងារ​សម្រាប់​កម្មករ​និយោជិត។

ឆ្លើយ​តប​រឿង​នេះ​អ្នកនាំពាក្យ​ក្រសួង​ការងារ លោក ហេង សួរ បាន​ប្រាប់​សារព័ត៌មាន​ក្នុង​ស្រុក​ថា នឹង​ពុំ​មាន​ការ​ព្យារ​ពេល​កិច្ចប្រជុំ​ចរចា​ប្រាក់​ឈ្នួល​ទេ។ លោក​ថា​ប្រសិន​បើ​ភាគី​មាន​ការ​លំបាក​អាច​លើក​ឡើង​នៅ​ក្នុង​កិច្ចប្រជុំ​ស្រប​ទៅ​តាម​លក្ខខណ្ឌ​នានា ដែល​មាន​ចែង​នៅ​ក្នុង​ច្បាប់​ស្ដីពី​ប្រាក់​ឈ្នួល​អប្បបរមា ឬ​ប្រាក់​ឈ្នួល​គោល។

ទាក់ទង​ដល់​ច្បាប់​នេះ​សេចក្ដី​ថ្លែងការណ៍​របស់​GMACបាន​លើក​ហេតុផល​ច្បាប់​មក​សំអាង​ដែរ​ថា ក្នុង​កថាខណ្ឌ​ទី៣ នៃ​មាត្រា​១០៧ នៃ​ច្បាប់​ស្ដីពី​ការងារ និង​ច្បាប់​ស្ដីពី​ប្រាក់​ឈ្នួល​អប្បបរមា​បាន​កំណត់​ថា ការចរចា​ប្រាក់ឈ្នួល​អប្បបរមា​តម្រូវ​ឱ្យ​ផ្ដោត​លើ​ធាតុ​ផ្សំ​ជា​លក្ខណ​វិនិច្ឆ័យ​បែប​សង្គម និង​សេដ្ឋកិច្ច។ នៅ​ក្នុង​នោះ​ក៏​មាន​កត្តា​ប្រាក់​ចំណេញ​របស់​វិស័យ​ដែរ។

ត្រង់​ចំណុច​នេះ លោក គង់ អាទិត្យ ឆ្លើយ​តប​ថា ជាទូទៅ​និយោជក​តែងតែ​រក​ហេតុផល​ជានិច្ច ដើម្បី​គេចវេះ​មិន​ដំឡើង​ប្រាក់​ឈ្នួល​អោយ​កម្មករ និយោជិត។ លោក​ថា​កន្លង​ទៅ​នៅ​ពេល​ដែល​និយោជក​បាន​ផល​ចំណេញ​ក៏​មិនបាន​យកចិត្ត​ទុកដាក់​ដល់​កម្មករ​ជាស្រេច​ទៅ​ហើយ ឯ​ការ​តម្លើង​ប្រាក់​ឈ្នួល​កន្លងទៅ​ក៏​មិន​បាន​ឆ្លើយតប​នឹង​តម្រូវការ​រស់នៅ​សមរម្យ និង​ថ្លៃថ្នូរ​របស់​កម្មករ​ដូច​ដែល​មាន​ចែង​ក្នុង​ច្បាប់​សោះ​ឡើយ៖ «បើ​តាម​តថភាព​ជាក់​ស្ដែង​ផ្អែក​លើ​ការ​ស្រាវជ្រាវ​ខ្លះ សម្ភាស​កម្មករ​ខ្លះ និង​ផ្អែក​តាម​ការ​ស្រាវជ្រាវ​ការ​ប្រកួត​ប្រជែង​ខ្លះ​ខ្ញុំ​គិត​ថា​ប្រាក់​ឈ្នួល​គោល​ទៅ​ថ្ងៃមុខ​អាច​ក្នុង​ចន្លោះ​កម្រិត​២៥០ដុល្លា​អ៊ីចឹង​គឺ​អាច​ថា​ក្នុង​រង្វង់​ប្រកួត​ប្រជែង​ក៏បាន កិត្តិយស​ក៏បាន ហើយ​កម្មករ​គាត់​ក៏​អាច​ដំឡើង​ផលិតភាព​បាន​ទៅ​មុខ​ទៀត​អាច​ប៉ុណ្ណឹង​បាន​ពី​ព្រោះ ក្នុង​ការស្រាវជ្រាវ​ខ្លះ​បើ​គេ​និយាយ​ពី​កញ្ចប់​ចំណីអាហារ មាន​បូក​ផ្នែក​ផ្សេងៗ ទៀត​ថ្នាំ​ពេទ្យ​អី​ទៀត​អ្នក​ដែល​គេ​ស្រាវជ្រាវ​នៅ​បរទេស​គេ​រក​ឃើញ​រហូត​ទៅ​ដល់ ៣០០​ដុល្លារ​ឯ​ណោះ»

ប្រាក់​ឈ្នួល​អប្បបរមា​នៅ​ក្នុង​ឆ្នាំ២០២០​នេះ​គឺ ១៩០​ដុល្លារ ក្នុង​មួយ​ខែ ប៉ុន្តែ​ក្នុង​ស្ថានភាព​រោងចក្រ​ព្យួរ​ការងារ​ក្នុង​ដំណាក់​កាល​ជំងឺ​កូវីដ១៩​នេះ កម្មករ​ទទួល​បាន​ប្រាក់​ឧបត្ថម្ភ ចំនួន ៧០​ដុល្លារ គឺ ៣០​ដុល្លារ​ពី​ភាគី​រោងចក្រ និង ៤០​ដុល្លារ​ពី​ភាគី​រដ្ឋាភិបាល។

ក្រសួង​ការងារ​បាន​ជូន​ដំណឹង​កាល​ពី​ថ្ងៃ​ទី១០ មិថុនា​ថា ការ​ចរចា​ប្រាក់​ឈ្នួល​គោល​ឆ្នាំ២០២១ នឹង​ចាប់​ផ្តើម​ដំណើរ​ការ​នៅ​ខែ​កក្កដា រហូត​ដល់​ខែ​កញ្ញា​ខាងមុខនេះ។

ក្នុង​ច្បាប់​ស្ដីពី​ប្រាក់​ឈ្នួល​អប្បបរមា ដែល​ចែង​ពី​លក្ខណវិនិច្ឆ័យ​កំណត់​ប្រាក់​ឈ្នួល​នោះ​បញ្ជាក់​ថា ក្នុង​លក្ខណ​វិនិច្ឆ័យ​បែប​សង្គម គឺ​គេ​ផ្ដោត​ទៅ​លើ ស្ថានភាព​គ្រួសារ អត្រា​អតិផរណា និង​ការ​ចំណាយ​ក្នុង​ការ​រស់​នៅ ចំណែក​លក្ខណ​វិនិច្ឆ័យ​បែប​សេដ្ឋកិច្ច​គឺ​ផ្ដោត​ទៅ​លើ ផលិតភាព ភាព​ប្រកួតប្រជែង​របស់​ប្រទេស ស្ថានភាព​ទីផ្សារ​ការងារ និង​កម្រិត​ចំណេញ​របស់​វិស័យ។ ច្បាប់​ដដែល​នេះ​បាន​ចែង​ទៀត​ថា​ក្នុង​ករណី​ប្រធានសក្ដិ ឬ​ករណី​ចាំ​បាច់ រដ្ឋមន្ត្រី​ក្រសួង​ការងារ​អាច​ចេញ​ប្រកាស​ផ្អាក ឬ​កែសម្រួល​កាលវិភាគ​នៃ​ការ​ពិភាក្សា​កំណត់​ប្រាក់​ឈ្នួល​អប្បបរមា​បាន។ ករណី​បែប​នេះ​ប្រាក់​ឈ្នួល​អប្បបរមា ដែល​បាន​កំណត់​ចុង​ក្រោយ​នឹង​មាន​សុពលភាព​អនុវត្ត​បន្ត​រហូត​មាន​ការ​កំណត់​ប្រាក់​ឈ្នួល​ថ្មី​មក​ជំនួស៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។