ក្រុមយុវជននៅខ្វះថវិកាជាង៨ពាន់ដុល្លារទៀតដើម្បីបោះពុម្ពសៀវភៅទស្សនទានបណ្ឌិត កែម ឡី
2016.10.08
ប្រធានសមាគមសម្ព័ន្ធនិស្សិតបញ្ញវន្តខ្មែរ និងជាសមាជិកក្រុមចងក្រងសៀវភៅស្ដីពីទស្សនៈបណ្ឌិត កែម ឡី លោក មួង សូនី ថ្លែងក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីថ្ងៃទី១៥ ខែសីហា ឆ្នាំ២០១៦។
RFA
សមាគមសម្ព័ន្ធនិស្សិតបញ្ញវន្តខ្មែរប្ដេជ្ញាថា នឹងបោះពុម្ពសៀវភៅស្ដីពីទស្សនៈបណ្ឌិត កែម ឡី ដែលពួកគេខំចងក្រងនោះ ឲ្យទាន់ពិធីបុណ្យខួបគម្រប់ ១០០ថ្ងៃ។ ទោះយ៉ាងណា ក្រុមអ្នកចងក្រងសៀវភៅនេះ កំពុងខ្វះថវិកាជាង ៨ពាន់ដុល្លារទៀត ដើម្បីដំណើរការបោះពុម្ពសៀវភៅ។ ពួកគេអំពាវនាវដល់សប្បុរសជនជិតឆ្ងាយជួយជាបន្ទាន់។
ពាក្យសម្ដី និងស្នាដៃសរសេរនិពន្ធរបស់លោក កែម ឡី ដែលកន្លងមកនៅរប៉ាត់រប៉ាយនៅតាមបណ្ដាញសង្គមហ្វេសប៊ុក (Facebook) និងនៅតាមប្រព័ន្ធផ្សព្វផ្សាយនោះត្រូវបានអតីតកូនសិស្ស និងមិត្តភ័ក្ដិរបស់លោកបានរួមកម្លាំងគ្នាប្រមូលចងក្រងជាសៀវភៅរួចរាល់ហើយ នៅឡើយខ្វះថវិកាបន្ថែមទៀត ដើម្បីបោះពុម្ពសៀវភៅឲ្យចេញជារូបរាងឲ្យទាន់ពិធីបុណ្យខួបគម្រប់ ១០០ថ្ងៃសពបណ្ឌិត កែម ឡី។
សមាគមសម្ព័ន្ធនិស្សិតបញ្ញវន្តខ្មែរ គ្រោងបោះពុម្ពសៀវភៅកម្រងទស្សនៈបណ្ឌិត កែម ឡី ចំនួន ១ម៉ឺនក្បាល ហើយមកដល់ពេលនេះបោះពុម្ពបាន ៥ពាន់ក្បាលហើយ នៅសល់ ៥ពាន់ក្បាលទៀត។ក្នុងមួយក្បាលត្រូវចំណាយអស់ថវិកា ៣ដុល្លារ សរុបត្រូវចំណាយថវិកាអស់ចំនួន ៣ម៉ឺនដុល្លារ។
ប្រធានសមាគមសម្ព័ន្ធនិស្សិតបញ្ញវន្តខ្មែរ និងជាសមាជិកក្រុមចងក្រង លោក មួង សូនី អំពាវនាវដល់សប្បុរសជននានា ឲ្យជួយឧបត្ថម្ភថវិកាបន្ថែមដើម្បីបោះពុម្ពផ្សាយស្នាដៃគតិបណ្ឌិតរបស់លោក កែម ឡី ក្នុងគោលបំណងរក្សាទុកសម្រាប់មនុស្សជំនាន់ក្រោយ៖ «ឥឡូវនេះឧបសគ្គរបស់យើង គឺខ្វះថវិកាសម្រាប់បោះពុម្ព។ យើងប្រមូលបាន ២១.៩០០ដុល្លារហើយ អ៊ីចឹងនៅខ្វះ ៨.១០០ដុល្លារទៀត»។
លោក មួង សូនី បញ្ជាក់ថា សៀវភៅនេះកត់ត្រាទុកអំពីទស្សនទានរបស់បណ្ឌិត កែម ឡី ជុំវិញបញ្ហានយោបាយ សេដ្ឋកិច្ច និងសង្គមកិច្ចដែលបណ្ឌិត កែម ឡី បានថ្លែងតាមប្រព័ន្ធផ្សព្វផ្សាយតាមបណ្ដាញសង្គមហ្វេសប៊ុក និងចុះបង្រៀនផ្ទាល់ដល់យុវជន និងពលរដ្ឋនៅតាមមូលដ្ឋាន។ សៀវភៅទស្សនទានបណ្ឌិត កែម ឡី បានបែងចែកជា ២ភាគដោយមួយភាគៗ មានកម្រាស់ជាង ២០០ទំព័រ។
សមាជិកក្រុមចងក្រងសៀវភៅទស្សនទានលោកបណ្ឌិត កែម ឡី នេះ បញ្ជាក់ថា សៀវភៅនេះ អាចនឹងលក់ក្នុងតម្លៃ ៥ដុល្លារ សម្រាប់ទីផ្សារក្នុងស្រុក និង ២០ដុល្លារសម្រាប់ទីផ្សារក្រៅប្រទេស៖ «ថវិកាដែលប្រមូលបានពីការលក់សៀវភៅនេះ គឺ ៤០ភាគរយ នឹងយកទៅជូនមន្ទីរពេទ្យគន្ធបុប្ផា ដើម្បីជួយកុមារដែលរងទុក្ខលំបាក និងឧទ្ទិសបុណ្យជូនបណ្ឌិត កែម ឡី។ សម្រាប់ថវិកា ៤០ភាគរយទៀត គឺនឹងជួយដល់សិស្សរបស់គាត់ដែលនឹងបន្តគម្រោង ១០០រាត្រី និងរឿងកោះទាំង ៦៤។ ចំណែក ២០ភាគទៀតសម្រាប់ជូនក្រុមគ្រួសារបណ្ឌិត កែម ឡី»។
ការចងក្រង និងបោះពុម្ពផ្សាយសៀវភៅកម្រងទស្សនទានបណ្ឌិត កែម ឡី គឺជាជំហានដំបូងនៃការប្រមូលផ្តុំស្នាដៃរបស់បណ្ឌិត កែម ឡី កាលលោកនៅមានជីវិត។ ក្រុមអ្នកចងក្រងបញ្ជាក់ថា ជំហានបន្ទាប់របស់ពួកគេ គឺការប្រមូលផ្ដុំការសិក្សាស្រាវជ្រាវទាំងឡាយរបស់បណ្ឌិត កែម ឡី ដែលលោកធ្លាប់បានធ្វើឱ្យអង្គការសង្គមស៊ីវិលជាតិ-អន្តរជាតិ ព្រមទាំងស្ថាប័នរដ្ឋដើម្បីទុកជាឯកសាររឹងមាំសម្រាប់អ្នកចង់សិក្សាស្វែងយល់អំពីបញ្ហានានា ដែលកំពុងកើតមាននៅកម្ពុជា និងដឹងអំពីដំណោះស្រាយបញ្ហាទាំងអស់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
