ព្រះតេជព្រះគុណ សំ គឹមសាធ នឹងសិងសម្រាកនៅស្រុកមោងឫស្សី នៅយប់ថ្ងៃទី១៣ ខែកុម្ភៈ ជាទី ដែលព្រះអង្គ ធ្លាប់ត្រូវបានអាជ្ញាធរខេត្តបាត់ដំបងចាប់ផ្សឹក កាលពីមីនា ឆ្នាំ២០២៣ កន្លងទៅ។
ព្រះតេជព្រះគុណ សំ គឹមសាធ មានថេរដីកាប្រាប់វិទ្យុអាស៊ីសេរី នៅថ្ងៃទី១៣ ខែកុម្ភៈថា ធម្មយាត្រា ដើម្បីលើកកម្ពស់សីលធម៌សង្គម បានមកដល់ស្រុកមោងឫស្សី ខេត្តបាត់ដំបង ។
សំឡេង ព្រះតេជព្រះគុណ សំ គឹមសាធ។
ព្រះតេជព្រះគុណ សំ គឹមសាធ៖«ការបានផ្សឹកអាត្មា បានចាប់វៃខ្នោះអាត្មាម្ដងរួចមកហើយ ប៉ុន្តែនៅតែសួរដដែលៗ អីចឹងហើយបានអាត្មាថា ឈប់ទៅជាពិសេសអភិបាល នៃគណៈអភិបាលខេត្តបាត់ដំបង តុលាការក្ដី ព្រះរាជអាជ្ញាក្ដី ឈប់យកគំនិត គិតការចោទប្រកាន់ វាគ្មានអ្វីចោទប្រកាន់ចំពោះអាត្មាកើតនោះទេ។ អាត្មាធ្វើនេះ ដើម្បីលើកកម្ពស់សីលធម៌សង្គម កូនសម្លាប់ម្ដាយ ម្ដាយយកកូនបោះបង់ចោល គ្រឿងញៀន អំពើហិង្សា អយុត្តិធម៌ ទោសមនសិការជាតិ ដែលស្រឡាញ់ជាតិមាតុភូមិចាប់ដាក់ពន្ធនាគារ ឲ្យមានការដោះលែងទៅ រៀបចំប្រព័ន្ធដឹកនាំ មានផ្នែកសន្តិសុខសង្គមឲ្យបានល្អទៅ អាត្មាទៅខ្វល់អ្វីរឿង បញ្ហាហ្នឹង»។
ព្រះតេជព្រះគុណ សំ គឹមសាធ រួមជាមួយសកម្មជនសង្គមលោក អ៊ុក ពេជ្រសំណាង បានចាប់ផ្ដើមដំណើរធម្មយាត្រាចេញពីទីលានប្រជាធិបតេយ្យ ក្នុងរាជធានីភ្នំពេញ កាលពីព្រឹកថ្ងៃទី២ កុម្ភៈ ដោយឆ្លងកាត់ខេត្តចំនួន៨ គ្រោងនឹងបញ្ចប់នៅភ្នំអដ្ឋរស្ស ស្ថិតក្នុងស្រុកឧត្តុង្គ ខេត្តកំពង់ស្ពឺ ដែលមានចម្ងាយផ្លូវជិត ៧រយគីឡូម៉ែត្រ។
កាលពីថ្ងៃទី៩ ខែមីនា ឆ្នាំ២០២៣ កន្លងទៅ ព្រះតេជព្រះគុណ សំ គឹមសាធ ដែលគេធ្លាប់ស្គាល់ព្រះនាមថា សយ សាធ ត្រូវបានសមត្ថកិច្ចខេត្តបាត់ដំបង ឃាត់ព្រះកាយ និងចាប់ផ្សឹកព្រះអង្គ នៅស្រុកមោងឫស្សី នៅពេលព្រះអង្គនិមន្តធ្វើធម្មយាត្រាផ្សាយមេត្តាធម៌ទៅដល់ខេត្តបាត់ដំបងនេះ។ ប៉ុន្តែសមត្ថកិច្ចបានដោះលែងព្រះអង្គវិញ ក្រោយពីរកមិនឃើញធាតុផ្សំ នៃបទល្មើស។
ព្រះតេជព្រះគុណ សំ គឹមសាធ ឲ្យដឹងទៀតថា អាជ្ញាធរខេត្តបាត់ដំបង នៅតែបន្តតាមឃ្លាំមើលព្រះអង្គមិនដាច់។
ព្រះតេជព្រះគុណ សំ គឹមសាធ មានថេរដីកាថា បើទោះបីជាអាជ្ញាធរធ្វើទុក្ខបុកម្នេញលើព្រះអង្គបែបណាក៏ដោយ ក៏ព្រះអង្គនៅតែបន្តចូលរួមអប់រំផ្សព្វផ្សាយពីសីលធម៌សង្គម និងទាមទាររដ្ឋាភិបាលឱ្យដោះស្រាយបញ្ហានយោបាយ ការរំលោភសិទ្ធិមនុស្ស រហូតដល់សង្គមមានសន្តិភាព ស្ថិរភាព និងដើរតាមគន្លងប្រជាធិបតេយ្យពិតប្រាកដឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។