អ្នក​លក់​កសិផល​បារម្ភ​រឿង​វៀតណាម​ចាប់​យក​លុយ

ប្រជាពលរដ្ឋ និង​ឈ្មួញ​ខ្មែរ​ដែល​ដឹក​ផលិតផល​កសិកម្ម​ទៅ​លក់​នៅ​ប្រទេស​វៀតណាម នៅ​តាម​ច្រក​ដារ ក្នុង​ឃុំ​ដារ ស្រុក​មេមត់ ខេត្ត​កំពង់ចាម មាន​ការ​ព្រួយ​បារម្ភ​ចំពោះ​សកម្មភាព​ប៉ូលិស​សេដ្ឋកិច្ច​វៀតណាម ចាប់​មនុស្ស និង​រឹប​យក​លុយ​ដែល​បាន​មក​ពី​ការ​លក់​ផលិតផល​កសិកម្ម។
ដោយ កែវ និមល
2013.03.06
Share on WhatsApp
Share on WhatsApp
សេដ្ឋកិច្ច វៀតណាម ៣០៥ ស្ត្រី​ម្នាក់​ជិះ​ម៉ូតូ​ដឹក​ទំនិញ​ពី​ប្រទេស​វៀតណាម ឆ្លង​កាត់​ប៉ុស្តិ៍​ត្រួត​ពិនិត្យ​ច្រក​ព្រែកចាក ក្នុង​ស្រុក​កំពង់​ត្រាច ខែត្រ​កំពត កាល​ពី​ថ្ងៃ​១៤ ខែ​មីនា ឆ្នាំ​២០១០។ ពាណិជ្ជកម្ម​ឆ្លងដែន​រវាង​​កម្ពុជា និង​វៀតណាម បាន​កើន​ឡើង​ជាង ៣០%​ នៃ​អត្រា​ប្រចាំ​ឆ្នាំ។
RFA

ប្រជាពលរដ្ឋ​ខ្មែរ​អ្នក​ដឹក​ផលិតផល​កសិកម្ម​ទៅ​លក់​នៅ​ប្រទេស​វៀតណាម តាម​ច្រក​ព្រំដែន​ឆ្លង​នៅ​ខេត្ត​កំពង់ចាម សុំ​ឲ្យ​អាជ្ញាធរ​ខ្មែរ​ជួយ​គាត់ ពី​ព្រោះ​ពេល​ដឹក​ផលិតផល​កសិកម្ម​ទៅ​លក់​រួច​ហើយ មាន​អ្នក​ខ្លះ​ត្រូវ​ប៉ូលិស​វៀតណាម ចាប់​ខ្លួន។

ប្រជាពលរដ្ឋ​មួយ​រូប​ឈ្មោះ សា គ្រីម៉ាស់ ភេទ​ស្រី រស់​នៅ​ឃុំ​ពពេល ស្រុក​ពញាក្រែក ខេត្ត​កំពង់ចាម បាន​និយាយ​នៅ​ថ្ងៃ​ទី​៦ មីនា ថា អ្នកស្រី​ត្រូវ​ប៉ូលិស​វៀតណាម ចាប់​ខ្លួន និង​រឹប​យក​លុយ​ចំនួន​ជាង ៥​ម៉ឺន​ដុល្លារ កាល​ពី​ថ្ងៃ​២៦ កុម្ភៈ កន្លង​ទៅ នៅ​ក្បែរ​ច្រក​ទ្វារ​ព្រំដែន​ដារ។ តែ​ភ្លាមៗ​នោះ អ្នកស្រី​បាន​ស្រែក​ហៅ​ឲ្យ​ប៉ូលិស​ច្រក​ទ្វារ​ខ្មែរ​ជួយ​ទើប​បាន​រួច​ខ្លួន​មក​វិញ ទាំង​មនុស្ស​ទាំង​ប្រាក់។

អ្នកស្រី សា គ្រីម៉ាស់៖ «ខ្ញុំ​យក​ស្វាយចន្ទី​ទៅ​លក់ ហើយ​យក​លុយ​មក​វិញ។ យួន​វា​ឆែក​លុយ​ខ្ញុំ ហើយ​វា​ចាប់​ខ្ញុំ វា​រុញ​ចូល​ឡាន​វា តែ​ខ្ញុំ​អត់​ទៅ។ ខ្ញុំ​មាន​ទៅ​ប្លន់​អី​វៀតណាម វា​ទាញ​ខ្ញុំ​ទៅ តែ​ខ្ញុំ​អត់​ទៅ។ ខ្ញុំ​បាន​ហៅ​ប៉ូលិស​ព្រំដែន ឈ្មោះ កែម ឲ្យ​ជួយ​ខ្ញុំ។ ខ្ញុំ​ស្រែក​ថា ពូ​ប៉ូលិស​អើយ​ជួយ​ខ្ញុំ​ផង យួន​ចាប់​ខ្ញុំ​ហើយ!»

ប្រជាពលរដ្ឋ​មួយ​រូប​ទៀត​ឈ្មោះ ហ៊ីម រ៉សស៊ីអាល់ ភេទ​ស្រី ដែល​បាន​ឃើញ​ហេតុការណ៍​ចាប់​ខ្លួន​នោះ បាន​និយាយ​ថា ហេតុការណ៍​ប៉ូលិស​ច្រក​ទ្វារ​វៀតណាម ចាប់​ប្រជាពលរដ្ឋ​ខ្មែរ​យក​លុយ​ក្រោយ​ពេល​លក់​ទំនិញ​កសិផល​បាន​លុយ​នោះ បាន​កើត​មាន​ជា​ច្រើន​លើក​ហើយ៖ «វា​ចង់​និយាយ​ថា ឲ្យ​តែ​អីវ៉ាន់​យើង​ចូល​ទៅ ចេញ​លុយ​មក​វិញ ដឹង​តែ​វា​ចាប់។ ខ្ញុំ​អត់​ដឹង ព្រោះ​ខាង​វៀតណាម ចាប់​ខ្មែរ​យើង​ជាប់​គុក​អស់​ច្រើន​នាក់​ហើយ»

ទាក់ទង​ហេតុការណ៍​ប៉ូលិស​វៀតណាម ចាប់​ប្រជាពលរដ្ឋ​ខ្មែរ​ទាំង​មនុស្ស និង​ប្រាក់​ក្រោយ​ពេល​លក់​ទំនិញ​កសិផល​ប្រមូល​លុយ​មក​ស្រុក​ខ្មែរ​វិញ​នេះ លោក ហ៊ុន ណេង អភិបាល​ខេត្ត​កំពង់ចាម មាន​ប្រសាសន៍​នៅ​ថ្ងៃ​ទី​៦ មីនា ថា មូលហេតុ​ប៉ូលិស​វៀតណាម ចាប់​ប្រជាពលរដ្ឋ​ខ្មែរ​មួយ​ចំនួន​នោះ ដោយ​សារ​ពួក​គេ​រំលោភ​ច្បាប់​នៅ​ប្រទេស​វៀតណាម។

លោក ហ៊ុន ណេង៖ «អា​រឿង​នេះ​មិន​កើត​លើក​ទី​១​ទេ វា​ច្រើន​លើក​ហើយ ពី​ព្រោះ​ខាង​ខ្មែរ​យើង​នោះ វា​ធ្វើ​អត់​ត្រូវ​ច្បាប់។ អត់​ត្រូវ​ច្បាប់​ត្រង់​ទំនិញ​យើង​យក​ទៅ​លក់ ហើយ​លុយ​យក​មក​វិញ​ប៉ុន្មាន? ហើយ​ប៉ុន្មាន​ផ្ញើ​តាម​ធនាគារ? ហើយ​បង​ប្អូន​យើង តែ​ទៅ​ស្រុក​គេ​លុយ​លើស​ពី ១​ម៉ឺន​ឡើង​ត្រូវ​បំពេញ​បែបបទ។ បង​ប្អូន​ច្រើន​តែ​ទៅ​ហើយ​មក​វិញ យក​លុយ​មក​តាម​ច្រម​របៀង​អី វា​ច្រើន គេ​ចាប់​ណា។ គាត់​អត់​មក​តាម​ច្រក​ស្រួល​បួល អានេះ​មួយ។ ទី​២​ទៀត អត់​មែន​ស្វាយចន្ទី គាត់​ទៅ​រក​ស៊ី​ស្អី​ផ្សេង​ពី​អា​ហ្នឹង ហើយ​ស្រុក​គេ​តែ​លុយ​លើស​ពី ១​ម៉ឺន​ឡើង គេ​បំពេញ​បែបបទ​ហើយ។ អា​ហ្នឹង​គេ​មិន​ទៅ​ចាប់ គេ​ប្លន់​អី​នោះ​ទេ ប៉ុន្តែ​ថា​យើង​ធ្វើ​ខុស​ច្បាប់»

លោក​អភិបាល​ខេត្ត​កំពង់ចាម បាន​ពន្យល់​ឲ្យ​ដឹង​ថា កន្លង​មក​លោក​ធ្លាប់​បាន​ប្រកាស​ជូន​ព័ត៌មាន​ឲ្យ​ប្រជាពលរដ្ឋ​ជា​ច្រើន​ដង​ហើយ អំពី​ការ​លក់​ទំនិញ​កសិផល ហើយ​មាន​​លុយ​ចំនួន​ច្រើន​លើស​ការ​អនុញ្ញាត គឺ​ត្រូវ​បំពេញ​បែប​បទ​ផ្ទេរ​លុយ​តាម​ធនាគារ​ប្រទេស​វៀតណាម៖ «មិន​មែន​លើក​ទី​១ ទេ រឿង​នេះ​កើត​ច្រើន​ឆ្នាំ​ហើយ ប្រជុំ​ខេត្ត​ទ្វេ​ភាគី ប្រទេស​ទ្វេ​ភាគី ខ្ញុំ​បាន​សំណើ​សំណូមពរ​គេ​ញយ​ហើយ តែ​គេ​លើក​ឡើង​ថា លុយ​យើង​បង្វិល​តាម​កុង​ទៅ។ តែ​បង​ប្អូន​យើង​អត់​ទេ ច្រើន​តែ​មក​ប្រុយ ៗ តែម្តង។ ខ្ញុំ​ដោះ​នោះ​ដោះ​ចង់​ងាប់​ហើយ»

លោក ហ៊ុន ណេង បាន​ឲ្យ​ដឹង​ថា មក​ទល់​បច្ចុប្បន្ន មាន​ប្រជាពលរដ្ឋ​ខ្មែរ​មួយ​ចំនួន​កំពុង​តែ​ជាប់​ឃុំ​នៅ​ក្នុង​ប្រទេស​វៀតណាម នៅ​ឡើយ​ទេ ដោយសារ​មិន​គោរព​ច្បាប់​របស់​ប្រទេស​វៀតណាម ក្នុង​ពេល​ទៅ​លក់​ដូរ​ទំនិញ​នៅ​ក្នុង​ប្រទេស​វៀតណាម។ លោក​អភិបាល​ខេត្ត​បាន​បញ្ជាក់​ថា លោក​កំពុង​តែ​ទាក់​ទង​ទៅ​អាជ្ញាធរ​វៀតណាម ដើម្បី​សុំ​ឲ្យ​មាន​ការ​ដោះ​លែង​ប្រជាពលរដ្ឋ​ខ្មែរ​ដែល​ជាប់​ឃុំ​ទាំង​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។