កម្មកររោងចក្រ សិន តៃ ហ្គាមែន ខេមបូឌា (Zhen Tai Garment Cambodia ) នៅខណ្ឌសែនសុខ រាជធានីភ្នំពេញ ត្អូញត្អែរពីជីវភាពខ្វះខាត ខណៈថៅកែរោងចក្របន្តព្យួរការងារកម្មករ។ មន្ត្រីសង្គមស៊ីវិល យល់ឃើញថាថៅកែរោងចក្រគួរតែចេញមកដោះស្រាយបញ្ហានេះឱ្យបានឆាប់ ដើម្បីជួយសម្រួលដល់ការរស់នៅរបស់កម្មករ។
ក្រុមកម្មកររោងចក្រជិត ៦រយនាក់ (៥៦៥) កំពុងប្រឈមនឹងភាពក្រីក្រ ដោយសារថៅកែរោងចក្រព្យួរការងាររយៈពេល៣ខែមកហើយ នៅមិនទាន់ទទួលយកកម្មករចូលធ្វើការវិញ។ ក្រុមកម្មករ អះអាងថា ការព្យួរការងារតែសមាជិកសហជីពនេះគឺថៅកែមានចេតនាចង់បញ្ឈប់ការងារកម្មករ និងរើសអើងសហជីព។
តំណាងកម្មករម្នាក់គឺ លោកស្រី ឈួ សារិត ដែលត្រូវថៅកែបញ្ឈប់ការងារដោយគ្មានមូលហេតុ ប្រាប់វិទ្យុអាស៊ីសេរីនៅថ្ងៃទី៤ មីនា ថា លោកស្រី សោកស្ដាយដែលថៅកែរោងចក្រធ្វើរឿងអយុត្តិធម៌ចំពោះកម្មករហើយ ក្រសួងការងារនៅតែគ្មានដំណោះស្រាយជូនកម្មករ ហើយថែមទាំងបង្ខំឱ្យកម្មករចុះហត្ថលេខាបន្តព្យួរការងារទៀត។ លោកស្រីបន្តថា លោកស្រីឈឺចាប់ និងមិនអាចទទួលយកទង្វើរបស់ថៅកែរោងចក្រ បានទេ ពីព្រោះថៅកែបានសន្យាទទួលយកកម្មករចូលធ្វើការវិញ ប៉ុន្តែពេលនេះ បែរជាចោទ លោកស្រី ថា យកព័ត៌មានផ្ទៃក្នុងរបស់រោងចក្រទៅផ្សព្វផ្សាយ ហើយត្រូវបណ្ដេញចេញពីរោងចក្រទាំងអយុត្តិធម៌។
លោកស្រី ឈួរ សារិត៖ «ខ្ញុំឈឺចាប់ណាស់ហើយក៏នឹកឃើញថាអយុត្តិធម៌សម្រាប់កម្មករដែលអត់ដឹងរឿងអីម៉ាតិចមានគេចោទប្រកាន់ខ្ញុំអ៊ីចឹងឈឺចាប់បំផុតនៅពេលយើងជាកម្មករអ៊ីចឹងគេចោទហើយគេឆក់កាតយើងទៀតនិយាយរួមទៅខ្ញុំតូចចិត្តខ្លាំងណាស់ណាមួយខ្ញុំជាកម្មករអ៊ីចឹងខ្ញុំទទួលយកអត់បាន»។
លោកស្រី ឈួ សារិត ត្រូវបានថៅកែបញ្ឈប់ការងារកាលពីថ្ងៃទី៣ មីនា ដោយចោទប្រកាន់ លោកស្រីថា យករឿងសំងាត់របស់រោងចក្រទៅផ្សព្វផ្សាយដែលធ្វើឱ្យរោងចក្រមានបញ្ហា ប៉ុន្តែ លោកស្រីច្រានចោលការចោទប្រកាន់នេះ។ លោកស្រី ចាត់ទុកការចោទប្រកាន់នេះជារឿងបង្ខូចកេរ្តិ៍ឈ្មោះ និងមានចេតនាមិនទទួលកម្មករជាសហជីពចូលធ្វើការវិញ។
ស្រដៀងគ្នានេះដែរ ប្រធានសហជីពស្មារតីកម្មករកម្ពុជា លោក កឹម សុភេន ថ្លែងថា ថៅកែមានចេតនាចង់បញ្ឈប់សហជីពទាំងអស់មិនឱ្យចូលធ្វើការ។ ម្យ៉ាងទៀត លោកថា ការបញ្ឈប់សមាជិកសហជីពលោក នេះគឺចង់គំរាមកំហែងដល់សមាជិកសហជីពផ្សេងទៀតដែលហ៊ានតវ៉ាជាមួយថៅកែ។
លោក កឹម សុភេន៖ «ពិបាកចិត្តណាស់ដល់ថ្នាក់កម្មករគាត់សាញហើយឥឡូវគ្រាន់តែលឺក្រសួងគាត់ចង់រាថយ ដោយសារដាក់ទៅក្រសួងហើយដំណោះស្រាយគឺសូន្យឈឹងគឺគ្មានម៉ាតិចសោះមកវិញហើយបំបាក់ទឹកចិត្តកម្មករគាត់ឡើងគាត់អស់ជំនឿជឿជាក់ដាក់ទៅក្រសួងហើយគាត់ស្ទើរតែអស់ជំនឿទៅលើការដាក់ហ្នឹងទៀត»។
ទោះបីជាយ៉ាងណាកាលពីថ្ងៃទី៨ កុម្ភៈ ខាងអធិការការងារចុះមកសម្របសម្រួលវិវាទការងារនេះម្ដងរួចហើយ ប៉ុន្តែមិនទទួលបានដំណោះស្រាយ ។ អធិការកិច្ចការងារ ក៏បានបង្ខំឱ្យកម្មករជិត ៦រយនាក់ (៥៦៥) បន្តព្យួរការងារ១ខែទៀត ក្រោមហេតុផលថា គ្មានអ្នកបញ្ជាទិញទំនិញ និងខ្វះខាតសម្ភារៈដើម្បីដំណើរការសង្វាក់ផលិតកម្ម។ ក្រុមកម្មករយល់ឃើញថា អធិការកិច្ចការងារ កំពុងការពារផលប្រយោជន៍ឱ្យរោងចក្រដោយមិនខ្វល់ពីទុក្ខលំបាករបស់កម្មករ។
វិទ្យុអាស៊ីសេរីមិនអាចទាក់ទង អគ្គលេខាធិការរង នៃគណៈកម្មាធិការការសម្រាប់ដោះស្រាយបញ្ហាកូដកម្មបាតុកម្មនៃក្រសួងការងារ លោក ទេស រុក្ខាផល និងប្រធានរដ្ឋបាលរោងចក្រ សិន តៃ ហ្គាមេន អ្នកស្រី អ៊ុន សុភា ដើម្បីបញ្ជាក់ជុំវិញរឿងនេះបានទេ នៅថ្ងៃទី០៤ មីនា ដោយទូរស័ព្ទហៅចូលពុំមានអ្នកទទួល។
ជុំវិញរឿងនេះប្រធានសហភាពការងារកម្ពុជា (CLC) លោក អាត់ ធន់ មានប្រសាសន៍ថា រោងចក្រគួរតែដោះស្រាយបញ្ហានេះជូនកម្មករ ជាពិសេសបើព្យួរការងារលើសពី២ខែថៅកែរោងចក្រត្រូវទូទាត់ប្រាក់ខែពេញឱ្យកម្មករ។ លោកបញ្ជាក់ថា បើថៅកែ មិនទូទាត់ទេគឺ ក្រសួងការងារគួរតែចុះពិនិត្យមើលភ្លាមៗជៀសវាងការអនុវត្តខុសពីច្បាប់ការងារ។
លោក អាត់ ធន់៖ «ក្រសួងការងារគួរតែចុះទៅអធិការឱ្យបានច្បាស់អំពីការព្យួរឬក៏ធានាថា ឱ្យកម្មករបានព្យួរទៅតាមច្បាប់ក្នុងករណីក្រុមហ៊ុនមានលទ្ធភាពព្យួរឱ្យព្យួរតាមច្បាប់ហើយការរើសអើង ឬក៏ការព្យួរតែសកម្មជនសហជីព សមាជិកសហជីពវាជាអំពើខុសច្បាប់ទាំងស្រុងក្រសួងគួរតែស៊ើបអង្កេត និងណែនាំទៅក្រុមហ៊ុនក្នុងករណីក្រុមហ៊ុននៅតែរើសអើងគឺនៅក្នុងច្បាប់គឺគេហាមការរើសអើង ការធ្វើទុក្ខបុកម្នេញ និងគឺគេអាចដាក់វិន័យលើក្រុមហ៊ុនហ្នឹងបាន»។
គិតមកទល់ពេលនេះ ថៅកែរោងចក្រមួយនេះ ព្យួរការងារកម្មករចំនួន៣ខែហើយ និងមានកម្មករមួយចំនួនមិនទទួលបានប្រាក់ឧបត្ថម្ភ ៣០ដុល្លារនោះទេ។ ក្រុមកម្មករភាគច្រើនជាស្ត្រីចាត់ទុកថាថៅកែរោងចក្រប្រកាន់បក្ខពួករើសអើងសហជីព និងមានចេតនាបង្ខំឱ្យសហជីពឈប់ធ្វើការដោយខ្លួនឯង។ រោងចក្រនេះមានកម្មករធ្វើការសរុបជាង៣ពាន់នាក់ (៣.០៨៥) ក្នុងនោះជាង២ពាន់នាក់ (២.៥២០) កំពុងធ្វើការ និងជិត ៦រយនាក់ (៥៦៥) ទៀតត្រូវបានព្យួរការងារ។
កាលពីថ្ងៃទី១៧ ខែសីហា ឆ្នាំ២០២២ លោកនាយករដ្ឋមន្ត្រី ហ៊ុន សែន ធ្លាប់បានស្ដីបន្ទោសខ្ជាំងៗ ទៅរដ្ឋមន្ត្រីក្រសួងការងារ លោក អ៊ិត សំហេង និងចេញបញ្ជាឱ្យដោះស្រាយសំណងជូនកម្មករ តាមរយៈការខ្ចីលុយពីរដ្ឋាភិបាល ដើម្បីកុំឱ្យកម្មករទាំងនោះបន្តរងទុក្ខលំបាកតទៅទៀត។ ទោះជាយ៉ាងណា រដ្ឋមន្ត្រីក្រសួងការងារ រូបនេះនៅតែមិនដោះស្រាយវិវាទការងាររបស់កម្មករនៅឡើយ ដែលបណ្ដោយឱ្យពួកគេរងទុក្ខលំបាកជាខ្លាំង។
ក្រុមកម្មករអះអាងថា ពួកគេនឹងនៅតែបន្តតវ៉ារហូតទាល់តែមានដំណោះស្រាយប្រសិនជាថៅកែគ្មានដំណោះស្រាយជូនកម្មករ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។