មន្ត្រីក្រសួងការបទេសថៃ នៅថៃអង្គារទី១៧ មិថុនា នេះ បានកោះហៅឯកអគ្គរាជទូតខ្មែរ ប្រចាំបាងកក ដើម្បីសង្ខេបព័ត៌មានប្រាប់អំពីគោលនយោបាយផ្ដល់ការងារឲ្យពលករខ្មែរ។
ការកោះហៅនេះ គឺដើម្បីបដិសេធជាផ្លូវការទៅកាន់ភាគីកម្ពុជាដែរថា ថៃមិនបានបណ្ដេញពលករខ្មែរចេញទាំងបង្ខំដូចពាក្យចចាមអារ៉ាម និងការចុះផ្សាយរបស់សារព័ត៌មាន កន្លងមកនោះទេ។
កាសែតថៃ បាងកកប៉ុស្តិ៍ ចុះផ្សាយនៅថ្ងៃទី១៦ មិថុនា បានស្រង់ប្រភព អគ្គលេខាអចិន្ត្រៃយ៍ នៃក្រសួងការបរទេសថៃ គឺលោក ស៊ីហាសាក់ ភួងកេតកែវ (Sihasak Phuangketkeow) ថា ក្រុមប្រឹក្សាជាតិដើម្បីសន្តិភាព និងសណ្ដាប់ធ្នាប់ បានពិភាក្សាជាមួយក្រសួងពាក់ព័ន្ធចំនួន ៧ របស់ថៃ ដើម្បីផ្លាស់ប្ដូរវិធានការគ្រប់គ្រងពលករបរទេស ដែលចូលធ្វើការនៅថៃ មិនមានឯកសារស្របច្បាប់ ឲ្យចុះបញ្ជីការងារស្របច្បាប់ ដើម្បីជៀសវាង ការកេងប្រវ័ញ្ចកម្លាំងពលកម្មពីម្ចាស់ក្រុមហ៊ុន និងថៅកែនានា ឬដើម្បីចាកផុតពីការជួញដូរមនុស្សជាដើម ហើយពលករទាំងនោះនឹងអាចមានសិទ្ធិទួលផលប្រយោជន៍បានពីច្បាប់ថៃ ដោយយុត្តិធម៌គ្រប់ៗគ្នា។
ការកោះហៅឯកអគ្គរាជទូតខ្មែរនេះ ធ្វើឡើងស្របពេលដែលពលករខ្មែរជាង ១៦ ម៉ឺននាក់ ត្រូវបានអាជ្ញាធរថៃចាប់បញ្ជូនមកស្រុកវិញ យ៉ាងតក់ក្រហល់ នៅអំឡុងខែមិថុនា នេះ។ ក្នុងនោះមានពលករខ្មែរ យ៉ាងហោចណាស់ ៨ នាក់ បានស្លាប់ និងខ្លះទៀតរងរបួស ដោយគ្រោះថ្នាក់ចរាចរណ៍ ក្នុងពេលថៃដឹកជញ្ជូនមកកម្ពុជាវិញ។
វិទ្យុអាស៊ីសេរីមិនអាចទាក់ទងមន្ត្រីក្រសួងការបរទេសកម្ពុជា បានភ្លាមៗ នៅថ្ងៃទី១៧ មិថុនា ដើម្បីសុំបញ្ជាក់បន្ថែម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។