គណបក្សភឿថៃ កាលពីថ្ងៃច័ន្ទ បានសម្រេចជ្រើសតាំងលោកស្រី យិងឡាក់ ស៊ីណាវ៉ាត្រ (Yingluck Shinawatra) អាយុ ៤៣ឆ្នាំ ជាបេក្ខជនស្ត្រីទីមួយដើម្បីឈរឈ្មោះជានាយករដ្ឋមន្ត្រីក្នុងប្រទេសថៃ ក្នុងការបោះឆ្នោតជាតិរបស់ថៃ ក្នុងខែកក្កដា ខាងមុខនេះ។
យោងតាមទីភ្នាក់ងារសារព័ត៌មាន អេ.ភី (AP) ចេញផ្សាយនៅថ្ងៃទី១៦ ឧសភា បានឲ្យដឹងថា ការជ្រើសរើសបេក្ខជនស្រីជាប្អូនរបស់លោក ថាក់ស៊ីន ស៊ីណាវ៉ាត្រ របស់គណបក្សគណបក្សភឿថៃ បានបង្កឲ្យមានភាពតានតឹងផ្នែកនយោបាយកាន់តែខ្លាំងឡើងនៅក្នុងប្រទេសថៃ។
ព័ត៌មានក៏បានបន្ថែមទៀតថា លោកស្រី យិងឡាក់ ស៊ីណាវ៉ាត្រ មានបទពិសោធន៍តិចតួចណាស់ក្នុងរឿងនយោបាយ ហើយត្រូវបានគេមើលឃើញថា គាត់ឈរឈ្មោះជាបេក្ខជននាយករដ្ឋមន្ត្រីថៃនេះ គឺដើម្បីលោក ថាក់ស៊ីន ដែលជាបងប្រុសរបស់លោកស្រី និងជាអតីតនាយករដ្ឋមន្ត្រីថៃ ដែលត្រូវក្រុមយោធាធ្វើរដ្ឋប្រហារទម្លាក់ពីអំណាចកាលពីឆ្នាំ២០០៦ ហើយបន្ទាប់មកត្រូវតុលាការថៃ កាត់ទោសកំបាំងមុខឲ្យជាប់ពន្ធនាគារ ២ឆ្នាំ។
ភាគច្រើននៃបទពិសោធន៍ការងាររបស់លោកស្រី យិងឡាក់ ស៊ីណាវ៉ាត្រ គឺបម្រើការងារក្នុងក្រុមហ៊ុនត្រកូល ស៊ីណាវ៉ាត្រ (Shinawatra) ហើយលោក ថាក់ស៊ីន ស្ថិតក្នុងលំដាប់អ្នកមានស្ដុកស្ដម្ភម្នាក់នៅក្នុងប្រទេសថៃ ដែលមានក្រុមហ៊ុនទូរគមនាគមន៍។
ចំណែកគណបក្សប្រជាធិបតេយ្យកំពុងកាន់តំណែងមិនទាន់បានបញ្ចេញឈ្មោះបេក្ខជនជានាយករដ្ឋមន្ត្រីនៅឡើយទេ ប៉ុន្តែស្ទើរតែ ១០០% គឺលោក អាភីស៊ិត វេតឆាឈីវ៉ាក់ (Abhisit Vejjajiva) នាយករដ្ឋមន្ត្រីថៃបច្ចុប្បន្ន។
អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រ ត្រូវបានគេដេញចេញពីតំណែងកាលពីឆ្នាំ២០០៦ ដោយរដ្ឋប្រហារ។ លោក ថាក់ស៊ីន ក៏បានភៀសខ្លួនពីប្រទេសថៃ ដើម្បីគេចខ្លួនឲ្យរួចពីការកាត់ទោសឲ្យជាប់ពន្ធនាគារ។ បើទោះបីជាលោក ថាក់ស៊ីន ត្រូវបានគេបណ្ដេញចេញពីការឈរឈ្មោះបោះឆ្នោតក៏ដោយ ប៉ុន្តែលោកនៅតែមានប្រជាប្រិយភាពខ្ពស់ពីអ្នកគាំទ្របោះឆ្នោតនៅតាមជនបទក្នុងប្រទេសថៃ។
ប្រសិនបើគណបក្សភឿថៃ ឈ្នះឆ្នោត ក្នុងការបោះឆ្នោតជាតិនៅខែកក្កដា ខាងមុខនេះ ប្អូនស្រីរបស់លោក ថាក់ស៊ីន គឺលោកស្រី យិងឡាក់ អាចឡើងជានាយករដ្ឋមន្ត្រីជាស្ត្រីទីមួយក្នុងប្រទេសថៃ៕