អាជីវករ​ផ្សារ​ទួល​សង្កែ​ធំ​តវ៉ា​និង​តម្លៃ​ជួល​តូប

ក្រុម​អាជីវករ​លក់​ទូរស័ព្ទ​ដៃ​នៅ​ផ្សារ​ទូល​សង្កែ​ធំ ឬ​ហៅ​ថា​ផ្សារ​សាំ​ហាន់ នៅ​ក្នុង​សង្កាត់​ទូល​សង្កែ ខណ្ឌ​ឫស្សី​កែវ ប្រមាណ ៥០​នាក់ នៅ​ថ្ងៃ​ទី​២៣ កុម្ភៈ បាន​ធ្វើ​ការ​តវ៉ា​ខណៈ​ដែល​ម្ចាស់​ផ្សារ​បាន​តម្រូវ​ឲ្យ​ពួក​គេ​បង់​ថ្លៃ​ កម្រៃ​ជើង​សារ ឬ​ហៅ​ថា​ថ្លៃ​ទឹក​តែ​ចំនួន ៥០០​ដុល្លារ និង​ដំឡើង​ថ្លៃ​តូប​ពី ៨០​ទៅ​១០០​ដុល្លារ។
ដោយ ទីន ហ្សាការីយ៉ា
2011.02.23
Share on WhatsApp
Share on WhatsApp

ក្រុម​អាជីវករ​បាន​ឲ្យ​ដឹង​ថា កាល​ពី​មុន​តម្លៃ​តូប​ម្ចាស់​ផ្សារ​ជួល​ឲ្យ​តម្លៃ ៨០​ដុល្លារ​ក្នុង ១​ខែ ប៉ុន្តែ​នៅ​ក្នុង​រយៈ​ពេល​ប៉ុន្មាន​ខែ​ចុង​ក្រោយ​នេះ ខណៈ​ដែល​មាន​អាជីវករ​មួយ​ចំនួន​ទៀត​បាន​ទៅ​រក​ជួល​តូប​ច្រើន បែរ​ជា​ម្ចាស់​ផ្សារ​បិទ​សេចក្ដី​ជួន​ដំណឹង​កាល​ពី​ថ្ងៃ​ទី​២២ កុម្ភៈ ថា​គេ​ដំឡើង​ថ្លៃ​តូប និង​ធ្វើ​កុងត្រា​ថ្មី តម្រូវ​ឲ្យ​កក់​លុយ​ចំនួន ២០០​ដុល្លារ​ក្នុង​តូប​មួយ និង​ឲ្យ​ថ្លៃ​ទឹក​តែ​ចំនួន ៥០០​ដុល្លារ​ផ្សេង​ទៀត ដោយ​ក្រុមហ៊ុន​មិន​បង្វិល​ថវិកា ៥០០​ដុល្លារ​នោះ​ឲ្យ​អាជីវករ​វិញ​ទេ។

អ្នក​គ្រប់គ្រង​ផ្សារ​ទូល​សង្កែ​ធំ​ឈ្មោះ ហេង នឿន បាន​បំភ្លឺ​ថា ក្រុមហ៊ុន​បាន​ដំឡើង​ថ្លៃ​ឈ្នួល​ជួល​តូប​ពី​៨០ ទៅ​១០០​ដុល្លារ​នោះ​មែន ហើយ​ថវិកា​ចំនួន ៥០០​ដុល្លារ​នោះ ក្រុមហ៊ុន​ត្រូវ​តែ​យក​ដូច្នេះ​ហើយ ព្រោះ​ក្រុមហ៊ុន​បាន​វិនិយោគ​ធ្វើ​ផ្សារ​នោះ​ចំណាយ​ថវិកា​ច្រើន។

លោក ហេង នឿន បាន​បញ្ជាក់​ថា លោក​បាន​ជូន​ដំណឹង​អំពី​ការ​តវ៉ា​របស់​ក្រុម​អាជីវករ​នេះ​ទៅ​ម្ចាស់​ផ្សារ​រួច​ហើយ ប៉ុន្តែ​ការ​សម្រេច​យ៉ាង​ណា​នោះ​មិន​ទាន់​ដឹង​ចម្លើយ​មក​វិញ​នៅ​ឡើយ។

ទោះ​ជា​យ៉ាង​ណា ក្រុម​អាជីវករ​បាន​លើក​ឡើង​ថា ពួក​គេ​មិន​ជំទាស់​ទៅ​នឹង​ការ​ដំឡើង​ថ្លៃ​ពី​៨០ ទៅ​១០០​ដុល្លារ​ក្នុង ១​ខែ នោះ​ទេ ផ្ទុយ​ទៅ​វិញ ពួក​គាត់​បាន​ទាម​ទារ​ឲ្យ​ក្រុមហ៊ុន​លុប​ចោល​នូវ​ការ​ទារ​ប្រាក់​ទឹក​តែ​ចំនួន ៥០០​ដុល្លារ​នោះ ពី​ព្រោះ​ថា​ការ​លក់​ទូរស័ព្ទ​ដៃ​របស់​ពួក​គាត់​មិន​សូវ​លក់​ដាច់​ច្រើន​ទេ​នា​ពេល​បច្ចុប្បន្ន​នេះ៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
គណបក្ស​ចំនួន​៣ ចូលរួម​ប្រកួត​ដណ្ដើម​កៅអី​ក្រុមប្រឹក្សា​ស្រុក​ក្រុង​ទើប​បំបែក​ថ្មី
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។