ពលការិនី​អនីតិជន​ម្នាក់​ត្រូវ​បាន​សង្គ្រោះ​ពី​ក្រុមហ៊ុន ភី អែន ធី

ពលការិនី​ជា​អនីតិជន​ម្នាក់ ត្រូវ​បាន​ប៉ូលិស​ការិយាល័យ​ប្រឆាំង​ការ​ជួញដូរ​មនុស្ស និង​ការពារ​អនីតិជន​នៃ​ស្នងការដ្ឋាន​នគរបាល​ខេត្ត​កំពង់ឆ្នាំង សហការ​ជាមួយ​មជ្ឈមណ្ឌល​អប់រំ​ច្បាប់​សម្រាប់​សហគមន៍ និង​អង្គការ​លីកាដូ (Licadho) ប្រចាំ​ខេត្ត​កំពង់ឆ្នាំង ជួយ​រំដោះ​ចេញ​ពី​ក្រុមហ៊ុន​នាំ​ពលករ​ចេញ​ទៅ​បរទេស​មួយ​ឈ្មោះ​ក្រុមហ៊ុន ភី អែន ធី (P&T)។
ដោយ មណ្ឌលកែវ
2011.08.09
Share on WhatsApp
Share on WhatsApp

ឪពុក​បង្កើត​កុមារី​រង​គ្រោះ គឺ​លោក ហោ សំអឿន មាន​ទីលំនៅ​ក្នុង​ក្រុង​បានលុង ខេត្ត​រតនគិរី បាន​ឲ្យ​ដឹង​នៅ​រសៀល​ថ្ងៃ​ច័ន្ទ ទី​៨ សីហា ថា កូន​ស្រី​គាត់​ដែល​ទើប​តែ​មាន​អាយុ ១៥​ឆ្នាំ ត្រូវ​បាន​មេខ្យល់​លួងលោម​យក​ទៅ​លក់​ឲ្យ​ក្រុមហ៊ុន ភី អែន ធី ដែល​ជា​ក្រុមហ៊ុន​នាំ​ពលករ​ទៅ​ធ្វើការ​នៅ​ប្រទេស​ម៉ាឡេស៊ី។

គាត់​បន្ត​ថា នៅ​ពេល​ចូល​ទៅ​ក្នុង​ក្រុមហ៊ុន​គេ​បាន​ដូរ​ឈ្មោះ និង​កែ​អាយុ​កូន​គាត់ តែ​ដោយ​កូន​គាត់​បាន​ទាក់ទង​តាម​ទូរស័ព្ទ​ប្រាប់​ថា វា​ត្រូវ​បាន​គេ​នាំ​មក​លក់​ឲ្យ​ក្រុមហ៊ុន ភី អែន ធី នៅ​កំពង់ឆ្នាំង ទើប​គាត់​ដឹង រួច​គាត់​ក៏​ទាក់ទង​សុំ​ឲ្យ​អង្គការ​អន្តរជាតិ​មួយ​ដែល​ធ្វើ​ការងារ​ជួយ​សង្គ្រោះ​កុមារ​ឲ្យ​ជួយ​សង្គ្រោះ​កូន​គាត់ ៖ «ឆែក​ទៅ​ឃើញ​ក្រុមហ៊ុន​ក៏​ស្រឡាំងកាំង។ ខ្ញុំ​សួរ​ថា កូន​ឯង​មក​ប៉ុន្មាន​ថ្ងៃ​ហើយ?វា​ថា មក​យូរ​ហើយ នៅ​ភ្នំពេញ ៣​ថ្ងៃ ហើយ​មក​នៅ​កំពង់ឆ្នាំង​នេះ ៨​ថ្ងៃ​ហើយ ហើយ​គេ​ដូរ​ឈ្មោះ​ដាក់​ឈ្មោះ នៅ ឡេង អាយុ ២៤​ឆ្នាំ»

មេធាវី​នៃ​មជ្ឈមណ្ឌល​អប់រំ​ច្បាប់​សម្រាប់​សហគមន៍ អ្នកស្រី ឆន សុខា មាន​ប្រសាសន៍​ថា អ្នកស្រី​ត្រូវ​បាន​អង្គការ​អន្តរជាតិ​មួយ​ដែល​ធ្វើ​ការងារ​ជួយ​សង្គ្រោះ​កុមារ ពឹង​ពាក់​ឲ្យ​ជួយ​ធ្វើ​ការងារ​ផ្នែក​ច្បាប់​ក្នុង​ការ​ជួយ​រំដោះ​កុមារី​រងគ្រោះ​រូប​នេះ​ចេញ​ពី​ក្រុមហ៊ុន ៖ «ខាង​ខ្ញុំ​ក៏​បាន​សហការ​ជាមួយ​ប៉ូលិស​ខេត្ត​កំពង់ឆ្នាំង។ ខាង​ប៉ូលិស​ក៏​គេ​ធ្វើ​អន្តរាគមន៍​ភ្លែតៗ​ទៅ ទើប​ទៅ​ដក​យក​ក្មេង​ហ្នឹង​ពី​ក្នុង​ក្រុមហ៊ុន​មក​បាន»

វិទ្យុ​អាស៊ីសេរី​មិន​អាច​ទាក់ទង​សុំ​ការ​បំភ្លឺ​ពី​ក្រុមហ៊ុន​នាំ​ពលករ​ទៅ​ធ្វើការ​នៅ​ប្រទេស​ម៉ាឡេស៊ី ឈ្មោះ ភី អែន ធី បាន​ទេ នៅ​ល្ងាច​ថ្ងៃ​ទី​៨ សីហា នេះ។

យ៉ាង​នេះ​ក្ដី ស្នងការ​រង​ទទួល​បន្ទុក​ការិយាល័យ​ប្រឆាំង​ការ​ជួញដូរ​មនុស្ស និង​ការពារ​អនីតិជន​នៃ​ស្នងការដ្ឋាន​នគរបាល​ខេត្ត​កំពង់ឆ្នាំង លោកស្រី ប្រាក់ សៅនី មាន​ប្រសាសន៍​ថា បន្ទាប់​ពី​ទទួល​បណ្ដឹង​ពី​ឪពុក​កុមារី​រងគ្រោះ ដោយ​មាន​ឯកសារ​ត្រឹមត្រូវ​បង្ហាញ​ថា កុមារី​រងគ្រោះ​គឺ​ពិត​ជា​អនីតិជន​នោះ អ្នកស្រី​ក៏​បាន​សុំ​គោលការណ៍​ពី​លោក​ស្នងការ និង​ព្រះរាជអាជ្ញា​អម​សាលា​ដំបូង​ខេត្ត​ចូល​ទៅ​ធ្វើការ​ឆែកឆេរ​ក្នុង​ទីតាំង​ក្រុមហ៊ុន ភី អែន ធី។ អ្នកស្រី​បន្ត​ថា ករណី​នេះ​កំពុង​ស្ថិត​ក្នុង​ការ​ស៊ើប​អង្កេត​បន្ថែម​នៅ​ឡើយ។

លោកស្រី ប្រាក់ សៅនី បន្ថែម​ថា ៖ «គឺ​អ៊ំស្រី​បង្កើត​របស់​ជន​រងគ្រោះ​បាន​នាំ​មក​ជាមួយ​កូន​បង្កើត​គាត់ ២​នាក់​ទៀត។ ខ្ញុំ​ចូល​ទៅ​ដំបូង ក្រុមហ៊ុន​មិន​បាន​ដឹង​ថា ក្មេង​នេះ​ឈ្មោះ​អី​ទេ ដល់​យើង​ទៅ​ដល់​ចង្អុល​តែម្ដង ទើប​គាត់​ភ្ញាក់។ ព្រោះ​អ្នក​ដែល​នាំ​យក​មក​ឲ្យ​ក្រុមហ៊ុន​គាត់​ប្រាប់​ឈ្មោះ​ផ្សេង ប៉ុន្តែ​ដល់​ពេល​យើង​យក​ឯកសារ​ទៅ​បង្ហាញ និង​មាន​ការ​បញ្ជាក់​ពី​ប្រធាន​ប៉ុស្តិ៍​រដ្ឋបាល​នៅ​រតនគិរី​ផង ខាង​ក្រុមហ៊ុន​ក៏​យល់​ព្រម​ប្រគល់​ក្មេង​នេះ​មក​ឲ្យ​ដោយ​គ្មាន​ការ​ប្រទូសរ៉ាយ​អី​ទេ»

បច្ចុប្បន្ន​កុមារី​រងគ្រោះ​ស្ថិត​ក្នុង​មណ្ឌល​សង្គ្រោះ​កុមារ​នៃ​អង្គការ​អន្តជាតិ​មួយ​នៅ​ទីក្រុង​ភ្នំពេញ និង​កំពុង​រៀន​វិជ្ជាជីវៈ៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
ក្រុម​មន្ត្រី​ជាន់ខ្ពស់​គណបក្ស​កាន់​អំណាច​ប្រតិកម្ម​នឹង​ពលរដ្ឋ​ខ្មែរ​រស់នៅ​ក្រៅ​ប្រទេស ជេរ​ប្រមាថ​លោក ហ៊ុន ម៉ាណែត តាម​បណ្ដាញ​សង្គម
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Aug 12, 2011 08:02 PM

I'm very apologize for her . I want to see Cambodian people have happiness but why they have a lot of problem . If the Government don't thinking about Cambodian people i think that they're kill in the future .