មេដឹកនាំសហភាពការងារកម្ពុជា នៅថ្ងៃទី ២១ ខែមិថុនា ឆ្នាំ ២០១១ បានជួបចរចាជាមួយមន្ត្រីជាន់ខ្ពស់នៃក្រសួងការងារ និងបណ្ដុះបណ្ដាលវិជ្ជាជីវៈ ដើម្បីសុំឲ្យក្រសួងជួយធ្វើអន្តរាគមន៍ អនុញ្ញាតឲ្យបុគ្គលិកកម្មករជាច្រើនរយនាក់ ចូលធ្វើការនៅក្រុមហ៊ុនឯកជនវិញ បន្ទាប់ពីថៅកែបណ្ដេញចេញពីការងារដោយគ្មានមូលហេតុច្បាស់លាស់ កាលពីឆ្នាំ ២០០៩ កន្លងទៅ។
ការចរចាបិទទ្វារមួយ បានធ្វើឡើងនៅឯក្រសួងការងារ និងបណ្ដុះបណ្ដាលវិជ្ជាជីវៈ រវាងប្រធានសហភាពការងារកម្ពុជា លោក អាត់ ធន់ ជាមួយប្រធានអគ្គនាយកដ្ឋាន ក្រសួងការងារ គឺលោក សេង សក្កដា។
នៅក្រោយពីជំនួបនោះ លោក អាត់ ធន់ មានប្រសាសន៍ប្រាប់អ្នកកាសែតនៅឯក្រសួងការងារ និងបណ្ដុះបណ្ដាលវិជ្ជាជីវៈថា មានសញ្ញាវិជ្ជមានច្រើនពីមន្ត្រីក្រសួងការងារក្នុងការដោះស្រាយរឿងនេះ។
លោក អាត់ ធន់ ៖ «យើងអត់ទាន់ទុកចិត្ត ១០០% ថា ខាងរដ្ឋាភិបាល នឹងធ្វើអ្វីតាមសន្យា។ ប៉ុន្តែ យើងមានជំនឿថា នឹងធ្វើអ្វី ដែលបានសន្យា ជំរុញឲ្យក្រុមហ៊ុនទទួលយកពួកគេចូលធ្វើការងារវិញ។ ទី២ ធ្វើឲ្យរដ្ឋាភិបាលធ្វើយ៉ាងណា ឲ្យក្រុមហ៊ុនទាំងនោះបង់ទូទាត់នូវប្រាក់សំណង។ បានន័យថា តាំងពីគាត់បញ្ឈប់រហូតដល់ចូលធ្វើការវិញ និងបង់ប្រាក់រំលឹកជាមធ្យម»។
ប្រធានអគ្គនាយកដ្ឋានការងារនៃក្រសួងការងារ និងបណ្ដុះបណ្ដាលវិជ្ជាជីវៈ លោក សេង សក្កដា មិនបានថ្លែងប្រាប់អ្នកកាសែតទេ។ ប៉ុន្តែ លោកត្រូវបានលោក អាត់ ធន់ ដកស្រង់សម្ដីថា លោករីករាយក្នុងធ្វើការសហប្រតិបត្តិការ ដើម្បីធ្វើយ៉ាងណាឲ្យរីកចំរើនក្នុងវិស័យការងារនៅកម្ពុជា។
អតីតបុគ្គលិកម្នាក់នៃក្រុមហ៊ុន កាស៊ីណូ ឈ្មោះ ណាហ្កាវើល (NAGA World Casino) នៅក្នុងទីក្រុងភ្នំពេញ ឈ្មោះ សុផាន់ ណារ៉ា អាយុ ៣២ ឆ្នាំ ដែលរងការបញ្ឈប់ពីការងារ ដោយសារតែងើបតវ៉ាទាមទារដំឡើងប្រាក់ខែ នៅឆ្នាំ ២០០៩ កន្លងមក បានថ្លែងថា ថៅកែមិនបានអនុវត្តន៍តាមគោលការណ៍ច្បាប់ទេ ក្នុងការដោះស្រាយកន្លងមកនោះ។
អ្នកស្រី សុផាន់ ណារ៉ា ៖ «ក្រោយពីយើងប្រកាសប្រាប់សមាជិកយើងថា លទ្ធផលរបស់យើង អត់ទទួលបានផលអ្វីហើយ យើងប្រជុំថ្ងៃទី ២៤ គឺថ្ងៃទី ២៦ ខែ ២ ឆ្នាំ ២០០៩ គឺគេបានបញ្ឈប់យើងតែម្ដង។ យើងបានប្រជុំ បាន២ថ្ងៃ គេបញ្ឈប់យើងតែម្ដង។ គេឆ្គក (escort) យើងចេញក្រៅ។ អត់ឲ្យយើងនៅ»។
ប្រភពពីសហភាពការងារកម្ពុជា បានឲ្យដឹងថា ថៅកែកាស៊ីណូ ណាហ្គាវ៉ឺល នៅក្នុងទីក្រុងភ្នំពេញបានបញ្ឈប់បុគ្គលិកជាបន្តបន្ទាប់ ចំនួនជិត ៦០ នាក់ កាលពីឆ្នាំ ២០០៩ កន្លងទៅ។
អាជ្ញាធរ អប្សរា បានបញ្ឈប់កម្មករពីការងារ ចំនួន ៣០០ នាក់ នៅឆ្នាំ ២០០៦ កន្លងទៅ ដោយពុំមានការដោះស្រាយតាមសំណើរបស់សហជីពឲ្យទទួលយកកម្មករចូលធ្វើការងារវិញនៅឡើយ។
ចំណែកឯអង្គការ ជេ. អេស. អេ ( JSA ) បានបញ្ឈប់កិច្ចសន្យាការងាររបស់កម្មករទាំងអស់ចំនួន ៥៥ នាក់ ពីការងារ នៅចុងឆ្នាំ ២០០៥ នៅពេលបានឈានដល់គម្រោងទី២៕