អ្នកភូមិចោទថាក្រុមហ៊ុនអភិវឌ្ឍន៍មួយនៅក្រចេះវាតទីយកដី
2010.12.30
ប្រជាពលរដ្ឋ ៤គ្រួសារនៅភូមិជីវ៉ាត់ ឃុំស្រែចារ ស្រុកស្នួល ខេត្តក្រចេះ បានឲ្យដឹងថា គ្រួសារនៅទីនោះមានជាង ២០ តែមិនត្រូវបានក្រុមហ៊ុនចិន ឈ្មោះ ណាម៉ុក យីង (NA MOC YING) បោះបង្គោលព្រំដីព័ទ្ធយកឡើយ តែដីរបស់ប្រជាពលរដ្ឋចំនួនបួនគ្រួសារ ដែលមានដំណាំធំៗហើយនោះ បែរជាក្រុមហ៊ុននោះបោះបង្គោលព្រំព័ទ្ធយកធ្វើជាកម្មសិទ្ធិដោយពុំមានពិគ្រោះជាមួយម្ចាស់ដីណាម្នាក់ឡើយ។
លោក ពៅ សុវណ្ណ បានឲ្យវិទ្យុអាស៊ីសេរីដឹងកាលពីល្ងាចថ្ងៃទី២៩ ខែធ្នូថា លោកបានដាំដំណាំកៅស៊ូលើដីចំនួនជាងបីហិកតា ដែលពេលនេះមានអាយុ ៣ឆ្នាំហើយនោះ រួមទាំងដីដាំដំណាំ ៣គ្រួសារទៀត ក៏ម្ចាស់ក្រុមហ៊ុននោះមកបោះបង្គោលព័ទ្ធយកដោយគ្មានពិភាក្សាថា ត្រូវផ្តោះប្តូរ ឬផ្ដល់សំណងអ្វីឡើយ។
លោក ពៅ សុវណ្ណ បន្ថែមថា ៖ «ខ្ញុំចង់តវ៉ាសុំដីហ្នឹងវិញ កៅស៊ូគេដាំអស់ហើយ កៅស៊ូចិន គេដាំព័ទ្ធជុំវិញអស់ហើយ ដល់គេមកបោះយកដីថ្មីនេះទៀត ដឹងគេបោះយកធ្វើអីគេទេ ខ្ញុំដូចឆ្ងល់ដែរ ព្រោះគេចង់ឲ្យលុយខ្ញុំសងជាសំណងថ្លៃជាដំណាំអីខ្ញុំអត់ចង់បានទេ ព្រោះដំណាំខ្ញុំជិតបានផលហើយ រួចខ្ញុំទៅកាប់ដីឯណា? ឥឡូវដីកាប់សុទ្ធតែជាប់ច្រវាក់ ខ្ញុំចង់សុំដីហ្នឹងវិញកុំឲ្យគេយក»។
លោក ញ៉េប ញេន អាយុជាង ៧០ឆ្នាំ ជាអតីតកម្មករចម្ការកៅស៊ូតាំងពីជំនាន់បារាំង រហូតដល់វ័យជរា ត្រូវបានទទួលដីប្រមាណជាងមួយហិកតាដាំដូង ខ្នុរ ដំឡូង គ្រាន់រស់ប្រចាំថ្ងៃយ៉ាងសុខស្រួល ទើបពេលនេះក្រុមហ៊ុនចិន មកហ៊ុមព័ទ្ធរបងយកដូច្នេះ តើលោកបានអ្វីរស់បន្តទៅទៀត លោកសុំឲ្យមានការអនុគ្រោះកុំឲ្យដកហូត។
អ្នកស្រី យឹម ង៉ាន អាយុ ៦៣ឆ្នាំ មានដីមិនដល់មួយហិកតាផង ឲ្យដឹងថា រស់ដោយសារដំណាំបន្តិចបន្តួច និងស៊ីឈ្នួលគាស់ដំឡូងឲ្យគេចិញ្ចឹមខ្លួនឯងតែម្នាក់ត្រដររស់ ចង់សុំកុំឲ្យមានការដកហូតយកដីគាត់។
លោក អ៊ីវ សាភុំ អភិបាលស្រុកស្នួល បានបដិសេធថា ពុំមានក្រុមហ៊ុនឈ្មោះ ណាម៉ុក យីង សុំច្បាប់អភិវឌ្ឍន៍នៅទីនោះដូចប្រជាពលរដ្ឋលើកឡើងឡើយ ៖ «អត់មានទេ ពួកហ្នឹងសុំយូរហើយ អត់មានច្បាប់មានអី។ ពួកហ្នឹងជាពួកផ្ដេសផ្ដាសអត់មានឆ្លងស្រុក ឆ្លងអាជ្ញាធរមូលដ្ឋានអីទេ សុទ្ធតែពួកបន្លំ មិនស្រួលទៅយកដីរដ្ឋធ្វើរបស់វាហ្នឹងនៅឃុំស្រែចារ ឃុំស្នួល មានតែក្រុមហ៊ុនក្រូវែស (CROWEST)»។
លោកអភិបាលស្រុកបានសុំឲ្យប្រជាពលរដ្ឋទាំងនោះធ្វើការទំនាក់ទំនងមកសាលាស្រុក ដើម្បីមានមូលដ្ឋានសម្រាប់ស៊ើបអង្កេត និងដោះស្រាយជូន ហើយលោកក៏ធ្លាប់បញ្ជាក់ជាសាធារណៈដែរថា មានក្រុមហ៊ុនចំនួន៩ បានទទួលអាជ្ញាប័ណ្ណចូលទៅអភិវឌ្ឍន៍នៅស្រុកស្នួល៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
ព័ត៌មានថ្មីៗ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់