មន្ត្រីអង្គការសង្គមស៊ីវិលបានប៉ាន់ស្មានថា មានពលរដ្ឋប្រមាណ២លាននាក់ នឹងធ្វើដំណើរចេញពីទីក្រុងភ្នំពេញឆ្ពោះទៅតាមបណ្ដាខេត្តនានា ដើម្បីចូលរួមក្នុងពិធីបុណ្យចូលឆ្នាំថ្មីប្រពៃណីខ្មែរ។
ប្រធានមជ្ឈមណ្ឌលវប្បធម៌ជាតិ និងសីលធម៌សង្គម លោក ប៉ូ សំណាង មានប្រសាសន៍នៅថ្ងៃទី៧ មេសា ថា បញ្ហាគ្រោះថ្នាក់ចរាចរណ៍គឺជាក្ដីបារម្ភដ៏ធំមួយ ដោយសារពលរដ្ឋត្រូវធ្វើដំណើរទៅ ចូលរួមក្នុងពិធីបុណ្យចូលឆ្នាំខ្មែរជាបន្តបន្ទាប់។ លោកថា ក្នុងយុទ្ធនាការឆ្នាំ២០១២នេះ លោកនិងក្រសួងមហាផ្ទៃបានសហការចុះអប់រំ និងផ្សព្វផ្សាយដល់ពលរដ្ឋ និងអ្នកបើករថយន្តឈ្នួលពីមូលហេតុដែលនាំឲ្យមានគ្រោះថ្នាក់ចរាចរណ៍ ដែលបណ្ដាលមកពីការមិនគោរពច្បាប់ ផ្ទុកលើសចំណុះ និងបើកបរក្នុងស្ថានភាពស្រវឹងជាដើម ៖ "យុទ្ធនាការនេះគឺយើងមានបំណងដើម្បីទប់ទល់និងបញ្ហាអត្រាគ្រោះថ្នាក់ចរាចរណ៍ ដែលអាចកើតឡើង។ បើសិនជាគ្មានយុទ្ធនាការនេះទេ អ្នកបើកយានយន្តនោះនិងមានស្មារតីភ្លេចភ្លាំង។ ជាពិសេសលោកមិនបានមើលពីបញ្ហាការស្វែងយល់ការបើកបររបស់គាត់"។
លោក ប៉ូ សំណាង បញ្ជាក់ថា មានចំណុចគោលដៅធំៗចំនួន៥ដែលក្រុមការងារបានចុះអប់រំ ផ្សព្វផ្សាយនោះ គឺ ចំណតរថយន្តឈ្នួលផ្សារធំថ្មី ផ្សារដើមគ ផ្សារច្បារអំពៅ ផ្សារចោមចៅ និងចំណតគល់ស្ពានជ្រោយចង្វារ។ យុទ្ធនាការនេះ បានចាប់ផ្ដើមពី ថ្ងៃទី៦ មេសា ដល់ថ្ងៃទី១៨មេសា។
ឆ្លើយតបបញ្ហានេះ វរសេនីយ៍ត្រី លោក ចេវ ហាក់ នាយរងការិយាល័យនគរបាលចរាចរណ៍ជើងគោករាជធានីភ្នំពេញ ថ្លែងថា កម្លាំងសមត្ថកិច្ចជំនាញបានចាប់ផ្ដើមធ្វើយុទ្ធនាការអប់រំផ្សព្វផ្សាយអំពីគ្រោះថ្នាក់ចរាចរណ៍នេះដែរ។ ហើយថា កម្លាំងសមត្ថកិច្ចជំនាញបានចុះត្រួតពិនិត្យលក្ខណៈបច្ចេកទេសយាន ដើម្បីសុវត្ថិភាពយានយន្ត និងអប់រំជាបណ្ដើរៗចំពោះម្ចាស់រថយន្តឈ្នួលដែលដឹកអ្នកដំណើរលើសចំណុះ ដែលជារិះគល់នៃគ្រោះថ្នាក់ចរាចរណ៍ ៖ "ជាពិសេសនៅក្នុងរាជធានីភ្នំពេញនេះ ម្សិលមិញនេះខ្ញុំបានចុះទៅចំណតផ្សារធំថ្មី ហើយបាផ្សព្វផ្សាយពីបញ្ហានេះ ទី១ការផ្ទុក ទីពីរការបើកបរដែលប្រើប្រាស់ល្បឿនលើសកំណត់។បានន័យថា ក្នុងឱកាសបុណ្យចូលឆ្នាំយើងសង្កេតថា គ្រោះថ្នាក់ភាគច្រើន គឺគាត់ប្រើប្រាស់ល្បឿន ដោយសារថ្ងៃធម្មតា ឧទាហរណ៍ថាគាត់រត់បានតែមួយជើងទេទាំងទៅទាំងមក។ប៉ុន្តែដល់ថ្ងៃបុណ្យនោះ គាត់បន្ថែមជើងទៀតដែលជាហេតុធ្វើឲ្យគាត់បន្ថែមល្បឿន។ ដូច្នេះបញ្ហានេះក៏យើងធ្វើការអប់រំផងដែរ ហើយបញ្ហាទី៣គឺការទទួលទានគ្រឿងស្រវឹង ហើយបើកបរក៏ហាមដែរ ដើម្បីបញ្ចៀសបាននូវបញ្ហាគ្រោះថ្នាក់ចរាចរណ៍ក្នុងឱកាសបុណ្យចូលឆ្នាំ"។
របាយការណ៍គ្រោះថ្នាក់ចរាចរណ៍នៃនាយកដ្ឋានសណ្ដាប់ធ្នាប់ នៃអគ្គស្នងការដ្ឋាននគរបាលជាតិបានឲ្យដឹងថា គ្រោះថ្នាក់ចរាចរណ៍ក្នុងរយៈពេល១១ខែ ឆ្នាំ២០១១ មានគ្រោះថ្នាក់ចរាចរណ៍កើតឡើងចំនួន ៥.០៩៦ករណី ប្រៀបធៀបជាមួយឆ្នាំ២០១០ កន្លងទៅមានការថយចុះ ៨%។ ដោយឡែក គ្រោះថ្នាក់ចរាចរណ៍ក្នុងពិធីបុណ្យចូលឆ្នាំថ្មីប្រពៃណីខ្មែរកាលពីឆ្នាំ២០១១ មានមនុស្សស្លាប់ចំនួន ៥៨នាក់ និងរបួសចំនួន៤៨៤នាក់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។