អង្គការទាំងនោះ រួមមាន អង្គការលីកាដូ សង់ត្រាល់ សមាគមការពារសិទ្ធិមនុស្សអាដហុក និងមជ្ឈមណ្ឌលកម្ពុជាសម្រាប់ប្រព័ន្ធផ្សព្វផ្សាយឯករាជ្យជាដើម បានធ្វើយុទ្ធនាការនេះពីថ្ងៃទី២៧ខែមិថុនាដល់ថ្ងៃទី២ខែកក្កដា។ សង្គមស៊ីវិលមើលឃើញថា ក្រុមយុវជនទាំងនោះធ្វើការងារដើម្បីបរិស្ថានស្អាត ដូច្នេះតុលាការមិនគួរចាប់ពួកគាត់ដាក់ពន្ធនាគារឡើយ។
អង្គការសង្គមស៊ីវិលនឹងបង្ហោះរឿងរ៉ាវខ្លីៗនៃការតស៊ូរបស់យុវជនទាំងនោះ មុនពេលចាប់ខ្លួន លើកឡើងអំពីទិដ្ឋភាពនៃការចាប់ខ្លួននិងសារសំខាន់ពីសកម្មភាពការងារការពារបរិស្ថានរបស់ពួកគាត់។
នាយកកិច្ចការទូទៅនៃអង្គការលីកាដូ លោក អំ សំអាត បានប្រាប់វិទ្យុអាស៊ីសេរីនៅថ្ងៃទី២៧ខែមិថុនាថា សកម្មជនមាតាធម្មជាតិទាំងនោះ បានចូលរួមយ៉ាងសកម្មក្នុងការការពារបរិស្ថាននិងធនធានធម្មជាតិ ដូច្នេះតុលាការគួរតែលើកទឹកចិត្តដល់ពួកគាត់។
អ៊ីចឹងបានអង្គការសង្គមស៊ីវិលនៅតែទទូចសុំឱ្យទម្លាក់ការចោទប្រកាន់ និងដោះលែងពួកគាត់ឱ្យមានសេរីភាពឡើងវិញ។ ពីព្រោះកិច្ចការពារបរិស្ថានធនធានធម្មជាតិ និងព្រៃឈើមិនមែនជាបទល្មើសឧក្រិដ្ឋ ឬក៏មិនជាបទល្មើសព្រហ្មទណ្ឌទេ។ គួរជាការមួយដែលលើកទឹកចិត្តសម្រាប់ពួកគាត់ឱ្យចូលរួមនៅក្នុងកិច្ចការពារធនធានធម្មជាតិបរិស្ថាននិងព្រៃឈើសម្រាប់ប្រទេសជាតិយើងជាផលប្រយោជន៍រួមរបស់យើងទាំងអស់គ្នា។
— លោក អំ សំអាត
វិទ្យុអាស៊ីសេរីមិនអាចទាក់ទងអ្នកនាំពាក្យសាលាឧទ្ធរណ៍ភ្នំពេញ លោក ឃុន លាងម៉េង ដើម្បីសាកសួរអំពីបញ្ហានេះបានទេនៅថ្ងៃទី២៧ខែមិថុនា។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក យិន ម៉េងលី បានមានប្រសាសន៍ថា យុទ្ធនាការនេះ មានសារសំខាន់ណាស់ដើម្បីបង្ហាញពីវីរភាពអង់អាចក្លាហានរបស់ក្រុមយុវជនទាំងនោះ ដែលបានធ្វើការងារដើម្បីប្រយោជន៍សង្គម។
អ៊ីចឹងអ្វីៗ ដែលពួកគាត់ធ្វើអ្វីៗដែលពួកគាត់លើកឡើងវាជាសេរីភាពមួយក្នុងការបញ្ចេញមតិ គឺសុំឱ្យរដ្ឋាភិបាលធ្វើការពិនិត្យមើលទៅលើបញ្ហាដែលមាននៅក្នុងសង្គមទេ។ អីចឹងបានជាយើងនៅតែចាត់ទុកថាវាមិនមែនជាបទល្មើស ហើយយុទ្ធនាការហ្នឹង គឺចង់ឱ្យមានការដោះលែងពួកគាត់ឱ្យមានសេរីភាពវិញ ឱ្យពួកគាត់បានមកជួបជុំប្រពន្ធកូន បានបន្តការងារសង្គមថែមទៀតដើម្បីជាផលប្រយោជន៍ដល់យើងទាំងអស់គ្នានេះ។
— លោក យិន ម៉េងលី
ក្រៅពីធ្វើយុទ្ធនាការតាមហ្វេសប៊ុក អង្គការសង្គមស៊ីវិល ក៏នឹងជួបជុំគ្នានៅការិយាល័យនៃអង្គការមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស ហៅកាត់ថាសង់ត្រាល់ (CENTRAL) នៅរសៀលថ្ងៃទី១ខែកក្កដាដែរ ដើម្បីឱ្យគ្រួសាររបស់ពួកគាត់ តំណាងយុវជន សហគមន៍មូលដ្ឋាន និងសង្គមស៊ីវិល បានបង្ហាញពីចំណាប់អារម្មណ៍ចំពោះការលះបង់របស់ក្រុមយុវជនទាំងនោះ។
សកម្មជនចលនា មាតាធម្មជាតិទាំង៥នាក់នោះត្រូវបានសាលាដំបូងរាជធានីភ្នំពេញផ្ដន្ទាទោសឱ្យជាប់ពន្ធនាគារពី ៦ ទៅ ៨ ឆ្នាំ ដោយចោទប្រកាន់ពីបទ«បទរួមគំនិតក្បត់» និង «ប្រមាថព្រះមហាក្សត្រ» ពាក់ព័ន្ធនឹងសកម្មភាពការងាររបស់ពួកគាត់។
កាលពីថ្ងៃទី២៤ខែមិថុនា ប្រធានក្រុមប្រឹក្សាជំនុំជម្រះនៃសាលាឧទ្ធរណ៍ភ្នំពេញ លោក អ៊ិត សុធា បានលើកពេលសវនាការជំនុំជម្រះរឿងក្ដីនេះ ទៅពេលក្រោយដោយគ្មានថ្ងៃកំណត់ ក្រោមហេតុផលថា ដោយសារមិនអាចបញ្ជូនដីកាកោះទៅជនជាប់ចោទដែលនៅក្រៅបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។