ចម្ការបន្លែធម្មជាតិសរីរាង្គ (Eco Agri Farm) មានទីតាំងនៅក្នុងឃុំជ្រោយស្វាយ ស្រុកស្រែអំបិល ខេត្តកោះកុង បច្ចុប្បន្នមានផ្ទៃដីសរុបចំនួន ៨៦ហិកតារ ហើយផ្ទៃដីដាំដំណាំបន្លែសរីរាង្គរួចមានចំនួន ២០ហិកតារ។ ស្ថាបនិកចម្ការបន្លែធម្មជាតិសរីរាង្គ ឲ្យដឹងថា ចម្ការបន្លែធម្មជាតិសរីរាង្គនេះ គ្រោងនឹងពង្រីកខ្លួនទៅជាសាលារៀនកសិករ ដើម្បីផ្តល់ឱកាសឲ្យកសិករទូទាំងប្រទេសអាចរៀនសូត្រពីបច្ចេកទេសកសិកម្មដោយមិនគិតកម្រៃ។
ស្ថាបនិកចម្ការបន្លែធម្មជាតិសរីរាង្គ (Eco Agri Farm) អះអាងថា សាលារៀនកសិករនឹងចាប់ផ្ដើមដំណើរការនៅដើមឆ្នាំ២០១៧ ខាងមុខនេះ។ សាលារៀនកសិករនោះ គឺជាសាលារៀនដែលអាចជួយឲ្យកសិករទូទាំងប្រទេស អាចស្វែងយល់ពីចំណេះដឹងកសិកម្ម ដើម្បីអភិវឌ្ឍវិស័យកសិកម្មកម្ពុជា។
ការលើកឡើងនេះ នាឱកាសធ្វើដំណើរទស្សនកិច្ចសិក្សារបស់តំណាងក្រសួងអប់រំ សាស្ត្រាចារ្យ និងសិស្សានុសិស្សវិទ្យាល័យជម្ពូវ័ន នៅចម្ការបន្លែធម្មជាតិសរីរាង្គ (Eco Agri Farm) កាលពីពេលថ្មីៗនេះ។
ប្រធានមជ្ឈមណ្ឌលកសិកម្មធម្មជាតិ (EAC) និងជាស្ថាបនិកចម្ការបន្លែធម្មជាតិសរីរាង្គ (Eco Agri Farm) លោក អៀង សុធារ៉ា យល់ថា វិស័យកសិកម្ម គឺជាផ្នែកមួយសំខាន់ក្នុងការទ្រទ្រង់សេដ្ឋកិច្ចជាតិ និងធានាស្បៀងក្នុងជីវភាពរស់នៅរបស់ប្រជាពលរដ្ឋ។ ជាងនេះទៀត ការងារកសិកម្ម គឺជាការងារសម្រាប់ទាំងអស់គ្នា ព្រោះទាំងអស់គ្នាសុទ្ធតែមានតម្រូវការលើផលិតផលកសិកម្មទាំងអស់។ លោកបន្តថា ជាការផ្លាស់ប្ដូរឥរិយាបថកសិករលើវិស័យកសិកម្មពីការធ្វើកសិកម្មតាមបែបជាយថាផល មកធ្វើតាមលក្ខណៈបច្ចេកទេសបែបសរីរាង្គ គឺជារឿងសំខាន់។ ហេតុនេះ លោកថាការបង្កើតឲ្យមានសាលារៀនសម្រាប់កសិករដោយមិនគិតកម្រៃ គឺជាជម្រើសសំខាន់ នឹងអាចជួយកែទម្លាប់ពលរដ្ឋទាំងនៅទីក្រុង និងជនបទ ឲ្យចេះធ្វើកសិកម្មឡើងវិញ។
ប្រធានមជ្ឈមណ្ឌលកសិកម្មធម្មជាតិ (EAC) និងជាស្ថាបនិកចម្ការបន្លែធម្មជាតិសរីរាង្គ (Eco Agri Farm) រូបនេះឲ្យដឹងថា សាលារៀនកសិករនឹងចាប់ផ្ដើមដំណើរការនៅដើមឆ្នាំ២០១៧ ខាងមុខនេះ។ ជាងនេះទៀត សាលារៀនកសិករ នឹងផ្តល់ឱកាសឲ្យកសិករអាចរៀន អាចធ្វើការផ្លាស់ប្ដូរនូវរបៀបប្រើប្រាស់ពូជ ការប្រើប្រាស់ជី ថ្នាំសម្លាប់សត្វល្អិត របៀបធ្វើ និងការថែទាំដើម្បីជួយជំរុញកសិករក្នុងការបង្កើនទិន្នផលកសិកម្មរបស់ខ្លួនកាន់តែខ្ពស់ ធានាបាននូវសន្តិសុខស្បៀងបានគ្រប់គ្រាន់៖ « ក្នុងពេលឆាប់ៗនេះ យើងចង់បង្កើតទៅសាលាកសិករ មានន័យថា ភូមិមួយហ្នឹងគាត់ចង់ដាំប៉េងប៉ោះ គាត់មករៀនតែដាំប៉េងប៉ោះទៅ។ គាត់មករៀនតែធ្វើជីកំប៉ុសទៅ ហើយពេលរៀនចេះហើយ គាត់ត្រឡប់ទៅផ្ទះវិញ គាត់នាំគ្នាដាំប៉េងប៉ោះទៅ ហើយខាងលោក អ្នកទទួលទិញទាំងអស់។ ចឹងគាត់បានទាំងចំណេះដឹងកសិកម្មហើយ គាត់បានទាំងទីផ្សារទៀត »។
ទន្ទឹមគ្នានេះ លោកថាដើម្បីឲ្យសាលារៀនកសិករអាចចាប់ផ្ដើមដំណើរការនៅដើមឆ្នាំ២០១៧ បានជោគជ័យ លោកក៏កំពុងតែរៀបចំផែនការជាក់លាក់ ដើម្បីពង្រីកកន្លែងស្នាក់នៅ អ្នកបច្ចេកទេស និងការសហការពីអ្នកជំនាញ ដើម្បីងាយស្រួលឲ្យកសិករ និងប្រជាពលរដ្ឋ សិស្សានុសិស្ស អាចមកសិក្សាស្វែងយល់រយៈពេលខ្លីលើបច្ចេកទេសកសិកម្ម ពិសេសការដាំបន្លែសរីរាង្គ៖ « គម្រោងនេះវាត្រូវការពេលវេលា និងរៀបចំផែនការឲ្យបានច្បាស់លាស់។ យើងត្រូវការកម្មវិធីបង្រៀនច្បាស់ៗមានរយៈពេលខ្លី កន្លែងស្នាក់នៅ កន្លែងរៀន និងកន្លែងហូបអាហារជុំគ្នា។ ចឹងហើយគឺជាឱកាសសម្រាប់កសិករទូទាំងប្រទេសកម្ពុជា ខ្វះចំណេះដឹងអីអាចរៀនសូត្រ ដើម្បីជំរុញជីវភាពគ្រួសាររបស់ខ្លួន »។
ប្រធានមជ្ឈមណ្ឌលកសិកម្មធម្មជាតិ (EAC) និងជាស្ថាបនិកចម្ការបន្លែធម្មជាតិសរីរាង្គ (Eco Agri Farm) លោក អៀង សុធារ៉ា ក៏បានបញ្ជាក់ថា បច្ចុប្បន្នផលិតផលកសិកម្មសរីរាង្គពីចម្ការបន្លែធម្មជាតិសរីរាង្គ (Eco Agri Farm) ត្រូវបានផ្គត់ផ្គង់ក្នុងមួយថ្ងៃជាង ៣០០គីឡូក្រាមទៅកាន់ទីផ្សារសហករណ៍សរីរាង្គខ្មែរចំនួនបីកន្លែងនៅរាជធានីភ្នំពេញ។ លោក អៀង សុធារ៉ា រំពឹងថា សាលារៀនកសិករនេះ គឺជាជំហានថ្មីដែលអាចជួយពង្រឹងធនធានមនុស្សក្នុងវិស័យកសិកម្មឲ្យបានខ្លាំងជាងមុន តាមរយៈការផ្តល់ទីផ្សារលក់ផលិតផលកសិកម្ម ដើម្បីឲ្យវិស័យនេះមានសក្ដានុពលពិតប្រាកដជួយឲ្យពលរដ្ឋកម្ពុជា អាចទទួលផលពីឱកាសទីផ្សារសេរីដើម្បីសេដ្ឋកិច្ចជាតិ និងការរស់នៅរបស់ប្រជាពលរដ្ឋគេចផុតពីភាពក្រីក្រ។
ទាក់ទិននឹងការពង្រីកខ្លួនរបស់ចម្ការបន្លែធម្មជាតិសរីរាង្គនៅខេត្តកោះកុង ទៅជាសាលារៀនកសិករនេះ ប្រធាននាយកដ្ឋានស្រាវជ្រាវវិទ្យាសាស្ត្រនៃក្រសួងអប់រំ យុវជន និងកីឡា លោក ច័ន្ទ រ័ត្ន គាំទ្រគម្រោងនេះ។ លោកថា ក្រសួងអប់រំ តែងតែមានគោលនយោបាយចង់ពង្រីកការអប់រំនៅក្នុងសាលា ឲ្យផ្សារភ្ជាប់ទៅនឹងចំណេះដឹងទូទៅ ពិសេសចំណេះដឹងបំនិនជីវិតពាក់ព័ន្ធនឹងបច្ចេកទេស។ ហេតុនេះលោកថា តាមរយៈសាលារៀនកសិករនេះ ក្រសួងរំពឹងថា កម្ពុជា នឹងអាចក្លាយជាប្រទេសដែលមានចំណូលមធ្យមក្នុងកម្រិតខ្ពស់ក្នុងឆ្នាំ២០៣០ ផងដែរ៖ « ពេលខ្លះយើងដេកពឹងតែលើជំនួយ ឧទាហរណ៍ថា គ្រោះធម្មជាតិភ្លាម យើងមានមធ្យោបាយជួយខ្លួនតាមរយៈការងារសាមញ្ញ បច្ចេកទេសងាយ និងការចែករំលែកគ្នាទៅវិញទៅមកពីបច្ចេកទេសកសិកម្ម។ អានេះហើយជាគោលដៅរបស់ក្រសួងអប់រំ ដែលចង់ជំរុញឲ្យពលរដ្ឋរៀនពីបំនិនជីវិត »។
ចំណែកឯនិស្សិតនៅសាកលវិទ្យាល័យភូមិន្ទភ្នំពេញ លោក ឃឹម សុខ ដែលបានចុះទស្សនកិច្ចនៅចម្ការបន្លែធម្មជាតិសរីរាង្គនៅខេត្តកោះកុង ដែរនោះ យល់ឃើញថា បច្ចុប្បន្នការយកចិត្តទុកដាក់បណ្តុះបណ្តាលកសិករឲ្យយល់ដឹងពីការដាំដុះបន្លែសរីរាង្គនៅមានកម្រិត និងមិនទាន់ស្របតាមសម័យបច្ចេកវិទ្យាទំនើប ឬស័ក្ដិសមនឹងប្រទេសដែលយកវិស័យកសិកម្មជាធំនោះទេ។ ករណីនេះ លោកគាំទ្រឲ្យមានការបង្កើតសាលារៀនសម្រាប់កសិករ ដើម្បីបណ្ដុះពលរដ្ឋខ្មែរ ពិសេសកសិករឲ្យយល់ដឹងពីការងារកសិកម្ម ដើម្បីកាត់បន្ថយលំហូរបន្លែគីមីពីក្រៅប្រទេស៖ « បំណងបង្កើតសាលារៀនកសិករ វាអាចជួយជំរុញឲ្យកសិករស្វែងយល់ពីការដាំដុះបន្លែដោយប្រើជី និងថ្នាំពុលធម្មជាតិសរីរាង្គ ដោយទទួលបានទិន្នផលខ្ពស់ និងមិនប៉ះពាល់សុខភាព តាមរយៈការបន្ថយបរិភោគបន្លែគីមី ឬនាំចូល »។
ស្ថាបនិកចម្ការបន្លែធម្មជាតិសរីរាង្គ (Eco Agri Farm) មានទីតាំងនៅក្នុងឃុំជ្រោយស្វាយ ស្រុកស្រែអំបិល ខេត្តកោះកុង បច្ចុប្បន្នមានផ្ទៃដីសរុបចំនួន ៨៦ហិកតារ និងដាំបន្លែសរីរាង្គប្រមាណជាង ៥០មុខ។ ស្ថាបនិកចម្ការបន្លែធម្មជាតិសរីរាង្គ មិនបានបញ្ជាក់ពីចំនួនថវិកាច្បាស់លាស់នៅឡើយ ដើម្បីដំណើរការបង្កើតសាលារៀនកសិករនៅដើមឆ្នាំ២០១៧ នេះ។
យ៉ាងណាក៏ដោយ ស្ថាបនិកចម្ការបន្លែធម្មជាតិសរីរាង្គ ចង់ឲ្យរដ្ឋាភិបាល និងស្ថាប័នពាក់ព័ន្ធ ពិសេសកសិករ គាំទ្រសាលារៀនកសិករ ដើម្បីលើកកម្ពស់ជីវភាពកសិករកម្ពុជា ឲ្យអាចចូលរួមចំណែកលើកស្ទួយផលិតផលក្នុងស្រុក និងសេដ្ឋកិច្ចជាតិទាំងមូល ពិសេសឈានទៅកាត់បន្ថយចំណាកស្រុកជនបទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។