ផែនការ​ស្តុក​ទឹក និង​របៀប​សន្សំ​សំចៃ​ដើម្បី​អាច​ស្រោចស្រព​ដំណាំ​បាន​ពេញ​មួយ​ឆ្នាំ

ដោយ សេក បណ្ឌិត
2019-03-30
អ៊ីម៉ែល
មតិ
Share
បោះពុម្ព
សកម្មភាព​បូម​ទឹក​សង្គ្រោះ​ស្រូវ​ប្រាំង​របស់​ពលរដ្ឋ នៅ​សង្កាត់​បារាយណ៍ ក្រុង​ព្រៃវែង ខេត្ត​ព្រៃវែង កាល​ពី​ថៃ្ងទី២២ ខែ​កុម្ភៈ ឆ្នាំ​២០១៩។
សកម្មភាព​បូម​ទឹក​សង្គ្រោះ​ស្រូវ​ប្រាំង​របស់​ពលរដ្ឋ នៅ​សង្កាត់​បារាយណ៍ ក្រុង​ព្រៃវែង ខេត្ត​ព្រៃវែង កាល​ពី​ថៃ្ងទី២២ ខែ​កុម្ភៈ ឆ្នាំ​២០១៩។
រូបភាព​ក្រសួង​ធនធាន​ទឹក

អង្គការ​ក្រៅរដ្ឋាភិបាល​មួយ​ចំនួន​ចុះ​សម្របសម្រួល ណែនាំ​កសិករ នៅ​តាម​តំបន់​ដែល​ងាយ​ប្រឈម​នឹង​ការ​ខ្វះខាត​ទឹក​ប្រើប្រាស់​ក្នុង​ជីវភាព​ប្រចាំថ្ងៃ និង​ទឹក​ស្រោចស្រព ដើម្បី​ឱ្យ​ពួកគាត់​ចងក្រង​ជា​ក្រុម​ពិភាក្សា រៀបចំ​ផែនការ​រក្សា​ទឹក​ទុក និង​ការប្រើប្រាស់​ទឹក​ដោយ​សន្សំសំចៃ ដើម្បី​កុំ​ឱ្យ​ករណី​ខ្វះ​ទឹក​នេះ ក្លាយ​ជា​ឧបសគ្គ ដល់​ដំណើរ​ការ​ដាំដុះ​របស់​កសិករ។

តើ​មាន​វិធី​យ៉ាង​ដូចម្ដេច​ខ្លះ ដែល​ងាយ​ឱ្យ​កសិករ​ចូលរួម​ផែនការ​រក្សា​ទឹក​ទុក និង​ការ​ប្រើ​ទឹក​ដោយ​សន្សំសំចៃ ទទួល​បាន​ជោគជ័យ​នោះ..?

អង្គការក្រៅរដ្ឋាភិបាល​ដែល​ផ្តោត​លើ​បញ្ហា​កសិកម្ម ជំរុញ​ឱ្យ​ប្រជាពលរដ្ឋ​ចូលរួម​ក្នុង​យុទ្ធនាការ​សន្សំសំចៃ​ទឹក និង​រក្សា​ទឹក​ទុក​ប្រើប្រាស់​ឱ្យ​បាន​ខួប​ប្រាំង ខួប​វស្សា ដើម្បី​ប្រយុទ្ធ​ប្រឆាំង​នឹង​គ្រោះ​រាំងស្ងួត។

អង្គការ​ទាំងនោះ​ក្រៅពី​ផ្ដល់​បច្ចេកទេស និង​បទ​ពិសោធន៍​នោះ ពួកគេ​ក៏បាន​ផ្តល់​នូវ​សម្ភារៈ​ក្នុង​ការ​រៀបចំ​ដំឡើង​ប្រព័ន្ធ​ស្រោចស្រព​មួយ​ចំនួន​ផង​ដែរ។

ប្រធាន​វិទ្យាស្ថាន​អន្តរជាតិ ដើម្បី​ស្តារ​ជនបទ​ឡើងវិញ​ហៅ​កាត់​(IIRR) លោក ឱ ធី បាន​ឱ្យ​ដឹង​ថា អង្គការ​កំពុង​ដំណើរការ​កម្ម​វិធី​ជួយ​កសិករ ក្នុង​ការ​តភ្ជាប់​ប្រព័ន្ធ​ស្រោចស្រព​ដំណក់​ទឹក ដែល​ជា​ប្រព័ន្ធ​ស្រោចស្រព​មួយ​ប្រើ​ទឹក​តិច និង​ចំណេញ​ពេល៖ «គម្រោង​របស់​យើង​ហ្នឹង ជំរុញ​ពួកគាត់​ធ្វើ​ម៉េច​ឱ្យ​ចេះ​សន្សំ​សំចៃ​ទឹក ដូចជា​កសិករ​ណា ដែល​គាត់​មាន​ស្រះ ឬក៏​អណ្ដូង យើង​ត​ភ្ជាប់​ប្រព័ន្ធ​ពី​ប្រភព​ទឹក​ទាំងនោះ ដោយ​បូម​ដាក់​ធុង ឬ​សា​ទែន​តាមរយៈ​ការ​តភ្ជាប់​ប្រព័ន្ធ​ស្រោច​ចេញ​ជា​ដំណក់​ទឹកតូចៗ ឱ្យ​បាចសាច​លើ​ដំណាំ​សព្វកន្លែង ដើម្បី​ឱ្យ​គាត់​ដាំ​បាន​ពេញ​មួយ​ឆ្នាំ។

នេះ​ជា​ដំណោះស្រាយ​មួយ ក្នុងចំណោម ដំណោះស្រាយ​ផ្សេងទៀត ក្នុង​នោះ​រួមមាន​ការ​ជ្រើសរើស​ពូជ​ដាំ​ដំណាំ​ដែល​ធន់​នឹង​អាកាសធាតុ រាំងស្ងួត ដូចជា ពពួក​បន្ថែ​ផ្ទី ត្រប់ សណ្ដែកកួរ ដែល​ជា​ប្រភេទ​ដំណាំ​ត្រូវការ​ទឹក​តិច ក្រៅ​ពី​នេះ​នៅ​មាន​វិធី​លើកដី រង​ដំណាំ​ដោយ​ប្រើ​ជីធម្មជាតិ​។​

ការ​ចំណាយ និង​សម្ភារៈ​ប្រើប្រាស់

ការ​ចំណាយ​ទៅលើ​គម្រោង​ទាំងនេះ មិន​ច្រើនពេក​ទេ គឺ​២ ទៅ ៣​រយ​ដុល្លារ គឺ​យើង​អាច​ធ្វើ​បាន សម្រាប់​ចម្ការ​ដំណាំ ក្នុង​អាជីវកម្ម​ខ្នាត​តូច ដោយសារតែ​បច្ចុប្បន្ន ឧបករណ៍​ទាំងនេះ សម្បូរណ៍​មាន​លក់​នៅ​លើ​ទីផ្សារ។

លោក​ថា ឧបករណ៍ ដែល​ត្រូវ​យក​មក​ប្រើប្រាស់​រៀបចំ​ផ្គុំ​ឱ្យ​ជា​បណ្ដាញ​ស្រោចស្រព​ដោយ​សន្សំសំចៃ​ទឹក​នោះ គឺ​ត្រូវការ​ធុង​ជ័រ​ធំ​ល្មម​មួយ​សម្រាប់​ដាក់​ទឹក​ទៅតាម​ត្រូវការ​ទឹក​ស្រោចស្រព មាន​ទុយោ​ត​រៀប​ជា​ប្រព័ន្ធ​ចេញពី​ធុង​ទៅ​កន្លែង​ដំណាំ​ដែល​ត្រូវ​ស្រោច និង​ប្លាស្ទិក​ក្រាល​គ្រប​លើ​រង​ដំណាំ​ដើម្បី​ឱ្យ​ដី​ត្រជាក់ និង​ឧបករណ៍​រួម​ផ្សំ​មួយ​ចំនួន​ទៀត​តាម​ការ​ច្នៃ​ប្រឌិត​ទៅតាម​ស្ថានភាព​ជាក់ស្ដែង៖ «កសិករ​ខ្លះ​គាត់​អត់ ប្រើ​ប្លាស្ទិក​ទេ គឺ​គាត់​ប្រើ​ជា​គម្រប​សារធាតុ​សរីរាង្គ មាន​ចំបើង ស្មៅ​ស្លឹក​ឈើ​ជាដើម​..»

ក្រៅ​នេះ​ក៏​មាន​ការ​ជ្រើសរើស​ពូជ​ដែល​ធន់​ជាមួយ​គ្រោះ​រាំងស្ងួត រួម​នឹង​បច្ចេកទេស​រៀបចំ​ដី​ថ្នាល​ដំណាំ ជា​រាង​សួន​រង្វង់ និង​រង​ដំណាំ​ដែល​មាន​ទុក​ចង្អូរ​កណ្ដាល​ឱ្យ​ដក់​ទឹក ដើម្បី​សន្សំសំចៃ​ទឹក​ចិញ្ចឹម​ដំណាំ​បាន​យូរ។

គម្រោង​ត​ភ្ជាប់​ប្រព័ន្ធ​ស្រោចស្រព​ដំណក់​ទឹក​តូចៗ ដើម្បី​ស្រោចស្រព​នេះ កំពុង​ដំណើរការ នៅ​ខេត្ត កណ្ដាល បន្ទាយមានជ័យ មណ្ឌលគិរី និង​ខេត្ត​កោះកុង។

ទីប្រឹក្សា​បច្ចេកទេស​កសិកម្ម នៃ​អង្គការ​សេដាក (CEDAC) លោក វង្ស សាវឿន ក៏បាន​ឱ្យ​ដឹង​ដែរ​ថា បច្ចុប្បន្ន​អង្គការ​លោក ក៏​កំពុង​ចុះ​ណែនាំ​ប្រជាពលរដ្ឋ​នៅ​តាម​ជនបទ ជាពិសេស​កន្លែង​ដែល​កំពុង​ប្រឈម​ការ​ខ្វះខាត​ទឹក ដូចជា​នៅ​ខេត្ត​មណ្ឌលគិរី​ជាដើម អំពី​ការ​ត្រៀម​លក្ខណៈ​ប្រយុទ្ធ​ប្រឆាំង​នឹង​គ្រោះ​រាំងស្ងួត ដោយ​រក​វិធីសាស្ត្រ​ផ្សេងៗ ដូចជា​ត្រៀម​ពាង​ទឹកធំៗ អាងទឹក ឬ​ស៊ីទែន សម្រាប់​ស្តុក​ទឹក​ភ្លៀង​នៅ​រដូវ​វស្សា ដើម្បី​ទុក​ប្រើ​នៅ​រដូវប្រាំង​។ ក្រៅពី​ទៀត​ត្រូវ​រៀបចំ​កន្លែង ជីក​ស្រះ អណ្តូង​ទឹក​ថ្មី​បន្ថែម ឬ ស្ដារ​ស្រះ អូរ ប្រឡាយ​ចាស់ៗ ឱ្យ​ដំណើរការ​ឡើងវិញ​។ ទន្ទឹម​គ្នានេះ ក៏​ទាម​ឱ្យ​ពួកគាត់​យល់ដឹង​អំពី​ការប្រើប្រាស់​ទឹក​ដោយ​សន្សំសំចៃ ដោយ​ប្ដូរ​ទម្លាប់​ពី​ការ​ប្រើ​ធុង រែក​ទឹក​ស្រោច​ដំណាំ​នោះ ឱ្យ​ងាក​មក​ប្រើ​ប្រព័ន្ធ​ស្រោចស្រព​ពាក់​កណ្ដាល​ស្វ័យប្រវត្តិ ដូចជា​ប្រើ​ប្រព័ន្ធ​ដំណក់​ទឹក​ស្រោចស្រព​ជាដើម៖ «អង្គការ​សេដាក និង​អង្គការ​ជាច្រើន​ទៀត​បាន​ជំរុញ​ប្រជាពលរដ្ឋ​ឱ្យ​មានការ​ប្រើប្រាស់​ទឹក ដោយ​សន្សំសំចៃ​ឱ្យ​បាន​ល្អ ទៅតាម​លទ្ធភាព ទៅតាម​អ្វី​ដែល​គាត់​អាច​ដោះស្រាយ​បាន តែ​ទោះ​យ៉ាង​ណា​ចំណេះដឹង​របស់​ប្រជាពលរដ្ឋ​នៅ​មាន​កម្រិត​ទាក់ទង​ទៅ​នឹង​ការប្រើប្រាស់​ទឹក​ដោយ​សន្សំសំចៃ​នេះ»

ទាក់ទង​បញ្ហា​នេះ​ដែរ លោក​បណ្ឌិត យ៉ង់ សាំង​កុមារ អ្នក​ជំនាញ​លើ​វិស័យ​កសិកម្ម និង​ជា​មន្ត្រី​ជាន់ខ្ពស់​នៃ​គណបក្ស​ប្រជាធិបតេយ្យ​មូលដ្ឋាន បាន​ឱ្យ​ដឹង​ថា នៅ​រដូវប្រាំង កសិករ​នៅ​តំបន់​ខ្លះ អាច​ខ្វះខាត​ទឹក​ស្រោចស្រព​ជិត​៩០%

លោក​ថា ដើម្បី​ទប់ទល់​បញ្ហា​នេះ និង​សម្រួល​ដល់​ដំណើរ​ការ​ដាំដុះ​បាន​រលូន ខួប​ប្រាំង ខួប​វស្សា​ដោយ​គ្មាន​ឧបសគ្គ​នោះ កសិករ ត្រូវ​មាន​ផែនការ​រក្សា​ទឹក ឬ​ស្វែង​ប្រភព​ទឹក​បម្រុង​ទុកជាមុន និង​ត្រូវ​មាន​គោលការណ៍ និង​វិធី​ប្រើប្រាស់​សន្សំសំចៃ​ទឹក ឱ្យ​ស្រប​ទៅ​តាម​ផែនការ​ដាំដុះ​ពេញ​មួយ​ឆ្នាំ​ដោយ​ម៉ត់ចត់។

លោក​បាន​ផ្ដល់​ជា​ដំណោះស្រាយ​ដែរ​ថា កសិករ​គួរ​តែ​រក​ដី​ជាង​តិច​១០% នៃ​ទំហំ​ដី​សរុប​ដែល​ត្រូវ​ដាំ​ដុះ ដោយ​ត្រូវ​ជីក​ស្រះ​ស្តុក​ទឹក​ទុក ជីក​អណ្ដូង ហើយ​បើ​មានលទ្ធភាព​សាងសង់​អាង​ស្តុក​ទឹក​ធ្វើ​ពី​បេតុង​ទៀត​នោះ​រឹត​តែ​ប្រសើរ។ លោក​បន្ត​ថា ការ​ធ្វើ​បែបនេះ ដោយសារ​បច្ចុប្បន្ន កសិករ មិន​អាច​ពឹងផ្អែក​បាន​ទាំងស្រុង​លើ​ប្រភព​ទឹក​ធម្មជាតិ ប្រព័ន្ធ​ធារាស្ត្រ​របស់​រដ្ឋ ឬ​ប្រព័ន្ធ​ស្រោចស្រព​ដែល​មាន​ស្រាប់ ទាំងស្រុង​នោះ​បាន​ទេ។

លោក​ឱ្យ​ដឹង​ទៀត​ថា ដើម្បី​ធ្វើ​ការងារ​នេះ​បាន​ជោគជ័យ កសិករ​ត្រូវតែ​មាន​អ្នក​ដឹកនាំ សម្របសម្រួល ធ្វើ​ផែនការ​សន្សំ​ទុន ស្វែងរក​ប្រភព​ប្រាក់កម្ចី​ដើម្បី​សាងសង់​ប្រភព​ទឹក​នេះ៖ «យើង​ត្រូវ​រក​ទុន​បន្ថែម​ខ្លះ ខ្ញុំ​ធ្លាប់​អំពាវនាវ​ឱ្យ​បង្កើត​មូលនិធិ បង្កើត​ក្រុម​ប្រាក់​សន្សំ ដើម្បី​ជីក​ស្រះ​ទឹក អណ្ដូង​ជាដើម​.....!»

អង្គការ​សេដាក ក៏បាន​ផ្សព្វផ្សាយ​នូវ​អត្ថបទ​ស្រា​ជ្រាវ​របស់​ខ្លួន​លើ​បណ្ដាញ​សង្គម​ដែរ​ថា​៖ ទឹកជា​ប្រភព​សំខាន់​មួយ​ដែល​នាំ​កសិករ​ទទួល​បាន​ជោគជ័យ​លើ​ការ​ដាំដុះ។

ដើម្បី​ទទួល​បាន​ទឹក​ពេញ​មួយ​ឆ្នាំ​កសិករ​ត្រូវ​ជីក​ស្រះ និង​ប្រព័ន្ធ​ប្រឡាយ ឱ្យ​ច្រើន​បាន​ខ្វាត់ខ្វែង ដើម្បី​ស្តុក​ទឹក​ទុក​ប្រើប្រាស់ សម្រាប់​រដូវប្រាំង​ផង និង​ជាពិសេស​ទៀត​នោះ​គឺ​អាច​ជួយ​រំដោះ​ទឹក ពេល​មានការ​ជន់​លិច​ផង​ដែរ។

អត្ថបទ​ស្រាវជ្រាវ​ដដែល​បង្ហាញ​ទៀត​ថា​៖ ការ​វិនិយោគ​លើ​ប្រព័ន្ធ​ប្រឡាយ ត្រូវ​ចំណាយ​ច្រើន​ពី​ដំបូង ប៉ុន្តែ​ផ្ដល់​អត្ថប្រយោជន៍​បាន​ច្រើន​ទាំង​ពេល​បច្ចុប្បន្ន និង​អនាគត ព្រោះ​«​មាន​ទឹក គឺ​មាន​ជីវិត​»។ ការដែល​មាន​ទឹក​គ្រប់គ្រាន់​កសិករ​អាច​ដាំ​ដុះ​បន្លែ ផ្លែឈើ ចិញ្ចឹម​ត្រី ចិញ្ចឹម​សត្វ​ផ្សេងៗ ប្រើប្រាស់​ក្នុង​ជីវភាព​គ្រួសារ​ប្រចាំថ្ងៃ និង​ជួយ​ឱ្យ​មាន​ភាព​ត្រជាក់ត្រជំ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល