ជំងឺបាតភ្នែកទឹកនោមផ្អែម ជាជំងឺភ្នែកមួយប្រភេទដែលអ្នកជំងឺទឹកនោមផ្អែមមានភាពប្រឈមខ្ពស់ និងឈានទៅរកភាពពិការ។ ជំងឺបាតភ្នែកទឹកនោមផ្អែម គឺជាជំងឺដែលគ្រូពេទ្យ និងអង្គការសុខភាពពិភពលោក ព្រួយបារម្ភខ្លាំង ស្របពេលដែលតួលេខជំងឺទឹកនោមផ្អែមចេះតែកើនឡើងរៀងរាល់ឆ្នាំ។
គ្រូពេទ្យជំនាញឯកទេសផ្នែកជំងឺបាតភ្នែក នៃមន្ទីរពេទ្យមិត្តភាពខ្មែរសូវៀត លោកវេជ្ជបណ្ឌិត សាលី ធារិទ្ធ ឱ្យដឹងថា ជំងឺបាតភ្នែកជាជំងឺរលាកដែលកើតមាននៅនឹងបាតភ្នែក ឬជួនកាលរលាកសរសៃឈាមនៅបាតភ្នែកនោះ។ បាតភ្នែក គឺនិយាយសំដៅទៅរកជញ្ជាំងខាងក្នុង និងផ្នែកខាងក្រោយនៃគ្រាប់ភ្នែក ដែលជាទីតាំងសម្រាប់ទទួលរូបភាព។
លោកវេជ្ជបណ្ឌិត សាលី ធារិទ្ធ មានប្រសាសន៍ថា ជំងឺបាតភ្នែកច្រើនជួបប្រទះចំពោះអ្នកកើតជំងឺទឹកនោមផ្អែមនៅទីក្រុង ជាងអ្នកនៅជនបទ។
«សំឡេង»
ចំពោះមូលហេតុវិញ លោកវេជ្ជបណ្ឌិត សាលី ធារិទ្ធ ឱ្យដឹងថា កត្តាដែលនាំឱ្យកើតជំងឺរលាកបាតភ្នែក មានមូលហេតុច្រើនយ៉ាង។ ជំងឺរលាកបាតភ្នែក ជាជំងឺមិនឆ្លង ហើយជំងឺនេះមិនមែនបណ្ដាលមកពីមេរោគទេ។ ករណីជំងឺរលាកបាតភ្នែកខ្លះ គឺអ្នកជំងឺកើតមកពីកំណើត។ ក៏ប៉ុន្តែ ជំងឺរលាកបាតភ្នែកភាគច្រើនដែលគ្រូពេទ្យឧស្សាហ៍ជួប និងបារម្ភខ្លាំង គឺជំងឺរលាកបាតភ្នែកដែលជាផលវិបាករបស់ជំងឺទឹកនោមផ្អែម។
«សំឡេង»
រោគសញ្ញា៖
គ្រូពេទ្យឱ្យដឹងថា ជំងឺរលាកបាតភ្នែកនៅក្នុងដំណាក់កាលដំបូងៗ មិនបង្ហាញអាការៈ ឬរោគសញ្ញាអ្វីឱ្យដឹងជាមុនទេ ហើយលោកវេជ្ជបណ្ឌិត សាលី ធារិទ្ធ មានប្រសាសន៍ថា ជំងឺរលាកបាតភ្នែកនេះក៏មិនបណ្ដាលឱ្យឈឺចាប់ដែរ៖ «រោគសញ្ញាអត់មានឈឺចាប់ទេ។ បញ្ហាតែមួយគត់ គឺស្រវាំង។ ស្រវាំងមានមូលហេតុពីរ គឺមូលហេតុគាត់អាចមកពីជំងឺឡើងបាយ ឬក៏គាត់អាចមានកំហុសកំណុំ»។
ការព្យាបាល៖
ជំងឺរលាកបាតភ្នែកទឹកនោមផ្អែម មិនអាចព្យាបាលជាទេ ដោយសារតែជំងឺទឹកនោមផ្អែមព្យាបាលមិនជាដែរ។ ក៏ប៉ុន្តែ លោកវេជ្ជបណ្ឌិត សាលី ធារិទ្ធ បញ្ជាក់ថា ការព្យាបាលជំងឺនេះឱ្យទាន់ពេលវេលា ជាការប្រសើរ ដើម្បីទប់ស្កាត់មុនកុំឱ្យភ្នែកឆាប់ងងឹត ឬពិការ។
«សំឡេង»
លោកបញ្ជាក់បន្ថែមថា ប្រសិនបើមិនបានព្យាបាល ឬគ្រប់គ្រងជំងឺទឹកនោមផ្អែមឱ្យបានត្រឹមត្រូវ យូរទៅវានឹងនាំឱ្យមានផលវិបាកជាជំងឺបាតភ្នែក។
«សំឡេង»
វិធីបង្ការ៖
លោកវេជ្ជបណ្ឌិតណែនាំថា ដើម្បីបង្ការកុំឱ្យមានជំងឺបាតភ្នែក ដែលជាផលវិបាកពីជំងឺទឹកនោមផ្អែម គឺត្រូវទទួលទានអាហារតាមរបបត្រឹមត្រូវ ដោយមិនត្រូវទទួលទានអាហារផ្អែម ឬខ្លាញ់ច្រើនពេក ជាពិសេស ត្រូវបញ្ចេញកម្លាំងកាយ ឬហាត់ប្រាណឱ្យបានច្រើន។
«សំឡេង»
ដំបូន្មានរបស់គ្រូពេទ្យ៖
លោកវេជ្ជបណ្ឌិតណែនាំទៀតថា អ្នកជំងឺទឹកនោមផ្អែម គប្បីឧស្សាហ៍ជួបពិគ្រោះ និងពិនិត្យភ្នែកជាមួយគ្រូពេទ្យជំនាញខាងភ្នែក ជាពិសេស អ្នកជំងឺទឹកនោមផ្អែមដែលមានបញ្ហាភ្នែកស្រវាំង ឬព្រិលមើលមិនសូវឃើញច្បាស់។ ការពិនិត្យរកជំងឺបាតភ្នែក គប្បីធ្វើមួយឆ្នាំម្ដង ដោយមិនត្រូវរង់ចាំរហូតដល់មានរោគសញ្ញាឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។