វិធី​បង្ការ​បញ្ហា​សុខភាព​នៅ​ពេល​ធាតុអាកាស​ក្តៅ​ខ្លាំង​ក្នុង​ពិធីបុណ្យ​ចូល​ឆ្នាំថ្មី

ដោយ ម៉ៅ សុធានី
2024.04.11
វិធី​បង្ការ​បញ្ហា​សុខភាព​នៅ​ពេល​ធាតុអាកាស​ក្តៅ​ខ្លាំង​ក្នុង​ពិធីបុណ្យ​ចូល​ឆ្នាំថ្មី ទិដ្ឋភាពវត្តអារាមនៅរាជធានីភ្នំពេញ មុនថ្ងៃចូលឆ្នាំថ្មី ប្រពៃណីជាតិ នៅថ្ងៃទី១១ ខែ​មេសា ឆ្នាំ​២០២៤។
រូប​៖ ពលរដ្ឋ​ផ្តល់ឱ្យ

វេជ្ជបណ្ឌិត​ជំនាញ​សុខភាព​ផ្តល់​ដំបូន្មាន​ឲ្យ​ប្រជាពលរដ្ឋ​មានការ​ប្រុងប្រយ័ត្ន​ខ្ពស់ ដើម្បី​ជៀសវាង ការ​ថប់​ដង្ហើម ដួលសន្លប់ គាំងបេះដូង ដាច់​សរសៃឈាម​ខួរក្បាល និង​ជំងឺ​ផ្សេងៗ​ទៀត​ទាក់ទង​នឹង​អាកាសធាតុ​ក្ដៅ​ខ្លាំង។ ការព្រមាន​នេះ ធ្វើឡើង ខណៈ​សីតុណ្ហភាព អាច​ឡើងក​ម្តៅ​ដល់​ទៅ ៤២ អង្សា​សេ ក្នុង​រដូវ​ប្រារព្ធ​បុណ្យ​ចូលឆ្នាំថ្មី​ប្រពៃណី​ជាតិ​ឆ្នាំនេះ។

តើ​គេ​មាន​វិធី​ណាខ្លះ​នៅពេល​ចេញទៅ​ក្រៅ​ផ្ទះ ឬ​ស្ថិត​ក្នុងចំណោម​មនុស្ស​កុះករ​ច្រើន ក្នុង​សីតុណ្ហភាព​ក្តៅ​ខ្លាំង?

អាកាសធាតុ​ក្តៅ​ខ្លាំង អាច​សម្លាប់​មនុស្ស​បាន ប្រសិនបើ​គ្មាន​វិធានការ​ត្រឹមត្រូវ ដើម្បី​បង្ការ​និង​កាត់​បន្ថយ​ហានិភ័យ​ខ្ពស់​នៃ​រលក​កម្តៅ​ខ្លាំង ជាពិសេស មនុស្ស​ចាស់​អាយុ​លើស​ពី ៦៥​ឆ្នាំ​ឡើង​ទៅ កុមារ​អាយុ​ក្រោម​២​ឆ្នាំ អ្នក​មាន​ជំងឺ​រ៉ាំរ៉ៃ (Chronic diseases) និង​អ្នកមាន​បញ្ហា​សុខភាព​ផ្លូវចិត្ត (Mental illness)

នាយកដ្ឋាន​ធនធានទឹក និង​ឧតុនិយម​ឲ្យ​ដឹង​ថា ប្រទេស​កម្ពុជា​កំពុង​ជួបប្រទះ​រលក​កម្តៅ​ដែល​មិន​ធ្លាប់​មាន​ពីមុន​មក ក្នុង​ខែ​មេសា​ឆ្នាំ​២០២៤​នេះ ដោយ​សីតុណ្ហភាព​ឡើងក​ម្តៅ​ខ្លាំង ចន្លោះ​ពី ៣៩ ទៅ ៤២ អង្សា​សេ នៅ​រាជធានី​ភ្នំពេញ និង​នៅ​តាម​ខេត្ត​មួយចំនួន រួមមាន​ខេត្តបាត់ដំបង បន្ទាយមានជ័យ ស្ទឹងត្រែង រតនគិរី និង​ខេត្តមណ្ឌលគិរី ជាដើម​។ រលក​កម្ដៅ​នេះ នឹង​បន្ត​កើនឡើង​ខ្លាំង ជាពិសេស ក្នុង​រដូវ​ប្រារព្ធ​ពិធីបុណ្យ​ចូលឆ្នាំថ្មី ប្រពៃណី​ជាតិ។

ប្រធាន​សមាគម​គ្រូពេទ្យ​គុណធម៌​កម្ពុជា លោក​វេជ្ជបណ្ឌិត អ៊ូច វុឌ្ឍី មាន​ប្រសាសន៍​ប្រាប់​វិទ្យុ​អាស៊ីសេរី​ថា រដូវ​បុណ្យ​ចូលឆ្នាំថ្មី​នេះ​ក្តៅ​ខ្លាំង​ខុសពី​ធម្មតា ជាហេតុ​នាំ​ឲ្យ​ពិបាក​ទ្រាំទ្រ​កំដៅ និង​ប៉ះពាល់​សតិអារម្មណ៍​ខ្លាំង ជាពិសេស​ចំពោះ​អ្នក​ក្រីក្រ​រស់នៅ​ក្នុង​បន្ទប់​ចង្អៀត គ្មាន​ម៉ាស៊ីនត្រជាក់ ឬ​កង្ហារ​ជាដើម​៖

វេជ្ជបណ្ឌិត អ៊ូច វុឌ្ឍី៖ «ប្រទេស​កម្ពុជា​យើង រដូវ​ហ្នឹង​គឺ​រដូវ​ចូលឆ្នាំ​ខ្មែរ គឺ​រដូវ​ក្តៅ​ខ្លាំង ប៉ុន្តែ​វា​ក្តៅ​ខុសពី​ធម្មតា ខុស​កាលពី​សម័យ​ដើមឡើយ សម័យ​ដែល​យើង​មាន​ព្រៃឈើ​ច្រើន យើង​អត់​ក្តៅ​អ៊ីចឹងទេ​។ ឥឡូវ​នេះ នៅ​ភ្នំពេញ កំដៅ​រហូតដល់​៣៩ រហូតដល់​៤១ អង្សា​សេ​។ បញ្ហា​ហ្នឹងហើយ​ធ្វើ​ឲ្យ​ប៉ះពាល់​ដល់​សរសៃ​ប្រសាទ ប៉ះពាល់​ដល់​អារម្មណ៍ នៅពេល​ក្តៅ​ខ្លាំង​ជិះ​កង់​ជិះ​ម៉ូតូ ទៅ​ធ្វើ​ការ​...»

បញ្ហា​រលក​កំដៅ​ខ្លាំង​ហួតហែង​និង​ហប់​ខ្យល់ អាច​បង្ក​គ្រោះថ្នាក់​នៃ​ជំងឺ​ដាច់​សរសៃឈាម​ខួរក្បាល គាំង​បេះដូង ការ​ខ្សោះ​ជាតិ​ទឹក​ក្នុង​ខ្លួន និង​ជំងឺ​ផ្សេងៗ បណ្តាល​មក​ពី​ធាតុអាកាស​ក្តៅ​ខ្លាំង​នេះ​។ ការ​គាំង​បេះដូង និង​ការ​ដាច់​សរសៃ​ឈាម​ខួរក្បាល អាច​បណ្តាល​ឱ្យ​ដួលសន្លប់ ហើយ​ករណី​ខ្លះ​រហូត​ដល់​ស្លាប់​ក៏​មាន ប្រសិនបើ​ជួយសង្គ្រោះ​អ្នកជំងឺ​មិន​ទាន់​ពេល​វេលា។

លោក​វេជ្ជបណ្ឌិត អ៊ូច វុឌ្ឍី ផ្តល់​ដំបូន្មាន​ថា នៅពេល​ទៅ​ចូលរួម​ពិធីបុណ្យ​ចូល​ឆ្នាំថ្មី​នេះ ពលរដ្ឋ​គ្រប់រូប មុន​ចេញ​ទៅ​ក្រៅ​ផ្ទះ ត្រូវ​ត្រៀម​សម្ភារៈ​មួយ​ចំនួន រួមមាន​មួក កន្សែង ឬ​ក្រមា និង​ទឹក​ប់​ដាក់​តាម​ខ្លួន​ជាប់​ជានិច្ច សំរាប់​ទទួលទាន​ជាប្រចាំ ដើម្បី​កាត់​បន្ថយ​កំដៅ​ក្នុង​ខ្លួន ទោះបីជា​មិន​ស្រេកទឹក​ក៏ដោយ។

វេជ្ជបណ្ឌិត អ៊ូច វុឌ្ឍី៖ «ដើម្បី​ធ្វើដំណើរ​មក​កំសាន្ត​ពេល​បុណ្យចូលឆ្នាំ​ហ្នឹង យើង​ត្រូវការ​ពពាក់ពពូន​គ្នា ផ្លូវ​ចង្អៀត​ប្រជ្រៀត​គ្នា​ទីប្រជុំជន​ហ្នឹង អ៊ីចឹង​គួរណា​បងប្អូន​ត្រូវ​មាន​ទឹក​តាម​ខ្លួន​ជាប់​ជ​និង​មាន​កន្សែង​អាច​ជ្រលក់​ទឹក បើ​មាន​ធុង​ទឹកកក​ធុង​ក្លាសេ ដាក់​ទឹកកក​ឲ្យ​ពេញៗ ហើយ​យើង​មាន​កន្សែង​ត្រជាក់​សំរាប់​ក្មេងៗ ប្រសិនបើ​ក្តៅ​ខ្លាំង យក​កន្សែង​ត្រជាក់​ហ្នឹង​ស្អំ​ទ្រូង ឬទ​ទូល​នៅលើ​ក្បាល ដើម្បី​កាត់​បន្ថយ​កំដៅ​ក្នុង​ខ្លួន​...»

ចំពោះ​រោគសញ្ញា​បណ្តាល​មកពី​អាកាសធាតុ​ក្តៅ​ខ្លាំង​នេះ រួម​មាន​សីតុណ្ហភាព​ក្នុង​ខ្លួន​លើសពី​៣៩​អង្សា​សេ មុខ​ឡើង​ក្រហម ជីពចរ​ដើរ​ញាប់ ឈឺក្បាល វិលមុខ ចង់​ក្អួត បែកញើស​ខ្លាំង និង​មាន​អារម្មណ៍​ច្របូកច្របល់​ជាដើម។

លោក​វេជ្ជបណ្ឌិត អ៊ូច វុឌ្ឍី សង្កត់ធ្ងន់​ថា ប្រសិនបើ​មាន​រោគសញ្ញា​ណាមួយ ដូច​ជា​បែកញើស​ខ្លាំង ស្រវាំងភ្នែក ងងិត​មុខ និង​ពិបាក​ដកដង្ហើម ចាំបាច់​ត្រូវ​ចាក​ចេញ​ពី​ទីប្រជុំជន​ដែលមាន​មនុស្ស​ចង្អៀត​កុះករ។

វេជ្ជបណ្ឌិត អ៊ូច វុឌ្ឍី៖ «ក្តៅ​ខ្លាំង​អាការៈ ទី​១ ធ្វើ​ឲ្យ​គាត់​ងងឹត​មុខ វិលមុខ ថប់ដង្ហើម ប៉ះពាល់​ខួរក្បាល ទៅដល់​សតិអារម្មណ៍ ហើយ​អ្នក​មាន​ជំងឺឆ្កួតជ្រូក ពេលណា​ក្តៅ​គឺ​ប្រកាច់​ភ្លាម​។ ដូច្នេះ​គួរណា​បងប្អូន​ដែល​ដឹងខ្លួន​មុន គួរ​ទៅ​រក​កន្លែង​ម្លប់​អង្គុយ​សម្រាក ដែល​ខ្មែរ​យើង​ថា ខ្យល់​គ ហ្នឹង​អាច​ប្រឈម​ហានិភ័យ​ខ្ពស់ ត្រូវ​បញ្ជូន​ទៅ​មន្ទីរពេទ្យ ដាក់​អុកស៊ីហ្សែន​ជួយ​គាត់​...»

ទាក់ទង​នឹង​ធាតុអាកាស​ក្តៅ​នៅ​កម្ពុជា​ឆ្នាំនេះ អង្គការ​យូនីសេហ្វ ក៏បាន​អំពាវនាវ​ឱ្យ​ប្រជាពលរដ្ឋ​គ្រប់រូប ត្រូវ​ត្រៀមខ្លួន​ជានិច្ច​ដើម្បី​បង្ការ​បញ្ហា​នានា ប៉ះពាល់​ដល់​សុខភាព ជាពិសេស​អ្នក​ដែល​ងាយ​រងគ្រោះ​បំផុត មាន​ដូចជា ទារក កុមារ ស្ត្រី​មាន​ផ្ទៃពោះ និង​មនុស្ស​ចាស់​។ អង្គការ​មួយ​នេះ ក៏បាន​ណែនាំ​អោយ​ស្លៀក​សម្លៀកបំពាក់​ស្រាលៗ និង​រលុង ដែល​ការពារ​កំដៅ​ព្រះអាទិត្យ កំដៅ​ក្នុង​ខ្លួន និង​បរិភោគ​ទឹក​ឲ្យ​បាន​ច្រើន ដើម្បី​បង្ការ​ការ​ខ្សោះ​ជាតិ​ទឹក​នៅក្នុង​ខ្លួន។

បន្ថែម​ពី​នេះ អង្គការ​យូនីសេហ្វ​ឲ្យ​ដឹង​ទៀត​ថា ប្រសិនបើ​អាច​ធ្វើ​បាន ត្រូវ​ជៀសវាង​ស្ថិត​ក្រោម​ពន្លឺព្រះអាទិត្យ​ដែល​ក្តៅ​ចែងចាំង​ខ្លាំង ចាប់ពី​ម៉ោង​១០​ព្រឹក​ដល់​ម៉ោង​៤​រសៀល លាប​ឡេ​ការពារ​មុខ​និង​ខ្លួន​ពី​កំដៅ​ថ្ងៃ ហើយ​ស្វែងរក​កន្លែង​ត្រជាក់​ដូចជា​ម្លប់ ឬ​ម៉ាស៊ីនត្រជាក់​។ ចំពោះ​កុមារ​វិញ ដាច់ខាត​មិន​ត្រូវ​ទុកចោល ឲ្យ​នៅ​ម្នាក់ឯង​ក្នុង​ឡាន​កំពុង​ចត​ចោល និង​បិទ​កញ្ចក់​ជិត​ឡើយ។គេហទំព័រ​មជ្ឈមណ្ឌល​គ្រប់គ្រង​និង​បង្ការ​ជំងឺ​នៅ​សហរដ្ឋអាមេរិក (CDC) ឲ្យ​ដឹង​ថា មធ្យោបាយ​ប្រសើរ​បំផុត​ដើម្បី​បង្ការ និង​ការពារ​កុំ​ឲ្យ​មាន​បញ្ហា​សុខភាព និង​គ្រោះថ្នាក់​ដល់​ជីវិត​ដោយសារ​អាកាសធាតុ​ក្តៅ​ខ្លាំង គឺ​ម៉ាស៊ីនត្រជាក់​។ បន្ថែម​ពី​នេះ ត្រូវ​ទទួលទាន​ទឹក​ឲ្យ​បាន​ច្រើន កុំ​ពិសា​គ្រឿង​ស្រវឹង កាត់បន្ថយ​ការ​ចំអិន​អាហារ​ដោយ​ប្រើ​ចង្ក្រាន ព្រោះ​ជំរុញ​ឲ្យ​កម្តៅ​ក្នុងផ្ទះ កាន់តែ​កើនឡើង​ខ្លាំង។

ចំណែក​យុវវ័យ​និង​អ្នកមាន​សុខភាព​ល្អ​វិញ ក៏​ត្រូវ​កាត់បន្ថយ​សកម្មភាព​កីឡា ឬ​សកម្មភាព​រាងកាយ​ខ្លាំង ក្នុង​អំឡុង​សីតុណ្ហភាព​ក្តៅ​ខ្លាំង​។ ប្រសិនបើ​ដើរ​ហាត់ប្រាណ ត្រូវ​ដើរ​នៅពេល​ព្រឹក​ព្រលឹម ឬ​ពេល​ល្ងាច​ថ្ងៃ​លិច ឬក៏​ដើរ​ក្រោម​ម្លប់​ដើមឈើ​នៅ​តាម​ដងផ្លូវ ឬ​កន្លែង​ឧទ្យាន​ដែល​មាន​ដើមឈើ​ធំៗ​ត្រជាក់​ត្រឈឹងត្រឈៃ។

ប្រធាន​សមាគម​គ្រូពេទ្យ​គុណធម៌​កម្ពុជា លោក​វេជ្ជបណ្ឌិត អ៊ូច វុ​ឌ្ឍី ឲ្យ​ដឹង​បន្ថែម​ថា ប្រសិនបើ​នៅក្នុង​ផ្ទះ គ្មាន​ម៉ាស៊ីនត្រជាក់ គួរ​បើក​បង្អួច​ផ្ទះ​ឲ្យ​ខ្យល់​ចេញចូល បាំង​កំដៅ​ព្រះអាទិត្យ​កុំ​ឲ្យ​ចាំង​ថ្ងៃ​ចូល​ផ្ទះ អង្គុយ​ក្រោម​ម្លប់​ដើមឈើ និង​ឧស្សាហ៍​ងូតទឹក​ត្រជាក់ ដើម្បី​ឲ្យ​កម្តៅ​ក្នុង​ខ្លួន​ថយ​ចុះ។

វេជ្ជបណ្ឌិត អ៊ូច វុឌ្ឍី៖ «បើ​ចាស់ៗ ប្រឈម​ខ្លាំង​មាន​ហានិភ័យ​ខ្លាំង បើ​គាត់​ទៅ​ពពាក់ពពូន​ជាមួយ​ក្មេង ហើយ​គ្មាន​ការ​ប្រុងប្រយ័ត្ន អត់​មាន​កូនចៅ​ជួយ​មើល​គាត់ អាច​នឹង​មាន​ហានិភ័យ​ទៅដល់​ជីវិត​គាត់ ហ្នឹង​ទី​១​។ មួយទៀត​បើសិនជា​ការ​ល្អ កូនចៅ​ទុក​គាត់​នៅផ្ទះ​ឲ្យ​បាន​ស្រួល មាន​ទឹក​ធុង​សំរាប់​គាត់​ងូតទឹក មួយថ្ងៃ​គាត់​ងូត​យ៉ាងតិច ពី​៣​ទៅ​៤​ដង យប់​ឡើង​គាត់​ងូត​ទៀត​ទៅ ដើម្បី​សំរាន្ត​ពេលយប់​...»

កំណើន​សីតុណ្ហភាព​នា​រដូវប្រាំង​ក្នុង​ឆ្នាំ​២០២៤​នេះ កំពុង​ដុត​រោល​មនុស្ស សត្វ និង​រុក្ខជាតិ ឱ្យ​រស់នៅ​ទាំង​ត្រដរ ដែល​រំខាន​ដល់​ការរស់នៅ​ប្រចាំថ្ងៃ ការ​បំពេញ​ការងារ ការ​ប្រកប​របរ​រក​ស៊ី និង​កសិកម្ម​ជាដើម​។ កសិករ​នៅ​បណ្តា​ខេត្ត​មួយ​ចំនួន ត្អូញត្អែរ​ថា រដូវប្រាំង​ឆ្នាំនេះ​ក្ដៅ​ជាង​ឆ្នាំមុន ទើប​បណ្ដាល​ឱ្យ​បឹងបួ អណ្ដូង ស្រះ និង​ប្រឡាយ​មួយចំនួន រីងស្ងួត​លឿន​ជាង​ឆ្នាំមុន ដែល​ធ្វើ​ឱ្យ​ពលរដ្ឋ​ប្រឈម​នឹង​ការ​ខ្វះ​ទឹក​សម្រាប់​ប្រើប្រាស់​ប្រចាំថ្ងៃ សំរាប់​ដំណាំ​កសិកម្ម និង​ការ​ចិញ្ចឹមសត្វ ជាដើម។

រដូវប្រាំង​នៅ​ប្រទេស​កម្ពុជា​គឺ​ចាប់ផ្តើម ពី​ខែ​វិច្ឆិកា ដល់​ខែ​មេសា​។ ខែ​មីនា និង​ខែមេសា គឺជា​ពេលវេលា​ក្ដៅ​បំផុត ដែល​សីតុណ្ហភាព ឡើង​កម្ដៅ​ខ្លាំង​រហូត​ដល់ ៤២​អង្សា​សេ។

អង្គការ​ឧតុនិយម​ពិភពលោក​នៃ​អង្គការសហប្រជាជាតិ បាន​ព្យាករណ៍​ថា ក្នុង​ឆ្នាំ​២០២៤​នេះ ពិភពលោក​នឹង​រង​កម្ដៅ​ក្ដៅ​ជាង​ឆ្នាំ​២០២៣ ដែល​ជា​ការ​បំបែក​កំណត់ត្រា អាច​ឈាន​ទៅ​រក​បាតុភូត​អាកាសធាតុ អែល នីណូ ដែល​បង្ក​ឱ្យ​មាន​ភាព​ក្ដៅ​ហួតហែង គ្រោះ​រាំងស្ងួត និង​មាន​សីតុណ្ហភាព​ចន្លោះ​ពី​៤០ ទៅ​៤២​អង្សា​សេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។