សារៈសំខាន់នៃការពិនិត្យសុខភាពប្រចាំឆ្នាំសម្រាប់ស្ត្រី

ដោយ ម៉ៅ សុធានី
2019-09-20

ផ្ទាំងផ្សព្វផ្សាយពីយុទ្ធនាការប្រយុទ្ធប្រឆាំងនឹងជំងឺមហារីកមាត់ស្បូនលើកទី៥ ដើម្បីអបអរទិវាអន្តរជាតិនារី លើកទី១០៤ របស់មន្ទីរពេទ្យកាល់ម៉ែត ចាប់ពីថ្ងៃទី៤ ដល់ថ្ងៃទី៦ ខែមីនា ឆ្នាំ២០១៥។

Photo courtesy of Calmette Hospital

ស្ដាប់ ឬទាញយកសំឡេង

គ្រូពេទ្យជំនាញសុខភាព អះអាងថា ការពិនិត្យសុខភាពទៀងទាត់ប្រចាំឆ្នាំ មានសារៈសំខាន់ ទាំងសម្រាប់បុរសនិងស្ត្រី។ ការពិនិត្យសុខភាពប្រចាំឆ្នាំនេះ គឺដើម្បីបង្ការទប់ស្កាត់ជាមុន នូវប្រភេទជំងឺផ្សេងៗដែលអាចកើតមានក្នុងរាងកាយរបស់មនុស្សម្នាក់ៗ ជាជាងបណ្ដោយទុកឱ្យជំងឺវិវត្តកាន់តែធ្ងន់ធ្ងរ ទើបស្វែងរកការព្យាបាល ហើយដែលបញ្ហានេះ មានពេលខ្លះគឺយឺតពេល មិនអាចជួយសង្គ្រោះជីវិតបានឡើយ។

តើគ្រូពេទ្យអាចពិនិត្យមើលអ្វីខ្លះក្នុងរាងកាយរបស់យើងម្នាក់ៗ?

ទាំងបុរសនិងស្ត្រី នៅពេលទៅពិនិត្យសុខភាពប្រចាំឆ្នាំ គ្រូពេទ្យប្រចាំគ្រួសារ (Family Doctor) នឹងពិនិត្យសុខភាពរាងកាយ រួមមាន វាស់សម្ពាធឈាម ពិនិត្យលាមក ទឹកមូត្រឬទឹកនោម ស្ដាប់សង្វាក់បេះដូង លើសជាតិស្ករ ជាតិខ្លាញ់ ឬកូលេស្តេរ៉ុល (Cholesterol) រោគថ្លើម ជំងឺពុកឆ្អឹង រោគមហារីកផ្សេងៗ និងជំងឺកាមរោគជាដើម។ ការពិនិត្យសុខភាពនេះ អាស្រ័យទៅតាមវ័យ និងប្រវត្តិជំងឺរបស់ក្រុមគ្រួសារ រួមមានកើតជំងឺរលាកថ្លើម ទឹកនោមផ្អែម មហារីក និងជំងឺបេះដូងជាដើម។ បន្ថែមពីនេះ វេជ្ជបណ្ឌិតនឹងជជែកអំពីរបបចំណីអាហារ ការទទួលទានដំណេក និងការហាត់ប្រាណ ដើម្បីថែរក្សាសុខភាពឱ្យបានល្អប្រសើរ។

គ្រូពេទ្យជំនាញផ្នែកសុខភាពទូទៅ អ្នកស្រីវេជ្ជបណ្ឌិត គ្រីស្ទីណា លី (Christina LEE) ដែលបើកគ្លីនីកពិនិត្យជំងឺនៅទីក្រុងឡុងប៊ិច (Long Beach) មានប្រសាសន៍ប្រាប់អាស៊ីសេរីតាមទូរស័ព្ទ ពីរដ្ឋកាលីហ្វរនីញ៉ា (California) ថាការពិនិត្យសុខភាពប្រចាំឆ្នាំនេះមានសារៈសំខាន់ណាស់ ព្រោះនេះជាអាយុជីវិតរបស់យើងម្នាក់ៗ។ លោកស្រីថា ប្រការដែលស្ត្រីមកពិនិត្យសុខភាពទៀតទាត់នោះ គឺដើម្បីទប់ស្កាត់និងព្យាបាលទាន់ពេលវេលា ដូចជាជំងឺមហារីកសុដន់ និងមហារីកស្បូនជាដើម៖ «អ្នកខ្លះមានប្រវត្តិក្រុមគ្រួសារកើតជំងឺទឹកនោមផ្អែម មានខ្លាញ់ច្រើន គឺយើងពិនិត្យគាត់ញឹកញាប់ ជាងអ្នកដែលអត់មាន។ ដូចនេះយើងបូមឈាមមើលជាតិស្ករ មើលជាតិខ្លាញ់ ហើយអ្នកខ្លះខ្វះឈាមក្រហម ដោយសារធ្លាក់ឈាមច្រើនពេលមានរដូវ។ ស្ត្រីដែលអាយុ៤០ឆ្នាំឡើងទៅ គួរមកថតខ្លះដែរ ព្រោះខ្លះអាចមានមហារីកក្រោម៥០ឆ្នាំ ដូចនេះ ត្រូវពិនិត្យដែររកមើលជំមហារីកដោះ ស្បូននិងមហារីកពោះវៀនធំ...»។

គេហទំព័រសុខភាពមួយចំនួនឱ្យដឹងថា នៅពេលយើងគ្រប់ៗគ្នាមានវ័យកាន់តែចាស់ នោះនឹងចាប់ផ្ដើមមានជំងឺរ៉ាំរ៉ៃជាច្រើនផងដែរ ដូចជា ជំងឺទឹកនោមផ្អែម សម្ពាធឈាមខ្ពស់ ជាតិកូឡេស្ដេរ៉ូលឬខ្លាញ់ច្រើន មហារីកស្បូន សុដន់ និងមហារីកក្រពេញសម្រាប់បុរស ជាដើម។ ភាគច្រើនជំងឺទាំងនោះ មិនបង្ហាញរោគសញ្ញាអ្វីឡើយ នៅដំណាក់កាលដំបូងៗ ដូចនេះនៅពេលដែលលោកអ្នកចាប់ផ្ដើមមានអារម្មណ៍មិនស្រួលខ្លួន នោះវាអាចជាដំណាក់កាលធ្ងន់ធ្ងរនៃជំងឺទៅហើយ។ អាស្រ័យហេតុនេះ ការធ្វើតេស្តរកឃើញរោគសញ្ញាទាន់ពេលវេលា គ្រូពេទ្យជំនាញនឹងអាចជួយព្យាបាលជំងឺទាំងនោះ បានជាសះស្បើយ ឬក៏អាចទប់ស្កាត់កុំឱ្យវិវត្តធ្ងន់ធ្ងរនិងរាលដាលខ្លាំង។

អ្នកស្រីវេជ្ជបណ្ឌិត គ្រីស្ទីណា លី បន្តថា ជំងឺមហារីក ដូចជាមហារីកសុដន់ និងស្បូន ដែលជំងឺកាចសាហាវ ភាគច្រើនគឺជាជំងឺតពូជ ដែលអាចងាយរងគ្រោះចំពោះអ្នកដែលមានក្រុមគ្រួសារកើតជំងឺមហារីក៖ «ចាប់ផ្ដើមពិនិត្យថា តើមានមហារីកស្បូន ជាមហារីកមួយ យើងអាចព្យាបាលបាន បើសិនទើបចាប់ផ្ដើម ហើយវាមិនទាន់រាលដាល។ ជាមួយគ្នានេះ យើងក៏ពិនិត្យមើលសុដន់ដែរ ពីព្រោះស្ត្រីយើងអាចមានមហារីកសុដន់។ ស្ត្រីម្នាក់ក្នុងចំណោម ៩ ឬ១០នាក់ អាចមានមហារីកសុដន់ ហើយប្រសិនបើស្ត្រីមានប្រវត្តិក្រុមគ្រួសារមានមហារីកដោះ នោះគាត់អាចប្រថុយប្រថានខ្ពស់នៃការកើតជំងឺមហារីកនេះ»។

លោកស្រីវេជ្ជបណ្ឌិតជំនាញរូបនេះ អះអាងបន្ថែមថា ចំពោះស្ត្រីគ្រប់វ័យ ដែលមានដៃគូរួមស្នេហ៍ច្រើន ក៏ត្រូវពិនិត្យមើលជំងឺកាមរោគផងដែរ ពីព្រោះជំងឺកាមរោគនេះ ប្រសិនបើមិនបានព្យាបាលទាន់ពេលវេលាទេនោះ វានឹងអាច បណ្ដាលឱ្យរលាកដៃស្បូន ឬក្នុងស្បូន៖ «ស្ត្រីដែលអាយុក្រោម ២៥ឆ្នាំ ច្រើនមានជំងឺឆ្លងតាមការរួមរ័ក។ ដូចនេះគាត់ត្រូវមកពិនិត្យមើល ព្រោះស្ត្រីខ្លះអត់មានរោគសញ្ញាទេ តែបុរសអាចមានរោគសញ្ញាខ្លះ ដូចជាបត់ជើងមកក្រហាយ មានខ្ទុះអីអ៊ីចឹង។ ស្ត្រីក្មេងទាំងនោះអាចមានជំងឺទាំងនោះ ហើយបើមិនព្យាបាលទេ អាចមានបញ្ហាថ្ងៃក្រោយ ទៅមានខ្ទុះក្នុងដៃស្បូន ឬក្នុងស្បូន វានាំឱ្យរលាក (Infection) ទៅគឺអត់អាចមានកូនបាន»។

ចំពោះស្ត្រីដែលអាយុលើសពី៦៥ឆ្នាំទៅ ឬស្ត្រីដែលមានឆ្អឹងបាក់អាយុក្រោម ៥០ឆ្នាំ ឬក៏ស្ត្រីដែលអស់រដូវ គ្រូពេទ្យនឹងបញ្ជូនឱ្យទៅថតពិនិត្យមើលគុណភាពឆ្អឹង ឬដង់ស៊ីតេឆ្អឹង (Bone density) ក្រែងកើតជំងឺពុកឆ្អឹង (osteoporosis) ដែលជាហេតុនាំឱ្យឆ្អឹងផុយស្រួយ ងាយបាក់ ឬគ្រេច ប្រសិនបើលោកអ្នកដួល៖ «ស្ត្រីដែលអាយុលើស៦៥ឆ្នាំ ត្រូវពិនិត្យឆ្អឹង (Bone density) រកមើលថា វាផុយឬស្ដើង ត្រូវការញ៉ាំថ្នាំវីតាមីនឌី (Vitamin D) និងកាល់ស្យូម។ បន្ថែមទៀតបើឆ្អឹងពុក គ្រូពេទ្យនឹងផ្ដល់ថ្នាំពិសេស ដើម្បីជួយកុំឱ្យឆ្អឹងហ្នឹងផុយ ឬស្ដើង»។

ការពិនិត្យសុខភាពប្រចាំឆ្នាំ គឺជាការពិនិត្យវេជ្ជសាស្ត្រពេញលេញ ដែលជាធម្មតាត្រូវការរយៈពេលតែពីរឬបីម៉ោងប៉ុណ្ណោះ។ ដូចនេះ លោកអ្នកគួរតែទៅពិនិត្យឱ្យបានទៀងទាត់រាល់ឆ្នាំ ពីព្រោះជំងឺភាគច្រើន ពុំបង្ហាញរោគសញ្ញានោះឡើយ។ ប្រសិនបើលោកអ្នក មិនទទួលបានការព្យាបាលទាន់ពេលវេលាទេនោះ វានឹងអាចបណ្ដាលឱ្យកើតជំងឺរ៉ាំរ៉ៃ ឧទាហរណ៍ ដូចជាជំងឺទឹកនោមផ្អែម អាចបណ្ដាលឱ្យពិការភ្នែក ខូចតម្រងនោម សម្ពាធឈាមខ្ពស់និងកូឡេស្តេរ៉ុលខ្ពស់ នាំឱ្យគាំងបេះដូង ដាច់សរសៃឈាមក្នុងខួរក្បាល ជាដើម។ ក្រោយលទ្ធផលនៃការធ្វើតេស្ត វេជ្ជបណ្ឌិតរបស់លោកអ្នកនឹងអាចធ្វើរោគវិនិច្ឆ័យ អំពីជំងឺណាមួយដែលលោកអ្នកអាចមាន និងណែនាំអំពីវិធីព្យាបាលដែលចាំបាច់។ វេជ្ជបណ្ឌិតក៏នឹងណែនាំអំពីវិធីដ៏ប្រសើរបំផុត ដើម្បីសម្រេចគោលដៅសុខភាពល្អ រួមមាន ទម្លាប់រស់នៅ របបអាហារប្រចាំថ្ងៃ និងការហាត់ប្រាណ ជាដើម៕

សូមរង់ចាំស្ដាប់សេចក្ដីរាយការណ៍អំពីថា តើបុរសគួរពិនិត្យសុខភាពប្រចាំឆ្នាំ ដូចជាស្ត្រីដែរឬទេ? ហើយតើវេជ្ជបណ្ឌិតធ្វើតេស្តពិនិត្យរោគសញ្ញាអ្វីខ្លះចំពោះបុរស?