តើមូលហេតុអ្វីបានជាការអង្គុយយូរពេកបណ្តាលឲ្យប៉ះពាល់ដល់សុខភាព?
2022.04.28
RFA
ការស្រាវជ្រាវនៅសហរដ្ឋអាមេរិករកឃើញថា ការអង្គុយយូរពេក បណ្តាលឲ្យកាត់បន្ថយអាយុកាលរបស់មនុស្ស និងបណ្តាលឲ្យកើតជំងឺរ៉ាំរ៉ៃជាច្រើន រួមមាន ជំងឺបេះដូង ជំងឺទឹកនោមផ្អែម ជំងឺមហារីក ឫសដូងបាត ទល់លាមក និងការឡើងទម្ងន់ជាដើម។
តើយើងត្រូវធ្វើដូចម្តេចខ្លះដើម្បីទប់ស្កាត់ផលវិបាកនានាដល់សុខភាពដែលបណ្ដាលមកពីការអង្គុយមិនត្រឹមត្រូវ?
ក្រុមវេជ្ជបណ្ឌិតជំនាញផ្នែកសុខភាព ផ្តល់ដំបូន្មានថា ដើម្បីកាត់បន្ថយផលប៉ះពាល់សុខភាពរយៈពេលខ្លីនិងរយៈពេលវែង ដោយសារអង្គុយយូរពេក អ្នកធ្វើការដែលតម្រូវឲ្យអង្គុយច្រើន គួរព្យាយាមធ្វើចលនាឲ្យបានញឹកញាប់ ដូចជាងើបពត់ខ្លួនប្រាណ ងើបក្រោកឈរ តម្រង់ខ្លួនប្រាណ យ៉ាងហោចណាស់ ២ឬ៣នាទី រៀងរាល់មួយម៉ោងម្តង។
ការស្រាវជ្រាវរបស់ក្រុមអ្នកវេជ្ជសាស្ត្រលើក្រុមមនុស្សពីរជំពូកផ្សេងគ្នា នៅសហរដ្ឋអាមេរិក គឺក្រុមអ្នកអង្គុយធ្វើការយូរ ដូចជាអ្នកបើកបរឡានតាក់ស៊ី អ្នកបើករថភ្លើង និងមួយក្រុមទៀត គឺអ្នកយាមល្បាត (guards) ដែលដើរច្រើន ឬអ្នកធ្វើការផ្សេងទៀត ដែលមិនតម្រូវឲ្យអង្គុយយូរ បានរកឃើញពីបញ្ហាសុខភាពរ៉ាំរ៉ៃមួយចំនួន រវាងក្រុមទាំងពីរនេះ បើទោះបីជាបានហាត់ប្រាណទៀងទាត់ ទទួលទានរបបអាហារ និងរបៀបរស់នៅ ដូចគ្នាក៏ដោយ។
គេហទំព័រសុខភាពវ៉ឹបអឹមឌី (WebMD) ដែលបានចុះផ្សាយ លទ្ធផលស្រាវជ្រាវបង្ហាញថា អ្នកអង្គុយយូរពេក បណ្តាលឲ្យបាត់បង់ជីវិតមុនអាយុកាល និងបណ្តាលឲ្យកើតជំងឺរ៉ាំរ៉ៃជាច្រើន។ ការអង្គុយយូរ ធ្វើឲ្យប៉ះពាល់ដល់ខួរក្បាល ដែលនាំឲ្យកើតជំងឺភ្លេចភ្លាំងពេលចាស់ឡើង កើតជំងឺបេះដូង ជំងឺដាច់សរសៃឈាមក្នុងខួរក្បាល ជំងឺទឹកនោមផ្អែម ជំងឺលើសឈាមជាដើម។
គ្រូពេទ្យជំនាញឯកទេសទូទៅ លោក វេជ្ជបណ្ឌិត ហ៊ាង រតនា ម្ចាស់គ្លីនីកមេត្តានៅរាជធានីភ្នំពេញ មានប្រសាសន៍ប្រាប់វិទ្យុអាស៊ីសេរីថា ការអង្គុយយូរពេក បណ្តាលឲ្យសាច់ដុំ ឬសន្លាក់ដៃជើងគាំងរឹង កាត់បន្ថយភាពបត់បែន និងនាំឲ្យឈឺសន្លាក់ដៃជើងនិងសាច់ដុំ។ លោកវេជ្ជបណ្ឌិត ពន្យល់ពីបញ្ហាផលប៉ះពាល់សុខភាពមួយចំនួនទៀត ដែលបណ្តាលមកពីការអង្គុយយូរពេក៖ «ទី១ ប៉ះពាល់ដល់ជំងឺឫសដូងបាត នៅពេលយើងអង្គុយយូរ វានាំឲ្យប៉ោងសរសៃឈាម នាំឲ្យកើតជំងឺឫសដូងបាត។ មួយទៀតជាធម្មតា ឈាមរត់ពេញខ្លួន ហើយវាត្រូវរត់ចូលមកបេះដូងវិញ ដើម្បីប្តូរយកអុកស៊ីហ្សែនមកប្តូរ។ អ៊ីចឹងនៅពេលយើងអង្គុយយូរ ទាំងចលនាទាំងពោះវៀនអត់បានដំណើរការល្អទេ នាំឲ្យយើងទល់លាមក នាំឲ្យប៉ះពាល់សុខភាពច្រើន...»។
កម្មការិនីរោងចក្រកាត់ដេរ សំលៀកបំពាក់ ឃែនធើរ៉េន អាប់ភែរឹល ខេមបូឌា (Canteran Apparel Cambodia Co., LTD) លោកស្រី សឹម សុខា ប្រាប់វិទ្យុអាស៊ីសេរីថា ការងាររបស់ក្រុមកម្មករ៖ «កម្មករអង្គុយធ្វើការហ្នឹង មានជំងឺឫសដូងបាតច្រើន សឹងតែគ្រប់គ្នាហើយ ដោយសារគាត់គ្មានពេលសម្រាក ឬពេលក្រោកឈរ លុះត្រាតែគាត់ទៅបន្ទប់ទឹក ទើបបានមានឱកាសដើរទៅមកបន្ទប់ទឹកបន្តិច។ ឧទាហរណ៍ថា ដេរ៨ម៉ោង គាត់ក្រោកឡើងផ្អៀងផ្អង ខ្លះងើបអត់ចង់រួចទេ ដោយសារអង្គុយយូរ ខ្លះលើសពី៨ម៉ោង...»។
គេហទំព័រសុខភាពវ៉ឹបអឹមឌី (WebMD) ដដែលបន្តថា ក្រៅតែពីកើតជំងឺឫសដូងបាត ឈឺចង្កេះ ឈឺត្រគាក ឈឺក ទល់លាមក ការស្ទះសរសៃឈាមជើង និងឡើងទម្ងន់ ការអង្គុយយូរ ក៏នាំឲ្យសាច់ដុំជើងនិងត្រគាក រួមតូចជាងមុន និងចុះខ្សោយ។ ការអង្គុយយូរឬ របៀបអង្គុយមិនត្រឹមត្រូវ មិនត្រង់ឬកោងខ្នង នឹងបង្កឲ្យខួរឆ្អឹងខ្នងចុះខ្សោយ និងអាចឈឺឆ្អឹងខ្នងរ៉ាំរ៉ៃផងដែរ។
បន្ថែមពីនេះ ការអង្គុយយូរ នាំឲ្យមានបញ្ហាថប់អារម្មណ៍ ដែលប៉ះពាល់ដល់ដំណេក អង្គុយធ្វើការម្នាក់ឯងយូរពេក ច្រើនផ្តាច់ខ្លួនពីសង្គម ដោយមិនបានទាក់ទងជាមួយមិត្តភ័ក្ត្រ ឬក្រុមគ្រួសារ។
លោក វេជ្ជបណ្ឌិត ហ៊ាង រតនា ណែនាំដល់ពលរដ្ឋដែលធ្វើការក្នុងការិយាល័យ និងអ្នកដែលធ្វើការងារតម្រូវឲ្យអង្គុយយូរ ដូចជាអ្នកបើកបររថយន្តឈ្នួល ឬឡានតាក់ស៊ី ឬកម្មករកាត់ដេរជាដើម ត្រូវការឈប់សម្រាកពត់ដៃជើង យ៉ាងតិចរៀងរាល់មួយម៉ោងម្តង ដើម្បីសម្រួលឥរិយាបថ៖ «បងប្អូនអ្នកបើកឡាន អង្គុយ៥ម៉ោងអ៊ីចឹង ដូច្នេះ អាចមួយម៉ោងឬ២ម៉ោង យើងងើបពត់ខ្លួនប្រាណម្តង តែ២នាទីឬ៣នាទីទៅ ចាំអង្គុយទៅវិញ។ ហើយយើងផឹកទឹកទៅ កុំអង្គុយច្រើនម៉ោងលើសពី២ម៉ោង ដើម្បីឲ្យចលនាឈាមរត់ស្រួល ពោះវៀន រត់ស្រួល ដើម្បីបន្ថយសម្ពាធផ្នែកខាងក្រោម នៅគូថ មួយម៉ោងឬ២ម៉ោងត្រូវផ្លាស់ប្ដូរឥរិយាបថម្តង...»។
ជាងនេះទៅទៀត ការស្រាវជ្រាវក៏បានផ្តល់ដំបូន្មានថា ប្រសិនបើអាចមានលទ្ធភាព បើកន្លែងធ្វើការមិនអាចផ្តល់ឲ្យ គួរតែចំណាយប្រាក់ខ្លួនឯងទិញតុដាក់ម៉ាស៊ីនកុំព្យូទ័រឲ្យខ្ពស់ ដើម្បីអាចឈរធ្វើការបាន ពាក់ស្បែងជើងដែលជួយគាំទ្រដល់ការឈរច្រើន យកពេលសម្រាកការងារដើរចុះឡើង ឬពេលនិយាយទូរស័ព្ទ កុំនិយាយគ្នាពេលអង្គុយ។ បន្ថែមពីនេះ កំណត់ពេលវេលាអង្គុយក្រែងលោភ្លេចងើបឈរ ទទួលទានទឹកឲ្យបានច្រើន ហាត់ប្រាណដូចជាដើរឲ្យបានទៀងទាត់ ដើម្បីកាត់បន្ថយភាពតានតឹងនៅកន្លែងធ្វើការជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ ផ្ដន្ទាទោសមន្ត្រីគណបក្សកម្លាំងជាតិ លោក គា វិសាល ឲ្យជាប់ពន្ធនាគារ ២ឆ្នាំកន្លះ
- ស្តូបមិត្តភាពកម្ពុជាវៀតណាមនៅខេត្តសៀមរាបរងការបំផ្លាញដោយគ្រាប់បែក ក្នុងពេលពលរដ្ឋបារម្ភបាត់បង់ដីទៅវៀតណាម ដោយសារគម្រោង CLV
- សង្គមស៊ីវិលបារម្ភថា កសាងស្តូបមិត្តភាព-កម្ពុជាវៀតណាមជាង ២០ខេត្ត/ក្រុង ជានិមិត្តរូបបំបែកបំបាក់សាមគ្គីខ្មែរ
- ពលរដ្ឋខ្មែរនៅកូរ៉េត្រៀមចេញធ្វើបាតុកម្មទ្រង់ទ្រាយធំប្រឆាំងគម្រោង CLV ជាលើកទី២
- សាលាដំបូងរាជធានីភ្នំពេញបើកការស៊ើបសួរ លោក គុយ វ៉ាត អតីតនាយកប្រតិបត្តិ CIC