សន្ទុះយុវជនកម្ពុជា ដែលចាប់អារម្មណ៍អំពីបញ្ហាខ្មែរកម្ពុជាក្រោម បានកើនឡើងគួរឲ្យកត់សម្គាល់ក្នុងមួយរយៈពេលចុងក្រោយនេះ។ សន្ទុះនេះ ស្ដែងចេញតាមរយៈការចូលរួមជាហូរហែរបស់ពួកគេ ក្នុងវេទិកានានាពាក់ព័ន្ធបញ្ហាខ្មែរក្រោម ការប្រារព្ធខួបបាត់បង់ទឹកដីកម្ពុជាក្រោម និងការទាមទារឲ្យរដ្ឋាភិបាលវៀតណាម សុំទោសខ្មែរចំពោះការបំភ្លៃប្រវត្តិសាស្ត្រ ជាដើម។
លើសពីនេះទៀត យុវជនខ្មែរមួយចំនួន មិនត្រឹមតែចូលរួមសកម្មភាពប៉ុណ្ណោះទេ ប៉ុន្តែពួកគេថែមទាំងនាំគ្នាបោះពុម្ពអាវយឺតដែលមានផែនទីទឹកដីកម្ពុជាក្រោម ពាក់យ៉ាងព្រោងព្រាតទៀតផង។
ហេតុអ្វីបានជាយុវជនខ្មែរបច្ចុប្បន្ន ចាប់អារម្មណ៍ពីបញ្ហាទឹកដីកម្ពុជាក្រោមបែបនេះ?
តើទឹកដីខ្មែរក្រោមនៅកន្លែងណា? តើខ្មែរក្រោមជាខ្មែរដែលរស់នៅខេត្តកំពត នៅតាកែវ ឬនៅខេត្តស្វាយរៀង ឬ? តើខ្មែរក្រោមជាជនជាតិវៀតណាម ឬ? តើនៅកម្ពុជាក្រោម មានខ្មែររស់នៅដែរឬទេ? តើនៅកម្ពុជាក្រោម គេនិយាយភាសាខ្មែរឬទេ? ទាំងនេះសុទ្ធសឹងតែជាសំណួរមួយចំនួន ដែលខ្មែរក្រោមនៅកម្ពុជា ធ្លាប់បានឮពីប្រជាពលរដ្ឋខ្មែរ។ មិនថាប្រជាពលរដ្ឋខ្មែរសាមញ្ញនោះទេ សូម្បីតែសិស្សមួយចំនួន ដែលរៀនចប់បាក់ឌុបទៅហើយ ក៏មិនដឹងថា តើកម្ពុជាក្រោម នៅកន្លែងណានោះទេ?
យ៉ាងណាក៏ដោយចុះ អ្វីៗហាក់បានផ្លាស់ប្ដូរយ៉ាងឆាប់រហ័ស ខ្មែរក្រោមដែលមិនសូវត្រូវបានយុវជនខ្មែរស្គាល់ពីមុននោះ បែរជាត្រូវបានយុវជនខ្មែរ ជាពិសេសយុវជនក្នុងក្រុងភ្នំពេញ យកចិត្តទុកដាក់គួរជាទីកត់សម្គាល់។ អ្វីដែលគួរឲ្យចាប់អារម្មណ៍ដែរនោះ គឺអាវយឺតដែលមានផែនទី និងអក្សរ ដាក់ថា ខ្មែរក្រោម ក៏ត្រូវបានយុវជននាំគ្នាបោះពុម្ពពាក់ជាទូទៅទៀតផង កាលពីពេលថ្មីៗនេះ។
ជាក់ស្តែង យុវជន យស់ ស៊ីថា អាយុ ២៦ឆ្នាំ សព្វថ្ងៃជាសមាជិករបស់បណ្ដាញយុវជន I Love Cambodia Hot News ដែលជាបណ្ដាញមួយក្នុងចំណោមបណ្ដាញយុវជនដទៃទៀត ចូលរួមយ៉ាងសកម្មជាមួយអង្គការសមាគមខ្មែរកម្ពុជាក្រោម ដើម្បីដឹកនាំធ្វើបាតុកម្មទាមទារឲ្យរដ្ឋាភិបាលវៀតណាម ទទួលស្គាល់ប្រវត្តិសាស្ត្រទឹកដីកម្ពុជាក្រោមនោះ ឲ្យដឹងថា ពីមុនមក គាត់មិនសូវបានដឹងអំពីបញ្ហាកម្ពុជាក្រោមឡើយ គឺទើបតែយល់ច្បាស់អំពីខ្មែរក្រោម ប្រហែលជាជាងមួយឆ្នាំចុងក្រោយនេះប៉ុណ្ណោះ។
យុវជន យស់ ស៊ីថា៖ «កាលដែលខ្ញុំរៀនហ្នឹង ខ្ញុំមិនសូវជាដឹងអីច្បាស់ប៉ុន្មានទេ ដោយសារតែកម្មវិធីសិក្សាគេអត់មាននិយាយប្រវត្តិកម្ពុជាក្រោមយ៉ាងម៉េច អីយ៉ាងម៉េចផង ទើបនឹងដឹងច្រើននៅពេលដែលខ្ញុំធ្វើជាក្រុមការងាររបស់ I Love Cambodia Hot News នៅពេលហ្នឹង ខាងខ្ញុំដឹងច្រើន»។
យុវជន យស់ ស៊ីថា ដែលរៀនបានត្រឹមតែថ្នាក់ទី១០ និងមានស្រុកកំណើតនៅខេត្តព្រៃវែង នោះ កត់សម្គាល់បន្ថែមថា មូលហេតុដែលធ្វើឲ្យគាត់ចាប់អារម្មណ៍ និងយកចិត្តទុកដាក់ពីបញ្ហាខ្មែរក្រោម ដោយសារគាត់អាណិតអាសូរព្រះសង្ឃ និងពលរដ្ឋខ្មែរក្រោម ដែលគាត់យល់ថា កំពុងត្រូវបានរដ្ឋាភិបាលវៀតណាម ធ្វើបាប គាបសង្កត់ និងរំលោភបំពានលើសិទ្ធិសេរីភាពផ្សេងៗ។
យុវជន យស់ ស៊ីថា៖ «ដោយសារតែខ្ញុំមើលឃើញពីទុក្ខកង្វល់របស់ខ្មែរក្រោម ខ្ញុំឃើញមិនថាព្រះសង្ឃ មិនថាឧបាសក ដែលរស់នៅៗខាងខ្មែរក្រោមហ្នឹង គឺគាត់មានទុក្ខខ្លាំងមែនទែន ដោយសារតែវៀតណាម គាត់បានគាបសង្កត់ប្រជាជន គាបសង្កត់ព្រះសង្ឃ សូម្បីតែរៀនអក្សរខ្មែរដែលជាភាសាដើមរបស់ខ្លួនហ្នឹង ក៏មិនឲ្យរៀនផង។ អ៊ីចឹងទៅខ្ញុំមានការឈឺចាប់ក្នុងទង្វើរបស់វៀតណាម»។
ដោយសារតែការឈឺឆ្អាល និងព្រួយបារម្ភអំពីខ្មែរក្រោម ដែលជាជាតិសាសន៍មានឈាមជ័រតែមួយជាមួយគ្នានេះហើយ ទើបក្រុមការងារយុវជនកម្ពុជា នឹកគិតធ្វើអ្វីម្យ៉ាង ដើម្បីជួយលើកកម្ពស់ការយល់ដឹងរបស់ពលរដ្ឋ និងយុវជនខ្មែរអំពីទឹកដីកម្ពុជាក្រោម។ យុវជន យស់ ស៊ីថា ដែលមានស្រុកកំណើតនៅខេត្តជាប់ព្រំប្រទល់នឹងប្រទេសវៀតណាម រូបនេះបន្ថែមថា ដើម្បីលើកកម្ពស់ការយល់ដឹង និងធ្វើឲ្យសាធារណជនខ្មែរចាប់អារម្មណ៍ពីរឿងរ៉ាវទឹកដីកម្ពុជាក្រោម សមាជិកនៃបណ្ដាញយុវជន I Love Cambodia Hot News បានប្រមូលលុយកាក់គ្នាបន្តិចបន្តួច ដើម្បីបោះពុម្ពជាអាវយឺតសម្រាប់លក់។
យុវជន យស់ ស៊ីថា៖ «ក្នុងការធ្វើអាវយឺតហ្នឹងលក់ ក្នុងគោលបំណងចង់បំផុសបំផុលដល់យុវជនខ្មែរយើងឲ្យយល់ដឹងឲ្យច្បាស់ពីប្រវត្តិទឹកដីខ្មែរក្រោម និងការឈឺចាប់ខ្មែរក្រោម ហើយចង់បង្ហាញទៅដល់ខ្មែរក្រោមថា ខ្មែរកណ្ដាលក៏ចេះឈឺចាប់ និងមិនទុកឲ្យគាត់នៅឯកោ»។
អាវយឺតដែលមានសរសេរអក្សរធំៗថា ខ្មែរក្រោមនៅពីខាងមុខ និងខ្មែរក្រោមជារបស់ខ្មែរ ជាភាសាខ្មែរ និងអង់គ្លេសនៅពីក្រោយផងនោះ រំលេចដោយរូបផែនទីទឹកដីកម្ពុជាក្រោម និងកោះត្រល់របស់ខ្មែរ ដែលផ្គុំឡើងដោយអក្សរខ្មែរក្រោមតូចធំ និងសរសេរថា កម្ពុជាក្រោមជាទឹកដីកំណើតរបស់ខ្មែរនៅចំកណ្ដាល។
អាវយឺតចំនួន៥០០ ដែលទើបត្រូវបានបោះពុម្ពប្រហែលមួយសប្ដាហ៍កន្លងមកនេះ ត្រូវបានផ្សព្វផ្សាយដាក់លក់នៅតាមបណ្ដាញសង្គមហ្វេសប៊ុក (Facebook) ក្នុងអាវមួយតម្លៃ ៥ដុល្លារ ហើយនៅពេលដែលមានអតិថិជនកុម្ម៉ង់ទិញ ពួកគេនឹងយកទៅឲ្យដល់ទីកន្លែង។ យុវជន យស់ ស៊ីថា ដែលជាសមាជិកម្នាក់នាំយកទំនិញរបស់ខ្លួនទៅឲ្យអតិថិជនដែរនោះ ថ្លែងថា ចំណូលដែលទទួលបានពីការលក់នោះ នឹងត្រូវយកទៅជួយក្នុងការងារសង្គម និងពលរដ្ឋរងគ្រោះនៅក្នុងប្រទេសកម្ពុជា។
យុវជន យស់ ស៊ីថា៖ «ទាក់ទងនឹងការធ្វើអាវនេះ ពួកខ្ញុំមានគោលបំណង ទី១នៅពេលដែលពួកខ្ញុំលក់អាវខ្មែរក្រោមហ្នឹងដាច់ទៅ ពួកខ្ញុំនឹងយកលុយហ្នឹងចាត់ចែងធ្វើការងារសង្គម ដូចជាការមនុស្សធម៌ ណាមួយយើងដឹងស្រាប់ហើយថា ប្រទេសយើងឥឡូវ កំពុងរឿងបញ្ហាដីធ្លីស្ទើរតែគ្រប់ខេត្តក្រុងហើយ ពួកគាត់មួយថ្ងៃៗឡើងមកភ្នំពេញ ហើយអត់មានដំណោះស្រាយអ៊ីចឹងទៅ អ្នកខ្លះទៅឡើងមកអត់មានបាយ អត់មានអីហូបអ៊ីចឹងទៅ។ ពួកខ្ញុំធ្វើអាហ្នឹង។ ហើយទី២ទៀតនោះ គឺជួយអ្នករងគ្រោះទឹកជំនន់ជួយដល់អ្នកទុរគតអី គាត់ត្រូវការជាបន្ទាន់»។
ខុសពីផលិតផលផ្សេងៗទៀតដែលអ្នកផលិតតែងព្យាយាមស្វែងរកអតិថិជន ឬមួយក៏ម៉ូយដុំតាមទីផ្សារធំៗ ដើម្បីដាក់លក់ផលិតផលរបស់ខ្លួន ក្រុមផលិតអាវយឺតដែលមានរូបផែនទីទឹកដីកម្ពុជាក្រោម និងកោះត្រល់នេះ មិនបានស្វែងរកការដាក់លក់នៅតាមទីផ្សារឡើយ។ យុវជន យស់ ស៊ីថា ឲ្យដឹងថា មូលហេតុដោយសារពួកគេពុំសូវស្គាល់អ្នកលក់ដូរតាមផ្សារ និងមូលហេតុសំខាន់បំផុតនោះ គឺពួកគេខ្លាចក្រែងមានបញ្ហាកើតមានឡើងដល់ក្រុមខ្លួន ដោយសារការដាក់លក់អាវយឺតទាំងនេះជាសាធារណៈ។
ទាក់ទងនឹងបញ្ហាទឹកដីកម្ពុជាក្រោម វិញ មិនខុសពីយុវជនខ្មែរមួយចំនួនធំនោះទេ សុបិន្ដរបស់យុវជន យស់ ស៊ីថា គឺចង់ឃើញទឹកដីសណ្ដទន្លេមេគង្គសម្បូរដោយជីជាតិមួយនេះ វិលត្រឡប់មកជារបស់កម្ពុជា វិញ។ យុវជនរូបនេះថា យុវជនកម្ពុជា មិនដែលនឹកគិតថា នឹងបោះបង់ចោលទឹកដីប្រកបដោយអំណោយផលនេះឡើយ។ យុវជនដដែលនេះសង្ឃឹមថា យុវជនកម្ពុជា ទូទៅ នឹងស្វែងយល់អំពីបញ្ហាកម្ពុជាក្រោម ហើយសង្ឃឹមថានៅពេលដែលពួកគេឡើងដឹកនាំប្រទេសក្នុងថ្ងៃអនាគត ពួកគេនឹងសើរើពីបញ្ហាទឹកដីនេះឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។