ព្រះសង្ឃ និងពុទ្ធបរិស័ទខ្មែរក្រោមប្ដេជ្ញាយកជីវិតប្ដូរ ដើម្បីការពារដើមគគីរ
2022.03.29
(រូបកណ្ដាល និងស្ដាំ) ព្រះសង្ឃ និងពុទ្ធបរិស័ទខ្មែរក្រោមលើកគ្នាតវ៉ាប្រឆាំងអាជ្ញាធរវៀតណាម ដែលប៉ុនប៉ង កាប់យកដើមគគីរ (រូបខាងឆ្វេង) ដែលមានអាយុកាលជាង ៧០០ឆ្នាំ ជាកេរ្តិ៍ដំណែលរបស់វត្តមង្គលបុរីទ្រនុំសេក ខេត្តលង់ហោរ ទឹកដីកម្ពុជាក្រោម។
រូប៖ ពីវីឌីអូលើហ្វេសប៊ុក
ព្រះសង្ឃ និងពុទ្ធបរិស័ទខ្មែរក្រោមបានលើកគ្នាតវ៉ាប្រឆាំងអាជ្ញាធរវៀតណាម ដែលប៉ុនប៉ង កាប់យកដើមគគីរ ដែលមានអាយុកាលជាង ៧០០ឆ្នាំ ជាកេរ្តិ៍ដំណែលរបស់វត្តមង្គលបុរីទ្រនុំសេក ខេត្តលង់ហោរ។ សហព័ន្ធខ្មែរក្រោម ចោទវៀតណាមថា មានបំណងចង់បំបាត់ពូជសាសន៍ខ្មែរក្រោម តាមរយៈការបំផ្លាញសម្បត្តិវប្បធម៌ខ្មែរក្រោម។
អាជ្ញាធរចម្រុះវៀតណាម មានគ្នាប្រមាណជាងមួយរយនាក់ កាលពីសប្ដាហ៍មុន បានសម្រុកចូលទៅ វត្តមង្គលបុរីទ្រនំសេក ក្នុងបំណងទៅកាប់យក ដើមគគីរខ្មែរក្រោម ដែលព្រះសង្ឃ និងពុទ្ធបរិស័ទខ្មែរក្រោមរក្សាទុកជាច្រើនរយឆ្នាំមកហើយ។
អាជ្ញាធរវៀតណាមបានប្រើហិង្សាវាយទៅលើព្រះសង្ឃខ្មែរក្រោម និងពលរដ្ឋខ្មែរក្រោម ដែលនាំគ្នាអង្គុយព័ទ្ធជុំវិញ ដើមគគីរ និងចងស្បង់ចីវរព្រះសង្ឃជុំវិញដើមគគីរនោះ ប៉ុន្តែដោយសារតែកម្លាំងតវ៉ារបស់ព្រះសង្ឃ និងពលរដ្ឋខ្មែរក្រោមខ្លាំង អាជ្ញាធរចម្រុះវៀតណាមបាននាំគ្នាដកថយទៅវិញ។ អាជ្ញាធរវៀតណាមព្រមានថា ពួកគេនឹងមកកាប់ម្ដងទៀតនៅពេលក្រោយ។
លោកយាយ ថាច់ធី សាប៊ុត ដែលចេញមុខតវ៉ាប្រឆាំងនឹងអាជ្ញាធរវៀតណាម បានចោទប្រកាន់ថា វៀតណាមបានរំលោភប្លន់យកទ្រព្យសម្បត្តិរបស់វត្ត ហើយថែមទាំងប្រើប្រាស់ហិង្សាលើព្រះសង្ឃខ្មែរក្រោមទៀតផង។ លោកយាយបន្តថា ទោះបីវៀតណាម កំពុងគ្រប់គ្រងទឹកដីខ្មែរក្រោមក៏ដោយ ប៉ុន្តែខ្មែរក្រោមជាជនជាតិដើម ដូច្នោះខ្មែរក្រោមមានសិទ្ធិការពារសម្បត្តិកេរដំណែលដូនតាខ្មែរ៖ «របស់នេះ ជារបស់សង្ឃ របស់យាយតា តាំងពីដូនតាយើងដល់ឥឡូវ មិនមែនជារបស់រដ្ឋអំណាច។ យើងមានតែវត្តសម្រាប់យើង អត់វត្ត យើងរលាយដូចផេះហើយ»។
ពលរដ្ឋខ្មែរក្រោមអះអាងថា អាជ្ញាធរវៀតណាមចង់បានដើមគគីរខ្មែរក្រោមនេះ ដើម្បីយកទៅរក្សាទុកនៅឯសារមន្ទីរវៀតណាម ដើម្បីទាក់ទាញភ្ញៀវទេសចរ។
ប្រធាននាយកដ្ឋានព័ត៌មានសហព័ន្ធខ្មែរកម្ពុជាក្រោមព្រះភិក្ខុ ស៊ឺង យ៉ឹងរតនា ដែលបានតាមដានរឿងនេះ មានថេរដីកាប្រាប់វិទ្យុអាស៊ីសេរី កាលពីថ្ងៃទី២៦ មីនាថា ដើមគគីរ ជាបេតិកភណ្ឌរបស់វត្ត។ ដូច្នោះពលរដ្ឋខ្មែរក្រោមហ៊ានបូជាជីវិតដើម្បីការពារដើមគគីរនេះ មិនឲ្យវៀតណាមកាប់បំផ្លាញចោលនោះទេ៖ «ការពិតអាជ្ញាធរវៀតណាមរំលោភតាំងពីដីធ្លី ទីតាំងវត្ថុបុរាណ អ្វីផ្សេងៗ ដែលជាកម្មសិទ្ធិរបស់ខ្មែរក្រោមហ្នឹង អាជ្ញាធរវៀតណាម មានមហិច្ឆតា ដើម្បីលេបត្របាក់បំបាត់ភស្តុតាងអ្វីជារបស់ខ្មែរក្រោមនៅដែនដីកម្ពុជាក្រោមហ្នឹង។ អាជ្ញាធរវៀតណាមមានចេតនា ដើម្បីលុបបំបាត់ពូជសាសន៍ រើសអើងពូជសាសន៍ចំពោះដែនដីកម្ពុជាក្រោម»។
ព្រះអង្គបន្តថា បច្ចុប្បន្នព្រះសង្ឃ និងពុទ្ធបរិស័ទខ្មែរក្រោមកំពុងយាមការពារមិនឲ្យអាជ្ញាធរវៀតណាម ចូលមកលួចកាប់ ដើមគគីរ ព្រោះខ្មែរក្រោមចង់រក្សាទុកដើមគគីរនេះ ធ្វើជាភស្តុតាងប្រវត្តិសាស្ត្រខ្មែរក្រោមទៅថ្ងៃអនាគត៖ «មានសារៈសំខាន់ដោយសារតែ ពីព្រោះវាជាបេតិកភណ្ឌ និងជាប្រវត្តិសាស្ត្រសម្រាប់ពលរដ្ឋខ្មែរក្រោមផង ដូចដើមឈើទាលរបស់ឧកញ៉ា សឺន គុយ ជាអត្តសញ្ញាណ និងជាកំណត់សំគាល់របស់ទឹកដីកម្ពុជាក្រោម»។
ក្នុងរយៈពេលប៉ុន្មានឆ្នាំចុងក្រោយនេះ វៀតណាមបានចាប់ផ្ដើមធ្វើទុក្ខបុកម្នេញខ្មែរក្រោមកាន់តែធ្ងន់ធ្ងរជាងមុន ដោយសារតែវៀតណាមបារម្ភពីចលនាទាមទារសិទ្ធិស្វ័យសម្រេចដោយខ្លួនឯងទៅថ្ងៃអនាគត។ យ៉ាងហោចណាស់ខ្មែរក្រោម ៤នាក់ ត្រូវបានអាជ្ញាធរវៀតណាមចាប់ដាក់ពន្ធនាគារដោយសារតែការសំដែងមតិទាមទារសិទ្ធជាជនជាតិដើម និងការពារមិនឲ្យវៀតណាមយកដីស្រែចម្ការរបស់ពួកគេ។ ចំណែកយុវជនខ្មែរក្រោម ក៏ត្រូវបានអាជ្ញាធរវៀតណាមប្រើប្រាស់ហិង្សាគំរាមកំហែងមិនឲ្យផ្សព្វផ្សាយប្រវត្តិសាស្ត្រខ្មែរក្រោម និងការទាមទារសិទ្ធិជាជនជាតិដើម។ វៀតណាមបានផាកពិន័យយុវជនខ្មែរក្រោម និងសម្លុតចាប់ពួកគេដាក់ពន្ធនាគារ ប្រសិនបើពួកគេបន្តសកម្មភាព ដើម្បីសិទ្ធិខ្មែរក្រោម។ អាជ្ញាធរវៀតណាមមិនត្រឹមតែរំលោភសិទ្ធិខ្មែរក្រោមនោះទេ វៀតណាម ក៏បានរឹតត្បិតសិទ្ធិសេរីសាសនាខ្មែរក្រោមផងដែរ។ អាជ្ញាធរវៀតណាមបន្តហាមឃាត់មិនឲ្យខ្មែរក្រោម កសាងវត្តអារាម និងសាលាឆទាន ដើម្បីគោរពសាសនា និងធ្វើជាសាលារៀនដើម្បីបង្រៀនអក្សរខ្មែរដល់កូនខ្មែរក្រោម។ ទោះបីជាវៀតណាមខំប្រឹងបំផ្លាញសាសនាខ្មែរក្រោមយ៉ាងណាក៏ដោយ ក៏ខ្មែរក្រោមសម្រេចកសាងវត្តបានជិត ប្រាំរយវត្ត និងមានព្រះសង្ឃជាង ៨ពាន់អង្គ។
មន្ត្រីសហព័ន្ធខ្មែរក្រោមលើកឡើងថា ខ្មែរក្រោមសុខចិត្តប្ដូរជីវិតការពារដើមគគីរមួយដើម ពីព្រោះវាអាចជួយរក្សាអត្តសញ្ញាណរបស់ខ្មែរកម្ពុជាក្រោមសម្រាប់កូនចៅខ្មែរក្រោមជំនាន់ក្រោយ។ បច្ចុប្បន្ន ដើមគគីរ មានអាយុកាលរាប់រយឆ្នាំ មានចំនួនតែពីរដើមគត់ ដែលនៅសេសសល់នៅលើទឹកដីកម្ពុជាក្រោម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់