អ្នកស្ដាប់វិទ្យុអាស៊ីសេរីម្នាក់ឈ្មោះ ឈួន វុទ្ធី នៅទីក្រុងភ្នំពេញ បានសួរមកនាទីអត្ថាធិប្បាយច្បាប់របស់វិទ្យុអាស៊ីសេរី អំពីបញ្ហាផ្លូវច្បាប់មួយចំនួនទាក់ទងទៅនឹងករណីដែលបុរសម្នាក់ទៅយកប្រពន្ធពីរ ឬស្ត្រីម្នាក់ទៅយកប្ដីពីរ។
លោក ឈួន វុទ្ធី បានលើកយកសាច់រឿងផ្ទាល់ខ្លួនរបស់លោកផ្ទាល់ដែលមានស្ត្រីម្នាក់សុំឱ្យលោករៀបការជាមួយនៅពេលដែលលោកកំពុងមានប្រពន្ធមួយរួចហើយ។ សំណួររបស់លោក ឈួន វុទ្ធី ត្រូវបានលោកមេធាវី គង់ រ៉ាឌី ជាសមាជិកគណៈមេធាវីនៃព្រះរាជាណាចក្រកម្ពុជា និងម្ចាស់ការិយាល័យច្បាប់មួយឈ្មោះថា ការិយាល័យមេធាវី គង់ រ៉ាឌី បានពន្យល់អំពីផ្លូវច្បាប់ស្ដីពីឯកពន្ធភាព ឬហៅថា ច្បាប់ប្ដីមួយប្រពន្ធមួយរួចហើយថា ក្នុងករណីដូចនេះ ត្រូវបានចាត់ចូលទៅក្នុងបទទ្វេពន្ធភាព គឺបទប្រពន្ធពីរ ឬប្ដីពីរ។
នៅក្នុងមាត្រា៤ នៃច្បាប់ស្ដីពីឯកពន្ធភាព បានចែងថា ៖ «ទ្វេពន្ធភាពជាចំណងអាពាហ៍ពិពាហ៍ដែលបុរសមានប្រពន្ធពីរ ឯស្ត្រីមានប្ដីពីរ។ ត្រូវចាត់ទុកថា មានពិរុទ្ធក្នុងបទទ្វេពន្ធភាព បុរស ឬស្ត្រីណាដែលមានចំណងអាពាហ៍ពិពាហ៍ពីមុនមិនទាន់រលាយនៅឡើយ ហើយទៅចុះបញ្ជីអាពាហ៍ពិពាហ៍ថ្មីមួយទៀត។ អ្នកសមគំនិតត្រូវមានទោសដូចគ្នា»។
នៅពេលដែលបុរសណាម្នាក់កំពុងមានប្រពន្ធ ឬស្រីកំពុងមានប្ដីក្នុងចំណងអាពាហ៍ពិពាហ៍នៅឡើយ ហើយទៅចុះបញ្ជីអាពាហ៍ពិពាហ៍ថ្មីមួយទៀត ត្រូវមានទោសពីបទប្រពន្ធពីរ ឬប្ដីពីរ ដែលភាសាច្បាប់ហៅទ្វេពន្ធភាពនោះ តើច្បាប់ឯកពន្ធភាពនឹងកំណត់យ៉ាងណា ប្រសិនបើបុរសនោះមិនចុះបញ្ជីអាពាហ៍ពិពាហ៍ស្រីថ្មី ដោយគ្រាន់តែរស់នៅជាមួយគ្នាជាប្ដីប្រពន្ធប៉ុណ្ណោះ?
ហើយលោកអ្នកស្ដាប់វិទ្យុអាស៊ីសេរី នៅសហរដ្ឋអាមេរិកមួយរូបបានលើកសំណួរមួយឡើងថា «បើសិនណាយើងចុះអេតាស៊ីវិលទាំងពីរ យើងមានទោស ហើយបើសិនយើងមានប្រពន្ធហើយ ហើយយើងទៅផិតក្បត់ជាមួយស្រីផ្សេង អាហ្នឹងយើងមានទោសឬទេ?»។
ចំពោះសំណួរនេះលោកមេធាវី គង់ រ៉ាឌី មានប្រសាសន៍ថា ក្នុងករណីដូច្នេះ ច្បាប់ឯកពន្ធភាពត្រូវចាត់ទុកថាជាបទផិត។
លោកពន្យល់បន្ថែមថា ៖ «ហ្នឹងចូលរឿងមួយទៀត។ មួយអម្បាញ់មិញគាត់មានចំណងអាពាហ៍ពិពាហ៍ គាត់ទៅរៀបការនារីមួយទៀត ចុះសំបុត្រអាពាហ៍ពិពាហ៍មួយទៀត អាហ្នឹងទ្វេពន្ធភាព។ ប៉ុន្តែក្នុងករណីនេះ បើសិនជាគាត់មានចំណងអាពាហ៍ពិពាហ៍ជាមួយប្រពន្ធគាត់មែន ក៏ប៉ុន្តែគាត់ទៅរកស្រីមួយផ្សេងទៀត គាត់អត់បានរៀបការទេ គ្រាន់តែគេងនៅជាមួយ រួមភេទធម្មតាហ្នឹង អាហ្នឹងត្រូវមានទោសពីបទផិត។ តាមមាត្រា៧ នៃច្បាប់ឯកពន្ធភាពហ្នឹង គេចាត់ទុកថា បទផិត។ គេថា ចាត់ទុកថាបទផិត បើការរួមសេវនកិច្ចរវាងបុរសដែលមានចំណងអាពាហ៍ពិពាហ៍ពីមុនមិនទាន់រលាយជាមួយស្ត្រីដទៃក្រៅពីប្រពន្ធរបស់ខ្លួន។ សេវនកិច្ច គឺការរួមរស់ជាមួយគ្នាដូចជាប្ដីនិងប្រពន្ធ ដោយមានការរួមភេទ រស់នៅជាមួយគ្នា ឬការរួមសេវនកិច្ចរវាងស្ត្រីដែលមានចំណងអាពាហ៍ពិពាហ៍ពីមុនមិនទាន់រលាយជាមួយបុរសដទៃក្រៅពីប្ដីរបស់ខ្លួន។ អ៊ីចឹងមាត្រានេះ គេនិយាយទាំងបុរសនិងស្ត្រី កាលណាគាត់មានចំណងអាពាហ៍ពិពាហ៍ហើយគាត់ទៅរកដៃគូផ្សេងទៀត។ អាហ្នឹងគាត់ត្រូវមានទោសពីបទផិត។ អាហ្នឹងមិនបានចុះអេតាស៊ីវិល មិនបានចុះសំបុត្រអាពាហ៍ពិពាហ៍»។
ងាកករណីរបស់ស្ត្រីដែលសុំឱ្យលោក ឈួន វុទ្ធី រៀបការជាមួយក្នុងពេលដែលគាត់ទើបតែលែងលះគ្នាជាមួយប្ដីរបស់គាត់ត្រឹមតែអាជ្ញាធរឃុំនោះ លោក គង់ រ៉ាឌី មានប្រសាសន៍ថា នឹងខុសច្បាប់ឯកពន្ធភាពដូចគ្នា ពីព្រោះចំណងអាពាហ៍ពិពាហ៍របស់គាត់ជាមួយប្ដីមុននៅមិនទាន់រលាយទេដរាបណាមិនបានសម្រេចជាស្ថាពរដោយតុលាការ។
លោក គង់ រ៉ាឌី មានប្រសាសន៍ដូច្នេះ ៖ «ការផ្ដិតមេដៃចំពោះមុខឃុំហ្នឹង គឺអត់រំលាយសិទ្ធិគាត់ស្របច្បាប់របស់បុរសហ្នឹងបានទេ។ គាត់នៅមានសិទ្ធិជាប្រពន្ធស្របច្បាប់របស់បុរសហ្នឹងដដែល»។
ឡេង ម៉ាលី ៖ តើស្ត្រីរូបនេះអាចមានសិទ្ធិរៀបការបានទេ ព្រោះបាននៅបែកគ្នាហើយ? គង់ រ៉ាឌី ៖ អាហ្នឹងយើងអាចក្រឡេកមើលទៅចំណុចមួយដែលខ្ញុំនិយាយថា មូលហេតុនៃការរលាយចំណងអាពាហ៍ពិពាហ៍ហ្នឹង។ ចំណងអាពាហ៍ពិពាហ៍ត្រូវរលាយក្នុងករណីណាមួយដូចខាងក្រោម ៖ មានសហព័ទ្ធណាមួយស្លាប់ មានសេចក្ដីសម្រេចរំលាយចំណងអាពាហ៍ពិពាហ៍ជាស្ថាពរ ហើយចុងក្រោយមួយទៀតដែលអាចទាក់ទងនឹងគាត់គឺ សហព័ទ្ធណាមួយបាត់ខ្លួនហួសពីមួយឆ្នាំដោយគ្មានដំណឹងអ្វីសោះ និងមិនដឹងថាស្លាប់ឬរស់។ ហ្នឹងជួនកាលក្រោយបែកគ្នាហ្នឹង ប្ដីគាត់បាត់ឈឹងមិនស្លាប់ ឬរស់។ អ៊ីចឹងគាត់មិនដឹងទីពឹងអី គាត់មានសិទ្ធិរកប្ដីថ្មីទៀត ព្រោះច្បាប់គេបើកឱ្យអ៊ីចឹង។
ក៏ប៉ុន្តែនៅក្នុងករណីនេះ បន្ទាប់ពីការលែងលះគ្នានៅថ្នាក់ឃុំរួចហើយក្ដី ក៏ប្ដីស្ត្រីរូបនេះនៅតែផ្ដល់លុយមកចិញ្ចឹមកូនបន្តិចបន្តួចដែរ គឺមិនបានបាត់ដំណឹងសូន្យទេ។
លោកមេធាវី គង់ រ៉ាឌី ពន្យល់ថា ៖ «បើសិនជានៅទាក់ទងគ្នាផ្ដល់លុយផ្ដល់កាក់ហ្នឹង ចំណងអាពាហ៍ពិពាហ៍នៅជាប់នៅឡើយ អត់ដាច់ទេ។ ស្ត្រីហ្នឹងក៏ត្រូវមានទោសដែរ ប្រសិនបើគាត់ហ្នឹងទៅរកប្រុសផ្សេងក្នុងចំណងអាពាហ៍ពិពាហ៍មិនទាន់នេះហ្នឹង គេអាចប្ដឹងគាត់បានពីបទផិត»។
នៅក្នុងមាត្រា១០ នៃច្បាប់ឯកពន្ធភាពបានចែងថា ៖ ជនណាប្រព្រឹត្តល្មើសនឹងមាត្រា៤ និងមាត្រា៧ នៃច្បាប់នេះ ត្រូវផ្ដន្ទាទោសដាក់ពន្ធនាគារពី ១ខែដល់ ១ឆ្នាំ និងផ្ដន្ទាទោសពិន័យជាប្រាក់ពី ២សែនរៀល ដល់មួយរៀល ឬផ្ដន្ទាទោសណាមួយនៃទោសទាំងពីរ។
ប្រសិនបើលោកអ្នកមានចម្ងល់នានា ទាក់ទងនឹងបញ្ហាច្បាប់ ហើយចង់សួរមកនាទីយើង សូមលោកអ្នកទាក់ទងមកទូរស័ព្ទលេខ ០១២ ៧៧៦ ៥០៧៕
