តើត្រូវធ្វើយ៉ាងណា ដើម្បីបណ្ដុះភាពក្លាហានសម្រាប់ស្ត្រី ឬក្មេងស្រី?
ការទទួលស្គាល់គំនិតរបស់ក្មេងស្រី ទាំងក្នុងសង្គមគ្រួសារ សាលារៀន និងក្នុងសង្គមជាតិ គឺជាកត្តាចាំបាច់ដែលបង្កើននូវភាពក្លាហាន និងទំនុកចិត្តរបស់ក្មេងស្រី ដែលអាចអោយពួកគេហ៊ានចូលប្រឡូកក្នុងកិច្ចការសង្គម ឬទៅជាអ្នកដឹកនាំទៅថ្ងៃអនាគត។
ក្នុងវ័យ ២៧ឆ្នាំ កញ្ញា ឡុង គឹមហ៊ាង គឺជាមន្ត្រីព័ត៌មាននៃក្រុមការងារពិសេសសិទ្ធិលំនៅឋាន។ ក្នុងតួនាទីនេះ គឹមហ៊ាង ត្រូវប្រឈមមុខចំពោះបញ្ហាជាច្រើន ជាពិសេសគឺអាចជួបប្រទះនឹងការប្រើអំពើហិង្សាណាមួយនៅពេលដែលកញ្ញាត្រូវចុះទៅតាមសហគមន៍ ដើម្បីបំពេញការងារការពារសិទ្ធិលំនៅឋានរបស់ពលរដ្ឋនៅតាមសហគមន៍ ឬនៅពេលមានការតវ៉ាណាមួយប្រឆាំងនឹងសេចក្ដីសម្រេចអាជ្ញាធរ។ គឹមហ៊ាង បញ្ជាក់ថា បើពុំមានភាពក្លាហាន និងទំនុកចិត្តទេ នាងប្រហែលបោះបង់ចោលការងារនេះបាត់ទៅហើយ។
កញ្ញា ឡុង គឹមហ៊ាង បានរំលឹកថា ភាពក្លាហាន និងទំនុកចិត្ត គឺនាងបានពីការសិក្សា និងការប្រៀនប្រដៅពីក្នុងសង្គមគ្រួសាររបស់នាង ដែលនាងបានឆ្លងកាត់តាំងពីវ័យក្មេងមក។
ការរៀបរាប់របស់ គឹមហ៊ាង បានបង្ហាញថា ការអប់រំក្នុងក្រុមគ្រួសាររបស់នាងមានភាពខុសប្លែកពីភាគច្រើននៃការអប់រំក្នុងសង្គមគ្រួសារនៅកម្ពុជា ជាពិសេសនៅតាមទីជនបទ។
នាយិកានៃអង្គការបន្លាស់ប្ដូរជាវិជ្ជមានសម្រាប់កម្ពុជា អ្នកស្រី ហូយ សុជីវណ្ណី មានប្រសាសន៍ថា ភាគច្រើននៃគ្រួសារខ្មែរតែងតែបន្តុះបង្អាប់ទស្សនៈរបស់ក្មេងស្រី ដែលធ្វើអោយក្មេងស្រីខ្លាចរអា។ អ្នកស្រីបន្តថា គេអាចផ្លាស់ប្ដូរបញ្ហានេះបានដោយការផ្ដល់ឱកាសអោយក្មេងស្រី បានលើកឡើងពីបញ្ហារបស់ពួកគេ។
មិនខុសគ្នានេះដែរ រដ្ឋលេខាធិការក្រសួងកិច្ចការនារី អ្នកស្រី ស៊ីវណ្ណ បុទម មានប្រសាសន៍ថា គ្រួសារដើរតួនាទីចម្បងទី១ ដែលនឹងដឹកនាំអោយក្មេងស្រីមានទំនុកចិត្ត។ ចាំបាច់ណាស់ដែលឪពុកម្ដាយត្រូវបែងចែកអោយដាច់ពីគ្នារវាងការអប់រំកូន និងការទំយើកូន។ អ្នកស្រីបន្តថា ការទំយើ នឹងនាំអោយក្មេងស្រីជួបការលំបាកទៅវិញទេនៅពេលពួកគេប្រឡូកក្នុងកិច្ចការសង្គម។
នៅពេលដែលក្មេងស្រីទទួលបានការជំរុញ និងលើកទឹកចិត្តអោយមានភាពក្លាហានហើយនោះ ចាំបាច់ត្រូវអោយមានការលើកទឹកចិត្តនៅក្នុងសាលារៀនដែរ។
នាយិកានៃអង្គការបន្លាស់ប្ដូរជាវិជ្ជមានសម្រាប់កម្ពុជា អ្នកស្រី ហូយ សុជីវណ្ណី អោយដឹងទៀតថា ក្មេងស្រីដែលមិនត្រូវផ្ដល់ឱកាសអោយដើម្បីបង្ហាញពីទស្សនៈរបស់ពួកគេ នឹងពុំមានសមត្ថភាពគ្រប់គ្រាន់ក្នុងការចូលរួមអោយពេញលេញក្នុងសង្គមឡើយ។
ក្រៅពីការអប់រំតាមគ្រួសារ និងសាលារៀន សង្គមកម្ពុជា ទាំងមូលក៏ជាផ្នែកមួយនៃការរួមចំណែកក្នុងការឲ្យជំរុញ ឬបន្ទច់បង្អាក់ភាពក្លាហានរបស់ក្មេងស្រី។
រដ្ឋលេខាធិការក្រសួងកិច្ចការនារី អ្នកស្រី ស៊ីវណ្ណ បុទម មានប្រសាសន៍ថា ក្មេងស្រីនៅទីក្រុងច្រើនមានភាពក្លាហាន និងមានទំនុកចិត្តជាងក្មេងស្រីនៅទីជនបទ នោះក៏ដោយសារតែនៅតាមទីជនបទ ក្មេងស្រីមិនសូវត្រូវគេផ្ដល់តម្លៃ។
ស្របគ្នានេះ ក្មេងស្រីគ្រប់រូបក៏ត្រូវចេះឆក់យកឱកាស ដើម្បីបណ្ដុះភាពក្លាហានក្នុងខ្លួន ដើម្បីត្រៀមខ្លួនជាស្រេចក្នុងការចូលប្រឡូកក្នុងសង្គម ឬក៏អាចឈានទៅចាប់យកតួនាទីជាអ្នកដឹកនាំនៅថ្ងៃអនាគត។
បើទោះជាយ៉ាងនេះក្ដី ចំពោះយុវតីដែលកំពុងបំពេញតួនាទីជាអ្នកការពារសិទ្ធិលំនៅឋាន កញ្ញា ឡុង គឹមហ៊ាង បានលើកឡើងថា ការជំរុញការអនុវត្តច្បាប់អោយបានត្រឹមត្រូវ គឺជាកត្តារួមចំណែកមួយទៀតក្នុងការកាត់បន្ថយការបំភិតបំភ័យសង្គម ដែលនឹងប៉ះពាល់ខ្លាំងទៅលើទឹកចិត្ត និងគោលជំហរក្មេងស្រី។
នៅក្នុងគោលនយោបាយរបស់ក្រសួងកិច្ចការនារី តែងផ្ដោតការយកចិត្តទុកដាក់ចំពោះការអប់រំសម្រាប់ក្មេងស្រី ដើម្បីកាត់បន្ថយបញ្ហាដែលចោទចំពោះក្មេងស្រី រួមមានការរំលោភបំពាន ការកេងប្រវ័ញ្ច ការជួញដូរ និងការបោកប្រាស់ដោយប្រការផ្សេងៗ និងការលើកកម្ពស់តម្លៃស្ត្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។