គណបក្សឆន្ទៈខ្មែរ ឃោសនារកសំឡេងឆ្នោតព្រឹទ្ធសភានៅខេត្តត្បូងឃ្មុំ
2024.02.19
គណបក្សនៃសម្ព័ន្ធភាពឆ្ពោះ ធ្វើពិធីឃោសនារកសំឡេងឆ្នោត នៅទីស្នាក់ការគណបក្សភ្លើងទៀន ស្ថិតនៅភូមិជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ នៅថ្ងៃទី១៨ ខែកុម្ភៈ ឆ្នាំ២០២៤។
រូប៖ ពលរដ្ឋ
គណបក្សឆន្ទៈខ្មែរ ឃោសនារកសំឡេងឆ្នោតព្រឹទ្ធសភាភូមិភាគទី២ នៅខេត្តត្បូងឃ្មុំ ដោយមានអ្នកចូលរួមជាង៧រយនាក់ (៧៥០) ។ ប្រធានគណបក្សឆន្ទៈខ្មែរលើកឡើងថា ការឃោសនាបោះឆ្នោតនេះធ្វើឡើងក្នុងគោលបំណងពង្រឹងស្មារតីអង្គបោះឆ្នោត និងផ្សព្វផ្សាយអំពីគោលនយោបាយគណបក្សបន្ថែមទៅដល់សមាជិកបក្សផងដែរ។
គណបក្សនៃសម្ព័ន្ធភាពឆ្ពោះទៅអនាគតរំពឹងថា គណបក្សឆន្ទៈខ្មែរ នឹងទទួលបានការគាំទ្រក្នុងការបោះឆ្នោតព្រឹទ្ធសភា មណ្ឌលភូមិភាគទី២ នៅថ្ងៃទី២៥ ខែកុម្ភៈ ខាងមុខនេះ។
សមាជិកគណបក្សភ្លើងទៀន គណបក្សឆន្ទៈខ្មែរ និងគណបក្សប្រជាធិបតេយ្យមូលដ្ឋាន ជាង៧រយនាក់ បានរួមគ្នាឃោសនារកសំឡេងឆ្នោត សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ នៅទីស្នាក់ការគណបក្សភ្លើងទៀន ស្ថិតនៅភូមិជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ។
ប្រធានគណបក្សឆន្ទៈខ្មែរ និងជាបេក្ខភាពព្រឹទ្ធសភាភូមិភាគទី២ បណ្ឌិត សុក ហាច ប្រាប់វិទ្យុអាស៊ីសេរីថ្ងៃទី១៨ ខែកុម្ភៈថា ការឃោសនាបោះឆ្នោតនេះធ្វើឡើងក្នុងគោលបំណង២ ទី១ ដើម្បីពង្រឹងស្មារតីអង្គបោះឆ្នោត ត្រៀមខ្លួនចូលរួមបោះឆ្នោតក្នុងពេលខាងមុខនេះ និងទី២ ដើម្បីផ្សព្វផ្សាយគោលនយោបាយគណបក្សឆន្ទៈខ្មែរ ដែលផ្ដោតលើការអភិវឌ្ឍសេដ្ឋកិច្ចដល់សមាជិកនៅតាមមូលដ្ឋាន។ លោកបន្តដោយភាពជឿជាក់ថា គណបក្សឆន្ទៈខ្មែរអាចនឹងទទួលបានកៅអីព្រឹទ្ធសភា៨ ទៅ៩កៅអី ក្នុងការបោះឆ្នោតអសកលនៅថ្ងៃទី២៥ ខែកុម្ភៈ។
បណ្ឌិត សុក ហាច៖«យើងនឹងទទួលជោគជ័យក្នុងរយៈពេលមួយអាទិត្យទៀតនេះ ហេតុដូច្នេះ ខ្ញុំអត់មានបញ្ហាអីទៀតទេ ជាពិសេសខាងភូមិភាគយើងខ្ញុំភូមិភាគទី២ ប៉ុន្តែខ្ញុំជឿថាភូមិភាគផ្សេងទៀតក៏អ៊ីចឹងដែរ យើងនឹងវាយយក៨ ទៅ៩អាសនៈហ្នឹងឱ្យបាន»។
ដោយឡែក ក្រុមប្រឹក្សាឃុំគរ ស្រុកត្បូងឃ្មុំ ខេត្តត្បូងឃ្មុំ កូតាគណបក្សភ្លើងទៀន កញ្ញា អូង កៃសំរ៉ោះ ដែលបានចូលរួមការឃោសនាដែរនោះ ប្រាប់វិទ្យុអាស៊ីសេរីថា ដោយសារតែសម្ព័ន្ធភាពឆ្ពោះទៅអនាគតមានសាមគ្គីភាពរឹងមាំ ដូច្នេះកញ្ញាសង្ឃឹមថាអ្នកស្រលាញ់លទ្ធិប្រជាធិបតេយ្យ នឹងបន្តចូលរួមជីវភាពនយោបាយជាមួយគណបក្សឆន្ទៈខ្មែរ។ កញ្ញាបន្ថែមថា ក្នុងនាមជាអង្គបោះឆ្នោតរបស់គណបក្សភ្លើងទៀន កញ្ញានឹងគាំទ្រការសម្រេចចិត្ត និងការណែនាំរបស់ថ្នាក់ដឹកនាំ នៅពេលបោះឆ្នោតព្រឹទ្ធសភាក្នុងពេលខាងមុខនេះ។
កញ្ញា អូង កៃសំរ៉ោះ៖ «ធម្មតាអ្នកប្រជាធិបតេយ្យគាត់ដឹងខ្លួនឯង គាត់ច្បាស់ហើយ គាត់អត់ចង់បានជម្លោះ គឺយើងធ្វើទៅតាមគោលការណ៍របស់គណបក្ស យើងជាអ្នកប្រជាធិបតេយ្យ បើសិនយើងប្រជាធិបតេយ្យហើយ ហេតុអីបានជាអ្នកប្រជាធិបតេយ្យដូចគ្នា មិនចូលរួមទៅដល់គោលដៅដែលយើងចង់បាន? អ៊ីចឹងហើយយើងមកចូលរួមទាំងអស់គ្នាមក វាល្អខ្លាំងណាស់»។
ការឃោសនាបោះឆ្នោតអសកលជ្រើសតាំងសមាជិកព្រឹទ្ធសភានីតិកាលទី៥ ចាប់ផ្ដើមពីថ្ងៃទី១០ និងបិទបញ្ចប់នៅថ្ងៃទី២៣ ខែកុម្ភៈ។ ការបោះឆ្នោតនេះមានគណបក្សនយោបាយចំនួន៤ចូលរួម គឺគណបក្សឆន្ទៈខ្មែរដែលតំណាងឱ្យគណបក្សភ្លើងទៀន គណបក្សប្រជាជនកម្ពុជា គណបក្សកម្លាំងជាតិ និងគណបក្សហ៊្វុនស៊ិនប៉ិច។
ជុំវិញរឿងនេះ ទីប្រឹក្សាគណបក្សកម្លាំងជាតិ លោក រ៉ុង ឈុន មានប្រសាសន៍ថា បើទោះបីជាថ្ងៃបោះឆ្នោតអសកលជិតមកដល់ក្ដី ក៏ក្រុមគណបក្សប្រឆាំង នៅតែអាចធ្វើសម្បទានផ្នែកនយោបាយឱ្យគ្នាទៅវិញទៅមក ប្រសិនបើគណបក្សភ្លើងទៀនមានឆន្ទៈរួបរួមគ្នា។
លោក រ៉ុង ឈុន៖«បើនិយាយភាសានយោបាយអត់មានភាសាហួសពេល ហើយយឺតពេលទេបាទ ឱ្យតែចិត្តយើងចង់ ទោះបីពេលវេលាណាក៏យើងអាចធ្វើបានដែរ ហើយគណបក្សកម្លាំងជាតិយើងបានធ្វើការសម្បទាន៦ភូមិភាគ សម្រាប់គណបក្សភ្លើងទៀត ប៉ុន្តែទីបញ្ចប់ការដែលយើងធ្វើសម្បទានហ្នឹង មិនត្រូវបានគណបក្សភ្លើងទៀនទទួលយក»។
ការបោះឆ្នោតអសកលជ្រើសតាំងសមាជិកព្រឹទ្ធសភានៅថ្ងៃទី២៥ ខែកុម្ភៈ ខាងមុខនេះមានអង្គបោះឆ្នោតជិត ១ម៉ឺន ២ពាន់នាក់(១១.៧៤៧) ក្នុងនោះមានតំណាងរាស្ត្រក្នុងតំណែងចំនួន១២៥នាក់ និងសមាជិកក្រុមប្រឹក្សាឃុំសង្កាត់ ក្នុងតំណែងចំនួនជាង១ម៉ឺន១ពាន់ (១១.៦២២) នាក់ ។ ដោយឡែកក្រុមគណបក្សរបស់សម្ព័ន្ធភាពឆ្ពោះទៅអនាគត មានអង្គបោះឆ្នោតជាង២ពាន់សំឡេង(២.២០៤)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ