រំលងទៅមាតិកាចម្បងពលរដ្ឋនៅខេត្តកំពង់ឆ្នាំងត្អូញត្អែរពីគំនរសំរាមស្អុយរលួយប៉ះពាល់ដល់សុខភាព
ពលរដ្ឋរស់នៅស្រុកកំពង់ត្រឡាច ខេត្តកំពង់ឆ្នាំង ត្អូញត្អែរពីក្លិនស្អុយចេញពីគំនរសំរាមដែលអាជ្ញាធរអនុញ្ញាតឱ្យក្រុមហ៊ុនចាក់សំរាម ពាសវាលពាសកាលបង្កឱ្យប៉ះពាល់ដល់សុខភាព និងការរស់នៅរបស់ពលរដ្ឋក្នុងចំនួន០៥ភូមិ នៃឃុំថ្មឥដ្ឋ។ អ្នកភូមិអះអាងថា រណ្តៅចាក់សំរាមមានទំហំជាង២០ ហិកតារគ្មានរបងព័ទ្ធជុំវិញ ដែលធ្វើឱ្យមានសត្វរុយច្រើននៅរដូវប្រាំង និងសំរាមអណ្ដែត និងហូរទឹកស្អុយចូលផ្ទះពលរដ្ឋនៅរដូវវស្សា។ លើសពីនេះ រណ្តៅសំរាមជ្រៅ ក៏ធ្វើឱ្យសត្វពាហនៈអ្នកស្រុកធ្លាក់ងាប់ផងដែរ៕
