លោក ជា មករា អ្នកយកព័ត៌មានវិទ្យុអាស៊ីសេរី ប្រចាំទីក្រុងភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជា ពីថ្ងៃ ២៥ ដល់ ៣១ សីហា ឆ្នាំ២០០៨។
កម្ពុជានិងថៃសម្រេចផ្អាកគម្រោងការជួបចរចាពីបញ្ហាព្រំដែន
មន្រ្តីក្រសួងការពារជាតិប្រទេសកម្ពុជានិងប្រទេសថៃបានសម្រេចផ្អាកជាបន្ទាន់នូវគម្រោងការជួបចរចាគ្នានៅក្នុងខេត្តសៀមរាប ដែលគ្រោងធ្វើកាលពីថៃ្ងទី២៩ ខែសីហាកន្លងទៅនេះ ដោយមានសំណើពីភាគីថៃ ហើយមិនបានកំណត់ថ្ងៃធ្វើវិញនៅពេលណាទ្បើយ។
លោកឧត្តមសេនីយ៍ឯក នាង ផាត រដ្ឋលេខាធិការក្រសួងការពារជាតិកម្ពុជា បានឲ្យដឹងកាលពីថ្ងៃព្រហស្បតិ៍ ទី២៨ សីហា ថា ប្រទេសថៃបានសុំពន្យារពេលការចរចាដោយមិនបានប្រាប់ពីមូលហេតុឡើយ។
មន្រ្តីជាន់ខ្ពស់របស់កម្ពុជានិងថៃបានជួបប្រជុំចរចាទ្វេភាគីចំនួនបីលើករួចមកហើយ ដើម្បីដោះស្រាយបញ្ហាកងទ័ពថៃចូលមករំលោភនិងឈ្លានពាននៅលើទឹកដីកម្ពុជា ត្រង់តំបន់ប្រាសាទព្រះវិហារ និងតំបន់ប្រាសាទតាមាន់ធំរបស់កម្ពុជា ប៉ុន្តែសេចក្តីរាយការណ៍នានាបានឲ្យដឹងថា កងយោធាថៃនៅតែបន្តឈរជើងនៅតំបន់នោះនិងរាតត្បាតទៅកន្លែងដទៃទៀតក្នុងទឹកដីកម្ពុជានៅជាប់ព្រំដែនថៃ ។
កម្ពុជាគ្រោងរៀបចំប្រាសាទព្រះវិហារឲ្យក្លាយជាតំបន់ទេសចរណ៍ដ៏ល្បីល្បាញ
រាជរដ្ឋាភិបាលកម្ពុជាគ្រោងរៀបចំប្រាសាទព្រះវិហារឲ្យទៅជាតំបន់ទេសចរណ៍និងជាបេតិកភណ្ឌដ៏ល្បីល្បាញមួយនៅពេលឆាប់ៗខាងមុខ ដើម្បីទាញយកប្រាក់ចំណូលពីទេសចរបរទេសក្នុងលំដាប់ថ្នាក់ទី២ បន្ទាប់ពីតំបន់ទេសចរណ៍ប្រាសាទបុរាណខេត្តសៀមរាប។
រដ្ឋមន្រ្តីក្រសួងទេសចរណ៍ លោក ថោង ខុន បានឲ្យដឹងកាលពីថ្ងៃព្រហស្បតិ៍ ទី២៨ សីហា ថា រដ្ឋាភិបាលកំពុងផ្ដើមធ្វើផ្លូវកៅស៊ូប្រវែងប្រមាណ៨០គីឡូម៉ែត្រពីស្រុកអន្លង់វែង ខេត្តឧត្ដរមានជ័យ ទៅដល់ភូមិស្រអែម ស្រុកជាំក្សាន្ត ខេត្តព្រះវិហារ ក្នុងបំណងតភ្ជាប់ខេត្តសៀមរាបទៅនឹងប្រាសាទព្រះវិហារដើម្បីឲ្យលំហូរអ្នកទេសចរណ៍ទៅកាន់តំបន់នោះ។
នាយករដ្ឋមន្ត្រីស្នើឲ្យធ្វើសម្បទានដីធ្លីដល់កងទ័ពនៅតាមព្រំដែនខ្មែរថៃ
លោកនាយករដ្ឋមន្ត្រី ហ៊ុន សែន បានស្នើឲ្យធ្វើសម្បទានដីធ្លីដល់កងទ័ពដែលបម្រើការងារនៅតាមបណ្តោយព្រំដែនកម្ពុជា-ថៃ ដើម្បីជាវិធានការមួយដែលគេសង្ឃឹមថា នឹងអាចទាក់ទាញឲ្យមនុស្សមករស់នៅក្នុងតំបន់ព្រំដែននិងពង្រឹងព្រំដែនប្រឆាំងនឹងការឈ្លានពានពីបរទេសបាន។
ផែនការថ្មីនេះបានលេចឡើងក្រោយពីមានសេចក្តីប្រកាសកាលពីសប្តាហ៍មុនថា កងវិស្វកម្មយោធានឹងស្ថាបនាផ្លូវថ្មីៗនៅជិតបរិវេណប្រាសាទព្រះវិហារនិងប្រាសាទតាមាន់ ដើម្បីជាការឆ្លើយតបចំពោះការប្រឈមមុខដាក់គ្នារយៈពេល៦សប្តាហ៍ជាមួយនឹងប្រទេសថៃ។
ទាហានថៃចូលមកបោះទីតាំងលើបន្ទាត់ព្រំដែនខ្មែរក្នុងខេត្តឧត្ដរមានជ័យជាថ្មីទៀត
មន្រ្តីយោធាខ្មែរបានឲ្យដឹងកាលពីថ្ងៃទី២៧ សីហា ថា កងទាហានឈុតខ្មៅថៃបានរំកិលចូលមកបោះទីតាំងនៅលើបន្ទាត់ព្រំដែនខ្មែរនៃស្រុកបន្ទាយអំពិល ខេត្តឧត្ដរមានជ័យ ជិតតំបន់ប្រាសាទតាមាន់ជាថ្មីម្ដងទៀត។
មេបញ្ជាការកងវរសេនាតូចនៃកងយោធពលខេមរភូមិន្ទលេខ៤២២ លោក ប៉ុល ថេន បានមានប្រសាសន៍ថា លោកបានទទួលព័ត៌មានថា កងទាហានឈុតខ្មៅថៃមួយក្រុមបានចូលមកបោះទីតាំងនៅចន្លោះតំបន់ចៃឆ្កែ បន្ទាប់ពីតំបន់ជប់ត្រឡោកដែលនៅក្បែរគ្នានោះ ត្រូវបានកងទាហានថៃចូលកាន់កាប់កាលពីសប្ដាហ៍មុនមក។
ចំណែកនៅឯប្រាសាទតាមាន់វិញ កងយោធាខ្មែរបានឲ្យដឹងថារហូតមកដល់ថ្ងៃពុធ ទី២៧ ខែសីហា កងទាហានឈុតខ្មៅថៃនៅមិនទាន់ធ្វើការបើកច្រកទ្វារឲ្យប្រជាពលរដ្ឋនិងទាហានខ្មែរបានចេញចូលទៅកាន់ប្រាសាទដូចធម្មតាវិញទេ បន្ទាប់ពីមានការចាក់សោបិទទ្វារកាលពីសប្ដាហ៍មុន ខណៈដែលកងទាហានឈុតខ្មៅថៃម្នាក់បានមកចាប់យកឧបករណ៍កំណត់ទីតាំងភូមិសាស្ត្ររបស់មន្រ្តីក្រសួងវប្បធម៌និងវិចិត្រសិល្បៈរបស់ខ្មែរ ហើយបោកកម្ទេចចោលនោះ។
អាជ្ញាធរខ្មែរចាប់ជនជាតិថៃ២នាក់ជាថ្នូរនឹងការដោះលែងខ្មែរ៤នាក់
កម្លាំងរដ្ឋាភិបាលខ្មែរឈរជើងការពារព្រំដែនក្នុងខេត្តបន្ទាយមានជ័យ បានចាប់ជនជាតិថៃ២នាក់ និងគោយន្ត២គ្រឿងជាថ្នូរដើម្បីឲ្យភាគីថៃដោះលែងពលរដ្ឋខ្មែរ៤នាក់ និងគោយន្ត២គ្រឿងដែលតម្រួតថៃបានចាប់កាលពីថ្ងៃទី២៦ សីហាកន្លងទៅថ្មីៗនេះ។
លោក ម៉ៅ រ៉ៃ មេបញ្ជាការវរសេនាតូចការពារព្រំដែនលេខ៨០៧ បានថ្លែងថាកម្លាំងរដ្ឋាភិបាលខ្មែរបានបង្ខំចិត្តចាប់ជនជាតិថៃ២នាក់ កាលពីវេលាម៉ោង៦ព្រឹក ថ្ងៃទី២៧ ខែសីហា នៅច្រកប្រាសាទត្បែងទឹកដីខ្មែរជាប់ច្រកសូន្យសាមរបស់ថៃ ក្បែរជើងភ្នំដងរែក។
ការចាប់ខ្លួនជនជាតិថៃ២នាក់និងគោយន្ត២គ្រឿងនេះ គឺបានធ្វើឡើងបន្ទាប់ពីតម្រួតថៃនៅច្រកសូន្យសាមក្នុងខេត្តស្រះកែវ បានចាប់ពលរដ្ឋខែ្មរ៤នាក់និងគោយន្ត២គ្រឿង ខណៈដែលពលរដ្ឋខ្មែរទាំង៤នាក់បើកគោយន្តដឹកអីវ៉ាន់ចូលឲ្យថៅកែថៃ។
ទោះជាយ៉ាងណាខ្មែរទាំង៤នាក់និងជនជាតិថៃ២នាក់ត្រូវបានកម្លាំងការពារព្រំដែនខ្មែរថៃដោះដូរ និងអនុញ្ញាតឲ្យទៅផ្ទះរៀងៗខ្លួនវិញហើយ កាលពីវេលាម៉ោង ៦:៣០ នាល្ងាចថ្ងៃទី២៨ សីហា ក្រោយពីមានការចរចាដ៏តឹងតែង។
ក្រុមសិទ្ធិមនុស្សបារម្ភពីពលរដ្ឋរស់នៅតំបន់បឹងកក់
ក្រុមអង្គការសិទ្ធិមនុស្សមួយចំនួនមានក្តីបារម្ភថា ពលរដ្ឋខ្មែររស់នៅតាមមាត់បឹងកក់ ពី៣០០០ ទៅ ៤២០០គ្រួសារ អាចនឹងជួបប្រទះការបណ្តេញឲ្យរុះរើផ្ទះសម្បែងដោយបង្ខំ ដូចពលរដ្ឋរស់នៅសង្កាត់ទន្លេបាសាក់ដែលត្រូវអាជ្ញាធរបង្ខំឲ្យទៅនៅតំបន់ដីក្រហមក្នុងស្រុកអង្គស្នួលនោះ។
អង្គការឈ្មោះ Amnesty International និងអង្គការឈ្មោះ Center on Housing Rights and Eviction បានចេញសេចក្តីប្រកាសព័ត៌មានមួយ កាលពីថ្ងៃពុធ ទី២៧ សីហា ដោយនិយាយថា ការចាក់ដីលុបបឹងកក់ដោយមិនបានជូនដំណឹងក្នុងពេលវេលាសមរម្យមួយដល់ពលរដ្ឋរស់នៅទីនោះ គឺជាការបំពានច្បាប់ខ្មែរផង ច្បាប់អន្តរជាតិផង។
កាលពីឆ្នាំ២០០៧ សាលាក្រុងបានសម្រេចធ្វើសម្បទានដីបឹងកក់សម្រាប់រយៈកាល៩៩ឆ្នាំ ទៅឲ្យក្រុមហ៊ុន ស្ហូកាគូ (Shukaku Ltd.) ដើម្បីធ្វើការអភិវឌ្ឍផ្ទៃដីនិងទឹក ១៣៣ហិកតារ។
នាយកគ្រប់គ្រងក្រុម ហ៊ុន ស្ហូកាគូ គឺឧកញ៉ា ឡោ ម៉េងឃិន ដែលជាស្វាមីរបស់អ្នកស្រី ជឹង សុភាព ហៅយាយភូ។ ក្រុមហ៊ុននេះបានឲ្យគេផ្តើមដឹកដីចាក់លុបបឹងកក់ជាបណ្តើរៗហើយ។
អង្គការខ្មែរកម្ពុជាក្រោមស្នើទៅទូតវៀតណាមសុំជួប ទឹម សាខន
តំណាងសហគមន៍និងអង្គការខ្មែរកម្ពុជាក្រោមមួយចំនួន បានស្នើទៅស្ថានទូតវៀតណាមប្រចាំនៅកម្ពុជាសុំជួបលោក ទឹម សាខន ក្នុងគោលបំណងចង់ដឹងពីស្ថានភាពរស់នៅពិតប្រាកដរបស់លោក។
ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា បានឲ្យដឹងកាលពីថ្ងៃទី២៩ សីហា ថា ក្រុមសហគមន៍របស់លោកនិងអង្គការសិទ្ធិមនុស្សចំនួន៥ទៀត បន្ទាប់ពីបានទទួលដំណឹងថា លោក ទឹម សាខន មានជំងឺជាទម្ងន់នៅប្រទេសវៀតណាមនោះ ក៏បានដាក់លិខិតកាលពីដើមសប្តាហ៍នេះទៅស្ថានទូតវៀតណាម ដើម្បីសុំជួបលោក ទឹម សាខន ប៉ុន្តែរហូតមកដល់ពេលនេះមិនទាន់មានចម្លើយយ៉ាងណានៅឡើយនោះទេ។
អ្នកនាំពាក្យស្ថានទូតវៀតណាម លោក ទ្រីង បាកាំ បានបដិសេធមិនអត្ថាធិប្បាយជុំវិញបញ្ហានេះឡើយ ប៉ុន្តែលោកធ្លាប់បានប្រាប់ថា លោក ទឹម សាខន មានសិទ្ធិសេរីភាពដូចប្រជាពលរដ្ឋដទៃទៀត។
បក្សសិទ្ធិមនុស្សនិងបក្សសមរង្ស៊ីបញ្ជាក់ពីជំហរមិនចូលរួមពិធីស្បថស្បែបង្កើតសភាថ្មី
គណបក្សសិទ្ធិមនុស្សនិងគណបក្សសមរង្ស៊ីបានបញ្ជាក់ជាថ្មីឡើងវិញ កាលពីថ្ងៃច័ន្ទ ២៥ សីហាថា គេនឹងមិនចូលរួមនៅក្នុងពិធីស្បថស្បែដើម្បីបង្កើតសភាអាណត្តិថ្មីនៅពេលខាងមុខនេះទេ បើសិនជាក្រុមប្រឹក្សាធម្មនុញ្ញមិនដោះស្រាយបណ្តឹងនៃការលួចសន្លឹកឆ្នោតឲ្យបានត្រឹមត្រូវ។
មេដឹកនាំគណបក្សទាំងពីរបានលើកបង្ហាញរួមគ្នា អំពីឯកសារភស្តុតាងរាប់ម៉ឺនសន្លឹក ស្តីពីចំនួនមនុស្សដែលត្រូវគេបំបាត់ឈ្មោះនៅក្នុងថ្ងៃបោះឆ្នោត អ្នកបោះឆ្នោតខុសច្បាប់ដោយប្រើទម្រង់១០១៨ និងអ្នកបោះឆ្នោតដែលឈ្មោះស្ទួនដដែលៗ។
អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប.) លោក ទេព នីថា បានឲ្យដឹងថាគ.ជ.ប.បានដោះស្រាយទៅតាមនីតិវិធីច្បាប់រួចរាល់ ហើយគ.ជ.ប.មិនជំទាស់ចំពោះការប្តឹងផ្ដល់របស់គណបក្សទាំងពីរទៅក្រុមប្រឹក្សាធម្មនុញ្ញនោះទេ។ ប៉ុន្តែគេកំពុងតែរង់ចាំការប្រកាសលទ្ធផលផ្លូវការនៅក្រោយការដោះស្រាយរបស់ក្រុមប្រឹក្សាធម្មនុញ្ញ៕