នៅប្រទេសកម្ពុជាក្នុងឆ្នាំ២០២៣ ព្រឹត្តិការណ៍ដែលបានកើតឡើងនិងលេចធ្លោជាងគេនោះ គឺការរៀបចំបោះឆ្នោតជាតិក្លែងក្លាយ ដើម្បីឲ្យក្រុមមេដឹកនាំបក្សកាន់អំណាច ផ្ទេរអំណាចដល់កូនចៅជំនាន់ក្រោយរបស់ពួកគេ ដែលកាន់តែធ្វើឲ្យដំណើរការប្រជាធិបតេយ្យ វិបត្តិនយោបាយ និងវិបត្តិសង្គមសេដ្ឋកិច្ច កាន់តែបន្តជាប់គាំងថែមទៀតមកទល់ពេលនេះ។ ក្រៅពីនោះ ការចាប់ចង និងការប្រើប្រព័ន្ធតុលាការកាត់ទោសមេដឹកនាំ និងសកម្មជនបក្សប្រឆាំង និងការរំលោភសិទ្ធិមនុស្ស ក៏នៅតែបន្តកើតមាន។
ឆ្នាំ២០២៣ដែលជិតកន្លងផុតទៅនេះ មានហេតុការណ៍ និងព្រឹត្តិការណ៍ជាច្រើនបានកើតឡើង ហើយរឿងខ្លះ កំពុងបន្តជះឥទ្ធិពលអវិជ្ជមានទៅដល់ឆ្នាំថ្មីខាងមុខទៀត។
គ្រាន់តែបើកក្បាលឆ្នាំ២០២៣ភ្លាម លោក ហ៊ុន សែន កាន់តែក្រពុលមុខ និងរកគ្រប់វិធីកម្ទេចកម្លាំងអ្នកប្រជាធិបតេយ្យ ដើម្បីត្រៀមផ្ទេរអំណាចដល់កូនៗរបស់ លោក។ នៅថ្ងៃទី៩ ខែមករា អតីតកម្មាភិបាលខ្មែរក្រហមរូបនេះ មិនត្រឹមតែព្រមានប្រើហិង្សាលើមន្ត្រីគណបក្សប្រឆាំងទេ ថែមទាំងបញ្ជាឲ្យមន្ត្រីរបស់លោក ប្តឹងទាមទារសំណងរាប់ម៉ឺនដុល្លារលើសពីច្បាប់កំណត់ និងរឹបអូសទ្រព្យសម្បត្តិពីអតីតឧត្តមទីប្រឹក្សាគណបក្សភ្លើងទៀនគឺលោក គង់ គាំ ដូចករណីអនុប្រធានបក្សភ្លើងទៀនលោក សុន ឆ័យ ដែរ ដោយសារតែការបញ្ចេញមតិរិះគន់ប្រវត្តិគណបក្សប្រជាជនកម្ពុជា និងការបោះឆ្នោតមិនត្រឹមត្រូវ។
លោក ហ៊ុន សែន៖ «ហើយអ្នកគិតថាអ្វី(ក៏)អាងតុលាការ ខ្ញុំចង់សួរអ្នកទៅវិញថា ជម្រើសមានតែពីរទេ មួយគឺប្រើផ្លូវច្បាប់ មួយទៀតគឺប្រើដំបងហ្មង តើអ្នកយកមួយណាពីរហ្នឹង?អាហ្នឹងអ្នកនិយាយឱ្យច្បាស់។ ខ្ញុំសុំព្រមានចំពោះអ្នក!ពួកខ្ញុំនេះមិនទុកឱ្យពួកអ្នកចោទថា ចោរមួយជីវិតទេ ខ្ញុំសូមជម្រាបជូន។ ត្រូវតែបញ្ចប់វប្បធម៌ឡាំប៉ាក្រោយការបោះឆ្នោត។ គណបក្សប្រជាជនមិនអាចទទួលយកបាននូវពាក្យថាជាចោរលួចបន្លំសន្លឹកឆ្នោតទេ។ អ្នកណាហ៊ាននិយាយបែបនេះយើងត្រូវតែប្ដឹង»។
ភ្លាមៗ ក្រុមមន្ត្រីអាម៉ីអាថោងរបស់លោក ហ៊ុន សែន សម្រុកដាក់បណ្តឹង និង រឹបអូសផ្ទះនិងដីធ្លីពីលោក គង់ គាំ នៅកណ្តាលទីក្រុងភ្នំពេញដែលមានតម្លៃរាប់លានដុល្លារ ដែលធ្វើឲ្យលោក គង់ គាំ វេចបង្វេចចេញស្ទើរមិនទាន់។
រួចដៃពីការចាត់ការលោក សុន ឆ័យ និងលោក គង់ គាំ ភ្លាម នៅថ្ងៃទី១៦ មករា រដ្ឋាភិបាលរបស់លោក ហ៊ុន សែន ក៏ងាកមកចាប់ឃុំខ្លួនអនុប្រធានគណបក្សភ្លើងទៀនម្នាក់ទៀតគឺ លោក ថាច់ សេដ្ឋា ច្រកចូលពន្ធនាគាររហូតមកទល់សព្វថ្ងៃនេះ។ ដំបូងឡើយ តុលាការបានចោទប្រកាន់លោក ថាច់ សេដ្ឋា ពីបទចេញសែកអត់លុយ ឬសែកស្អុយកាលពីអំឡុងឆ្នាំ២០១៩។ បន្ទាប់មក តុលាការបានចោទប្រកាន់លោកមួយករណីទៀតពីបទញុះញង់ឱ្យប្រព្រឹត្តបទឧក្រិដ្ឋ និងបទញុះញង់ឱ្យមានការរើសអើង ពាក់ព័ន្ធនឹងសុន្ទរកថារបស់លោកជាមួយអ្នកគាំទ្រនៅក្រៅប្រទេសរឿងខួប៧មករា របស់គណបក្សកាន់អំណាច។ ពីរសំណុំរឿងនេះ តុលាការកាត់ទោសឲ្យលោក ថាច់ សេដ្ឋា ជាប់ពន្ធនាគារ៤ឆ្នាំកន្លះ។ ប៉ុន្តែការចាប់ឃុំខ្លួនអ្នកនយោបាយដើមកំណើតខ្មែរក្រោមរូបនេះ បានបណ្តាលឲ្យមានចលនាបាតុកម្មប្រឆាំងរដ្ឋាភិបាលលោក លោក ហ៊ុន សែន ជាបន្តបន្ទាប់ ជាពិសេសនៅក្រៅប្រទេស។
ក្រៅពីការបង្ក្រាបអ្នកនយោបាយបក្សប្រឆាំងឥតឈប់ឈរហើយនោះ លោក ហ៊ុន សែន ក៏បន្តបង្ក្រាបប្រព័ន្ធផ្សព្វផ្សាយឯករាជ្យដែរ នៅមុនការបោះឆ្នោតជាតិ។ នៅថ្ងៃទី១៣ ខែកុម្ភៈ លោក ហ៊ុន សែន បានប្រើអំណាចទាំងបំពានច្បាប់បញ្ជាឲ្យក្រសួងព័ត៌មានបិទវិទ្យុសំឡេងប្រជាធិបតេយ្យ វីអូឌី (VOD) ដោយលោកចោទថា ការផ្សាយព័ត៌មានដែលថា លោក ហ៊ុន ម៉ាណែត ចុះហត្ថលេខាជំនួសលោកដើម្បីផ្ដល់ជំនួយដល់ប្រទេសទួរគី (Turkey) នោះ គឺជាកំហុសដ៏ធ្ងន់ធ្ងរ និងបំបែកបំបាក់ផ្ទៃក្នុងរដ្ឋាភិបាល។ ក្រុមអង្គការជាតិ និងអន្តរជាតិ ព្រមទាំងក្រុមប្រទេសប្រជាធិបតេយ្យ បានថ្កោលទោសទង្វើរបស់លោក ហ៊ុន សែន ជាបន្តបន្ទាប់ ចំពោះការបិទវិទ្យុវីអូឌីដែលជាប្រព័ន្ធផ្សព្វផ្សាយឯករាជ្យចុងក្រោយនៅកម្ពុជា។
ក្រោយបិទវិទ្យុវីអូឌីរួច នៅថ្ងៃទី៣ ខែមីនា តុលាការក្រុងភ្នំពេញ ក៏បានប្រកាសសាលក្រមកាត់ទោសលោក កឹម សុខា ប្រធានគណបក្សសង្គ្រោះជាតិពីបទ''ក្បត់ជាតិ''ដោយឲ្យជាប់ឃុំក្នុងផ្ទះ២៧ឆ្នាំ និងដកហូតសិទ្ធិធ្វើនយោបាយ ព្រមទាំងហាមមិនឲ្យជួបអ្នកណាក្រៅពីសាច់ញាតិបានឡើយ។ការកាត់ទោសមេបក្សប្រឆាំងរូបនេះ ត្រូវបានអង្គការជាតិ-អន្តរជាតិ និងក្រុមប្រទេសប្រជាធិបតេយ្យ ប្រកាសថ្កោលទោសរដ្ឋាភិបាលលោក ហ៊ុន សែន និងចាត់ទុកថា ជាការដើរថយក្រោយនៃការអនុវត្តរដ្ឋធម្មនុញ្ញ របបប្រជាធិបតេយ្យសេរីពហុបក្ស។ បន្ថែមពីនេះ ១៣ថ្ងៃក្រោយមក គឺសភាអឺរ៉ុប បានអនុម័តជាផ្លូវការនូវសេចក្តីសម្រេចថ្មីមួយព្រមានដកប្រព័ន្ធអនុគ្រោះពន្ធ «គ្រប់មុខទំនិញទាំងអស់លើកលែងតែអាវុធ» (EBA) ពីកម្ពុជា ប្រសិនបើការបោះឆ្នោតជាតិខែកក្កដា ប្រព្រឹត្តទៅមិនស្របតាមស្តង់ដារអន្តរជាតិ ឬនៅតែមានការបន្តរំលោភសិទ្ធិមនុស្ស និងសិទ្ធិនយោបាយ។
ក្នុងពេលមានវិបត្តិនយោបាយនេះ កម្ពុជា ក៏ដល់វេនធ្វើជាម្ចាស់ផ្ទះនៃការរៀបចំព្រឹត្តិការណ៍កីឡាស៊ីហ្គេមលើកទី៣២ ចាប់ពីថ្ងៃទី០៥ ដល់ថ្ងៃទី១៧ ខែឧសភា និងអាស៊ានប៉ារ៉ាហ្គេមលើកទី១២ ចាប់ពីថ្ងៃទី០៣ ដល់ថ្ងៃទី០៩ ខែមិថុនា។ ព្រឹត្តិការណ៍កីឡាទាំងពីរនេះបានបិទបញ្ចប់ ដោយមោទនភាពជាតិ និងការកេងចំណេញនយោបាយពីលោក ហ៊ុន សែន។ ព្រឹត្តិការណ៍កីឡាស៊ីហ្គេមដែលលោក ហ៊ុន សែន ចំណាយលុយជាតិអស់ចំនួន១១៨លានដុល្លារនោះ កម្ពុជាដណ្ដើមបានមេដាយសរុប ២៨២គ្រឿង ក្នុងនោះមេដាយមាសចំនួន ៨១គ្រឿង ប្រាក់ ៧៤គ្រឿង និងសំរឹទ្ធចំនួន ១២៧គ្រឿង។ តួលេខនេះ ធ្វើឱ្យកម្ពុជាឈរលេខរៀងទី៤ ជាប្រទេសទទួលបានមេដាយមាសច្រើនជាងគេ។ ដោយចង់អួតអាងថា កម្ពុជាតូចតែ«បេះដូងធំ»លោក ហ៊ុន សែន បានសម្រេចធ្វើរឿងមួយឲ្យខុសពីគេ គឺមិនយកលុយថ្លៃហូបចុក និងស្នាក់នៅពីប្រតិភូកីឡាស៊ីហ្គេមបរទេសក្នុងម្នាក់ៗ ៥០ដុល្លារ ដែលសរុបប្រមាណស្មើ ៧លានដុល្លារ។
បើទោះបីជាកម្ពុជារវល់រៀបចំព្រឹត្តិការណ៍កីឡាស៊ីហ្គេមក្តី ក៏រដ្ឋាភិបាលរបស់លោក ហ៊ុន សែន នៅតែមិនភ្លេចបង្ក្រាបទៅលើគណបក្សប្រឆាំងឡើយ។
នៅថ្ងៃទី១៥ ខែឧសភា គណៈកម្មាធិការជាតិរៀបចំការបោះឆ្នោតហៅកាត់ គ.ជ.ប ដែលថ្នាក់ដឹកនាំភាគច្រើនជាមនុស្សរបស់លោក ហ៊ុន សែន បានបិទសិទ្ធិមិនឲ្យ គណបក្សភ្លើងទៀនចូលរួមប្រកួតប្រជែងការបោះឆ្នោតជាតិ នៅថ្ងៃទី២៣ ខែកក្កដា នោះទេ ក្រោមហេតុផលបច្ចេកទេសថា គណបក្សនេះបាត់ឯកសារដើមនៃការចុះបញ្ជីគណបក្ស។ ក្រោយតតាំងតាមផ្លូវច្បាប់អស់លទ្ធភាព ថ្នាក់ដឹកនាំនិងសកម្មជន គណបក្សភ្លើងទៀន ក៏ប្រកាសត្រៀមធ្វើបាតុកម្មដោយអហិង្សាដើម្បីទាមទារសិទ្ធិ ចូលរួមការបោះឆ្នោត ប៉ុន្តែត្រូវបាន លោក ហ៊ុន សែន គំរាមសម្លាប់និងចាប់ដាក់គុកអ្នកធ្វើបាតុកម្មប្រឆាំងគ.ជ.ប។
លោក ហ៊ុន សែន៖ «សូមបងប្អូនកុំចាញ់បោក ហើយមកជាប់គុក ឬស្លាប់ ជំនួសឱ្យមេដឹកនាំ(គណបក្សភ្លើងទៀន)។ ខ្ញុំសូមអំពាវនាវ បងប្អូនកុំចូលរួមសកម្មភាពណាមួយ ជាមួយមេដឹកនាំ(គណបក្ស)ភ្លើងទៀនឱ្យសោះ ហើយក៏សូមបញ្ជាទៅអាជ្ញាធរគ្រប់ទីកន្លែង ដែលមានសមត្ថកិច្ច មិនអនុញ្ញាតឱ្យមានការប្រមូលផ្ដុំប្រឆាំងជាមួយនឹងសណ្ដាប់ធ្នាប់សាធារណៈ»។
នៅចុងខែឧសភាដែលកាន់តែជិតដល់ការបោះឆ្នោតនោះដែរ លោក ហ៊ុន សែន ភ័យស្លន់ស្លោមិនស្ទើរទេ នៅពេលឃើញវត្តមានលោក សម រង្ស៊ី ហោះហើរទៅទស្សនកិច្ចនៅប្រទេសជាសមាជិកអាស៊ានមួយចំនួនដែលកៀកកម្ពុជា ដូចជាប្រទេសឥណ្ឌូណេស៊ី (Indonesia) និងប្រទេសម៉ាឡេស៊ី (Malaysia)ជាដើម។ លោក ហ៊ុន សែន បានព្រមានប្រើរ៉ុក្កែត BM21បាញ់សម្លាប់លោក សម រង្ស៊ីនិងអ្នកគាំទ្រផ្សេងទៀត បើហ៊ានឆ្លងដែនចូលប្រទេសកម្ពុជា។ លើសពីនេះ លោក ហ៊ុន សែន ក៏បានប្រឌិតព័ត៌មានថា រដ្ឋាភិបាលម៉ាឡេស៊ី បានបណ្តេញលោក សម រង្ស៊ី ចេញពីប្រទេស ប៉ុន្តែផ្ទុយទៅវិញ លោក សម រង្ស៊ី បានបំពេញទស្សនកិច្ចជាធម្មតា និងថែមទាំង ជួបពិភាក្សាការងារជាមួយសមាជិកសភាម៉ាឡេស៊ីថែមទៀត។
ដោយសារតែបុរសខ្លាំងរូបនេះ ញៀនខាងប្រើភាសាជេរប្រមាថ និងគំរាមកំហែងបាញ់បោះកាប់សម្លាប់ដៃគូប្រកួតប្រជែងនយោបាយនោះ នៅចុងខែមិថុនាក្រុមប្រឹក្សាភិបាលត្រួតពិនិត្យ (Oversight Board) របស់ក្រុមហ៊ុនមេតា (Meta) សម្រេចព្យួរគណនីហ្វេសប៊ុក និងអ៊ីនស្តាក្រាម (Instagram) របស់លោក ហ៊ុន សែន រយៈពេល ៦ខែជាបន្ទាន់។ រឿងនេះបានធ្វើឲ្យលោក ហ៊ុន សែន ខឹងផង និងខ្មាសគេផង។ លោក ហ៊ុន សែន បានសងសឹកដោយបញ្ជាឱ្យបណ្តេញសមាជិកក្រុមប្រឹក្សាភិបាលក្រុមហ៊ុនមេតា ២២នាក់ ចេញពីកម្ពុជា ៤៨ម៉ោង និងហាមប្រាមមិនឱ្យចូលកម្ពុជា អស់មួយជីវិត។ កាលនោះ លោក ហ៊ុន សែន ក៏បានប្រកាសឈប់ប្រើហ្វេសប៊ុក (Facebook) និងលុបចោលទំព័រហ្វេសប៊ុករបស់លោក ដោយអះអាងថា មិនចង់នាំចង្រៃដល់ខ្លួន និងថែមទាំងដាក់សម្ពាធឲ្យមន្ត្រីរាជការ ងាកទៅប្រើបណ្ដាញសង្គមតេឡេក្រាម (Telegram) និងតិកតុក (TikTok) តាមលោកវិញ។ ប៉ុន្តែ ៣សប្តាហ៍ក្រោយមក លោកបានលេបសំដី និងបើកគណនីហ្វេសប៊ុកនោះប្រើឡើងវិញ។
ក្រោយបំបិទគណបក្សភ្លើងទៀនរួមទាំងវិធានការនានាដើម្បីបំបិទសេរីភាពព័ត៌មានឯករាជ្យ អង្គការសង្គមស៊ីវិល និងសិទ្ធិសេរីភាពជាមូលដ្ឋានរបស់ពលរដ្ឋរួចមក នៅថ្ងៃទី២៣ ខែកក្កដា លោក ហ៊ុន សែន ក៏បានរៀបចំការបោះឆ្នោតដែលគ្មានគូប្រកួតប្រជែង និងដែលបានកំណត់ទុកជាមុននូវលទ្ធផលឈ្នះភ្លូកទឹកភ្លូកដីតែម្នាក់ឯង ដើម្បីត្រៀមប្រគល់អំណាចដល់កូនប្រុសរបស់លោកតាមបែបផ្ដាច់ការ។
ការបោះឆ្នោតនេះ បានរងនូវការថ្កោលទោសស្ទើរជុំទិសពីសហគមន៍អន្តរជាតិ ជាពិសេស ក្រុមប្រទេសនិយមប្រជាធិបតេយ្យ ដូចជាសហរដ្ឋអាមេរិក បានប្រកាសដាក់ទណ្ឌកម្មលើរដ្ឋាភិបាលថ្មីដែរ។
ក្រោយការបោះឆ្នោតបង្គ្រប់កិច្ច នៅថ្ងៃទី២២ សីហា គណៈរដ្ឋមន្ត្រីថ្មីក្បាលធំហួសមាឌដែលសុទ្ធតែជាកូនចៅ និងសាច់ញាតិរបស់មន្ត្រីកំពូលៗនៃគណបក្សប្រជាជនកម្ពុជា ត្រូវបានបង្កើតឡើង ក្នុងនោះមានឧបនាយករដ្ឋមន្ត្រី ១០រូប និងទេសរដ្ឋមន្ត្រី ២១រូប និងរដ្ឋមន្ត្រី ៣០រូបទៀត។ លោក ហ៊ុន សែន មិនត្រឹមតែផ្ទេរតំណែងនាយករដ្ឋមន្ត្រីជិត៤ទសវត្សរ៍របស់លោកឲ្យកូនប្រុសច្បង គឺលោក ហ៊ុន ម៉ាណែត ទេ ថែមទាំងតែងតាំងកូនបង្កើតកូនប្រសា និងសាច់ញាតិរបស់លោកផ្សេងទៀត រួមទាំងឪក្មេកលោក ហ៊ុន ម៉ាណែត ឲ្យកាន់តួនាទីកំពូលៗតាមក្រសួងស្ថាប័នរដ្ឋសំខាន់ៗ។ ហើយលោក ហ៊ុន សែន ក៏កំពុងត្រៀមទៅអង្គុយកៅអីប្រធានព្រឹទ្ធសភាដែរ។ ដោយមើលឃើញដូច្នេះរដ្ឋមន្ត្រីផ្សេងៗទៀត ដូចជា លោក ស ខេង លោក ទៀ បាញ់ អ្នកស្រី ម៉ែន សំអន លោក សាយ ឈុំ លោក ចម ប្រសិទ្ធ លោក ប្រាក់ សុខុន និងលោក ជា សុផារ៉ា ជាដើម ក៏ចាត់ចែងតែងតាំងកូនបង្កើតនិងកូនប្រសារបស់ពួកគេរៀងៗខ្លួននៅតាមក្រសួងស្ថាប័នដែលពួកគេធ្លាប់គ្រប់គ្រង និងកន្លែងខ្លាញ់ផ្សេងៗទៀតតាំងពីថ្នាក់ជាតិ រហូតដល់ថ្នាក់ក្រោមជាតិ ដោយធ្វើដូចប្រទេសជាតិនេះជាក្រុមហ៊ុនឯកជនរបស់ពួកគេ។
បន្ទាប់ពីបានតំណែងជានាយករដ្ឋមន្ត្រីបន្តពីឪពុក លោក ហ៊ុន ម៉ាណែត បានចេញដំណើរទៅជួបមេដឹកនាំចិនផង និងវៀតណាមផង។ លោកក៏បានទៅចូលរួមមហាសន្និបាតអង្គការសហប្រជាជាតិនៅទីក្រុងញ៉ូវយ៉ក (New York) សហរដ្ឋអាមេរិក ពីថ្ងៃទី២១ដល់ថ្ងៃទី២៥ កញ្ញាដែរ។ នៅពេលនោះប្រជាពលរដ្ឋខ្មែររាប់រយនាក់បានធ្វើបាតុកម្មប្រឆាំងវត្តមានលោក ហ៊ុន ម៉ាណែត និងការផ្ទេរអំណាចតាមបែបផ្ដាច់ការ។ ប៉ុន្តែដើម្បីការពារមុខមាត់ផ្ទាល់ខ្លួននោះ លោក ហ៊ុន ម៉ាណែត និងមន្ត្រីរបស់ លោក ក៏បានចំណាយលុយប្រមូលមនុស្សទៅសម្ដែងការស្វាគមន៍លោកដែរ។ មិនតែប៉ុណ្ណោះ លោក ហ៊ុន ម៉ាណែត និងឪពុករបស់លោក ក៏ថែមទាំងបង្ហោះសារអួតអាងប្រកបដោយមោទនភាពថា មានរូបភាពស្វាគមន៍លោក នៅលើផ្ទាំងប៉ាណូក្នុង តំបន់ថាមស៍ស្វែរ (Time Square) ទៀតផង។ប៉ុន្តែក្រុមហ៊ុនផ្សព្វផ្សាយពាណិជ្ជកម្ម លើផ្ទាំងប៉ាណូទាំងនោះបដិសេធថា មិនដែលផ្សព្វផ្សាយរូបភាពស្វាគមន៍លោក ហ៊ុន ម៉ាណែត ឡើយ ដោយបញ្ជាក់ថា រូបភាពវីដេអូទាំងនោះ ជារូបភាពកាត់តក្លែងក្លាយ។
ងាកមកមើល អំពើហិង្សាបង្កដោយជនបិទមុខទៅលើអ្នកនយោបាយ និងអ្នករិះគន់នៅតាមដងផ្លូវវិញ នៅតែបន្តតែកើតឡើង ហើយនៅតែគ្មានយុត្តិធម៌សម្រាប់ជនរងគ្រោះ បើទោះបីជាមានរដ្ឋាភិបាលថ្មីក៏ដោយ។ នៅថ្ងៃទី២១ កញ្ញា ជនមិនស្គាល់មុខមួយក្រុម បានវាយដុំទៅលើអ្នកបញ្ចេញមតិលើបណ្ដាញសង្គម លោក នី ណាក់ ស្ទើរបាត់បង់ជីវិត ប៉ុន្តែសមត្ថកិច្ចរកជនដៃដល់មិនឃើញដូចករណីកន្លងទៅដែរ។
១០០ថ្ងៃក្រោយមកនៃការកាន់តំណែងជានាយករដ្ឋមន្ត្រីរបស់លោក ហ៊ុន ម៉ាណែត គឺនៅថ្ងៃទី២៩ វិច្ឆិកា នាយករដ្ឋមន្ត្រីថ្មី និងមន្ត្រីរដ្ឋាភិបាល ព្យាយាមលើកឡើងពីសមិទ្ធផលដែលសម្រេចបានដូចជាការដាក់ចេញគោលនយោបាយ ការធ្វើដំណើរទៅក្រៅប្រទេសបានច្រើនគីឡូម៉ែត និងធានានូវសន្តិភាព ស្ថិរភាពនយោបាយ សង្គម និងសេដ្ឋកិច្ចជាដើម។ ប៉ុន្តែប្រជាពលរដ្ឋ អ្នកឃ្លាំមើល និងអ្នកនយោបាយបក្សប្រឆាំងវិញ មើលឃើញថា ចាប់តាំងពីលោក ហ៊ុន ម៉ាណែត កាន់អំណាចបាន១០០ថ្ងៃមក អំពើអយុត្តិធម៌សង្គមកាន់តែធ្ងន់ធ្ងរ កូនចៅអ្នកមានលុយអ្នកមានអំណាច បើករថយន្តបុកគេស្លាប់នៅតែរត់គេចពីច្បាប់ អ្នកជំនួញដែលមានទំនាក់ទំនងជាមួយ លោក ហ៊ុន ម៉ាណែតមួយចំនួន រកស៊ីអចលនទ្រព្យបោកប្រាស់ពលរដ្ឋ ដោយគ្មានបញ្ហា។ សេដ្ឋកិច្ចកាន់តែធ្លាក់ចុះបណ្តាលឲ្យជីវភាពពលរដ្ឋតូចតាចកាន់តែលំបាក ហើយគ្មានលុយបង់ធនាគារ។ អំពើពុករលួយ វិបត្តិសង្គម វិបត្តិនយោបាយ ការរំលោភសិទ្ធិមនុស្ស និងលទ្ធិប្រជាធិបតេយ្យកាន់តែយ៉ាប់យ៉ឺន។ អ្នកនយោបាយបក្សប្រឆាំង និងអ្នករិះគន់ ជាប់គុកកាន់តែច្រើន និងរងការគំរាមកំហែងកាន់តែខ្លាំង។បញ្ហាជនអន្តោប្រវេសន៍ បញ្ហាគ្រឿងញៀន និងការជួញដូរមនុស្ស នៅតែបន្តកើនឡើងដដែល។
ឥឡូវនេះ ដល់ពេលបិទបញ្ចប់ទំព័រឆ្នាំ២០២៣ហើយ ប៉ុន្តែហេតុការណ៍ និងព្រឹត្តិការណ៍មួយចំនួន ដែលបានកើតឡើង ជាពិសេសបញ្ហាញាំញីដោយវិបត្តិនយោបាយ នឹងអាចបន្តជះឥទ្ធិពលអាក្រក់ ដល់ឆ្នាំ២០២៤ខាងមុខទៀត ប្រសិនបើរដ្ឋាភិបាលរបស់លោក ហ៊ុន ម៉ាណែត នៅតែប្រកាន់ជំហរដដែល ដោយមិនព្រមដោះស្រាយបញ្ហាប្រជាធិបតេយ្យ និងការគោរពសិទ្ធិមនុស្សតាមសំណើរបស់សហគមន៍ជាតិ និងអន្តរជាតិទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។