ໄຊຍະບູຣີ ຕຣຽມຈັດງານບຸນຊ້າງ ປີທ່ອງທ່ຽວ ກະຕຸ້ນເສຖກິຈ ລາວ

ງານບຸນຊ້າງ ຢູ່ແຂວງໄຊຍະບູຣີ ປະຈໍາປີ 2024 ນີ້ ເປັນຄັ້ງທີ 17 ທາງການເເຂວງໄຊຍະບູຣີ ຈະຈັດຂຶ້ນແຕ່ມື້ວັນທີ 12​ ເຖິງວັນທີ 18 ກຸມພາ ໂດຍມີການກຽມຄວາມພ້ອມແລ້ວ, ຈະມີຊ້າງເຂົ້າຮ່ວມ 75 ໂຕ ທີ່ສ່ວນໃຫຍ່ເປັນຊ້າງ ຂອງສູນອະນະຮັກຊ້າງ ຢູ່ເມືອງໄຊຍະບູຣີ ຊຶ່ງໄດ້ຜ່ານການຝຶກຝົນແລະ ສາມາດສະແດງກິຈກັມ ໃຫ້ນັກທ່ອງທ່ຽວເບິ່ງໄດ້. ປີນີ້ ງານບຸນຈະຈັດໃຫຍ່ສົມຄວນ ຍ້ອນເປັນປີທ່ອງທ່ຽວ.

ດັ່ງເຈົ້າໜ້າທີ່ ທ່ອງທ່ຽວ ຢູ່ແຂວງໄຊຍະບູຣີ ຜູ້ຂໍ ສງວນຊື່ ແລະຕໍາແໜ່ງທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 8 ກຸມພານີ້ວ່າ:

“ໃຫຍ່ສົມຄວນ ເປັນປີທ່ອງທ່ຽວລາວແດ່ ເຮັດບຸນຊ້າງປະຈໍາປີແດ່ ຕາມແຜນແມ່ນ 75 ໂຕd ກໍມີການເປີດຕລາດນັດ ວາງສະແດງສິນຄ້າd ແລ້ວກະມີກິຈກໍາຂອງຊ້າງ ມີບໍຣິການຂີ່ຊ້າງ ເຣື່ອງທີ່ພັກຈະພຽງພໍຢູ່ດອກ ເພາະວ່ານອກຈາກໂຮງແຮມ, ເຮືອນພັກແລ້ວ ແລ້ວກະພວກເຮົາກໍໄດ້ຕຽມໂຮມສະເຕ ເປັນເຮືອນພັກແຮມ ປະຊາຊົນນ່າໄວ້ຢູ່.”

ເຈົ້າໜ້າທີ່ທ່ອງທ່ຽວ ຢູ່ແຂວງນີ້ອີກທ່ານນຶ່ງ ເວົ້າວ່າ ປີນີ້ ທາງການເພິ່ນໄດ້ວາງເປົ້າໝາຍ ຈໍານວນນັກທ່ອງທ່ຽວ ທີ່ຈະເຂົ້າມາຮ່ວມງານ ໄວ້ຄືກັນກັບທຸກປີ ບໍ່ໃຫ້ຫລຸດ 150,000 ຄົນ ຮວມທັງນັກທ່ອງທ່ຽວຕ່າງປະເທດ, ແຕ່ສ່ວນໃຫຍ່ຈະເປັນຄົນລາວ.

“ກະຈັດໃຫຍ່ແດ່ ເພາະມັນເປັນປີການທ່ອງທ່ຽວລາວແດ່ເດ້ນໍ ເພິ່ນກໍຄາດການໄວ້ ໃນແຕ່ລະປີ ບໍ່ໃຫ້ຫລຸດ ແສນຫ້າສິບພັນເດ. ປົກກະຕິມັນກໍຍາກ ຄ້າຍຄືແຕ່ລະປີຜ່ານມາຫັ້ນແຫລະ. ຈໍານວນນຶ່ງ ທີ່ວ່າແຂວງໃກ້ຄຽງ ບາງເທື່ອທີ່ເຂົາເຈົ້າມາແຕ່ເຊົ້າ. ກະເບິ່ງກິຈກໍາແລ້ວກະກັບໄດ້ ກະມີຫັ້ນນະ ເພາະວ່າການເຂົ້າເຖິງມັນງ່າຍຫັ້ນເດ.”

ໃນຂະນະດຽວກັນ ເຈົ້າຂອງບ້ານພັກຢູ່ແຂວງໄຊຍະບູຣີ ເວົ້າວ່າ ໃນວັນທີ 16 ແລະ 17 ກຸມພາ ສອງມື້ນີ້ ຫລາຍບ່ອນພັກຢູ່ເມືອງໄຊຍະບູຣີ ຈະເຕັມໝົດແລ້ວ, ສ່ວນໃຫຍ່ຈະເປັນຄົນຕ່າງແຂວງ ມາຈ່ອງກັນຫລາຍ ສ່ວນຄົນຕ່າງປະເທດມີໜ້ອຍ.

“ວັນທີ 16, 17 ນີ້ເຕັມແລ້ວ ເພາະວ່າງານບຸນຊ້າງເຣີ່ມເປີດວັນທີ 12 ແຕ່ວ່າເຂົາເປີດເປັນພິທີ ເປັນມື້ວັນທີ 17 ເຕັມໝົດເລີຍ ສອງຄືນນີ້ ແຕ່ວ່າຄັນເອົາກ່ອນ ຫລືວ່າຫລັງ 17 ຫັ້ນ ກະຍັງວ່າງຢູ່ ແຕ່ສ່ວນຫລາຍຈະເປັນຄົນຕ່າງແຂວງ, ຕ່າງຊາຕ ພວກຢູໂຣບ ກະສ່ວນໜ້ອຍ.”

ຊາວບ້ານ ຢູ່ເມືອງໄຊຍະບູຣີ ຜູ້ນຶ່ງ ກໍເວົ້າວ່າ ງານບຸນຊ້າງປີນີ້ ກໍຈະຈັດໃຫຍ່ຄືທຸກປີ, ປີນີ້ເປັນປີທ່ອງທ່ຽວລາວ, ຄາດວ່າຈະມີຄົນມາທ່ຽວຫລາຍ ຊຶ່ງສ່ວນໃຫຍ່ກໍຈະມາໃນມື້ວັນທີ 16, 17 ແລະ 18 ກຸມພາ ເພາະເປັນມື້ແທ້ຂອງງານບຸນ.

“ເພິ່ນກໍວ່າ ຈະຈັດເປັນມະຫາກໍາໃຫຍ່ແດ່ ເພາະວ່າມັນແມ່ນປີທ່ອງທ່ຽວລາວແດ່ນໍ. ປີທ່ອງທ່ຽວແຂວງໄຊຍະບູຣີແດ່ ອາໄສແຂກຄົນຈະເຂົ້າມາຫລາຍແດ່. ຖ້າຮອດມື້ມາ ສ່ວນຫລາຍແມ່ນມື້ 16,​17,​18 ນີ້ແຫລະ ມື້ເຂົາເຈົ້າຈະເຮັດມື້ແທ້ຫັ້ນນະ.” 

ປະຊາຊົນຜູ້ນຶ່ງ ທີ່ບໍ່ແນ່ໃຈວ່າ ຈະໄດ້ໄປງານບຸນຊ້າງປີນີ້ ຫລືບໍ່ນັ້ນ ເວົ້າວ່າ ງານນີ້ຈັດໃຫຍ່ທຸກປີ, ປີນີ້ ຄົນອາຈໄປຮ່ວມຫລາຍ ໄປເບິ່ງຊ້າງສະແດງກິຈກັມແລະມີສິນຄ້າຂາຍຫລາຍ, ບ້ານພັກອາຈບໍ່ພໍກັນຊໍ້າ.

“ຄືກັບບຸນທົ່ວໄປ ກ່ຽວກັບຊ້າງຫັ້ນແຫລະ ຈັດໃຫຍ່ທຸກປີ ຕ່າງແຂວງກໍໄປຄືກັນ ໄປແລ້ວ ບ້ານພັກອາດບໍ່ພໍຊີ້ນະ ໜ້າຈະໄດ້ຈ່ອງ ເພາະວ່າເຂົາເຈົ້າກໍໄປຫລາຍ.”

ງານບຸນຊ້າງປີ 2024 ນີ້ ທາງການຈະເປີດພິທີຢ່າງເປັນທາງການ ໃນມື້ວັນທີ 17 ກຸມພາ, ແຕ່ວັນທີ 12 ກຸມພາ ຈະເປີດຕລາດນັດ ແລະກິຈກໍາຕ່າງໆ ເປັນ ຕົ້ນ ການວາງສະແດງສິນຄ້າ ທັງສິນຄ້າພາຍໃນ ແລະຕ່າງປະເທດ, ການສະ ແດງສິລປະວັນນະຄະດີ, ການແຂ່ງຂັນນັກຮ້ອງ ແລະດົນຕຣີພື້ນເມືອງ, ການປະກວດ ນາງສາວງາມທິດາຊ້າງ, ການໂດດຈ້ອງ, ການຕັດບາດອຸທິດສ່ວນບຸນກຸສົນໃຫ້ຊ້າງ.

ໃນງານບຸນຊ້າງປີນີ້ ທາງການແຂວງໄຊຍະບູຣີ ໄດ້ແຕ່ງຕັ້ງຄະນະກໍາມະການ ຮັບຜິດຊອບ ຕິດຕາມ ກວດກາ ການຈໍາໜ່າຍສິນຄ້າ ເຊັ່ນ ການຕິດລາຄາສິນ ຄ້າເປັນເງິນກີບ, ສິນຄ້າໝົດອາຍຸ, ສິນຄ້າປອມ ແລະອື່ນໆ ແລະຄຸ້ມຄອງເຣື່ອງຄ່າບໍຣິການທີ່ພັກ, ຮ້ານອາຫານ ແລະຮ້ານກິນດື່ມ ແລະເຣື່ອງການສນອງສະບຽງອາຫານ ໃຫ້ພຽງພໍກັບຄວາມຕ້ອງ ຂອງຜູ້ບໍຣິໂພກ ທີ່ມາຮ່ວມງານນັ້ນ.

ຣັຖບານລາວ ໃຫ້ຄວາມສໍາຄັນໃນການອະນຸຮັກຊ້າງ ໂດຍໄດ້ໃຫ້ຈັດເຂດປ່າສງວນແຫ່ງຊາຕ ນໍ້າປຸຍ ຢູ່ແຂວງໄຊຍະບູຣີ ເປັນເຂດອະນຸຮັກຊ້າງ ໂດຍມີອົງການອະນຸຮັກສັດປ່າລາວ ຮ່ວມມື ເພື່ອຟື້ນຟູ ຮັກສາ ແລະເພີ່ມຈໍານວນຊ້າງເອເຊັຽ ໃຫ້ຫລາຍຂຶ້ນ. ໃນເຂດປ່າສງວນແຫ່ງນີ້ ໄດ້ມີການລາດຕະເວນ ກວດກາ ຍ້ອນທີ່ຜ່ານມາ ຊ້າງປ່າມັກສູນເສັຍທີ່ຢູ່ອາໄສ ຍ້ອນມີການບຸກລຸກຕັດໄມ້, ທໍາລາຍປ່າ ຫລາຍ ຈົນເຮັດໃຫ້ຊ່າງປ່າ ຈໍາເປັນຕ້ອງໄດ້ໄປຊອກຫາອາຫານ ຢູ່ບ່ອນອື່ນ ຮວມທັງໄປທໍາລາຍພືດຜົລ ຂອງປະຊາຊົນ ເສັຍຫາຍ. ພ້ອມກັນນັ້ນ ຍັງມີທັງການລັກຂ້າຊ້າງປ່າ ເພື່ອເອົາງາ, ໜັງ ແລະຊິ້ນສ່ວນຕ່າງໆຂອງຊ້າງໄປຂາຍ. ດັ່ງນັ້ນ ຈຶ່ງໄດ້ມີໂຄງການອະນຸຮັກຊ້າງ ເພື່ອໃຫ້ຊ້າງມີທີ່ປອດໄພ. ໂຄງການທີ່ວ່ານີ້ ໄດ້ເຣີ່ມມາແຕ່ປີ 2005, ເຮັດໃຫ້ປ່າສງວນແຫ່ງຊາຕນໍ້າປຸຍ, ມີຊ້າງປ່າຢູ່ປະມານ 50-60 ໂຕ, ອີງຕາມຣາຍງານຂອງອົງການອະນຸຮັກສັດປ່າລາວ.     

ຊ້າງ ທີ່ມີຢູ່ໃນສູນອະນຸຮັກຊ້າງ ທີ່ເມືອງໄຊຍະບູຣີ ກໍມີປະມານ 100 ປາຍໂຕ, ອີງຕາມຄໍາເວົ້າຂອງເຈົ້າໜ້າທີ່ທ່ອງທ່ຽວ ແຂວງໄຊຍະບູຣີ.