ວຽງຈັນ ເສັຽຊີວິດ 11 ຄົນ, ອຸ​ບັດ​ຕິ​ເຫດ ໄລ​ຍະ​ປີ​ໃໝ່

ສິດນີ
2019-04-15
ອີແມວລ໌
ຄໍາເຫັນ
Share
ພິມ
ການຫຼິ້ນສລອງມ່ວນຊື່ນ ຂອງຊາວລາວ ໃນເທສການ ປີໃໝ່ລາວ
ການຫຼິ້ນສລອງມ່ວນຊື່ນ ຂອງຊາວລາວ ໃນເທສການ ປີໃໝ່ລາວ
RFA/LX

ໃນໄລຍະ ບຸນປີໃໝ່ ພ.ສ. 2562 ທີ່ນະຄອນຫລວງວຽງຈັນ ມີຄົນເສັຽຊິີວິດ ຍ້ອນອຸບັດຕິ​ເຫດ ຕາມທ້ອງຖນົນແລ້ວ 11 ຄົນ ແລະ ໄດ້ຮັບບາດເຈັບ ຈຳນວນ 284 ຄົນ ໃນນັ້ນ ເຂົ້າປິ່ນປົວ ຢູ່ໂຮງພະຍາບານ ມິດຕພາບ 150 ຕຽງ 240 ຄົນ ເປັນແມ່ຍິງ 75 ຄົນ ປິ່ນປົວ ຢູ່ຫ້ອງ ICU 9 ຄົນ ອີກ 44 ຄົນແມ່ນປິ່ນປົວ ຢູ່ໂຮງພະຍາບານເສດຖາທິຣາດ, ດັ່ງເຈົ້າຫນ້າທີ່ ໂຮງພະຍາບານ ມິຕພາບ 150 ຕຽງກ່າວ ຕໍ່ວິ​ທ​ຍຸ ເອເຊັຽ ເສຣີ ໃນມື້ວັນທີ 15 ເມສາ ນີ້ວ່າ:

“ສລຸບແລ້ວ 3 ມື້ເນາະ ຄົນເຈັບອຸບັດຕິເຫດ ແມ່ນ 240 ຄົນ ເປັນແມ່ຍິງ ຢູ່ 75 ຄົນ ນອນ ICU 9 ຄົນ.”

ໃນຂນະດຽວກັນ ເຈົ້າຫນ້າທີ່ ຢູ່ໂຮງພະຍາບານ ເສດຖາທິຣາດ ກໍໄດ້ກ່າວ ໃນມື້ດຽວກັນວ່າ:

"ກະທົບທັງ ໝົດມີ 44 ຄົນ ເສັຽຊິວິດ ບໍ່ມີເພາະວ່າ ຄົນໜັກໆ ເຂົາສົ່ງໄປມິຕພາບໝົດ ຢູ່ໂຮງໝໍເສດຖາ ຄັນວ່າໜັກໆ ຂະເຈົ້າມາປິ່ນປົວ ອີ່ຫຍັງໜ້ອຍນຶ່ງ ແລ້ວເຂົາກໍສົ່ງຫັ້ນນ່າ ຈະບໍ່ເສັຽຊີວິດຢູ່ຫັ້ນ ຄັນບໍ່ແມ່ນເສັຽຊີວິດ ມາແຕ່ນອກຫັ້ນນ່າ."

ສາເຫດຫຼັກ ທີ່ເຮັດໃຫ້ມີຄົນເຈັບ ແລະ ຕາຍ ໃນໄລ​ຍະບຸນປີໃໝ່ ກໍຍ້ອນຂັບຂີ່ ໃນເວລາມືນເມົາຂັບຣົດໄວ ຝ່າຝືນຣະບຽບຈາຣະຈອນ ໂດຍ ສະເພາະ ແມ່ນກຸ່ມໄວຣຸ້ນ ຂີ່ຣົດຈັກແລ່ນຫົດນ້ຳກັນ ຕາມທ້ອງຖນົນ. ທ່ານວ່າ ໃນໄລຍະບຸນປີໃໝ່ ເຈົ້າໜ້າທີ່ ກໍໄດ້ຕັ້ງດ່ານກວດກາ ຢ່າງເຂັ້ມງວດ ແຕ່ກໍຍັງບໍ່ທົ່ວເຖິງ ເຈົ້າໜ້າທີ່ ໄດ້ກວດພົບຜູ້ຂັບຣົດໄວເກີນໄປ ຫຼາຍກໍຣະນີ ແລະ ໄດ້ວັດແທກຣະດັບ ທາດເຫລົ້າ ໃນຮ່າງກາຍ ຫຼາຍຄົນ ປາກົດວ່າ ເກີນທີ່ກົດໝາຍກຳນົດໃຫ້. ສຳລັບແຂວງອື່ນໆນັ້ນ ຍັງບໍ່ມີຣາຍງານເທື່ອ.

ວ່າງບຸນປີໃຫມ່ ປີທີ່ຜ່ານມາ ສຳນັກຂ່າວສານປະເທດລາວ ຣາຍງານວ່າ ຣະຫວ່າງ ວັນທີ 14-16 ເມສາ ມີຜູ້ເສັຽຊີວິດ ຈາກອຸບັດເຫດ 29 ຄົນ.

ເຕັມຫນ້າ