ຊາວຄ້າຂາຍຂ້າງທາງກັງວົນ ບ່ອນ ຂາຍຂອງ

ໄຊຍາ
2020-09-14
ອີແມວລ໌
ຄໍາເຫັນ
Share
ພິມ
ປະຊາຊົນ ທີ່ ຫາຢູ່ຫາກິນ ຂາຍເຄື່ອງຂອງ ຂາຍອາຫານ ຕາມຂ້າງຖນົນຫົນທາງ ທີ່ມີທັງຄົນວຽດນາມ ແລະຄົນລາວ ປະປົນກັນໄປ
ປະຊາຊົນ ທີ່ ຫາຢູ່ຫາກິນ ຂາຍເຄື່ອງຂອງ ຂາຍອາຫານ ຕາມຂ້າງຖນົນຫົນທາງ ທີ່ມີທັງຄົນວຽດນາມ ແລະຄົນລາວ ປະປົນກັນໄປ
RFA

ຜແນກອຸດສາຫະກັມ-ການຄ້າ ນະຄອນຫຼວງວຽງຈັນ ຕຽມຈັດສັນການຄ້າຂາຍ ຕາມແຄມທາງ ແບບຊະຊາຍ. ຜ່ານມາທາງການເຫັນວ່າ ຍັງມີການຄ້າຂາຍ ທີ່ຣະເມີດຕໍ່ຣະບຽບຂອງ ການຈັດສັນຂົງເຂດ ການຄ້າ. ຕໍ່ບັນຫາດັ່ງກ່າວ ປະຊາຊົນຊາວຄ້າຂາຍ ໄດ້ສະແດງຄຳເຫັນ ຕໍ່ເອເຊັຽເສຣີ ໃນວັນທີ 11 ກັນຍາ 20 ວ່າ; ຖ້າຂັ້ນເທິງບໍ່ໃຫ້ຂາຍບ່ອນນີ້ ກາບໍ່ຮູ້ວ່າຈະໄປ ຂາຍຢູ່ໃສ, ຖ້າເປັນໄປໄດ້ໃຫ້ເພິ່ນຈັດສັນ ບ່ອນຂາຍໃຫ້:

"ກໍຖ້າບໍ່ໃຫ້ຂາຍບ່ອນນີ້ ກໍບໍ່ຮູ້ເນາະວ່າ ຈະໄປຂາຍບ່ອນໃດໃນຕລາດກໍບໍ່ ທີ່ຖ້າທາງການຈະຈັດຣະບຽບ ກໍໜ້າຈະເຮັດທີ່ຂາຍໃຫ້ພວກເຮົາ."

ແຕ່ຊາວນະຄອນຫຼວງວຽງຈັນ ພັດໃຫ້ຄວາມເຫັນວ່າ ຄວນຈະມີການຈັດຣະບຽບຮ້ານຄ້າ ທີ່ີຕັ້ງຢ່າງຊະຊາຍ ບໍ່ເປັນຣະບຽບເຊິ່ງເຮັດໃຫ້ ແຄມທາງເປື້ອນເປິ ແລະ ມີຄົນຈອດຣົດ ຊື້ຂອງ ເຮັດໃຫ້ການສັນຈອນ ລຳບາກຫຼາຍ.

"ພື້ນທີ່ຄວນຈັດສັນຢ່າງເປັນຣະບຽບຮຽບຮ້ອຍເດີ້ ເພາະວ່າຮ້ານຄ້າ ສ່ວນຫຼາຍຮ້ານບໍ່ຮຽບຮ້ອຍ, ຕັ້ງກັນຢູ່ແຄມທາງເຮັດໃຫ້ ຄວາມສົກກະປົກ ມີຂີ້ເຫຍື້ອຫຼາຍ ຍັງເຮັດໃຫ້ການສັນຈອນ ຍັງລຳບາກເພີ່ມຂຶ້ນອີກດ້ວຍ."

ຕໍ່ກັບບັນຫາດັ່ງກ່າວ ທາງດ້ານເຈົ້າໜ້າທີ່ຜແນກອຸດສາຫະກັມ ແລະການຄ້າ ນະຄອນຫຼວງວຽງຈັນ ກ່າວວ່າປັຈຈຸບັນ ມີຮ້ານຄ້າຂາຍແບບ ຊະຊາຍໃນບ່ອນ ສາທາຣະນະແຄມທາງ ດັ່ງນັ້ນທາງຜແນກການຄ້າ ຈຶ່ງມີການກວດກາ ແລະ ຈັດຣະບຽບ ໂດຍຖ້າຜູ້ໃດ ບໍ່ປະຕິບັດຕາມ ຈະມີການປັບໃໝ.

"ປັຈຈຸບັນການຄ້າຂາຍ ບໍ່ຖືກຣະບຽບຍົກໂຕຢ່າງ ການຂາຍເຄື່ອງຊະຊາຍ ເນາະ ບໍ່ຂາຍນໍາເປັນໄປຕາມຣັຖກຳນົດໃຫ້ ແລ້ວເຂົາເຈົ້າກໍຂາຍ ໃນບ່ອນຕລາດ. ທີ່ວ່າເຮົາກຳນົດໃຫ້ຂາຍ ຂາຍບໍ່ຖືກ ບໍ່ຂາຍໃນຕລາດ ໄປຂາຍຕາມຖນົນ ບ່ອນສາທາຣະນະ ສະຖານທີ່ຣັຖ ບໍ່ໃຫ້ຂາຍ ມີມາຕການຢຶດເຄື່ອງຂອງ."

ທ່ານໄດ້ກ່າວຕື່ມວ່າ ເມື່ອວັນທີ 03 ກັນຍາ 20 ຜ່ານມາ ຜແນກອຸດສາຫະກັມ ແລະການຄ້າ ກໍໄດ້ຈັດກອງປະຊຸມ ປຶກສາຫາລືໃນເຣື່ອງ ດັ່ງກ່າວໂດຍອີງໃສ່ແຜນການຈັດສັນ ຂອງ ນະຄອນຫຼວງວຽງຈັນ ເພື່ອສ້າງຄວາມເປັນຣະບຽບຮຽບຮ້ອຍ ຫຼືໃຫ້ຊາວຄ້າຂາຍເຂົ້າໄປຂາຍ ຕາມຈຸດທີ່ີຣັຖກຳນົດໃຫ້ ເຊັ່ນຕລາດສົດ, ຕລາດກາງຄືນ ເປັນຕົ້ນ ໂດຍບໍ່ໃຫ້ຂາຍ ຕາມແຄມທາງ ຫຼື ສວນສາທາຣະນະ ໃນຂອບເຂດ ນະຄອນຫຼວງ ວຽງຈັນ.

ທີ່ຜ່ານມາທາງການນະຄອນຫຼວງວຽງຈັນ ກໍໄດ້ມີມາຕການຈັດຣະບຽບ ຕາມໂຕເມືອງທີ່ສຳຄັນເຊັ່ນ ເມືອງ ຈັນທະບູຣີ, ສີໂຄດຕະບອງ, ໄຊເຊດຖາ ແລະ ສີສັດຕະນາກ ເພາະເປັນ ຈຸດສຸມຂອງການຄ້າຂາຍ ທັງກາງເວັນ ແລະກາງຄືນ.

ແຕ່ແນວໃດກໍຕາມ ຊາວຄ້າຂາຍຕາມແຄມທາງ ກໍແຍກໄດ້ເປັນສອງປະເພດຄື ຜູ້ທີ່ມີອາຄານ ແລ້ວເປີດຄ້າຂາຍ ແລະ ຜູ້ທຸກຍາກຫາເຊົ້າ ກິນຄໍ່າ ເອົາເຄື່ອງຂອງມາວາງຂາຍຕາມ ຈຸດຊຸມຊົນ ສ່ວນຫຼາຍກຸ່ມເລົ່ານີ້ ຈະຖືກເຈົ້າໜ້າທີ່ ຈັບລົງໂທດ.

ເຕັມຫນ້າ