ໂຮງງານຊິເມັນຂອງຈີນ ຄ້າງຄ່າແຮງ ຄົນງານ

ສຸພັດຕາ
2021-02-25
Share
ໂຮງງານຊິເມັນຂອງຈີນ ຄ້າງຄ່າແຮງ ຄົນງານ ຄົນງານລາວ 100 ປາຍຄົນ ໃນຈໍານວນ 300 ປາຍຄົນ ນັ້ນໄປໂຮມກັນປະທ້ວງ ຢູ່ໜ້າບ້ານພັກຄຸນໝິງ ເພື່ອທວງຖາມເອົາເງິນ ຄ່າແຮງງານ ຈາກ ບໍຣິສັດເກັດທາວລາວ ຈໍາກັດ ຊຶ່ງເປັນຂອງ ນັກລົງທຶນຈີນ
ນັກຂ່າວພົລເມືອງ

ຄົນງານລາວ ຈໍານວນ 300 ປາຍຄົນ ບໍ່ໄດ້ຮັບຄ່າແຮງງານ ຈາກໂຮງງານຊິເມັນຂອງບໍຣິສັດ ເກັດທາວລາວ ຈໍາກັດ ຊຶ່ງເປັນຂອງ ນັກລົງທຶນຈີນ ຕັ້ງຢູ່ບ້ານ ໂພນມະນີ ເຂດນໍ້າຖ້ວມ, ເມືອງນໍ້າບາກ ແຂວງຫຼວງພຣະບາງ ນັບແຕ່ເດືອນ 11 ປີ 2020 ເປັນຕົ້ນມາ.

ຕໍ່ມາໃນມື້ວັນທີ 22 ກຸມພາ 2021 ມີຄົນງານ 100 ປາຍຄົນໃນຈໍານວນ 300 ປາຍຄົນນັ້ນ ໄດ້ໂຮມກັນປະທ້ວງ ຢູ່ໜ້າບ້ານພັກ ຄຸນໝິງເພື່ອທວງຖາມເອົາເງິນຄ່າແຮງງານ ຈາກ ບໍຣິສັດດັ່ງກ່າວ, ດັ່ງຄົນງານຜູ້ນຶ່ງ ທີ່ຢູ່ໃນເຫດການ ເວົ້າກັບວິທຍຸເອເຊັຽເສຣີ ເມື່ອວັນທີ 22 ກຸມພາ ຜ່ານມານີ້ ວ່າ:

“ຖາມເທື່ອໃດກະບໍ່ໄດ້ 2 ເທື່ອ 3 ເທື່ອ. ເທື່ອນີ້ແຫຼະເຕົ້າໂຮມກັນ ເຮັດຈັ່ງໃດແທ້ ເຂົາມີບັນຫາແມ່ນຫຍັງ, ຫົວໜ້າຫັ່ນກະບໍ່ເຫັນ ໜ້າເລີຍ ຈັກເຂົາໄປທາງໃດກະບໍ່ຮູ້, ລະບາດນີ້ ທາງອ້າຍນ້ອງເຂົາກະຮິບໂຮມກັນ ລະກະໄປຖາມເບິ່ງ, ມັນກະຫຼາຍຄົນ 300 ກວ່າຄົນ, ແຕ່ວ່າມັນກະບໍ່ຄົບ ມາປະທ້ວງກະຊິແມ່ນຫມ້ອງ 100 ປາຍກວ່າຄົນນີ້ແຫຼະ, ມາຖາມເບິ່ງ ວ່າເງິນເດືອນ ເດືອນ 11 ຊິເຮັດແນວໃດ ຊິຖາມເຂົາ ເຂົາລະຮ້າຍຂຶ້ນ ເວົ້າຂຶ້ນ ເວົ້າຂຶ້ນ ຈະນັ້ນແຫຼະຄົນຈີນ.”

ຄົນງານຜູ້ນີ້ເວົ້າວ່າ ຕາມປົກກະຕິແລ້ວ ຈະໄດ້ຮັບເງິນຄ່າແຮງງານໃນທຸກໆ ວັນທີ 10 ຂອງເດືອນ, ແຕ່ຕົກມາຮອດເດືອນ 11 ປີ 2020 ທາງບໍຣິສັດ ກໍບອກວ່າ ຈະຈ່າຍເງິນໃຫ້ ໃນວັນທີ 20 ຂອງເດືອນ, ເມື່ອຮອດວັນທີ ທີ່ນັດໝາຍ ພວກຄົນງານ ກໍພາໄປ ຖາມເອົາເງິນຄ່າແຮງງານ ແຕ່ກໍບໍ່ໄດ້ຮັບ:

“ຜ່ານມາກະ ກໍານົດເຂົາແມ່ນວັນທີ່ 10 ເຂົາຈ່າຍ ບາດນີ້ ລະມັນບໍ່ໄດ້ຕາມກໍານົດ ບາງເທື່ອກະວັນທີ 20, ເທື່ອນີ້ ເຂົາເຮັດໄປ ເດືອນ 11 ຫັ້ນໄດ້ 10 ປາຍມື້ແລ້ວ ເຂົາປິດໂຮງງານ ຫັ້ນ, ເຂົາບໍ່ຈ່າຍໂຕນີ້ສະອັນນ່າ ບໍຣິສັດເກັດທາວເດີ້, ເຂົາບໍ່ຈ່າຍເງິນໃຫ້ ກັມມະກອນ 300 ກວ່າຄົນນີ້ແຫຼະ, ເງິນເດືອນນິ່ ມັນກະບໍ່ຫຼາຍ, ສະເພາະເຮັດເດືອນ 11 ມັນໄດ້ 13, 14 ມື້ ກະຖືກຢູ່ປະມານ 1,800,000, 1,900,000 ກີບ ເງິນລາວເຮົານີ້ແຫຼະ.”

ຄົນງານຜູ້ນີ້ ເວົ້າອີກວ່າ ຕົນແລະເພື່ອນຮ່ວມງານຄົນອື່ນໆ ພາກັນທຽວໄປຖາມເອົາເງິນ ຄ່າແຮງງານອີກ 2-3 ເທື່ອ, ແຕ່ກໍບໍ່ໄດ້ ຮັບຈາກນັ້ນຈຶ່ງຕັດສິນໃຈ ຂຽນໃບສເນີ ຫາຂັ້ນເມືອງ, ຫາກະຊວງແຮງງານ ແລະສວັດດີການສັງຄົມ ເພື່ອໃຫ້ຊ່ອຍແກ້ໄຂເຣື່ອງນີ້ໃຫ້ ແລະ ກໍລໍຖ້າ ຈົນຈະເຂົ້າສອງເດືອນແລ້ວ ກໍຍັງບໍ່ມີຫຍັງຄືບໜ້າ ຈຶ່ງພາກັນໄປທ້ວງທວງຖາມເງິນ ຢູ່ໜ້າບ້ານພັກຄຸນໝິງ ທີ່ຄົນຈີນ ຕາງໜ້າຂອງບໍຣິສັດ ເກັດທາວ ພັກຢູ່.

ໂຮງງານຜລິດຊິເມັນແຫ່ງນີ້ ມີສັນຍາສັມປະທານ ທັງໝົດ 3 ປີ, ແຕ່ດໍາເນີນການຜລິດມາໄດ້ 2 ປີ ກັບ 7 ເດືອນ ກໍຢຸດເຊົາໂດຍທີ່ ຄົນງານບໍ່ຮູ້ສາເຫດ ວ່າເປັນຍ້ອນຫຍັງ ຈຶ່ງຢຸດຜລິດ ແລະເງິນຄ່າແຮງງານ ຂອງເດືອນ 11 ປີ 2020 ກໍບໍ່ຈ່າຍໃຫ້ຄົນງານ ທັງ 300 ປາຍຄົນນັ້ນເລີຍ.

ຄົນງານ ທີ່ເຮັດວຽກຢູ່ໂຮງງານດັ່ງກ່າວ ອີກຄົນນຶ່ງເວົ້າວ່າ ປັດຈຸບັນ ກໍາລັງລໍຖ້າ ທາງຄະນະສະເພາະກິຈ ແຂວງຫຼວງພຣະບາງ ມາແກ້ໄຂບັນຫາໂຕນີ້ໃຫ້ຢູ່ ສ່ວນຕົນ ແລະຄົນງານ ອີກຫຼາຍຄົນ ຕ່າງກໍລໍຖ້າຟັງຂ່າວຢູ່ເຮືອນ, ບໍ່ໄດ້ໄປເຮັດວຽກ ໃນໂຮງງານ ດັ່ງກ່າວ ແລ້ວ ຫຼັງຈາກໄດ້ປິດມາຕັ້ງແຕ່ ວັນທີ 15 ພຶສຈິກາ ປີກາຍ, ດັ່ງຄົນງານຜູ້ນີ້ ເວົ້າກັບວິທຍຸ ເອເຊັຽ ເສຣີ ໃນວັນທີ 25 ກຸມພາ ນີ້ວ່າ:

“ທາງໜ່ວຍງານສະເພາະກິຈຂັ້ນແຂວງ ຮອງເຈົ້າແຂວງ ເພິ່ນກະຂຶ້ນມາ ໂອ້ລົມກັບອ້າຍນ້ອງແລ້ວ ວ່າຕອນນີ້ ໃຫ້ລໍຖ້າກ່ອນ, ຂະເຈົ້າ ກໍາລັງໄກ່ເກັ່ຽຢູ່ວ່າຊັ້ນ ບໍ່ໄດ້ເຮັດແລ້ວ ບໍ່ໄດ້ເປີດໂຮງງານ ພວກຂ້ອຍກະໄດ້ຢູ່ຕາມບ້ານຕາມເຮືອນ, ຈັ່ງໄດ້ຖ້າແຫຼະ ສ່ວນເຖົ້າແກ່ແທ້ ຂະເຈົ້າກະບໍ່ໄດ້ ມາຢູ່ນີ້ນະ ກໍາລັງລໍຖ້າ ທາງຣັຖເຂົ້າມາໄກ່ເກັ່ຽ.”

ຄົນງານອີກຄົນນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ໃນໄລຍະທີ່ເຮັດວຽກ ຢູ່ໂຮງງານດັ່ງກ່າວ ຕົນແລະຄົນງານອີກຫຼາຍຄົນ ຮູ້ສຶກບໍ່ພໍໃຈ ກັບການບໍຣິຫານວຽກງານ ຂອງ ນາຍຈ້າງ ທີ່ເປັນຄົນຈີນ ຍ້ອນມີການເວົ້າຈາບໍ່ດີ ໃສ່ຄົນງານລາວ ອີກທັງໃນຫຼາຍເທື່ອ ເງິນເດືອນກໍອອກຊ້າ ເຮັດໃຫ້ກຸ່ມຄົນງານ ຕ້ອງພາກັນໄປປະທ້ວງ ເງິນເດືອນຈຶ່ງອອກ:

“ຫົວໜ້ານິ່ ຢາກໃຊ້ຮູບການແບບວ່າຖຽງເອົາ ໃຊ້ປາກສຽງເອົານ່່າ, ຢາກດຸໜ້ອຍນຶ່ງ ພະນັກງານທີ່ວ່າເຂົ້າມາໃໝ່ນີ້ເບາະ, ເຮັດບໍ່ຖືກ ແບບຫຍັງຂະເຈົ້າກະດ່າ, ເຣື້ອງເງິນເດືອນນີ້ໆ ຍັງຮອດວັນທີ 20 ປາຍ ຫຼືວ່າ ຈົນກວ່າກັມມະກອນ ຕ້ອງໄດ້ໄປປະທ້ວງ ຢູ່ຫ້ອງ ການກັນ ຂະເຈົ້າຈຶ່ງມີຄໍາຕອບໃຫ້ນະ.”

ກ່ຽວກັບເຣື່ອງນີ້ ເຈົ້າໜ້າທີ່ ແຂວງຫຼວງພຣະບາງ ທ່ານນຶ່ງ ທີ່ຂໍສງວນຊື່ແລະສຽງ ຊີ້ແຈງວ່າ:

“ປັດຈຸບັນ ຄະນະກັມມະການ ຊຸດສະເພາະກິຈ ກໍາລັງຫາລືແກ້ໄຂ ບັນຫາດັ່ງກ່າວຢູ່, ຊຶ່ງຮັບປະກັນວ່າ ຄົນງານຈໍານວນດັ່ງກ່າວ ຈະໄດ້ ເງິນເດືອນ ຂອງເດືອນ 11 ນັ້ນ ຢ່າງແນ່ນອນ, ແຕ່ໃນໄລຍະນີ້ ຂໍໃຫ້ຍຸຕິການປະທ້ວງຢູ່ໂຮງງານ.”

ສ່ວນຣາຍລະອຽດອື່ນໆ ເພີ້ມຕື່ມ ທ່ານຍັງບໍ່ສາມາດ ໃຫ້ຫຼາຍກວ່ານີ້ໄດ້. ກ່ຽວກັບບັນຫາດັ່ງກ່າວນີ້ ວິທຍຸເອເຊັຽເສຣີ ໄດ້ພຍາຍາມ ຕິດຕໍ່ຫາ ບໍຣິສັດເກັດທາວລາວ ຈໍາກັດ ຫຼາຍຄັ້ງ ໂທຕິດສຽງດັງ, ແຕ່ປະກົດວ່າ ບໍ່ມີຜູ້ໃດຮັບສາຍ.

ໃນມື້ວັນ ວັນທີ 22 ກຸມພາ ຜ່ານມານີ້ ມີຜູ້ປະທ້ວງຜູ້ນຶ່ງ ໄດ້ໂພສ ວິດິໂອ ລົງທາງເຟສບຸຄ ແລະ 6-7 ຊົ່ວໂມງຕໍ່ມາ ວິດິໂອນັ້ນ ກໍຖືກລຶບອອກຈາກເຟສບຸຄ, ແຕ່ຕາມທີ່ເຮົາສັງເກດ ເຫັນໃນວິດິໂອນັ້ນມີ:

1-/ ຕາມທີ່ສັງເຫັນໃນວິດິໂອ ມີຄົນງານມາຢູ່ໂຮມກັນ ປະມານ 100 ຄົນ ຢືນຢູ່ຕໍ່ໜ້າຕຶກ ບ່ອນທີ່ຄົນຈີນ ຊຶ່ງເປັນພະນັກງານ ແລະ ຜູ້ຕາງໜ້າຂອງບໍຣິສັດ ເກັດທາວລາວ ພັກອາສັຍຢູ່ ເພື່ອມາທວງຖາມ ເອົາເງິນຄ່າແຮງງານ ທີ່ທາງບໍຣິສັດ ດັ່ງກ່າວ.

2-/ ຄົນງານຈໍານວນນຶ່ງ ໄດ້ເຂົ້າຫ້ອງການ ເພື່ອພົບກັບຄົນຈີນ ທີ່ເປັນຜູ້ຕາງໜ້າຂອງບໍຣິສັດ ຈາກນັ້ນ ກໍມີການຜິດຖຽງກັນເຣື່ອງ ເງິນຄ່າແຮງງານເກີດຂຶ້ນ, ດັ່ງຜູ້ປະທ້ວງຜູ້ນຶ່ງ ໄດ້ເວົ້າໃນວິດິໂອ ນັ້ນວ່າ:

“ສື່ເຈັຍ ເຣື່ອງນີ້ ສຸເຈົ້າ ຊິຄວນປຶກສາປະທານເຈົ້າ ຕັ້ງແຕ່ເດືອນ 11 ພຸ້ນແລ້ວ, ເຈົ້າສິປຶຶກສາ ປະທານເຈົ້ານ່າ, ເຈົ້າສິມາແກ້ໂຕ ແບບນີ້ບໍ່ໄດ້, ສຸເຈົ້າບໍ່ຄຶດເຫັນອ້າຍນ້ອງແດ່ຫວະ ເຂົາເຮັດວຽກໃຫ້ສຸເຈົ້າ ນີ້ເໝິດເດືອນນະ, ເງິນແຮງງານເຂົາອັນນີ້ນະ ບໍ່ແມ່ນເຂົາ ມາຂໍເຈົ້າລ້າໃດ໋, ອັນນີ້ ອ້າຍນ້ອງມາຖາມເງິນ ລະຢາກໂວຍວາຍອ້າຍນ້ອງຕລອດ.”

ໃນຂນະດຽວກັນ ຜູ້ປະທ້ວງອີກຜູ້ນຶ່ງ ທີ່ລໍຖ້າເງິນເດືອນ ມາດົນນັ້ນ ກໍເວົ້າຂຶ້ນມາວ່າ:

“ຄັນບໍ່ໄດ້ເງິນລະບໍ່ເມືອ ອັນນີ້ນະ ຢູ່ນີ້, ມີ ບໍ່ມີກະແມ່ນໜ້າທີ່, ຈັກເດືອນແລ້ວ ຢູ່ນີ້ນ່າ.”

ໃນຕອນທີ່ລົມກັນຢູ່ນັ້ນ ຄົນຈີນຜູ້ນຶ່ງ ທີ່ໄດ້ພາສາລາວແດ່ ກໍເວົ້າວ່າ:

ຄົນຈີນຜູ້ນີ້ ເວົ້າວ່າ “ລາວວ່າ ລາວບໍ່ມີເງິນ ໂອເຄ ລາວບໍ່ມີເງິນ, ລາວວ່າ ລາວໂທຫາປະທານໂຮງງານແລ້ວແລ້ວ, ບໍ່ແມ່ນ ລາວບໍ່ໂທ.”

ຢ່າງໃດກໍຕາມ, ຕາມທີ່ເອເຊັຽເສຣີ ໄດ້ລົມນໍາຄົນງານລາວ ທີ່ຢູ່ໃນເຫດການປະທ້ວງ ໃນມື້ນັ້ນແລ້ວແມ່ນວ່າ: ໃນທີ່ເວລາທີ່ຖົກຖຽງ ກັນນັ້ນ ຊຶ່ງບໍ່ສາມາດຕົກລົງກັນໄດ້ ຕໍ່ມາບໍ່ດົນ ເຈົ້າໜ້າທີ່ ປກສ ແລະນາຍບ້ານ ກໍເຂົ້າໄປຫ້າມ ເພື່ອບໍ່ຢາກໃຫ້ມີສຽງເນືອງນັນ, ທາງບ້ານ ແລະ ພາກສ່ວນກ່ຽວຂ້ອງ ເລີຍບອກກັບຄົນງານ ເຫຼົ່ານັ້ນວ່າ ຈະຊ່ອຍແກ້ໄຂເຣື່ອງນີ້ໃຫ້ ແລະຄົນງານ ທັງໝົດ ກໍແຍກຍ້າຍກັນກັບເມືອບ້ານ.

ໃນກໍຣະນີຄວາມຂັດແຍ້ງ ເຣື່ອງຄ່່າແຮງງານໃນເທື່ອນີ້ ກໍຫວັງ ວ່າທາງເຈົ້າຂອງໂຮງງານ ແລະ ພາກສ່ວນກ່ຽວຂ້ອງ ຈະໄກ່ເກັ່ຽ ໃຫ້ຄວາມເປັນທັມ ແກ່ໃຫ້ຄົນງານລາວ ຈໍານວນນີ້.

Anonymous says:
Feb 28, 2021 09:39 PM

ກຳມະບານລາວ ສະຫລອງຄົບຮອບ 65 ປີ ໂດຍໄດ້ມີການເຕີບໃຫຍ່ຂະຫຍາຍຕົວມາເປັນກ້າວໆ ແລະ ກຳມະບານໃນທຸກກະຊວງທະບວງກົມ ກໍເປັນເສນາທິການ ໃຫ້ແກ່ກຳມະບານລາວ. ພ້ອມດຽວກັນນັ້ນ ຊົນຊັ້ນກຳມະກອນ ແລະ ຊາວຜູ້ອອກແຮງງານລາວກໍໄດ້ປະກອບສ່ວນເຂົ້າໃນການສ້າງສາພັດທະນາປະເທດຊາດ ວ່າຊັ້ນ ຕາມເພິ່ນວ່າ. ແຕ່ກັມມະກອນ ແລະ ຊົນຊັ້ນຊາວຜູ້ອອກແຮງງານ ຍັງຖືກກົດຂີ່ຂົມເຫັງ ເອົາລັດເອົາປຽບຈາກ ນາຍຈ້າງ, ພະນັກງານ ຊັ້ນຜູ້ນ້ອຍ ຍັງຖືກເອົາລັດເອົາປຽບ ຈາກຜູ້ທີ່ມີຫນ້າທີ່ຕຳແໜ່ງຢູ່ຕໍ່ມາ ເປັນເວລາ 40 ກ່ວາປີແລ້ວ ກໍຍັງບໍ່ເຫັນ ມີທ່າທີ່ ທີ່ດີຂຶ້ນ, ຊ້ຳບໍ່ຫນ້ຳ ຍິ່ງຖືກກົດຂີ່ຫລາຍກ່ວາເກົ່າ. ກຳມະກອນ ໃນໂຮງຈັກໂຮງງານ ຂອງຊາວຕ່າງຊາດ ໂດຍສະເພາະຈີນແລະວຽດນາມ ກໍຍິ່ງຖືກເອົາປຽບ ເປັນຕົ້ນແມ່ນ ບໍ່ຈ່າຍເງິນເດືອນຕາມເວລາ ສໍ້ໂກງຄ່າເງິນເດືອນ ຖືກບັງຄັບເຮັດວຽກ ເກີນເວລາ ກຳມະກອນ ໃນສວຍກ້ວຍຈີນ ເກີດເປັນຕຸ່ມທົ່ວຕົນໂຕ ຍ້ອນຖືກສານເຄມີ ຫາຍໃຈເອົາສານເຄມີເຂົ້າປອດ ອາດກໍ່ໃຫ້ເກີດ ເປັນມະເລງໄດ້ ແຕ່ກໍບໍ່ເຫັນ ກຳມະບານ ເອົາຫົວໃສ່ໃຈຊາຫຍັງ ທັ້ງໆທີ່ຮູ້ຢູ່ວ່າ ກຳມະກອນ ໄດ້ຮັບຄວາມເດືອດຮ້ອນ ແລະ ບໍ່ເປັນທຳ. ສື່ສັງຄົມ ກໍ່ອອກຢູ່ເລື້ອຍໆ ແຕ່ກໍາມະບານ ຍັງເຫັນບໍ່ຮູ້ບໍ່ເຫັນບໍ່ຈັກ ບັດຊິເຫັນ ເຫັນແຕ່ເງິນ ກ້ອງໂຕະ. ບັດເວລາ ສະຫລອງຄົບຮອບ ມີແຕ່ຜູ້ໃສ່ຫລຽນກາຄຳຊອບໂອ້ອວດ ມີແຕ່ມອບໃບຍ້ອງຍໍກັນ ເບີກບານມ່ວນຊື່ນ. ຫວັງວ່າ ລັດຖະບານຊຸດໃໝ່ ຈະເອົາໃຈໃສ່ ຊ່ວຍເຫລືອປະຊາຊົນ ແລະ ກຳມະກອນ ຜູ້ເປັນຊົນຊັ້ນກຳມະຊີບ ທີ່ແທ້ຈິງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ