ໂຕແທນ ຂາຍປີເຮືອບິນ ສວຍໂອກາດ ຂຶ້ນລາຄາ
2021.11.12
ກຸ່ມນັກສຶກສາລາວ ທີ່ກໍາລັງຈະເດີນທາງໄປຮຽນຕໍ່ທີ່ປະເທດຈີນ ເມື່ອວັນທີ່ 10 ພຶສຈິກາ ທີ່ຜ່ານມານີ້ ຕ້ອງພົບກັບບັນຫາ ລາຄາປີ້ເຮືອບິນແພງຫຼາຍ ຈົນບໍ່ສາມາດຊື້ໄດ້ ເປັນຍ້ອນ ບໍຣິສັດໂຕແທນຈຳໜ່າຍປີ້ເຮືອບິນນັ້ນ ສວຍໂອກາດປັບຂຶ້ນລາຄາປີ້ເຮືອບິນ ຈາກນະຄອນຫຼວງວຽງຈັນ ໄປເມືອງຄຸນໝິງ ປະເທດຈີນ ຂຶ້ນເປັນ 3,500 ໂດລາຣ໌ສະຫະຣັດ ຕໍ່ບ່ອນນັ່ງ ຈາກແຕ່ກ່ອນທີ່ມີລາຄາຢູ່ທີ່ປະມານ 481 ໂດລາຣ໌ສະຫະຣັດ ຕໍ່ບ່ອນນັ່ງ, ດັ່ງນັກວິຊາການ ດ້ານການບິນ ທ່ານນຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ່ 11 ພຶສຈິກາ 2021 ນີ້ວ່າ:
“ສ່ວນຫຼັກໆ ກໍຊິເປັນຍ້ອນໂຕແທນຈຳໜ່າຍ ທີ່ເພິ່ນປັບລາຄາຂຶ້ນຫຼາຍໂພດຫັ່ນນ່າ ແຕ່ວ່າສາຍການບິນຂະເຈົ້າ ກໍຈະມີຫັ້ນນ່າເພດານລາຄາໃຫ້ເນາະ ແຕ່ວ່າກໍຈະເອົາໄປຂາຍຢູ່ນອກ ອາຈແບບວ່າ ລາຄາອາຈບໍ່ຕົງ ສຳລັບກຸ່ມນັກສຶກສາ ທີ່ຕ້ອງການຢາກຈະໄປຮຽນຕໍ່ຢູ່ຈີນເນາະ ແລ້ວບາດນີ້ຂະເຈົ້າກໍບໍ່ສາມາດຈ່າຍໄດ້ເນາະ ມັນທົບເຄິ່ງຫັ້ນນ່າ.”
ນັກສຶກສາລາວຈຳນວນນຶ່ງ ທີ່ຕ້ອງການເດີນທາງໄປຮຽນຕໍ່ທີ່ປະເທດຈີນ ໃນໄລຍະເປີດສົກການສຶກສາໃໝ່ດັ່ງກ່າວນີ້ ບໍ່ສາມາດເດີນທາງໄປໄດ້ ຍ້ອນພວກເຂົາເຈົ້າບໍ່ມີເງິນພຽງພໍ ທີ່ຈະຊື້ປີ້ເຮືອບິນ ເນື່ອງຈາກ ປີ້ເຮືອບິນມີລາຄາແພງຂຶ້ນຫຼາຍໂພດ, ດັ່ງນັກສຶກສາ ນາງນຶ່ງ ກ່າວໃນມື້ດຽວກັນນີ້ວ່າ:
“ກໍວ່າແກ້ໄຂໄດ້ຊິນ່າ ກໍຢາກໃຫ້ເພິ່ນຜ່ອນຄ່າປີ້ຍົນລົງແນ່ຫັ້ນນ່າ ສົມມຸດວ່າ ເຮົາກໍເຮັດເງິນເດືອນເນາະ 5 ລ້ານກີບ ແຕ່ວ່າປີ້ຍົນຫັ້ນນ່າ ໄປເທື່ອນຶ່ງຫັ້ນ່າ 10 ປາຍລ້ານກີບ ຄົນແບບເຮັດວຽກດ້ວຍເຫື່ອແຮງຊີ້ນ່າ ບາງຄົນກໍມີແຕ່ 1 ລ້ານກີບບໍ 2 ລ້ານກີບຊີ້ນ່າ ເຮັດວຽກຈັກປີ ກວ່າຊິໄດ້ເງິນຄ່າປີ້ຍົນ.”
ສາເຫດທີ່ເຮັດໃຫ້ບໍຣິສັດເອກຊົນ ທີ່ດຳເນີນກິຈການຂາຍປີ້ເຮືອບິນ ຢູ່ພາຍໃນປະເທດລາວ ສາມາດປັບຂຶ້ນລາຄາປີ້ເຮືອບິນໄດ້ສູງນັ້ນເປັນຍ້ອນວ່າ ທາງຣັຖວິສາຫະກິຈການບິນລາວ ໄດ້ຂາຍປີ້ເຮືອບິນໃນເສັ້ນທາງການບິນ ຈາກນະຄອນຫຼວງວຽງຈັນ ໄປຍັງເມືອງຄຸນໝິງ ປະເທດຈີນ ໃຫ້ກັບບໍຣິສັດໂຕແທນຈຳໜ່າຍປີ້ນັ້ນ ທັງໝົດແລ້ວ, ດັ່ງເຈົ້າຂອງບໍຣິສັດຈຳໜ່າຍປີ້ເຮືອບິນ ນາງນຶ່ງ ກ່າວວ່າ:
“ເພາະວ່າ ຮູ້ສຶກວ່າ ການບິນລາວ ຂະເຈົ້າເອົາບ່ອນນັ່ງໃຫ້ເອເຈັ້ນນ່າ ແບບວ່າ ການບິນລາວ ຂະເຈົ້າຊື້ເອົາໂຄຕ້າໃຫ້ເອເຈັ້ນຂາຍນ່າ ການບິນລາວວ່າຊັ້ນຫັ້ນນ່າ ສົມມຸດວ່າເຫັນຂາຍເກີນ ການບິນລາວຊິຕັດອອກ ບໍ່ສົ່ງປີ້ຍົນໃຫ້.”
ແນວໃດກໍຕາມ ເຖິງແມ່ນວ່າຣັຖວິສາຫະກິຈການບິນລາວ ຈະອອກຂໍ້ກຳນົດ ບໍ່ໃຫ້ບໍຣິສັດໂຕແທນຈຳໜ່າຍ ຂາຍປີ້ເຮືອບິນເກີນລາຄາ 20% ຈາກລາຄາຂາຍປີ້ປົກກະຕິກໍຕາມ ແຕ່ທີ່ຜ່ານມາ ກໍຍັງພົບວ່າ ມີບໍຣິສັດໂຕແທນຈຳໜ່າຍຈຳນວນນຶ່ງ ພຍາຍາມຊື້ປີ້ເຮືອບິນໄວ້ ເພື່ອນຳມາຂາຍຕໍ່ໃນລາຄາທີ່ແພງກວ່າ ຣັຖວິສາຫະກິຈການບິນລາວກຳນົດ, ດັ່ງເຈົ້າຂອງບໍຣິສັດ ຈຳໜ່າຍປີ້ເຮືອບິນ ອີກນາງນຶ່ງ ກ່າວວ່າ:
“ຖ້າເປັນວຽງຈັນ ຫາຄຸນໝິງ ແມ່ນຂອງເຮົາໂດຍສະເພາະ ເຮົາບໍ່ໄດ້ເອົາຕໍ່ ຂາຍລາຄາມັນກໍຈະຖືກ ມີໂຕແທນເນາະ ໄປເອົາກັບສູນການບິນເລີຍ ໂດຍຕົງເລີຍຈະໄດ້ຖືກ ຂຶ້ນກັບໂຕແທນຫັ້ນ ແຕ່ລະບ່ອນກໍບໍ່ໄດ້ຄືກັນນ່າ ໂຕແທນບາງທີ່ຂະເຈົ້າຊື້ໄວ້ ຂາຍຕໍ່ລາຄາມັນກໍເລີຍສູງ.”
ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ໄປຍັງຣັຖວິສາຫະກິຈການບິນລາວ ແລະກົມການບິນພົລເຮືອນ ກະຊວງໂຍທາທິການແລະຂົນສົ່ງ ເພື່ອສອບຖາມເຖິງສາເຫດ ແລະ ແນວທາງໃນການແກ້ໄຂບ້ານຫາທີ່ເກີດຂຶ້ນ ແຕ່ເຈົ້າໜ້າທີ່ປະຈຳໜ່ວຍງານດັ່ງກ່າວ ບໍ່ສະດວກໃຫ້ສັມພາດ.
ຢ່າງໃດກໍຕາມ ຣັຖວິສາຫະກິຈການບິນລາວ ໄດ້ອອກແຈ້ງການ ໃນວັນທີ່ 11 ພຶສຈິກາ ນີ້ວ່າ ບໍ່ອະນຸຍາດໃຫ້ບໍຣິສັດໂຕແທນ ຫຼືໜ່ວຍງານທີ່ກ່ຽວຂ້ອງຂາຍປີ້ເຮືອບິນ ຂອງການບິນລາວ ໃນເສັ້ນທາງນະຄອນຫຼວງວຽງຈັນ ຫາເມືອງຄຸນໝິງ ຂອງຈີນ ຫຼາຍກວ່າ 20% ຈາກລາຄາປົກກະຕິ ຫາກບໍຣິສັດໂຕແທນໃດ ຂາຍປີ້ເຮືອບິນເກີນລາຄາທີ່ກຳນົດ ແມ່ນຈະບໍ່ໄດ້ຮັບສິດ ເປັນໂຕແທນໃນການຈຳໜ່າຍປີ້ເຮືອບິນ ຂອງການບິນລາວອີກ.
ໃນຂະນະດຽວກັນ ກໍມີນັກສຶກສາລາວອີກຈຳນວນນຶ່ງ ທີ່ຍັງບໍ່ຕ້ອງການເດີນທາງໄປປະເທດຈີນ ໃນໄລຍະມໍ່ໆນີ້ ຍ້ອນວ່າ ເມື່ອເດີນທາງໄປຮອດປະເທດຈີນແລ້ວ ຈະຕ້ອງໄດ້ຈ່າຍຄ່າໂຮງແຮມສຳລັບກັກໂຕ ຕາມມາຕການປ້ອງກັນໂຄວິດ-19 ຂອງທາງການຈີນ ເປັນໄລຍະເວລາປະມານ 21 ມື້ຕື່ມອີກ, ດັ່ງນັກສຶກສາລາວ ນາງນຶ່ງ ກ່າວວ່າ:
“ບໍ່ແນ່ໃຈເດີ້ວ່າເທົ່າໃດ ເພາະວ່າແຕ່ລະຄົນ ມັນເລືອກໂຮງແຮມບໍ່ຄືກັນ ເພາະວ່າມີໝູ່ຂ້ອຍຄົນຈີນ ທີ່ກັບໄປຫວ່າງອາທິດທີ່ຜ່ານນີ້ ຂະເຈົ້າໄດ້ເສັຽຊື້ປີ້ຍົນ ແລະກໍໄດ້ເສັຽຄ່າໂຮງແຮມ ຣັຖບານຂະເຈົ້າຈະໃຫ້ຈ່າຍເປັນຣະບົບ 21 ມື້ ເພາະວ່າກຳນົດເຂົາ ແມ່ນເຂົ້າບ້ານເຂົ້າ ແມ່ນກັກ 21 ມື້.”
ສຳລັບແນວທາງໃນການແກ້ໄຂບັນຫາ ທີ່ບໍຣິສັດໂຕແທນ ຂາຍປີ້ເຮືອບິນແພງເກີນລາຄາທີ່ກຳນົດນັ້ນ ທາງນັກວິຊາການດ້ານການບິນ ໄດ້ສເນີໃຫ້ກົມການບິນພົລເຮືອນ ກະຊວງໂຍທາທິການແລະຂົນສົ່ງ ຄວນລົງກວດກາ ລາຄາປີ້ເຮືອບິນຕາມສະພາບໂຕຈິງ ຈາກໂຕແທນຈຳໜ່າຍປີ້ເຮືອບິນ ໂດຍສະເພາະ ບໍຣິສັດຂອງຈີນ ທີ່ມັກຂາຍປີ້ເຮືອບິນແພງກວ່າໝູ່ ແລະຄວນເລັ່ງດຳເນີນການແກ້ໄຂບັນຫາລາຄາປີ້ເຮືອບິນ ຈາກນະຄອນຫຼວງວຽງຈັນ ຫາເມືອງຄຸນໝິງ ຂອງຈີນແພງນີ້ ຈົນເຮັດໃຫ້ຜູ້ໂດຍສານ ທີ່ຕ້ອງການເດີນທາງແທ້ໆ ບໍ່ສາມາດຊື້ປີ້ເຮືອບິນໄດ້ ອີກທັງ ກໍຄວນຕັ້ງເພດານລາຄາປີ້ເຮືອບິນສູງສຸດ ທີ່ບໍຣິສັດໂຕແທນສາມາດຂາຍໄດ້ ແລະຫາກບໍຣິສັດໂຕແທນໃດຂາຍເກີນລາຄາດັ່ງກ່າວ ຈະຕ້ອງຖືກພິຈາຣະນາ ແລະຖອນເອກສານສິດໃນການຂາຍປີ້ເຮືອບິນນັ້ນເລີຍ.
ເມື່ອທ້າຍປີ 2020 ຜູ້ອໍານວຍການຝ່າຍການຕລາດ ຂອງສາຍການບິນ Lao air Line ກ່າວວ່າ ທາງສາຍການບິນ ຈຳເປັນຕ້ອງໄດ້ຢຸດໃຫ້ບໍຣິການ ເສັ້ນທາງການບິນລະຫວ່າງປະເທດທຸກເສັ້ນທາງເປັນການຊົ່ວຄາວ ນັບຕັ້ງແຕ່ວັນທີ່ 23 ມົກກະຣາ 2021 ເປັນຕົ້ນໄປ ເພື່ອປ້ອງກັນການແຜ່ຣະບາດຂອງເຊື້ອໂຄວິດ-19 ຕາມຄຳສັ່ງຂອງຄະນະກັມມະການຣະດັບຊາດ ວ່າດ້ວຍການປ້ອງກັນ ແລະຄວບຄຸມການແຜ່ຣະບາດຂອງເຊື້ອໂຄວິດ-19, ແຕ່ຢ່າງໃດກໍຕາມ ເສັ້ນທາງການບິນ ລະຫວ່າງ ນະຄອນຫຼວງວຽງຈັນ ໄປເມືອງຄຸນໝິງຂອງຈີນນັ້ນ ຍັງເປີດໃຫ້ບໍຣິການຕາມປົກກະຕິ ສັປດາ ລະ 2 ຖ້ຽວ ຄືວັນພະຫັດ ແລະວັນອາທິດ.