ຄົນຈີນເຂົ້າມາທ່ຽວ ຫຼວງພຣະບາງຫຼາຍຂຶ້ນ ແຕ່ຄົນລາວໄດ້ປະໂຫຍດໜ້ອຍລົງ

ເມື່ອວັນທີ 22 ກັນຍາ ທີ່ຜ່ານມານີ້ ຄະນະນັກທ່ອງທ່ຽວຊາວຈີນ ຈໍານວນຫລາຍຮ້ອຍຄົນ ໄດ້ຫລັ່ງໄຫລເຂົ້າມາທ່ຽວ ຫລວງພຣະບາງ ໂດຍເດີນທາງມາກັບລົດໄຟລາວ-ຈີນ ພາຍຫລັງທີ່ ສະພາບນ້ໍາຖ້ວມ ຢູ່ແຂວງຫລວງພຣະບາງ ມີສະພາບເປັນປົກກະຕິ, ແຕ່ນັກທ່ອງທ່ຽວຈີນ ທີ່ເຂົ້າມານັ້ນ ສ່ວນໃຫຍ່ກໍຍັງອຸດໜູນ ແລະໃຊ້ບໍລິການແຕ່ທຸລະກິດ ຂອງນັກລົງທຶນຈີນ ຢູ່ຄືເກົ່າ ເນື່ອງຈາກຮູ້ພາສາຈີນນໍາກັນ ເຮັດໃຫ້ ຜູ້ປະກອບການຊາວລາວ ບໍ່ໄດ້ລາຍໄດ້ ຈາກນັກທ່ອງທ່ຽວຈີນເຫລົ່ານັ້ນ, ດັ່ງ ພະນັກງານໂຮງແຮມແຫ່ງນຶ່ງ ໃນເຂດນະຄອນຫລວງພຣະບາງ ກ່າວຕໍ່ວິທຍຸ ເອເຊັຽເສຣີ ໃນວັນທີ 24 ກັນຍານີ້ວ່າ:

“ບໍ່ມີເລີຍ ເຂົ້າແຕ່ໂຮງແຮມຈີນ ເຈົ້າ ເຂົາເຈົ້າໃຫ້ເຊົ່າຫລາຍ ເຈົ້າ ເຂົາເຈົ້າມາກະຫລາຍຢູ່ ແຕ່ວ່າເຂົາເຈົ້າມາເຊົ່າຫລາຍເນາະ ເຂົາເຈົ້າກະໄປພັກແຕ່ໂຮງແຮມຈີນ ເພາະວ່າເຂົາເຈົ້າຮູ້ພາສາກັນເດ້ເນາະ.” 

ໃນຂະນະດຽວກັນ ຜູ້ປະກອບການໂຮງແຮມ ອີກແຫ່ງນຶ່ງ ໃນນັກຄອນຫລວງພຣະບາງ ກໍເຫັນວ່າ ນັກທ່ອງທ່ຽວຈີນ ບໍ່ໄດ້ມາພັກເຊົາ ຢູ່ໂຮງແຮມຂອງທ່ານ ແລະໂຮງແຮມຂອງຄົນລາວອື່ນໆ ເຊິ່ງນັກທ່ອງທ່ຽວຈີນ ກໍມັກໄປພັກເຊົາຢູ່ແຕ່ໂຮງແຮມຂອງນັກລົງທຶນຈີນ ຫລື ແມ່ນແຕ່ກິນເຂົ້າ ກໍກິນແຕ່ຢູ່ຮ້ານອາຫານຈີນ ເນື່ອງຈາກ ພວກເຂົ້າເຈົ້າມີເຄືອຂ່າຍນໍາກັນ ດັ່ງນັ້ນ ຈຶ່ງເປັນເລື້ອງຍາກ ທີ່ຜູ້ປະກອບການທ່ອງທ່ຽວຊາວລາວ ຈະມີລາຍໄດ້ຫລາຍຈາກນັກທ່ອງທ່ຽວຈີນ, ດັ່ງ ທ່ານກ່າວວ່າ:

“ໂອ ຄົນຈີນມາຫລາຍ 3 ມື້ ຫລັງນີ້ ໂອ ໂຮງແຮມຂ້ອຍບໍ່ມີຄົນຈີນ ຂອງຈີນເຂົາມີບ້ານພັກຈີນຕ່າງຫາກ ຈີນໄປໂຮງແຮມຈີນ ໄກ້ນໍາທ່ຽວ ໜ້າຈະມີເຄືອຂ່າຍນໍາເຂົາເຈົ້າ ມັນມີຮ້ານອາຫານຈີນ ໂຮງແຮມຈີນ ສ່ວນຫລາຍ ເຂົາບໍລິການກັນເອງ.” 

ທາງດ້ານຜູ້ປະກອບການຮ້ານອາຫານ ແຫ່ງນຶ່ງ ຢູ່ນະຄອນຫລວງພຣະບາງ ກໍເຫັນວ່າ ນັກທ່ອງທ່ຽວຈີນ ທີ່ເຂົ້າມາທ່ຽວນັ້ນ ກໍມັກໄປກິນອາຫານ ຢູ່ແຕ່ຮ້ານອາຫານຂອງຄົນຈີນ ທີ່ຕັ້ງຢູ່ໃນນະຄອນຫລວງພຣະບາງ ເຊິ່ງບໍ່ແຕກຕ່າງຫຍັງກັບສ້າງເມັດເງິນ ໃຫ້ແກ່ຄົນຈີນນໍາກັນ ແທນທີ່ຈະສ້າງລາຍໄດ້ ໃຫ້ແກ່ ຜູ້ປະກອບການຄົນລາວ ໃນຖານະເຈົ້າຂອງປະເທດ, ດັ່ງ ທ່ານກ່າວວ່າ:

“ຈີນບໍ່ຄ່ອຍຫລາຍ ຄົນຈີນບໍ່ຄ່ອຍມາ ມາ ກະມາໜ້ອຍ ແມ່ນເຂົາເຈົ້າໄປຮ້ານຈີນຢູ່ຫັ້ນ ຄ້າຍໆກັນ ທົວຣ໌ສູນບາດຫັ້ນແຫລະ ເພິ່ນຈະມີຮ້ານຂອງຈີນຕ່າງຫາກຮຽບຮ້ອຍແລ້ວ ເຂົາເຈົ້າພາກັນໄປ.” 

ບໍ່ພຽງແຕ່ເທົ່ານັ້ນ ການເຂົ້າມາຂອງນັກທ່ອງທ່ຽວຈີນ ຈໍານວນຫລາຍ ກໍໄດ້ສ້າງຄວາມໜັກໃຈ ແກ່ຜູ້ປະກອບການທ່ອງທ່ຽວ ຈໍານວນນຶ່ງ ໃນເເຂວງຫລວງພຣະບາງ ເປັນຕົ້ນວ່າ ຄັນຄົນຈີນແຫ່ກັນມາທ່ຽວຫລາຍ ກໍເຮັດໃຫ້ນັກທ່ອງທ່ຽວ ຈາກປະເທດອື່ນໆ ບໍ່ຢາກເຂົ້າມາຍາດແຍ່ງ ກັບນັກທ່ອງທ່ຽວຄົນຈີນ ລວມທັງນັກທ່ອງທ່ຽວຈີນ ຈໍານວນບໍ່ໜ້ອຍ ກໍມັກຖີ້ມຂີ້ເຫຍື້ອ ຕາມສະຖານທີ່ຕ່າງໆ ແລະ ກໍສົ່ງສຽງດັງ ເນືອງນັນ, ດັ່ງ ຜູ້ປະກອບການທ່ອງທ່ຽວ ທ່ານນຶ່ງ ກ່າວວ່າ:

“ເລື້ອງລາຍຮັບນີ້ກະໄດ້ ແຕ່ວ່າເຂົາເຈົ້າມາຫລາຍເກີນໄປ ແລ້ວມັກແອອັດ ຄືເຮົາຮູ້ນໍາກັນເນາະ ຈີນກັບຝຣັ່ງ ເຂົາເຈົ້າບໍ່ມັກກັນ ຖ້າຈີນຫລາຍ ຝຣັ່ງກໍບໍ່ມາຫັ້ນນ່າ ເລຶື້ອງຂີ້ເຫຍື້ອ ເຂົາເຈົ້າບໍ່ເປັນເຈົ້າການ ແລ້ວກໍສຽງເນືອງນັນ.” 

ແຕ່ເຖິງຢ່າງໃດກໍຕາມ ການເຂົ້າມາຫລາຍ ຂອງນັກທ່ອງທ່ຽວຈີນ ກໍເຮັດໃຫ້ຜູ້ປະກອບການລາວຈໍານວນນຶ່ງ ມີລາຍໄດ້ ໂດຍສະເພາະ ຜູ້ປະກອບການລົດຕູ້ ແລະ ລົດໂດຍສານ ເນື່ອງຈາກວ່າບໍ່ມີລົດຕູ້ ຫລື ລົດໂດຍສານ ຈາກປະເທດຈີນເຂົ້າມາເປີດຢູ່ໃນລາວ ຈຶ່ງເຮັດໃຫ້ ກຸ່ມນັກທ່ອງທ່ຽວຈີນ ຈໍາເປັນຕ້ອງໃຊ້ບໍລິການລົດໂດຍສານ ຂອງຄົນລາວ ແບບຫລີກລ້ຽງບໍ່ໄດ້, ດັ່ງຜູ້ປະກອບການລົດຕູ້ນໍາທ່ຽວ ຢູ່ນະຄອນຫລວງພຣະບາງ ທ່ານນຶ່ງກ່າວວ່າ:

“ມາລົດໄຟ ມັນກະໃຊ້ໄປໝົດຫັ້ນແຫລະ ເລື້ອງລົດເລື້ອງຫຍັງ ກະໃຊ້ຂອງຄົນລາວໝົດຫັ້ນແຫລະ ລົດຢູ່ທາງລາວເຮົາ ກະໃຊ້ລົດລາວເຮົາ ຈະບໍ່ໃຫ້ລົດຈີນ ມາສາມາດເປີດບໍລິສັດລົດໄດ້.”

ກ່ຽວກັບເລື້ອງນີ້ ວິທຍຸ ເອເຊັຽເສຣີ ໄດ້ຕິດຕໍ່ໄປຫາ ຜະແນກຖະແຫລ່ງຂ່າວ ວັດທະນາທຳ ແລະ ທ່ອງທ່ຽວ ເພື່ອສອບຖາມລາຍລະອຽດເພີ່ມຕື່ມ ເຊິ່ງເຈົ້າໜ້າທີ່ ທ່ານນຶ່ງ ກ່າວພຽງແຕ່ວ່າ ສໍາລັບການເຂົ້າມາຂອງນັກທ່ອງທ່ຽວຈີນນັ້ນ ທາງເຈົ້າໜ້າທີ່ຕິດຕາມຢູ່ເລື້ອຍໆ ສ່ວນປະເດັ່ນທີ່ວ່າ ພວກເຂົາເຈົ້າມັກໃຊ້ບໍລິການ ແຕ່ທຸລະກິດຂອງຄົນຈີນນໍາກັນນັ້ນ ກໍກໍາລັງມີການຕິດຕາມຢູ່ເຊັ່ນກັນ ແຕ່ຍັງບໍ່ສາມາດ ໃຫ້ຄໍາເຫັນໄດ້ເທື່ອ.

ເຖິງຢ່າງໃດກໍຕາມ ໃນໄລຍະບຸນປີໃໝ່ 2024 ນັກທ່ອງທ່ຽວຈີນ ໄດ້ເຂົ້າມາທ່ຽວ ແຂວງຫລວງພຣະບາງ ຈໍານວນປະມານ 10,500 ຄົນ ແລະ ກໍຫລັ່ງໄຫລເຂົ້າມາເລື້ອຍໆ ແຕ່ຍັງບໍ່ມີລາຍງານ ເປັນແບບທາງການເທື່ອວ່າ ມາຮອດເດືອນ ກັນຍາ 2024 ນີ້ ມີນັກທ່ອງທ່ຽວຈີນ ມາແຂວງຫລວງພຣະບາງແລ້ວ ຈັກຄົນ.

ສໍາລັບນັກທ່ອງທ່ຽວຈີນ ທີ່ເຂົ້າມາທ່ຽວໃນລາວ ໃນ 4 ເດືອນທໍາອິດຂອງປີ 2024 ເຊິ່ງເປັນປີທ່ອງທ່ຽວລາວ ມີຈໍານວນປະມານ 350,000 ຄົນ ເຊິ່ງເພີ່ມຂຶ້ນ 67% ຖ້າທຽບໃສ່ ໄລຍະດຽວກັນຂອງປີ 2023 ແຕ່ຍັງເປັນຮອງ ນັກທ່ອງທ່ຽວຈາກໄທ ແລະ ຫວຽດນາມ ແລະ ຄາດຄະເນວ່າ ໃນປີ 2024 ນີ້ ຈະມີນັກທ່ອງທ່ຽວຈີນ ເຂົ້າມາທ່ຽວລາວທັງໝົດ ຈໍານວນ ປະມານ 8 ແສນຄົນ.