ອາຫານການກິນຂຶ້ນຣາຄາ

ຈຳປາທອງ
2016-11-09
ອີແມວລ໌
ຄໍາເຫັນ
Share
ພິມ
ຕະຫຼາດສົດ ຢູ່ສປປລາວ
ຕະຫຼາດສົດ ຢູ່ສປປລາວ
Screen captured from you tube Video

ຣາຄາອາຫານການກິນ ຢູ່ ນະຄອນຫຼວງ ວຽງຈັນ ແພງຂຶ້ນ ເລີ້ມຕັ້ງແຕ່ ເດືອນຕຸລາ ມານີ້ ແລະ ຄາດວ່າ ອາຈແພງຂຶ້ນ ຈົນຮອດ ເດືອນ ທັນວາ ເປັນຕົ້ນ ອາຫານ ທະເລ ແລະ ຜັກ, ເຮັດໃຫ້ ຮ້ານອາຫານ ຈໍາເປັນ ຕ້ອງໄດ້ປັບ ຄ່າອາຫານຂຶ້ນ ນໍາດ້ວຍ ຕາມຄໍາເວົ້າ ຂອງ ເຈົ້າຂອງຮ້ານ ແຫ່ງນຶ່ງ ຢູ່ ນະຄອນຫຼວງ ວຽງຈັນ ຕໍ່ ວິທຍຸ ເອເຊັຽເສຣີ ໃນວັນທີ 8 ພຶສຈິກາ ວ່າ.

"ຊີ້ນແດ່ ແລ້ວກໍ ອາຫານທະເລ ເຮົາກໍເອົາ ລົງຕລາດເລີຍ ຣາຄາຂຶ້ນຫຼາຍ ຂຶ້ນຫຼາຍເຕີບ ປົກກະຕິ ກຸ້ງອັນໂຕໃຫຍ່ເນາະ ປະມານຕະກີ້ 250 ດຽວນີ້ ຂຶ້ນມາ 300 ແລ້ວ ອັນ ຜັກກໍ່ຂຶ້ນ".

ນາງກ່າວອີກວ່າ ຣາຄາຊີ້ນ ປະເພດຕ່າງໆ ຢູ່ຕາມຕລາດ ສູງຂຶ້ນຫຼາຍ ໃນລະຍະ ບຸນທາດຫຼວງ ແລະ ບຸນປີໃໝ່ສາກົນ ຈະມາເຖິງນີ້ ອັນ ຈະເຮັດໃຫ້ ໄດ້ ປັບຣາຄາ ອາຫານ ໃນຮ້ານ ຂຶ້ນຕື່ມອີກ. ແຕ່ເຖິງຢ່າງໃດ ກໍຄິດວ່າ ຣາຄາ ອາຫານນັ້ນ ຈະຫຼຸດລົງ ຫລັງຈາກ ປີໃໝ່ ສາກົນ ຜ່ານໄປ.

ເມື່ອວັນທີ 25 ຕຸລາ ສະມາຊິກ ສະພາ ແຫ່ງຊາດ ເຂດ 1 ນະຄອນຫຼວງ ວຽງຈັນ ໄດ້ສເນີໃຫ້ ຣັຖບາລ ມີການຄວບຄຸມ ຣາຄາ ສິນຄ້າ ເນື່ອງຈາກວ່າ ຣັຖບາລ ຈະປັບເງິນ ເດືອນ ພະນັກງານ ຣັຖກອນ ຂຶ້ນ 500 ກີບ ຕໍ່ ດັດຊະນີ  ແລະ ສະມາຊິກສະພາ ໄດ້ ຕັ້ງຄໍາຖາມ ວ່າ, ເມື່ອ ຣັຖບາລ ຂຶ້ນເງິນເດືອນ ແລ້ວຈະມີ ການຄວບຄຸມ ຣາຄາ ສິນຄ້າ ແນວໃດ. ກ່ຽວກັບ ເຣຶ່ອງນີ້ ທ່ານ ທອງລຸນ ສີສຸລິດ ນາຍົກ ຣັຖມົນຕຣີ ໄດ້ ຕອບຄໍາຖາມ ຂອງ ສະມາຊິກ ສະພາ ແຫ່ງຊາດ ເມື່ອອາທິດ ຜ່ານມາວ່າ:

"ສິນຄ້າ ທ້ອງຕລາດ ແພງຂຶ້ນ ໂດຍສະເພາະ ສະບຽງ ອາຫານ ນີ້ ການເພີ່ມ ເງິນເດືອນ 500 ກີບ ຕໍ່ດັຊນີ ບໍ່ມີຄວາມໝາຍຫຍັງ, ບັດນີ້ ເຮົາ ຈະເຮັດຈັ່ງໃດ ບໍ່ໃຫ້ສິນຄ້າ ແລ່ນຂຶ້ນ ບໍ່ໃຫ້ ສວຍໂອກາດ ຂ້າພະເຈົ້າສເນີ ເປັນແນວນີ້ ພາກສ່ວນ ທີ່ກ່ຽວຂ້ອງ ຂແນງການຄ້າ ຕ້ອງ ເປັນເຈົ້າການ ຄວບຄຸມແທ້ໆ ຕ້ອງ ເອົາມາຕການ ຕໍ່ຜູ້ ສວຍໂອກາດ".

ປັດຈຸບັນ ຣາຄາ ສະບຽງອາຫານ ຢູ່ນະຄອນຫຼວງ ວຽງຈັນ ສູງຂຶ້ນຫຼາຍ ເປັນຕົ້ນ ຊີ້ນງົວ ແຕ່ກ່ອນຣາຄາ ກິໂລລະ 65 ພັນກີບ ຂຶ້ນເປັນ 80 ພັນກີບ ແລະ ຊີ້ນໝູ ຈາກ ກິໂລລະ 30 ພັນກີບ ຂຶ້ນເປັນ 40 ພັນກີບ ໃນ ປັດຈຸບັນ ເຮັດໃຫ້ ຄ່າຄອງຊີບ ສູງຂຶ້ນນຳ ໂດຍສະເພາະ ໃນຣະຍະ ງານບຸນ ສໍາຄັນຕ່າງໆ.

ຄໍາເຫັນ (1)
Share

ຄ.ນະຄຳມວ່ນ

ຈາກ ທ່າແຂກ

ຍ້ອນບຸນຄຸນພັກ-ຣັຖ ສປປລາວແດງ ຈອມປອມນີ້ແລ້ວ, ສ້າງຄວາມຈະເລີນຮູ່ງເຮືອງເຫລືອງເຫລື້ອມ ໃຫ້ປະຊາຊົນລາວ ທົ່ວທຸກແຫ່ງໃນ ສປປລາວ ມີເງິນເຫລືອໃຊ້ເຫລືອຈ່າຍແລ້ວ, ບໍ່ຢາກກິນກໍ່ສຸດແລ້ວແຕ່ຈະຄິດນັ້ນລະຕີ້, ແພງກໍ່ບໍ່ຕ້ອງຊື້, ກິນກໍ່ບໍ່ຕ້ອງກິນ, ເພາະພວກຄ້າຂາຍເຂົາກໍ່ຊື້ມາຈຶ່ງຂາຍຕໍ່ໄດ້. ມີພວກໄດແດ່ຕ້ອງການຊື້ສິບແລ້ວຂາຍຫ້າ, ຖ້າເປັນແນວນີ້ມັນກໍ່ເປັນບ້າ, ໂດຍການນຳພາແລະຄຸ່ມຄອງ ຈາກພັກ-ຣັຖ ສປປລາວເອງນັ້ນລະຕີ້ບໍ? ຕ້ອງການແຕ່ ອຳນາຈແຕມີຄວາມຂີ້ຂາດຕາຂາວ ທັງນັ້ນ!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Nov 10, 2016 04:40 PM

ເຕັມຫນ້າ