ກັມພູຊາຮຽກຮ້ອງເຣື້ອງເຂື່ອນ

ມະນີຈັນ
2015-10-08
ອີແມວລ໌
ຄໍາເຫັນ
Share
ພິມ
ຊາວບ້ານ ທີ່ ຫາປາລ້ຽງຊີພ ໃນເຂດທ້ອງຖິ່ນ ໂຄງການ ເຂື່ອນ ດອນສະໂຮງ
ຊາວບ້ານ ທີ່ ຫາປາລ້ຽງຊີພ ໃນເຂດທ້ອງຖິ່ນ ໂຄງການ ເຂື່ອນ ດອນສະໂຮງ
RFA

ຣັຖມົນຕຣີ ກະຊວງ ການ ຕ່າງ ປະເທດ ກັມພູຊາ Hor Namhong ຮຽກຮ້ອງ ໃຫ້ ສປປລາວ ສຶກສາ ຜົລກະທົບ ຕໍ່ ສິ່ງແວດລ້ອມ ທີ່ ອາຈເກີດຈາກ ເຂື່ອນ ໄຟຟ້າ ດອນສະໂຮງ ຂນາດ 260 ເມັກກາວັດ ນັ້ນ ຕໍ່ໄປ. ຕາມ ຣາຍງານ ຂ່າວ ຊິນຮົວ ຈາກ ກຸງ ພະນົມເປັນ ເມື່ອ ວັນທີ 6 ຕຸລາ 2015.

ສະພາ ແຫ່ງຊາດ ສປປລາວ ໄດ້ຮັບຜ່ານ ຂໍ້ຕົກລົງ ສັມປະທານ ໂຄງການ ເຂື່ອນ ດອນສະໂຮງ ທີ່ ຈະສ້າງ ໃສ່ ແມ່ນໍ້າຂອງ ຕອນລຸ່ມ ເມື່ອ ເດືອນ ສິງຫາ ຜ່ານມາ ແລະ ຄາດວ່າ ການ ກໍ່ສ້າງ ຈະ ເລີ່ມຂຶ້ນ ກ່ອນ ໝົດປີ ນີ້.

ໃນການ ພົບປະ ກັບ ຮອງ ນາຍົກ ຣັຖມົນຕຣີ ສົມສະຫວາດ ເລັ່ງສະຫວັດ, ຜູ້ຮັບ ຜິດຊອບ ກິຈການ ດ້ານ ເສຖກິດ ທີ່ ໄປຢ້ຽມຢາມ ກັມພູຊາ ນັ້ນ, ທ່ານ ຫໍນໍາຫົ້ງ ໄດ້ ກ່າວວ່າ ເຂື່ອນ ດອນສະໂຮງ ຢູ່ ຫ່າງຈາກ ຊາຍແດນ ກັມພູຊາ ພຽງ 2 ຫລັກ ກິໂລແມັຕ. ແລະວ່າ ກັມພູຊາ ແລະ ປະເທດ ໃນເຂດ ແມ່ນໍ້າຂອງ ອື່ນໆ ຄື ໄທ ແລະ ວຽດນາມ ຕ່າງ ກໍກັງວົນ ກ່ຽວກັບ ຜົລກະທົບ ຂອງ ເຂື່ອນ ນັ້ນ.

ທ່ານ ຫໍນໍາຫົ້ງ ກ່າວຕໍ່ ຊື່ມວນຊົນ ວ່າ ກ່ອນທີ່ ຈະເລີ່ມ ການກໍ່ສ້າງ ເຂື່ອນ ນັ້ນ ຂໍສເນີ ໃຫ້ ສປປລາວ ສືບຕໍ່ ສຶກສາ ໂຄງການ ນັ້ນ ເພື່ອບໍ່ໃຫ້ ມີ ຜົນກະທົບ ຕໍ່ ສິ່ງແວດລ້ອມ ໂດຍສະເພາະ ການໄຫລ ຂອງ ນໍ້າ ແລະ ການ ເຄື່ອນຍ້າຍ ຂອງ ປາ ລົງ ສູ່ເຂດ ປະເທດ ລຸ່ມ ແມ່ນໍ້າຂອງ. ແລະ ທ່ານ ກໍໄດ້ກ່າວ ຕໍ່ ທ່ານ ສົມສະຫວາດ ວ່າ ທະເລສາບ ເປັນ ຊີວິດ ຂອງ ປະຊາຊົນ ກັມພູຊາ ແລະ ນໍ້າ ໃນ ທະເລສາບ ກໍຂຶ້ນ ຢູ່ກັບນໍ້າ ທີ່ ໄຫລ ຈາກ ແມ່ນໍ້າຂອງ. ດັ່ງນັ້ນ ບໍ່ວ່າ ຜົລກະທົບ ບໍ່ດີໃດໆ ຕໍ່ ແມ່ນໍ້າຂອງ ທະເລສາບ ຊຶ່ງ ເປັນ ແຫລ່ງປາ ແລະ ເປັນຊີວິດ ຂອງ ຊາວ ກັມພູຊາ ນັ້ນ ກໍຈະໄດ້ ຮັບ ຜົລກະທົບ ນໍາດ້ວຍ.

ແລະວ່າ ເຂື່ອນ ດອນສະໂຮງ ສາມາດ ສົ່ງ ຜົລກະທົບ ບໍ່ດີ ໃສ່ຊາວ ກັມພູຊາ ຈໍານວນ ຫຼາຍລ້ານ ຄົນ. ສ່ວນ ທ່ານ ສົມສະຫວາດ ກໍໄດ້ ອະທິບາຍ ເຖິງ ຜົລການ ສຶກສາ ຮອບດ້ານ ກ່ຽວກັບ ໂຄງການ ເຂື່ອນ ດອນສະໂຮງ ວ່າ ລາວ ຈະເຮັດ ທຸກສິ່ງ ທຸກຢ່າງ ເພື່ອ ບໍ່ໃຫ້ມີ ຜົລກະທົບ ບໍ່ດີ ຕ່າງໆ ຈາກ ເຂື່ອນ ນັ້ນ ທີ່ ອາຈມີ ຕໍ່ບັນດາ ປະເທດ ລຸ່ມ ແມ່ນໍ້າຂອງ.

ຄໍາເຫັນ (1)
Share

ທ້າວ ງໍາເພັດ

ຈາກ ວຽງຈັນ

ຂ້ອຍ ສະແດງ ຄວາມຊົມເຊີຍ ການຂີດຂຽນ ຂອງ ພວກທ່ານ ເດີ ໂດຍສະເພາະ ການຊ່ອງວ່າງ ຣະຫວ່າງ ຄໍາສັບ ເຮັດໃຫ້ ພວກເຮົາ ອ່ານ ແລະ ເຂົ້າໃຈ ງ່າຍຂື້ນ. ຂ້ອຍ ບໍ່ຮູ້ວ່າ ເປັນຫຍັງ ຫນັງສືພີມ ຢູ່ ປະເທດ ລາວ ພວກເພີນ ຈຶ່ງຂີດຂຽນ ຕິດກັນຫມົມ ຂຽນເລື້ອງ ເປັນຫນ້າ ສອງຫນ້າ ບໍ່ມີ ການຊ່ອງວ່າງ ຫຍັງເລີຍ. ອ່ານ ໄດ້ຢູ່ ແຕ່ວ່າ ມັນຢາກ ເຂົ້າໃຈ ເພາະເຫດວ່າ ທຸກໆຄໍາສັບ ແລະ ປະໂຫຍດ ແມ່ນ ຕິດກັນຫມົດ ເປັນຫນ້າ ສອງຫນ້າ ສາມຫນ້າ ສີ່ຫນ້າ. ຂ້ອຍ ບໍ່ແມ່ນ ນັກອັກສອນສາດ ດອກເດີ ແຕ່ວ່າ ຂ້ອຍ ເຫັນ ພວກທ່ານ ຂີດຂຽນ ແລະ ອ່ານ ເຂົ້າໃຈ ງາຍ ແລະ ອ່ານ ກໍມ່ວນ ອີກດ້ວຍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Oct 13, 2015 07:03 PM

ເຕັມຫນ້າ