ເຂື່ອນນໍ້າທາ 1 ຈະລອງ ກັ້ນນໍ້າ
2018.06.28
ໝູ່ບ້ານຈັດສັນ ທີ່ທາງໂຄງການ ເຂື່ອນນໍ້າທາ1 ຍົກຍ້າຍຊາວບ້ານ ເຂົ້າມາຢູ່
Screen captured VT times video
ໂຄງການເຂື່ອນໄຟຟ້ານໍ້າທາ 1 ເຣີ້ມທົດລອງປິດປະຕູເຂື່ອນກັ້ນນໍ້າແລ້ວ ແລະການທົດລອງດັ່ງກ່າວຈະເຮັດໃຫ້ນໍ້າຖ້ວມ ດິນທໍາການຜລິດ ແລະບ່ອນລ້ຽງສັດ ຂອງປະຊາຊົນ 6 ບ້ານ ທີ່ຢູ່ເທິງເຂືອນ. ດັ່ງເຈົ້າໜ້າທີ່ ເມືອງນາແລ ແຂວງຫລວງນໍ້າທາ ຜູ້ປະສົງອອກຊື່ທ່ານນຶ່ງ ກ່າວຕໍ່ວິທຍຸເອເຊັຍເສຣີ ວ່າ:
“ປະກາດເຣີ້ມຕົ້ນແຕ່ວັນທີ່ 25 ເດືອນນີ້ແຫລະ ປະຊາຊົນນີ້ມີອັນລ້ຽງສັດ ຢູ່ຕາມສາຍນໍ້າທານີ້ ໃຫ້ເຂົາຍົກຂຶ້ນ ຈະກັ້ນແລະນໍ້າຈະຖ້ວມ ໃຫ້ຄົນລ້ຽງສັດ ລ້ຽງໝູ ລ້ຽງຄວາຍ ລ້ຽງແບ້ ຢູ່ຕາມສາຍນໍ້ານີ້ ຕາມບ້ານເກົ່ານີ້ນະ ຕາມບ້ານເກົ່າເຂົາເຈົ້ານີ້ນະ ປະກາດ ໃຫ້ເຂົາເຈົ້າ ເຄື່ອນຍ້າຍ ຂຶ້ນເມືອດອຍ ຢູ່ລຽບນໍ້ານີ້ ນໍ້າສິຖ້ວມ ໃຫ້ເຂົາເຈົ້າ ຢູ່ເທິງໃຫ້ມັນດີກ່ອນ.”
ທ່ານກ່າວວ່າ ການກັ້ນນໍ້າເທື່ອນີ້ ເປັນການທົດລອງ ປິດປະຕູເຂື່ອນຄັ້ງທໍາອິດ ເພື່ອຢາກຮູ້ວ່າ ເຂື່ອນດັ່ງກ່າວ ມີຄວາມທົນທານ ສາມາດກັ້ນ ນໍ້າໄດ້ຫລືບໍ່. ຖ້າເຂື່ອນບໍ່ແຕກ ກໍຈະເຣີ້ມທົດລອງ ຕັນນໍ້າ ໃນຂັ້ນຕອນຕໍ່ໄປ ສ່ວນຣະຍະ ການທົດລອງນັ້ນຢ່່າງນ້ອຍ ຈະໃຊ້ເວລາປະມານ 2-3 ເດືອນ.
ເຖິງຢ່າງໃດກໍຕາມ ຣາຍງານວ່າ ການທົດລອງປິດ ປະຕູເຂື່ອນຄັ້ງນີ້ ຈະສົ່ງຜົນກະທົບ ຕໍ່ປະຊາຊົນຫລາຍຄອບຄົວ ໃນ 6 ບ້ານ ເປັນຕົ້ນ: ບ້ານຕາຣາງ, ບ້ານຕາວັນ, ບ້າຍຫ້ວຍລາວ, ແລະບ້ານຫ້ວຍຢາງ ຍ້ອນວ່າ ປະຊາຊົນໃນ 6 ບ້ານນີ້ ເຖິງຈະຍ້າຍມາຢູ່ ບ້ານຈັດສັນແລ້ວ ແຕ່ກໍຍັງຕ້ອງໄດ້ ກັບຄືນໄປເຮັດໄຮ່ ເຮັດສວນຢູ່ບ້ານເດີມ ຂອງພວກເຂົາເຈົ້າ ເນື່ອງຈາກປັຈຈຸບັນ ຄນະຈັດສັນ ເຂື່ອນບໍ່ໄດ້ ຈັດສັນທີ່ດິນ ທໍາການຜລິດໃຫ້ເທື່ອ ດັ່ງປະຊາຊົນ ຜູ້ນື່ງເວົ້າວ່າ:
“ນໍ້າຈະຖ້ວມ ຜົນກະທົບຕໍ່ປະຊາຊົນນີ້ ມັນກໍຫຼາຍຢ່າງ ປະຊາຊົນນີ້ ໄປໄຮ່ໄປສວນນີ້ບໍ່ໄດ້ ເອີ ໄປເຮັດການຜລິດທາງເກົ່າບໍ່ໄດ້ ຜົນກະທົບ ປະຊາຊົນນີ້ ຍ້ອນດິນຜລິດບໍ່ໄດ້ເທື່ອ ບໍມີບ່ອນຜລິດ ປະຊາຊົນນີ້ຂໍນໍາມໝູ່ ນໍາຄູ່ ເຮັດສວນນ້ອຍດຽວ.”
ປັຈຈຸບັນການກໍ່ສ້າງເຂື່ອນນໍ້າທາ 1 ເມືອງນາແລ ແຂວງຫລວງນໍ້າທາ ໄກ້ຈະສໍາເຣັດແລ້ວ, ແຕ່ໃນການຊ່ວຍເຫລືອ ຜູ້ໄດ້ຮັບຜົນກະທົບນັ້ນ ຖືວ່າລ່າຊ້າ ໂດຍສະເພາະ ການຊ່ວຍເຫລືອ ປະຊາຊົນ ໃນໝູ່ບ້ານຈັດສັນສນາມ 1 ທີ່ມີຈໍານວນ 300 ຄອບຄົວ. ຜ່ານມາຄນະຈັດສັນ ໄປແຈກເຂົ້າສານ ໃຫ້ປະຊາຊົນພຽງ 2 ເທື່ອເທົ່ານັ້ນ ສ່ວນເສັ້ນທາງຈາກບ້ານໃໝ່ ໄປຫາບ້ານເກົ່າ ກໍຫາກໍສ້າງສໍາເຣັດ ເມື່ອມໍ່ໆມານີ້ ທັ້ງໆທີ່ປະຊາຊົນ ຢ້າຍເຂົ້າມາຢູ່ບ້ານໃໝ່ໄດ້ເກືອບ 3 ປີແລ້ວ.
