ຂຶ້ນຄ່າ ຣົຖໂດຍສານສາຍໃຕ້ ຕາມແຈ້ງການຂອງ ກະຊວງ

ຕຣຽມປັບຂຶ້ນຄ່າໂດຍສານ ໃນສາຍທາງສາຍໃຕ້ ລະຫວ່າງ 10,000-80,000 ກີບ, ອີງຕາມການແຈ້ງການຂອງ ກະຊວງໂຍທາທິການ ແລະ ຂົນສົ່ງ ສະບັບເລຂທີ 28035/ຫກ., ລົງວັນທີ 13 ຕຸລາ 2023. ກ່ຽວກັບເຣື່ອງນີ້, ວິທຍຸເອເຊັຽເສຣີ ໄດ້ສອບຖາມໄປຍັງ ເຈົ້າໜ້າທີ່ກ່ຽວຂ້ອງ ທ່ານນຶ່ງ ຢູ່ສະຖານີຣົຖໂດຍສານສາຍໃຕ້ ໄດ້ໃຫ້ຮູ້ວ່າ ລາຄາຣົຖໂດຍສານ ປະເພດ ຣົຖດ່ວນ VIP 1 ຫຼື ຣົຖນອນມີຫ້ອງນ້ຳ ແຕ່ນະຄອນຫຼວງວຽງຈັນ-ນະຄອນປາກເຊ ແຂວງຈຳປາສັກ ລາຄາ 320,000 ກີບແລ້ວ, ຊຶ່ງເພີ່ມຂຶ້ນຈາກເດີມ 30,000 ກີບ.

ດັ່ງທີ່ທ່ານ ກ່າວໃນມື້ວັນທີ 16 ຕຸລາ ນີ້ວ່າ:

“ວຽງຈັນ-ປາກເຊ ຕອນນີ້ລາຄາຢູ່ 320,000 ຣົຖນອນນ່າ. ແມ່ນໆ ຫາກໍຂຶ້ນ ບໍ່ຈັກມື້ກ່ອນຫັ້ນລະ. ມີ 3 ປະເພດ ມີນັ່ງ, ນັ່ງແລະກະມີນອນ, ນອນມີຫ້ອງນ້ຳ ແລະ ກະບໍ່ມີຫ້ອງນ້ຳ. ຊົ່ວໂມງລະຄັນ ຕອນສວາຍນີ້ນ່າ. ຕອນແລງລະມີຣົຖ 8 ໂມງແລງ, ມີ 6-7-8 (ໂມງ) ຕອນແລງນີ້ນ່າ.”

ທ່ານກ່າວຕື່ມວ່າ ການຂຶ້ນລາຄາປີ້ຣົຖໂດຍສານ ສາຍໃຕ້ເທື່ອນີ້ ແມ່ນຂຶ້ນແຕ່ສະເພາະ ພາຍໃນປະເທດ ບໍ່ລວມ ສາຍທາງໄປປະເທດວຽດນາມ.

ຣົຖໂດຍ ທີ່ປັບລາຄາຂຶ້ນ ຫຼາຍກວ່າໝູ່ແມ່ນ ຣົຖດ່ວນ VIP 1 ສາຍທາງ ວຽງຈັນ ໄປຫາ ເຊກອງ ຈາກ 320,000 ກີບ ເປັນ 400,000 ກີບ, ເພີ່ມຂຶ້ນ 80,000 ກີບ. ຮອງລົງມາແມ່ນ ຣົຖນັ່ງທັມມະດາ ສາຍວຽງຈັນ-ຫຼັກຊາວ ຈາກ 130,000 ກີບ ຂຶ້ນເປັນ 200,000 ກີບ ແລະ ສາຍວຽງຈັນ-ນາກາຍ ຈາກ 150,000 ກີບ ຂຶ້ນເປັນ 220,000 ກີບ, ເພີ່ມຂຶ້ນ 70,000 ກີບ.

ຊາວບ້ານ ຢູ່ແຂວງຈຳປາສັກ ນາງນຶ່ງ ກ່າວວ່າ ເຂົ້າໃຈຜູ້ປະກອບການຣົຖໂດຍສານ ທີ່ຕ້ອງໄດ້ຂຶ້ນລາຄາ ຍ້ອນນ້ຳມັນເຊື້ອເພີງ ທີ່ປັບໂຕສູງຂຶ້ນ ໃນໄລຍະປັດຈຸບັນ. ນອກຈາກນີ້ແລ້ວ, ຄິວຣົຖບາງແຫ່ງ ມີການຄິດໄລ່ຄ່າຣົຖໂດຍສານ ແບບດຽວກັນ ແຕ່ຣົຖທີ່ໄດ້ຂຶ້ນໂຕຈິງ ອາດຈະເປັນຣົຖນັ່ງທັມມະດາ ຊຶ່ງຖືວ່າ ເປັນການເອົາປຽບຜູ້ໂດຍສານ.

“ຄ່າຣົຖເມສາຍໃຕ້ໂຕນີ້ປະມານ 290,000 ກີບ. ຊ່ວງນີ້ຄ່ານ້ຳມັນມັນຂຶ້ນເດ້ ເຂົາກໍເລີຍຂຶ້ນຄ່າຣົຖ ຕອນນີ້ປະມານ 300,000 ຫຼື 350,000 ນີ້ລ່ະ ປະມານນີ້. ແມ່ນລະ ອັ່ນນ່າ, ຄັນຊື້ປີ້ຢູ່ຄິວເລີຍນີ້ ລາຄາຈະອັນດຽວກັນເໝິດ, ແຕ່ວ່າຣົຖບໍຣິການ ອາຈບໍ່ຄືກັນ ບາງຄົນກະຈະໄດ້ VIP ບາງຄົນກະຈະໄດ້ຣົຖທັມມະດາ.”

ຂະນະທີ່ ຊາວນະຄອນຫຼວງວຽງຈັນ ຜູ້ນຶ່ງ ກ່າວວ່າ ເຫັນໃຈຜູ້ປະກອບການຣົຖໂດຍສານ ເຊັ່ນດຽວກັນ ແຕ່ ຢາກໃຫ້ຜູ້ປະກອບການ ເອົາໃຈໃສ່ປັບປຸງ ການບໍຣິການ ໂດຍສະເພາະ ການເສີມຕັ່ງນັ່ງ ໃຫ້ຜູ້ໂດຍສານ ຫຼາຍກວ່າບ່ອນນັ່ງ ທີ່ມີຢູ່ ຊຶ່ງຈະສົ່ງຜົລຕໍ່ຄວາມປອດໄພ ຂອງຜູ້ໂດຍສານ.

“ຂຶ້ນລາຄາແລ້ວ ກະຕ້ອງປັບປຸງການບໍຣິການແນ່ເດີ້. ບໍ່ແມ່ນແຕ່ ເອົາແຕ່ ຕັ່ງເສີມໆ ແນ່ ມັນບໍ່ໄດ້ໃດ໋. ຖ້າມີຣົຖສ່ວນໂຕນີ້ ບໍ່ຢາກນັ່ງເລີຍຣົຖເມຫັ້ນນ່າ ມັນລຳບາກ.”

ສຳລັບ ການຂຶ້ນລາຄາ ປີ້ຣົຖໂດຍສານ ເທື່ອນີ້ ແມ່ນເປັນເທື່ອທຳອິດ ໃນຮອບປີ. ໂດຍການຂຶ້ນລາຄາປີ້ຣົຖໂດຍສານ ຄັ້ງຫຼ້າສຸດ ແມ່ນໃນຄັ້ງວັນທີ 19 ຕຸລາ 2022, ຊຶ່ງພາກສ່ວນກ່ຽວຂ້ອງ ໃຫ້ເຫດຜົລວ່າ ຍ້ອນນ້ຳມັນເຊື້ອເພີງ ແພງຂຶ້ນ ຈາກພາວະເງິນເຟີ້.  

ເຈົ້າໜ້າທີ່ກ່ຽວຂ້ອງ ອີກຜູ້ນຶ່ງ ຢູ່ສະຖານີຣົຖໂດຍສານ ສາຍເໜືອ ນະຄອນຫຼວງວຽງຈັນ ກ່າວວ່າ ປັດຈຸບັນ, ຍັງບໍ່ທັນມີການຂຶ້ນລາຄາ ປີ້ຣົຖໂດຍສານ ຢູ່ສະຖານີຣົຖໂດຍສານສາຍເໜືອ ແຕ່ຢ່າງໃດ.

“250,000 ກີບ, ຣົຖຕູ້ນ່າເຈົ້າ. ດຽວນີ້ບໍ່ມີຣົຖນອນແລ້ວ ຫຼວງພຣະບາງ ມີແຕ່ຣົຖຕູ້. ຕອນນີ້ລາຄາແນວນີ້ແຕ່ດົນລະແມ່ນ ຍັງບໍ່ໄດ້ປ່ຽນແປງເລີຍ ຫຼວງພຣະບາງ.”

ການເດີນທາງ ໂດຍລະບົບຂົນສົ່ງ ສາທາຣະນະ ລະຫວ່າງ ນະຄອນຫຼວງວຽງຈັນ ໄປຫາພາກໃຕ້ຂອງລາວ ຍັງມີພຽງແຕ່ການເດີນທາງດ້ວຍຣົຖໂດຍສານ ສາຍໃຕ້ ເປັນສ່ວນຫຼາຍ ແລະ ຍັງມີການເດີນທາງດ້ວຍ ເຮືອບິນ ຈາກສນາມບິນວັດໄຕ ນະຄອນຫຼວງວຽງຈັນ ຫາ ສນາມບິນປາກເຊ ແຂວງຈຳປາສັກ ແລະ ສນາມບິນ ສວັນນະເຂດ ແຂວງສວັນນະເຂດ ຊຶ່ງລາຄາປີ້ໂດຍສານ ແພງຫຼາຍ ແລະ ມີພຽງສັປດາລະ 2-3 ຖ້ຽວບິນເທົ່ານັ້ນ ຂະນະທີ່ ຜູ້ໂດຍສານ ຈຳນວນນຶ່ງ ຍອມເດີນທາງ ດ້ວຍຣົຖໂດຍສານ ຜ່ານພາກອີສານ ຂອງໄທຍ ໄປທີ່ແຂວງພາກໃຕ້ຂອງລາວ ຍ້ອນມີຄວາມປອດໄພຫຼາຍກວ່າ ອີກທັງ ສະພາບຫົນທາງຢູ່ໄທຍ ດີກວ່ານຳອີກ, ແຕ່ຜູ້ໂດຍສານດັ່ງກ່າວ ກໍຕ້ອງມີໜັງສືຜ່ານແດນ ແລະ ຕ້ອງໄດ້ເສັຽຄ່າທັມນຽມ ໃນການຂ້າມຊາຍແດນ ໃຫ້ເຈົ້າໜ້າທີ່ ຕື່ມອີກ.

ສຳລັບ ການເດີນທາງ ໂດຍເຮືອໂດຍສານທາງໄກ ແມ່ນມີພຽງແຕ່ສາຍ ເມືອງຫ້ວຍຊາຍ ແຂວງບໍ່ແກ້ວ ຫາ ແຂວງຫຼວງພຣະບາງ ເທົ່ານັ້ນ ໂດຍໃຊ້ໄລຍະເວລາເຖິງ 2 ມື້ ຍ້ອນສະພາບແມ່ນ້ຳຂອງ ໃນຫຼາຍໄລຍະ ມີຄວາມຄົດຄ້ຽວ ແລະ ມີເກາະແກ່ງເປັນຈຳນວນຫຼາຍ ເຮັດໃຫ້ ຜູ້ຂັບຂີ່ເຮືອ ຕ້ອງມີທັກສະຊ່ຽວຊານສູງ. ດັ່ງນັ້ນ, ຈຶ່ງຍັງບໍ່ທັນມີ ເຮືອໂດຍສານທາງໄກ ຈາກ ນະຄອນຫຼວງວຽງຈັນ ໄປຫາ ຕ່າງແຂວງ ໃນປັດຈຸບັນ.

ທີ່ຜ່ານມາ, ທາງການລາວ ໄດ້ພະຍາຍາມ ຂົນຂວາຍແຫຼ່ງທຶນ ແລະ ຜູ້ຮັບເໝົາ ໃນການກໍ່ສ້າງທາງດ່ວນສາຍໃຕ້ ຈາກ ນະຄອນຫຼວງວຽງຈັນ ໄປຫາ ນະຄອນປາກເຊ ແຂວງຈຳປາສັກ ແລະ ທາງຣົຖໄຟ ຈາກສວັນນະເຂດ ໄປຫາດ່ານແດນສວັນ ເພື່ອເຊື່ອມຕໍ່ ເຂົ້າສູ່ປະເທດວຽດນາມ, ແຕ່ກໍຍັງບໍ່ທັນມີການກໍ່ສ້າງທາງດັ່ງກ່າວ ຂຶ້ນເທື່ອ.