ຮ້ານຕູ້ແກມພະນັນ ເປີດຕິດແຄມນ້ຳຊອງ ເມືອງວັງວຽງ

ນັບແຕ່ປີ 2023 ເປັນຕົ້ນມາ ຊາວບ້ານຫຼາຍຄົນ ຢູ່ເມືອງວັງວຽງ ແຂວງວຽງຈັນ ໄດ້ພົບເຫັນ ສະໂມສອນຕູ້ເກມໄຟຟ້າແຫ່ງໜຶ່ງ ໃນລັກສະນະສ່ຽງໂຊກກັບການພະນັນ ທີ່ຄາດວ່າ ເປັນຂອງຄົນຈີນ ຕັ້ງຢູ່ບໍລິເວນແຄມສາຍນໍ້າຊອງ ພາກຕາເວັນຕົກ, ແຕ່ມາຮອດປັດຈຸບັນ ກໍ່ຍັງບໍ່ທັນເປີດໃຫ້ບໍລິການ ແບບເປັນທາງການເທື່ອ ທ່າມກາງຄວາມສົງໄສຂອງຊາວບ້ານ ທີ່ຢູ່ໃກ້ຄຽງ ແຕ່ຫຼາຍຄົນກໍ່ເຊື່ອວ່າ ໜ້າຈະບໍ່ທັນໄດ້ຮັບອະນຸຍາດໃຫ້ເປີດ ເນື່ອງຈາກທາງການເມືອງວັງວຽງ ມີການເຂັ້ມງວດໃນດ້ານນີ້, ດັ່ງຊາວບ້ານ ທີ່ຢູ່ໃກ້ຄຽງ ນາງໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 6 ສິງຫາ ນີ້ວ່າ:

“ບໍ່ໄດ້ເປີດ ເຫັນຢູ່ ຂ້າງຮ້ານເອື້ອຍນີ້ແຫຼະ ໄດ້ປະມານປີໜຶ່ງນີ້ແຫຼະ ເຂົາເຈົ້າເປີດ ແຕ່ວ່າ ຄືຊິແມ່ນເອກກະສານບໍ່ຖືກຕ້ອງ ເຮັດຖືກຕ້ອງຕາມລະບຽບ ກະໜ້າຈະໄດ້ຢູ່.”

ໃນຂະນະທີ່ ຜູ້ປະກອບການທຸລະກິດນໍາທ່ຽວ ຢູ່ເມືອງວັງວຽງ ທ່ານໜຶ່ງ ກໍ່ຢືນຢັນວ່າ ມາຮອດປັດຈຸບັນ ທາງການເມືອງວັງວຽງ ຍັງບໍ່ອະນຸຍາດ ໃຫ້ສະໂມສອນຕູ້້້ເກມໄຟຟ້າດັ່ງກ່າວ ເປີດໃຫ້ບໍລິການເທື່ອ ຍ້ອນຢ້ານວ່າ ອາດກາຍເປັນແຫຼ່ງມົ້ວສຸມທີ່ບໍ່ດີ ແລະກໍ່ໃຫ້ເກີດບັນຫາ ປະກົດການຫຍໍ້ທໍ້ຕ່າງໆຕາມມາ, ດັ່ງທ່ານກ່າວວ່າ:

“ເຂົາເຈົ້າຍັງບໍ່ເປີດ ອັນນັ້ນບໍ່ເປີດຕູ້ໂຕນັ້ນ ຕູ້ເກມນີ້ ເພິ່ນຍັງປິດ ເປັນບ່ອນມົ້ວສຸມ ເປັນບ່ອນອັນຕະລາຍ ເຈົ້າຂອງນີ້ແມ່ນເປັນຄົນນີ້ແຫຼະ ຄົນລາວນີ້ແຫຼະ ຄົນວັງວຽງ.”

ວິທຍຸເອເຊັຽເສຣີ ໄດ້ຕິດຕໍ່ໄປຫາ ຫ້ອງການຖະແຫຼງຂ່າວ ວັດທະນະທໍາ ແລະທ່ອງທ່ຽວ ເມືອງວັງວຽງ ເພື່ອສອບຖາມລາຍລະອຽດເພີ່ມຕື່ມ ແຕ່ເຈົ້າໜ້າທີ່ຜູ້ຮັບຜິດຊອບວຽກງານນີ້ ຍັງບໍ່ສະດວກໃຫ້ສໍາພາດ ເນື່ອງຈາກ ຍັງຄາກອງປະຊຸມ.

ແຕ່ເຖິງຢ່າງໃດກໍ່ຕາມ ເຈົ້າໜ້າທີ່ກອງບັນຊາການ ປກສ ແຂວງວຽງຈັນ ທ່ານໜຶ່ງ ທີ່ເຄີຍເຮັດວຽກຢູ່ຫ້ອງການ ປກສ ເມືອງວັງວຽງ ກ່າວວ່າ ສໍາລັບຕູ້ເກມຢູ່ບ່ອນດັ່ງກ່າວ ແມ່ນໄດ້ຂໍອະນຸຍາດ ຈາກທາງເຈົ້າໜ້າທີ່ຂັ້ນແຂວງ ແຕ່ເມື່ອມາເຮັດຢູ່ເມືອງວັງວຽງ ທາງການເມືອງວັງວຽງ ກໍ່ບໍ່ອະນຸຍາດ ຍ້ອນຂັດຕໍ່ກົດລະບຽບຂອງເມືອງ ແຕ່ຍັງບໍ່ໄດ້ຖືກໃຫ້ມີການມ້າງຖິ້ມເທື່ອ ສ່ວນເຈົ້າຂອງຕູ້ເກມດັ່ງກ່າວ ແມ່ນຄົນລາວ ທີ່ຮ່ວມທຸລະກິດກັບນາຍທຶນຈີນ, ດັ່ງທ່ານກ່າວວ່າ:

“ຖືວ່າ ເພິ່ນບໍ່ໄດ້ອະນຸຍາດ ບໍ່ໃຫ້ເຮັດ ເຈົ້າໜ້າທີ່ຜູ້ອະນຸຍາດແທ້ໆ ແມ່ນຂັ້ນແຂວງ ສາຍປົກຄອງຂອງແຂວງ ເປັນຈີນ ແລະກະຄົນລາວມີສ່ວນຮ່ວມ.”

ກ່ອນໜ້ານີ້ ເມື່ອປີ 2018 ເຈົ້າໜ້າທີ່ຂັ້ນສູງ ຂອງເມືອງວັງວຽງ ທ່ານໜຶ່ງ ກໍ່ເຄີຍປະກາດວ່າ ຄັນມີໂຄງການພັດທະນາແຫຼ່ງທ່ອງທ່ຽວ ຢູ່ເມືອງວັງວຽງ ກໍ່ຈະບໍ່ໃຫ້ມີທຸລະກິດ ປະເພດກາສິໂນ ກວມຢູ່ໃນນັ້ນຢ່າງເດັດຂາດ ເພື່ອບໍ່ໃຫ້ກາຍເປັນແຫຼ່ງມົ້ວສຸມ ແລະເກີດປະກົດການຫຍໍ້ທໍ້ຕ່າງໆ.

ນອກຈາກນັ້ນແລ້ວ ກໍ່ມີສະໂມສອນຫຼີ້ນເກມໄຟຟ້າ ໃນລັກສະນະສ່ຽງໂຊກກັບການພະນັນ ອີກແຫ່ງໜຶ່ງ ຢູ່ພາຍໃນຕຶກ ສີໄຄ ພາຊ້າ ເຂດບ້ານທ່າແຮ່ ເມືອງສີໂຄດຕະບອງ ນະຄອນຫຼວງວຽງຈັນ ໂດຍອອກຊື່ ໃນນາມ ສະມາຄົມທຸລະກິດໃຕ້ຫວັນ ປະຈໍາ ສປປ.ລາວ ເຊິ່ງຜູ້ທີ່ເຂົ້າໄປໃຊ້ບໍລິການສ່ວນໃຫຍ່ ແມ່ນນັກທ່ອງທ່ຽວຊາວຈີນ ແຕ່ຊາວບ້ານສ່ວນໃຫຍ່ ກໍ່ບໍ່ຮູ້ຄັກແນ່ວ່າ ໄດ້ຮັບການອະນຸຍາດ ແບບຖືກຕ້ອງ ຫຼືບໍ່, ດັ່ງຊາວບ້ານ ນາງໜຶ່ງ ທີ່ເຮັດວຽກຢູ່ຕຶກ ສີໄຄ ພາຊ້າ ກ່າວວ່າ:

“ຕູ້ເກມ ຍັງເປີດປົກກະຕິດ ເຂົາເຈົ້າເປີດແມ່ນ 10 ໂມງສວຍ ຫາ 11 ໂມງແລງ ກະມີຄົນຈີນ ກັບຄົນລາວ ຄົນໄທ ອີ່ຫຍັງກະໄດ້ຄືກັນ.”

ໃນຂະນະດຽວກັນ ຊາວບ້ານອີກນາງໜຶ່ງ ທີ່ເດີນທາງຜ່ານ ຕຶກສີໄຄ ພາຊ້າ ຢູ່ເລື້ອຍໆ ກໍ່ຢືນຢັນວ່າ ເຫັນສະໂມສອນຫຼີ້ນເກມໄຟຟ້າດັ່ງກ່າວ ເປີດຕັ້ງແຕ່ດົນແລ້ວ ແຕ່ກໍ່ບໍ່ຮູ້ຄັກແນ່ວ່າ ເປີດບໍລິການແນວໃດ ແລະລູກຄ້າທີ່ໄປຫຼີ້ນ ແມ່ນໃຜແດ່ ເພາະບໍ່ໄດ້ເຂົ້າໄປເບິ່ງດ້ານໃນ, ດັ່ງນາງ ກ່າວວ່າ:

“ສີໄຄ ພາຊ້າ ເຂົາເຈົ້າມີຕູ້ເກມ ເຮົາຂີີ່ລົດກາຍແລ້ວອ່ານ ແມ່ນມັນມີ ຂ້ອຍກະເຄີຍເຫັນອີີ່ຫຼີໄດ໋ ທາງໜ້າຫັ້ນນ່າ ຂຽນໃສ່ວ່າ ມີເກມ ເຮົາກະບໍ່ແນ່ໃຈ.”

ແຕ່ເຈົ້າໜ້າທີ່ ຫ້ອງການຖະແຫຼງຂ່າວ ວັດທະນະທໍາ ແລະທ່ອງທ່ຽວ ເມືອງສີໂຄດຕະບອງ ນາງໜຶ່ງ ກ່າວວ່າ ສໍາລັບທຸລະກິດ ປະເພດຕູ້ເກມດັ່ງກ່າວ ແມ່ນບໍ່ໄດ້ຮັບອະນຸຍາດ ຈາກທາງການເທື່ອ ແລະໄດ້ລັກເປີດແບບຜິດກົດໝາຍ ແຕ່ກໍ່ບໍ່ໄດ້ຮູ້ວ່າ ໃນໄລຍະທີ່ຜ່ານມາ ໄດ້ມີເຈົ້າໜ້າທີ່ ໄປຕິດຕາມກວດກາແລ້ວຫຼືບໍ່, ດັ່ງນາງ ກ່າວວ່າ:

“ດຽວນີ້ ຂະແໜງໄທເຮົາບໍ່ໄດ້ອະນຸຍາດ ເວົ້າເລື້ອງເກມນີ້ ດຽວນີ້ແມ່ນ ຍັງບໍ່ມີພາກສ່ວນໃດອະນຸຍາດໃຫ້ ຂະແໜງການທີ່ກ່ຽວຂ້ອງຕິດພັນກະຄື ມັນມີຂະແໜງໄປສະນີເນາະ ກັບຂະແໜງຖະແຫຼງຂ່າວວັດທະນະທໍານີ້ ເກມແບບ ຕູ້ເກມ.”

ຢ່າງໃດກໍ່ຕາມ ກ່ອນໜ້ານີ້ ທາງການບາງແຂວງ ກໍ່ໄດ້ອອກແຈ້ງການ ກ່ຽວກັບການອອກໃບອະນຸຍາດ ສ້າງຕັ້ງຕູ້ເກມ ລຶບລ້າງຕູ້ເກມ ເປັນຕົ້ນ ເມື່ອເດືອນກໍລະກົດ ທີ່ຜ່ານມາ ທາງການແຂວງບໍ່ແກ້ວ ໄດ້ອອກແຈ້ງການ ກ່ຽວກັບການອະນຸຍາດອອກຕູ້ເກມ ໃນແຂວງບໍ່ແກ້ວ ແລະຄັນບຸກຄົນ ຫຼື ນິຕິບຸກຄົນໃດ ຢາກສ້າງຕັ້ງຕູ້ເກມ ຕ້ອງໄດ້ຂໍອະນຸຍາດ ຈາກຫ້ອງວ່າການນາຍົກລັດຖະມົນຕີ ເທົ່ານັ້ນ ໂດຍກ່ອນໜ້ານັ້ນ ເມື່ອປີ 2022 ທາງການແຂວງບໍ່ແກ້ວ ກໍ່ໄດ້ກວດຍຶດ ແລະທໍາລາຍຕູ້ເກມ ຖິ້ມແລ້ວຈໍານວນໜຶ່ງ ທີ່ເປັນຂອງຄົນຈີນ.