ນໍ້າມັນເຊື້ອເພີງ ແພງຂຶ້ນ, ກະທົບ ຕໍ່ການຄອງຊີບ ຂອງຊາວລາວ

ປະຊາຊົນລາວ ທີ່ໃຊ້ລົດ ພາກັນອຸກໃຈຫຼາຍ ພາຍຫຼັງກະຊວງອຸດສາຫະກໍາ ແລະການຄ້າ ໄດ້ປັບລາຄານໍ້າມັນເຊື້ອເພີງຂຶ້ນ ເມື່ອວັນທີ 7 ພະຈິກ ທີ່ຜ່ານມາ ເປັນຕົ້ນ ລາຄານໍ້າມັນ ຢູ່ນະຄອນຫຼວງວຽງຈັນ ປະກອບດ້ວຍ ແອັດຊັງພິເສດ ປັບຂຶ້ນ 350 ກີບ, ແອັດຊັງທໍາມະດາ ປັບຂຶ້ນ 330 ກີບ ແລະ ນໍ້າມັນກາຊວນ ປັບຂຶ້ນ 400 ກີບ/ລິດ. ໃນຂະນະທີ່ ສະພາບຄ່າຄອງຊີບຍັງຄົງສູງ ຄົນທີ່ໃຊ້ລົດສ່ວນໃຫຍ່ ຕ້ອງໄດ້ຈ່າຍເງິນໃສ່ນໍ້າມັນສູງຂຶ້ນ ສ້າງຄວາມອຸກໃຈ ໃຫ້ແກ່ຊາວລາວຫຼາຍອາຊີບ, ດັ່ງຜູ້ປະກອບການລົດໂດຍສານ ນາງໜຶ່ງ ກ່າວຕໍ່ວິທຍຸເອເຊັຽເສຣີ ວ່າ:

“ຍອມຮັບວ່າ ເອີ່ ມັນກະມີຜົນກະທົບ ນໍ້າມັນຂຶ້ນ 300-400 ເນາະ ລິດມັນກະຍັງຄົງທີ່ ແຕ່ວ່າ ເງິນເຮົາຈະຕ້ອງໄດ້ປັບຂຶ້ນຫັ້ນນ່າ ແຕ່ກ່ອນໆ ແຕ່ກີ້ ແຕ່ຄັນນໍ້າມັນບໍ່ທັນຂຶ້ນ ລະແມ່ນລົດເມນ້ອຍ ໄປ-ກັບ ລະແມ່ນ ລ້ານໜຶ່ງວ່າຊັ້ນສະ ດຽວນີ້ ລະແມ່ນ 2 ລ້ານປາຍ ມັນຂຶ້ນ ມັນຈະຂຶ້ນຫຼາຍກວ່າມັນລົງ ເອີ່ຄັນວ່າ ເຮົາຈະແບບຂຶ້ນຄ່າໂດຍສານອີ່ຫຍັງນີ້ ເຮົາກໍ່ຈະຂຶ້ນເອງບໍ່ໄດ້ ຕ້ອງໄດ້ແບບຂັ້ນເທິງເພີ່ມຂຶ້ນໃຫ້.”

ລາຄານໍ້າມັນເຊື້ອເພີງ ທີ່ທາງການປັບຂຶ້ນໃໝ່ ຢູ່ນະຄອນຫຼວງວຽງຈັນ ແອັດຊັງທໍາມະດາ  ປັບຂຶ້ນເປັນ 23,070 ກີບຕໍ່ລິດ, ແອັດຊັງພິເສດ ປັບຂຶ້ນເປັນ 29,780 ກີບ ແລະນໍ້າມັນກາຊວນ ປັບຂຶ້ນເປັນ 19,730 ກີບຕໍ່ລິດ.

ຄົນຂັບລົດຕູ້ ທ່ານໜຶ່ງ ລະບາຍຄວາມຮູ້ສຶກວ່າ ເຖິງແມ່ນວ່າ ນໍ້າມັນເຊື້ອເພີງ ຈະປັບລາຄາຂຶ້ນ ກໍ່ຍັງຈໍາເປັນ ຕ້ອງໄດ້ຂັບລົດຕູ້ຄີືເກົ່າ ເພື່ອຫາລາຍໄດ້ ເຊິ່ງໂຕທ່ານເອງ ກະໄດ້ຮັບຜົນກະທົບ ຍ້ອນຕ້ອງໄດ້ຈ່າຍເງິນ ຊື້ນໍ້າມັນຫຼາຍຂຶ້ນ ໂດຍໄດ້ປະລິມານນໍ້າມັນສໍ່າເກົ່າ ແລະນອກຈາກນີ້ ຄົນທີ່ຫາເຊົ້າກິນຄໍ່າ ກໍ່ລ້ວນແຕ່ ໄດ້ຮັບຜົນກະທົບ ບໍ່ແຕກຕ່າງຫຍັງກັນ ຍ້ອນບັນຫາທາງດ້ານເສດຖະກິດ:

“ຄືຈັ່ງຂ້ອຍຂັບລົດຕູ້ ກະໄດ້ຂັບຄືເກົ່າຫັ້ນແຫຼະ ໄດ້ໃຊ້ເງິນຫຼາຍຂຶ້ນຈ່ັງຊີ້ນ່າ ຂອງທໍ່ເກົ່າ ກະຕ້ອງໄດ້ຂຶ້ນລາຄາ ຕາມສະພາບໄປຫັ້ນແຫຼະ ຊຸມທີ່ວ່າເຂົາມີເງິນຫຼາຍ ມັນກໍ່ບໍ່ໄດ້ເດືອດຮ້ອນ ຊຸມທີ່ວ່າ ເຂົາເຈົ້າ ຫາເຊົ້າກິນຄໍ່າ ມັນກໍ່ອາດມີຜົນກະທົບກັບເພິ່ນແດ່ ທໍາມະດາແຫຼະເງິນມັນເຟີ້ເດ້.”

ຊາວລາວ ຜູ້ຫາເຊົ້າກິນຄໍ່າ ທ່ານໜຶ່ງ ກໍ່ໄດ້ກ່າວວ່າ ນໍ້າມັນໃນປັດຈຸບັນນີ້ ຍັງສືບຕໍ່ລາຄາແພງ ຈາກລາຄາ ລິດລະ 10 ປາຍພັນກີບ ແຕ່ປັດຈຸບັນນີ້ ພຸ່ງສູງຂຶ້ນຕໍ່ເນື່ອງ ເປັນ 20,000 ກີບຕໍ່ລິດ ແຕ່ຜູ້ໃຊ້ລົດ ກໍ່ຕ້ອງຍອມເສຍຄ່ານໍ້າມັນ ໃນລາຄາແພງ ແລະກໍ່ເຮັດໄດ້ພຽງແຕ່ ຕິດຕາມການປັບລາຄານໍ້າມັນ ໃນແຕ່ລະອາທິດ ໄປເທົ່ານັ້ນ:

“ຜົນກະທົບມັນແພງຫັ້ນແຫຼະ ລົດຈັກ ບາງຄັ້ງ ກໍ່ໃຊ້ 2 ລິດ 3 ລິດ ແຕ່ກ່ອນ ມັນລິດໜຶ່ງ 10 ປາຍພັນ ດຽວນີ້ ມັນ 20 ປາຍພັນ 27, 28 ພັນພຸ້ນ ໄດ້ຮັບຜົນກະທົບ ນໍາກັນຫັ້ນແຫຼະ ເງິນກີບກະອ່ອນຄ່າ ລາຍຮັບກະເລັກໆນ້ອຍໆ ຈໍາເປັນໄດ້ໃຊ້.”

ປັນຫາດັ່ງກ່າວນີ້ ທາງລັດຖະບານລາວ ຍັງບໍ່ທັນແກ້ໄຂໄດ້ ຍ້ອນບໍ່ສາມາດຜະລິດນໍ້າມັນໄດ້ພາຍໃນປະເທດ ຍັງຈໍາເປັນຕ້ອງເພິ່ງພາ ການນໍາເຂົ້າຈາກຕ່າງປະເທດຢູ່ ໃນຂະນະທີ່ ບັນຫາເສດຖະກິດ ແລະເງິນເຟີ້ໃນລາວ ຍັງແກ້ບໍ່ໄດ້ ແລະກໍ່ໄດ້ຮັບຜົນກະທົບ ຈາກພາວະໄພສົງຄາມ ໂດຍສະເພາະ ສົງຄາມລະຫວ່າງ ລັດເຊຍ ແລະຢູເຄຣນ:

“ແກ້ໄຂຫຍຸ້ງຍາກສົມຄວນ ເລື່ອງນໍ້າມັນນີ້ ກະເລື່ອງເງິນເຟີ້ ກະແມ່ນເນາະ ສອງກະເລື່ອງ ບັນຫາສົງຄາມ ອິຣັກ ອິຫຍັງຫັ້ນແຫຼະ ສະທ້ອນມາແຕ່ພຸ້ນແຫຼະ ບາດນີ້ເຮົາຢູ່ລາວ ບໍ່ມີບໍ່ ມີແຕ່ອາໃສຊື້ເຂົ້າມາເນາະ ຄ່າຂົນສົ່ງຫຼາຍຕໍ່ຫຼາຍອັນເນາະ.”

ກ່ອນໜ້ານີ້ ການປັບລາຄານໍ້າມັນ ປະຈໍາວັນທີ 30 ຕຸລາ ປີ 2024 ທີ່ຜ່ານມາ ລາຄານໍ້າມັນເຊື້ອເພີງ ຢູ່ນະຄອນຫຼວງວຽງຈັນ ປະກອບດ້ວຍ ແອັດຊັງພິເສດ ຈາກ 29,430 ກີບຕໍ່ລິດ, ແອັດຊັງທໍາມະດາ 22,740 ກີບຕໍ່ລິດ ແລະກາຊວນ 19,330 ຕໍ່ລິດ.