ລັດຖະບານ ປະກາດໃຫ້ເງິນອຸດໝູນ ພະນັກງານລັດຖະກອນ

ຈຳປາທອງ
2024.04.04
ລັດຖະບານ ປະກາດໃຫ້ເງິນອຸດໝູນ ພະນັກງານລັດຖະກອນ ພະນັກງານ ຣັຖກອນ ທີ່ເຮັດວຽກບໍຣິການປະຊາຊົນ ທີ່ຫ້ອງການແຫ່ງນຶ່ງ ໃນນະຄອນຫຼວງວຽງຈັນ. ເດືອນກຸມພາ ປີ 2023.
ນັກຂ່າວ ພົລເມືອງ

ພະນັກງານ-ລັດຖະກອນ ໃນທົ່ວປະເທດລາວ ຈະໄດ້ຮັບເງິນອຸດໜູນ ຄ່າຄອງຊີບເພີ່ມຕື່ມ 150,000 ກີບຕໍ່ຄົນຕໍ່ເດືອນ ແລະເງິນເດືອນ ໃນເດືອນເມສາ 2024 ນີ້ ກ່ອນບຸນປີໃໝ່ລາວ. ສໍາລັບເງິນອຸດໝູນ 150,000 ກີບນັ້ນ ຈະມີການຄິດໄລ່ຢ້ອນຫລັງ ນັບແຕ່ເດືອນ ມັງກອນ 2024 ເປັນຕົ້ນມາ ໂດຍໃຫ້ເບີກຈ່າຍເງິນອຸດໜູນ ພ້ອມກັບເງິນເດືອນ ຂອງເດືອນເມສານີ້, ຊ້າສຸດບໍ່ໃຫ້ກາຍວັນທີ 8 ເມສາ ແລະໃຫ້ການເບີກຈ່າຍນັ້ນ ສໍາເລັດກ່ອນວັນທີ 12 ເມສາ, ອີງຕາມແຈ້ງການ ຂອງກະຊວງການເງິນ ວັນທີ 2 ເມສາ ນີ້.

ເຈົ້າໜ້າທີ່ ຜະແນກການເງິນ ຢູ່ແຂວງຊຽງຂວາງ ນາງນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 4 ເມສານີ້ວ່າ ຜະແນກການເງິນ ໃນຫລາຍແຂວງ ກໍາລັງຄິດໄລ່ເງິນອຸດໜູນ ໂດຍຄິດໄລ່ຢ້ອນຫລັງ ຕັ້ງແຕ່ເດືອນມັງກອນ 2024 ມາ ແລ້ວບວກໃສ່ເງິນເດືອນ ຂອງພະນັກງານ-ລັດຖະກອນ ສໍາລັບຈ່າຍເປັນເງິນເດືອນຂອງເດືອນເມສານີ້ ເພື່ອເປັນຂວັນ ກໍາລັງໃຈໃຫ້ແກ່ພະນັກງານ-ລັດຖະກອນ ຢູ່ແຂວງຕ່າງໆ.

ດັ່ງທີ່ນາງເວົ້າວ່າ:

ເພາະວ່າຫາກໍ່ໄດ້ຮັບແຈ້ງການເນາະ ແລ້ວເຮົາຍັງບໍ່ໄດ້ປະຕິບັດເທື່ອ ເພິ່ນວ່າໃຫ້ຢ້ອນຫລັງແຕ່ເດືອນມັງກອນນ່າ ໂຕນີ້ໆນ່າເພິ່ນເລີ້ມປະຕິບັດງວດ 1 ເນາະ. ເອກະສານຂອງແຕ່ລະຂະແໜງການ ເຂົາເຈົ້າຍັງບໍ່ມາຮອດ ເຂົາເຈົ້າຕ້ອງໄປໄລ່ຢ້ອນຫລັງ ນັບແຕ່ເດືອນ 1 ກ່ອນຫັ້ນນ່າ.

ໃນຂະນະດຽວກັນ ເຈົ້າໜ້າທີ່ ຜະແນກການເງິນແຂວງ ຜົ້ງສາລີ ນາງນຶ່ງກໍເວົ້າວ່າ ສໍາລັບຢູ່ແຂວງຜົ້ງສາລີນີ້ ກໍກໍາລັງມີການຄິດໄລ່ເງິນອຸດໜູນ 150,000 ກີບ ແບບຢ້ອນຫລັງຄືກັນ ໃຫ້ພະນັກງານ-ລັດຖະກອນທຸກຄົນທົ່ວແຂວງ ຊຶ່ງຈະເບີກຈ່າຍ ພ້ອມກັບເງິນເດືອນ ບໍ່ໃຫ້ກາຍວັນທີ 9 ເມສານີ້ ຕາມແຈ້ງການຂອງກະຊວງການເງິນ.

ງວດນຶ່ງເນາະຢ້ອນຫລັງງວດ 1 ເຫັນເຂົາເຈົ້າມາແລ່ນເງິນເດືອນ. ເຂົາເຈົ້າເລີ້ມຈ່າຍງວດນຶ່ງ ເດືອນ 4 ນີ້ເນາະ ໂຕງວດ 1 ຫັ້ນ ເຂົາເຈົ້າຢ້ອນຫລັງ.

ເງິນອຸດໜູນຄ່າຄອງຊີບ 150,000 ກີບຕໍ່ຄົນຕໍ່ເດືອນ ທີ່ກຽມເບີກຈ່າຍພາຍໃນເດືອນນີ້ນັ້ນ ລັດຖະກອນຜູ້ນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ ພະນັກງານ-ລັດຖະກອນ ຫລາຍຄົນເຫັນວ່າ ເປັນຈໍານວນເງິນໜ້ອຍຫລາຍ ຖ້າທຽບໃສ່ສະພາບເສດຖະກິດ ຂອງປະເທດໃນທຸກມື້ນີ້ ທີ່ສິນຄ້າ ອາຫານ ແລະເຄື່ອງຂອງອື່ນໆ ກໍຂຶ້ນລາຄາໝົດ ເຮັດໃຫ້ຄ່າຄອງຊີບ ສູງຂຶ້ນ ແຕ່ຕ້ອງໄດ້ຮັບເອົາ ແບບບໍ່ມີທາງເລືອກ ຍ້ອນດີກວ່າຈະບໍ່ໄດ້ເລີຍ.

ໂອ໋ ອິງໃສ່ຄ່າຄອງຊີບປັດຈຸບັນເນາະ  ມັນກໍບໍ່ກຸ້ມດົນປານໃດແຫລະ ທຸກຢ່າງມັນກໍຂຶ້ນລາຄາໝົດເດ້. ຄັນມາໄລ່ໃສ່ອັນນີ້ກະສິໄດ້ 3 ຄາບຊີ້ນ່າ ກະສິໄຄຂຶ້ນນີ້ແຫລະ ໄຄກວ່າບໍ່ໄດ້ວ່າຊັ້ນສາ ໄຄກວ່າບໍ່ຂຶ້ນ.

ແລະລັດຖະກອນອີກຜູ້ນຶ່ງ ກໍເວົ້າໃນທໍານອງດຽວກັນນີ້ ເຖິງເງິນອຸດໜູນຈໍານວນດັ່ງກ່າວວ່າ ໜ້ອຍຫລາຍ ຖ້າທຽບໃສ່ຄ່າຄອງຊີບໃນປັດຈຸບັນ ທີ່ລາຄາສິນຄ້າແລະອາຫານຕ່າງໆ ແພງຂຶ້ນຫລາຍ, ດີແທ້ ກໍຢາກໃຫ້ເພີ່ນປັບຂຶ້ນເງິນອຸດໜູນນັ້ນ ໃຫ້ຫຼາຍກວ່າ 150,000 ກີບຕໍ່ເດືອນ ເພື່ອໃຫ້ພະນັກງານ-ລັດຖະກອນ ໂດຍສະເພາະຊັ້ນຜູ້ນ້ອຍ ພໍໄດ້ມີຢູ່ມີກິນ ກວ່າເກົ່າ.

ບໍ່ບໍ່ຫລາຍແຫລະ ດີແທ້ກະຂຶ້ນກວ່ານັ້ນແຫລະ ສົມກັບຄ່າຄອງຊີບປັດຈຸບັນ. ສົມມຸດວ່າເຮົາຊື້ຂອງກິນເນາະ ຊື້ອາ ຫານການກິນນີ້ໄດ້ຊີ້ນໂລນຶ່ງ. ຊີ້ນຄວາຍລະແມ່ນໂລນຶ່ງ ຊີ້ນງົວຊີ້ນຄວາຍໂລນຶ່ງ ໃນເມື່ອກ່ອນກະເທົ່າກັບ 15,000 ກີບ.

ແຕ່ເຖິງຢ່າງໃດກໍຕາມ ກໍຍັງມີພະນັກງານ-ລັດຖະກອນ ຈໍານວນນຶ່ງ ຮູ້ສຶກພໍໃຈກັບເງິນອຸດໜູນ ທີ່ວ່ານັ້ນ ແລະເຫັນວ່າເງິນຈໍານວນດັ່ງກ່າວ ສາມາດນໍາໄປຊື້ອາຫານການກິນ ໄດ້ຫລາຍຄາບຢູ່ ຖ້າໃຊ້ຈ່າຍແບບປະຢັດ ແລະເໝາະສົມກັບພະນັກງານ-ລັດຖະກອນ ທີ່ຢູ່ຕາມເມືອງນ້ອຍ ຫລືເຂດຫ່າງໄກ.

ດັ່ງລັດຖະກອນນາງນຶ່ງເວົ້າວ່າ:

ຄັນຢູ່ນະຄອນຫລວງແທ້ ຢູ່ເມືອງໃຫຍ່ແທ້ ກະຄືສິແພງເນາະອາຫານນ່າ ຄືຢູ່ທ້ອງຖິ່ນ ແຂວງ ດຽວນີ້ກະ 50,000 ມີ 2 ຄາບກະໄດ້ ອາຫານມັນຂຶ້ນກັບຜູ້ມັກ ຜູ້ກິນອັນນ້ອຍໄດ້ ມັນຈະປະຢັດແນວໃດ ເບິ່ງເລື້ອງລາຍຮັບເຮົາຫັ້ນນ່າ ປະຢັດໄດ້ເຮົາກະມີເງິນເຫລືອ.

ລັດຖະບານລາວ ໄດ້ອອກແຈ້ງການ ໃນມື້ວັນທີ 2 ຕຸລາ 2023 ເພີ້ມເງິນອຸດໜູນຄ່າຄອງຊີບ ໃຫ້ພະນັກງານ-ລັດຖະກອນ ທີ່ໄດ້ເງິນເດືອນຕໍ່າກວ່າ 1,700,000 ກີບ ນັບແຕ່ງວດ 4 ປີ 2023 ເປັນຕົ້ນໄປ. ແລະການເພີ້ມເງິນອຸດໜູນດັ່ງກ່າວນີ້ ໃຫ້ຍົກເວັ້ນອາກອນລາຍໄດ້ ແລະການຫັກເງິນສົມທົບ ເຂົ້າອົງການປະກັນສັງຄົມ ໂດຍໄດ້ກໍານົດເປົ້າໝາຍ, ຂັ້ນຕອນ ແລະວິທີການຄິດໄລ່ ເພື່ອໃຫ້ຫົວໜ່ວຍງົບປະມານທຸກຂັ້ນ ຈັດຕັ້ງປະຕິບັດ ແລະມີຄວາມເປັນເອກະພາບກັນ ໃນທົ່ວປະເທດ,​ ອີງຕາມແຈ້ງການ ຂອງກະຊວງການເງິນ ວັນທີ 2 ຕຸລາ 2023.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.